ФАРМОНИ ПРЕЗИДЕНТИ ҶУМҲУРИИ ТОҶИКИСТОН

Дар бораи такмили минбаъдаи сохтори мақомоти марказии ҳокимияти иҷроияи Ҷумҳурии Тоҷикистон

Бо мақсади такмили минбаъдаи сохтори мақомоти марказии ҳокимияти иҷроияи Ҷумҳурии Тоҷикистон ва мутобиқи моддаи 69 Конститутсияи (Сарқонуни) Ҷумҳурии Тоҷикистон фармон медиҳам:

1. Вазорати кишоварзӣ ва ҳифзи табиати Ҷумҳурии Тоҷикистон Вазорати кишоварзии Ҷумҳурии Тоҷикистон номгузорӣ карда шавад.

2. Ҳукумати Ҷумҳурии Тоҷикистон бо тартиби муқараргардида:

- Кумитаи ҳифзи муҳити зисти назди Ҳукумати Ҷумҳурии Тоҷикистонро таъсис дода ба зиммаи он вазифаҳои ҳифзи муҳити зист, обуҳавошиносӣ, ҳифзи ҷангал ва масъалаҳои марбут ба ҳудудҳои табиии махсус муҳофизатшавандаро вогузор намояд;

- дар муддати як моҳ санадҳои меъёрии ҳуқуқии худро ба Фармони мазкур мутобиқ намояд;

- дар мӯҳлати се моҳ доир ба масъалаи ворид намудани тағйиру иловаҳо ба санадҳои қонунгузории Ҷумҳурии Тоҷикистон таклиф пешниҳод намояд;

- масъалаҳоеро, ки аз Фармони мазкур бармеоянд, аз ҷумла масъалаҳои ташкилию молиявӣ ва моддии мақомоти давлатиро ҳаллу фасл намояд.

3. Ба Фармони Президенти Ҷумҳурии Тоҷикистон аз 30 ноябри соли 2006 № 9 "Дар бораи такмили сохтори мақомоти марказии ҳокимияти иҷроияи Ҷумҳурии Тоҷикистон" тағйиру иловаҳои зерин ворид карда шаванд:

Сархати якуми банди 3 Фармон хориҷ карда шавад;

Дар сохтори мақомоти марказии ҳокимияти иҷроияи Ҷумҳурии Тоҷикистон:

- дар банди 3 калимаҳои "Вазорати кишоварзӣ ва ҳифзи табиати Ҷумҳурии Тоҷикистон" ба калимаҳои "Вазорати кишоварзии Ҷумҳурии Тоҷикистон" иваз карда шаванд;

- дар банди 5 баъд аз калимаҳои "Кумитаи ҳолатҳои фавқулодда ва мудофиаи граждании Ҷумҳурии Тоҷикистон" калимаҳои Кумитаи ҳифзи муҳити зисти назди Ҳукумати Ҷумҳурии Тоҷикистон илова карда шаванд.