ФАРМОНИ ПРЕЗИДЕНТИ ҶУМҲУРИИ ТОҶИКИСТОН

Дар бораи нашри "Энсиклопедияи миллии тоҷик"

Бо дарназардошти аҳамияти давлатии нашри "Энсиклопедияи миллии тоҷик" ва бо мақсади таъмини чопи саривақтии он фармон медиҳам:

1. Таҳти раёсати президенти Академияи илмҳои Ҷумҳурии Тоҷикистон Шӯрои илмию таҳрирӣ оид ба нашри "Энсиклопедияи миллии тоҷик" (минбаъд Шӯрои илмию таҳрирӣ) таъсис дода шавад.

2. Роҳбарии илмию методӣ ва ташкилӣ оид ба чопи "Энсиклопедияи миллии тоҷик" ба зиммаи Шӯрои илмию таҳрирӣ вогузор карда шавад.

3. Раиси Шӯрои илмию таҳрирӣ дар мӯҳлати як моҳ лоиҳаи Низомномаи Шӯрои илмию таҳрирӣ ва ҳайати онро таҳия ва барои тасдиқ ба Ҳукумати Ҷумҳурии Тоҷикистон пешниҳод намояд.

4. Вазорату идораҳо, мақомоти иҷроияи ҳокимияти давлатии Вилояти Мухтори Кӯҳистони Бадахшон, вилоятҳо, шаҳри Душанбе, шаҳру ноҳияҳои тобеи ҷумҳурӣ, академияи илмҳои соҳавӣ ва дигар ташкилотҳои илмӣ дар ҷараёни ба чоп омода намудани "Энсиклопедияи миллии тоҷик" ширкат варзанд.

5. Вазорати молияи Ҷумҳурии Тоҷикистон ҳамасола барои чопи "Энсиклопедияи миллии тоҷик" дар буҷети давлатӣ маблағҳои заруриро пешбинӣ намояд.

6. Мутобиқи ҳамин Фармон ба санадҳои меъёрии ҳуқуқӣ тағйиру иловаҳои зарурӣ ворид намуда, барои тасдиқ ба Ҳукумати Ҷумҳурии Тоҷикистон пешниҳод карда шавад.