Ҳукумати Ҷумҳурии Тоҷикистон

ҚАРОР

Дар бораи тасдиқ намудани Оинномаи Корхонаи махсуси (қазонии) давлатии ҷумҳуриявии "Тиллои Тоҷик"

Мутобиқи моддаи 127 Кодекси граждании Ҷумҳурии Тоҷикистон Ҳукумати Ҷумҳурии Тоҷикистон қарор мекунад:

1. Оинномаи Корхонаи махсуси (қазонии) давлатии ҷумҳуриявии "Тиллои Тоҷик" тасдиқ карда шавад.

2. Кумитаи давлатии сармоягузорӣ ва идораи амволи давлатии Ҷумҳурии Тоҷикистон ба реестри амволи давлатӣ тағйироти дахлдор ворид намояд.

3. Кумитаи давлатии амнияти миллии Ҷумҳурии Тоҷикистон дар якҷоягӣ бо Вазорати молияи Ҷумҳурии Тоҷикистон дар сохтори Хазинаи сарватҳои давлатии назди Вазорати молияи Ҷумҳурии Тоҷикистон хадамоти махсуси таъмини бехатарӣ ва ҳифзи Фонди давлатии металлҳои қиматбаҳо ва сангҳои қиматбаҳои Ҷумҳурии Тоҷикистон ва Корхонаи махсуси (қазонии) давлатии ҷумҳуриявии "Тиллои Тоҷик"-ро таъсис диҳанд.

4. Банди 7 қарори Ҳукумати Ҷумҳурии Тоҷикистон аз 1 октябри соли 2007 № 508 "Дар бораи барҳам додани Корхонаи муштараки Тоҷикистон ва Британия "Дарвоз" ва таъсис додани Корхонаи махсуси (қазонии) давлатии ҷумҳуриявии "Тиллои Тоҷик" хориҷ карда шавад.