ҲУКУМАТИ ҶУМҲУРИИ ТОҶИКИСТОН

ҚАРОР

Дар бораи ба "Бунгоҳҳои тиббӣ" табдил додани нуқтаҳои фелдшерию акушерӣ

Вобаста ба ислоҳоти соҳаи тандурустӣ ва тайёр намудани мутахассисони соҳаи тиб, бо мақсади инкишоф ва дастрас будани ёрии аввалияи сифатноки тиббиву санитарӣ ба сокинони деҳот, Ҳукумати Ҷумҳурии Тоҷикистон қарор мекунад:

1. Нуқтаҳои фелдшерию акушерӣ ба "Бунгоҳи тиббӣ" табдил дода шаванд.

2. Вазорати тандурустии Ҷумҳурии Тоҷикистон:

Оинномаи "Бунгоҳи тиббӣ" ва табели таҷҳизи онро тасдиқ намояд;

бо дарназардошти теъдоди аҳолии деҳот, ки ба хизматрасонии онҳо фаро гирифта мешаванд, мушаххасоти ҷуғгрофӣ ва дигар хусусиятҳои маҳаллӣ меъёрҳои штатии "Бунгоҳи тиббӣ"-ро, ки имкони тавсияи дастраси ва беҳбудии сифати ёрии профилактикӣ ва аввалияи тиббиро ба аҳолии деҳот фароҳам оварда тавонанд бо Вазорати молияи Ҷумҳурии Тоҷикистон, Вазорати иқтисод ва робитаҳои иқтисодии хориҷии Ҷумҳурии Тоҷикистон ва Вазорати меҳнат ва шуғли аҳолии Ҷумҳурии Тоҷикистон мувифиқа ва тасдиқ намояд;

мутобиқи ҳамин қарор ба номенклатураи муассисаҳои тиббӣ тағъирот ворид намояд.

3. Вазорати молияи Ҷумҳурии Тоҷикистон мутобиқи ҳамин қарор дар таснифи фасли тандурустии буҷет (аломати "203") тағъирот ворид намояд.

4. Ҳукуматҳои ВМКБ, вилоятҳо, шаҳру ноҳияҳо барои беҳбудии маблағгузорӣ, инкишофи соҳа, пурзӯр намудани баҳои моддию техникӣ, тибқи табель, ҷиҳозонии "Бунгоҳҳои тиббӣ" дар деҳот чораҳо андешида, дастрасӣ ва беҳбудии сифати ёрии профилактикӣ ва аввалияи тиббиро ба аҳолии деҳот ҳамчун самти афзалиятноки соҳаи тандурустӣ баррасӣ намоянд.