Ҳукумати Ҷумҳурии Тоҷикистон

ҚАРОР

Оид ба тасдиқи Қоидаҳои маблағгузории меъёрии (сарикасии) муассисаҳои таҳсилоти умумӣ

Бо мақсади такмили механизми маблағгузории меъёрии (сарикасии) муассисаҳои таҳсилоти умумӣ, истифодабарии самараноки маблағҳои буҷетӣ Ҳукумати Ҷумҳурии Тоҷикистон қарор мекунад:

1. Қоидаҳои замимашудаи маблағгузории меъёрии (сарикасии) муассисаҳои таҳсилоти умумӣ тасдиқ карда шаванд.

2. Вазорати молияи Ҷумҳурии Тоҷикистон ва мақомоти иҷроияи маҳаллии хокимияти давлатӣ маблағгузории муассисаҳои таҳсилоти умумиро тибқи меъёрҳои минималӣ ва коэффитсиентҳои махсуси маблағгузории меъёрии (сарикасии) муассисаҳои таҳсилоти умумӣ (замимаи 1) ва ҷадвали гузариш ба маблағгузории меъёрии (сарикасии) муассисаҳои таҳсилоти умумии Ҷумҳурии Тоҷикистон барои солҳои 2008-2010 (замимаи 2) амалӣ намоянд.

3. Назорати иҷрои қарори мазкур ба зиммаи Вазорати маориф ва илми Ҷумҳурии Тоҷикистон гузошта шавад (қарори Ҳукумати ҶТ аз 10.02.2016 № 66).