Бо қарори Ҳукумати

Ҷумҳурии Тоҷикистон

аз 14 апрели соли 2007 № 199

тасдиқ шудааст

Қоида дар бораи воситаҳои махсуси ташкилотҳои давлатии тандурустии ноҳияҳои таҷрибавии Ҷумҳурии Тоҷикистон оид ба кӯмаки тиббию санитарӣ барои соли 2007

1. Муқаррароти умумӣ

1.1. Маблағҳое, ки ташкилотҳои давлатии тандурустӣ барои хизматрасониҳои дорои хусусияти ғайримуолиҷавӣ ва намудҳои алоҳидаи хизматрасонии тиббӣ мутобиқи хоҳиши шаҳрвандон ба даст овардаанд, ба суратҳисоби махсуси муассисаҳои тиббии давлатӣ гузаронида мешаванд.

1.2. Воситаҳои махсус манбаъҳои иловагии маблағгузории ташкилотҳои давлатии тандурустӣ ба ҳисоб мераванд.

1.3. Қоидаи мазкур дар ноҳияҳои таҷрибавии Рашт ва шаҳри Турсунзодаи тобеи ҷумҳурӣ, ноҳияи Данғараи вилояти Хатлон ноҳияи Спитамени вилояти Суғд амалӣ карда мешавад.

2. Ташаккули воситаҳои махсус

2.1. Воситаҳои махсуси ташкилотҳои давлатии тандурустӣ аз ҳисоби хизматрасониҳои зерин, ки мутобиқи Нархномаи ягона барои хизматрасониҳои тиббӣ, аз ҷониби шахсони ҳуқуқӣ ва воқеӣ пардохта мешавад ва тибқи тартиби муқарраргардида тасдиқ гардидааст, ташаккул меёбад:

- шаҳодатдиҳии тиббии вазъи саломатии шаҳрвандон ҳангоми қабул ба кор, гирифтани шаҳодатномаи ронандагӣ;

- ба шаҳрвандони давлатҳои аъзои Иттиҳоди Давлатҳои Мустақил, ба истиснои шаҳрвандоне, ки дар ҳудуди Ҷумҳурии Тоҷикистон ба таври доимӣ истиқомат мекунанд, инчунин мутобиқи шартномаҳо ва созишномаҳои байналмилалӣ барои истиқомат иҷозат доранд, хизматрасонии тиббӣ вобаста ба хароҷоти воқеӣ анҷом дода мешавад;

- ба шаҳрвандони хориҷӣ;