Бо қарори Ҳукумати ҶТ аз 3.03.2014 № 151 аз эътибор соқит дониста шуд.

Ҳукумати Ҷумҳурии Трҷикистон

ҚАРОР

Дар бораи Агентии давлатии суғуртаи иҷтимоӣ ва нафақа

Мутобиқи моддаи 12 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон" ва ҷиҳати иҷрои Фармони Президенти Ҷумҳурии Тоҷикистон аз 30 ноябри соли 2006 № 9 "Дар бораи такмили сохтори мақомоти марказии ҳокимияти иҷроияи Ҷумҳурии Тоҷикистон", Ҳукумати Ҷумҳурии Тоҷикистон қарор мекунад:

1. Низомнома, сохтори Дастгоҳи марказӣ ва нақшаи идоракунии Агентии давлатии суғуртаи иҷтимоӣ ва нафақа тасдиқ карда шаванд (замимаҳои 1,2,3).

2. Шумораи кормандони Агентии давлатии суғуртаи иҷтимоӣ ва нафака ба миқдори 812 воҳид (бе ҳайати хизматрасон), аз ҷумла шумораи кормандони Дастгоҳи марказӣ ба миқдори 69 воҳид муқаррар карда шавад (қарори Ҳукумати ҶТ аз 31.12.2008 № 665, аз 1.03.2012 № 62).

3. Ба Агентии давлатии суғуртаи иҷтимоӣ ва нафақа иҷозат дода шавад, ки ду муовини Директор дошта бошад.

4. Барои Дастгоҳи марказии Агентии давлатии суғуртаи иҷтимоӣ ва нафақа лимити автомашинаҳои сабукрави хизматӣ ба миқдори 4 адад муқаррар карда шавад.

5. Маблағгузории Дастгоҳи марказӣ ва мақомоти дар нақшаи идоракунии Агентии давлатии суғуртаи иҷтимоӣ ва нафақа нишондодашуда аз ҳисоби маблағҳои Буҷети давлатӣ анҷом дода шавад.

6. Ҳуқуқи идоракунии оперативии амволи собиқ Фонди ҳифзи иҷтимоии аҳолии назди Ҳукумати Ҷумҳурии Тоҷикистон ва маблағҳои суғуртаи давлатии иҷтимоӣ ба Агентии давлатии суғуртаи иҷтимоӣ ва нафақа вобаста карда шавад.

7. Вазорати меҳнат ва ҳифзи иҷтимоии аҳолии Ҷумҳурии Тоҷикистон дар мӯҳлати як моҳ:

- якҷоя бо Вазорати молияи Ҷумҳурии Тоҷикистон ва Кумитаи андози назди Ҳукумати Ҷумҳурии Тоҷикистон дастурамали гузаронидани маблағҳо ба суратҳисобҳои Агентии давлатии суғуртаи иҷтимоӣ ва нафақа, баҳисобгирии онҳоро таҳия ва тасдиқ намуда, тибқи тартиби муқарраргардида ба қайди давлатӣ гирад;

- вобаста ба қабули ҳамин қарор лоиҳаҳои санадҳои меъёрии ҳуқуқии дахлдорро, ки муносибатҳоро бо пардохткунандагони андозҳои иҷтимоӣ тан танзим мекунанд, таҳия намояд.