Ҳукумати Ҷумҳурии Тоҷикистон

ҚАРОР

Дар бораи таъсиси Муассисаи давлатии "Телевизиони кӯдакону наврасон - Баҳористон"

Мутобиқи моддаҳои 52 ва 132 Кодекси граждании Ҷумҳурии Тоҷикистон ва бо мақсади дар рӯҳияи инсондӯстиву ватанпарастӣ тарбия кардани кӯдакону наврасон, шиносоӣ бо арзишҳои волои милливу умумибашарӣ ва қонеъ гардонидани талаботи бадеию эстетикии онҳо Ҳукумати Ҷумҳурии Тоҷикистон қарор мекунад:

1. Муассисаи давлатии "Телевизиони кӯдакону наарасонБаҳористон" таъсис дода шавад.

2. Оиннома ва сохтори Муассисаи давлатии "Телевизиони кӯдакону наврасон - Баҳористон" тасдиқ карда шавад (замима мегарданд).

3. Теъдоди штатии Муассисаи давлатии "Телевизиони кӯдакону наврасон - Баҳористон" (35 воҳид, аз ҷумла 40 воҳид аз ҳисоби шумораи умумии Кумитаи телевизион ва радиои назди Ҳукумати Ҷумҳурии Тоҷикистон, 60 воҳид аз ҳиосби буҷети ҷумҳуриявӣ ва 35 воҳид аз ҳисоби маблағҳои ғайрибуҷетӣ муқаррар карда шавад.

4. Кумитаи телевизион ва радиои назди Хукумати Ҷумҳурии Тоҷикистон дар мӯҳлати як моҳ тибқи тартиби муқарраргардида Муассисаи давлатии "Телевизиони кӯдакону наврасон - Баҳористон"-ро бо бино, таҷҳизоти техникӣ, нақлиёт ва дигар амволи зарурӣ таьмин намояд.

5. Маблағгузории ташкил ва фаъолияти Муассисаи давлатии "Телевизиони кӯдакону наврасон - Баҳористон" дар соли 2006 аз ҳисоби маблағҳое, ки дар буҷети ҷумҳуриявии соли 2006 барои Кумитаи телевизион ва радиои назди Ҳукумати Ҷумҳурии Тоҷикистон пешбинӣ шудаанд, инчунин аз ҳисоби маблағҳои худии ғайрибуҷетии Кумитаи телевизион ва радиои назди Ҳукумати Ҷумҳурии Тоҷикистон таъмин карда шавад.

6. Вазорати молияи Ҷумҳурии Тоҷикистон якҷоя бо Вазорати алоқаи Ҷумҳурии Тоҷикистон, Кумитаи телевизион ва радиои Ҷумҳурии Тоҷикистон фонди музди меҳнат ва хароҷоти марбут ба фаъолияти Муассисаи давлатии "Телевизиони кӯдакону наврасон - Баҳористон"-ро тибқи банди 3 муайян ва аз 1 январи соли 2007 таъмин намояд

7. Вазорати иқтисод ва савдои Ҷумҳурии Тоҷикистон барои соли 2007 ва солҳои минбаъда дар нишондиҳандаҳои дурнамои рушди иқтисодию иҷтимоии ҷумҳурӣ зиёд намудани ҳаҷми барномаҳо, таҳкими заминаи моддию техникӣ ва васеъгардонии фарогирии Муассисаи давлатии "Телевизиони кӯдакону наврасон - Баҳористон"-ро ба нақша гирифта, барои ин мақсад маблағ пешбинӣ намояд.

8. Вазорати алоқаи Ҷумҳурии Тоҷикистон пахши барномаҳои Муассисаи давлатии "Телевизиони кӯдакону наврасон - Баҳористон"-ро сари вақт таъмин намуда, дар асоси истифодаи технологияи замонавӣ барои минбаъд пурраву васеъ гардидани доираи фарогирии он чораҳои зарурӣ андешад.