Низомномаи Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон

1. Муқаррароти умумӣ

1. Агентии стандартизатсия, метрология, сертификатсия ва нозироти савдои назди Ҳукумати Ҷумҳурип Тоҷикистон (минбаъд Агентӣ) мақоми марказии ҳокимияти иҷроия буда, сиёсати давлатиро дар соҳаи стандартизатсия, метрология, сертификатсия, аккредитатсия, таъмин намудани назорати давлатӣ оид ба ҷорӣ ва риоя намудани талаботи стандартҳо ва дастурҳои техникии сифати ашёи хом, маҳсулот, таъмини ченаки ягона ва қоидаҳои савдо дар корхонаҳо, ташкилотҳо, дар соҳаи савдо, хоҷагии қишлоқ ва дигар ташкилотҳои Ҷумҳурии Тоҷикистон, новобаста аз шакли ташкилӣ - ҳуқуқӣ ва шакли моликият, амалӣ месозад.

2. Роҳбарӣ ба фаъолияти Агентӣ аз ҷониби Ҳукумати Ҷумхурии Тоҷикистон сурат мегирад.

3. Агентӣ фаъолияти худро дар асоси Конститутсия (Сарқонуни) Ҷумхурии Тоҷикистон, қарорҳои Маҷлиси миллӣ ва Маҷлиси намояндагони Маҷлиси Олии Ҷумхурии Тоҷикистон, Фармонҳои Президенти Ҷумхурии Тоҷикистон, қарорҳои Ҳукумати Ҷумхурии Тоҷикистон, санадаҳои ҳуқуқии байналилалие, ки Ҷумхурии Тоҷикистон эътироф намудааст ва Низомномаи мазкур ба роҳ мемонад.

4. Агентӣ мақоми миллӣ оид ба стандартизатсия, метрология, сертификатсия, аккредитатсия ва нозиро савдо буда, фаъолияти худро дар хамкорӣ бо дигар мақомоти марказии ҳокимияти иҷроия, мақомоти иҷроиси маҳаллии хокимияти давлатӣ, ташкилотҳои ҷамъиятӣ ва дигар ташкилотҳо амалӣ месозад.

II. Ваколатҳо

5. Дар соҳаҳои муқаррарнамудаи фаъолият Агентӣ дорои ваколатҳои зерин мебошад:

- амалӣ сохтани сиёсати давлатӣ дар соҳаи стандартизатсия, метрология, сертификатсия ва аккредитатсия дар Ҷумхурии Тоҷикистон;

- таҳия ва такмили низоми стандартизатсия, метрология, сертификатсия, аккредитатсия ва қоидаҳои савдо, мутобиқгардонии онҳо бо меъёрҳои байналхалқӣ;

- таҳияи пешниҳодот оид ба такмили низоми миллии сертификатсияи Ҷумҳурии Тоҷикистон;

- таҳияи пешниҳодот оид ба сиёсати сертификатсияи маҳсулот вобаста ба воридот ва содироти он;

- ташкил ва гузаронидани корҳо оид ба сертификатсия ва шаҳодатномадиҳии хизматрасонӣ;

- амалисозии назорати давлатӣ ва нозироти сифати маҳсулоти аз пахта ва пилла истеҳсолшаванда ва фурӯхташаванда ва гузаронидани санҷишҳои сертификатсионии ашёи хом ва маҳсулоти аз пилла ва пахта истеҳсолкардашуда;

- ташкил ва гузаронидани корҳо оид ба сертификатсияи маҳсулот;

- дастрас гардонидани стандартҳои байналхалқӣ, қоидаҳо ва тавсияҳо оид ба стандартизатсия, метрология, сертификатсия ва сифат;

- амалӣ сохтани назорати давлатӣ оид ба иҷрои талаботи стандартҳо, дастурҳои техникӣ, таъмини ченаки ягона ва назорат оиди иҷрои қоидаҳои сертификатсияи ҳатмӣ дар Ҷумҳурии Тоҷикистон бо мақсади таъмин намудани бехатарии ҳаёт, саломатӣ ва амволи шаҳрвандон, ҳифзи муҳити зист, қоидаҳои савдо, қобилияти ҳамдигарро ивазкунӣ ва рақобатнокии маҳсулот, ягонагии усулҳои назорат ва тамгазанӣ, ҳимояи ҳуқуқи истеъмолкунандагон ва манфиатҳои давлатӣ;

- ташкили корҳо оид ба ҳамкории байнидавлатии Ҷумҳурии Тоҷикистон дар соҳаи стандартизатсия, метрология, сертификатсия ва аккредитатсия;

- ташкил ва гузаронидами корҳо оид ба сертификатсияи ҳатмӣ, муқаррар намудани шаклҳои сертификатсияи ҳатмӣ бо дарназардошти таҷрибаи мавҷудаи байналхалқӣ;

- бо тартиби муқарраршуда гузаронидани қайди давлатии низоми сертификатсия;

- гузаронидани корҳо оид ба аккредитатсияи озмоишгоҳҳои (марказҳои) санҷишӣ ва мақомот оид ба сертификатсияи маҳсулот, ва иттиҳодияҳо ва ташкилотҳо новобаста аз шакли моликият барои иштирок дар гузаронидани корҳо оид ба сертификатсияи ҳатмӣ, инчунин аккредитатсияи лабораторияҳои метрологии корхонаҳо ва ташкилотҳо оид ба санҷиши воситаҳои ченак ва додани иҷозат ба онҳо барои гузаронидани корҳо мутобиқ ба соҳаи аккредитатсия;

- ҳамоҳангсозии байниминтақавӣ ва байнисоҳавии фаъолият оид ба таъмини ченаки ягона, муқаррар намудани қоидаҳои ташкил, тасдиқ, нигоҳдорӣ ва татбиқи эталонҳои воҳидҳои бузургӣ;

- амалӣ сохтани ҳамоҳангсозии фаъолияти мақомоти идораи давлатӣ, ки назоратро оид ба бехатарии маҳсулот (корҳо, хизматрасонӣ) инчунин ташкил ва гузаронидани корҳо оид ба тасдиқи ҳатмии мувофиқати молҳо ба талаботи муқарраршуда;

- амалӣ сохтани назорати давлатӣ оид ба риояи қонунгузорӣ дар бораи ҳимояи ҳуқуқи истеъмолкунандагон;

- амалӣ сохтани назорати давлатии метрологӣ;

- гузаронидани назорати давлатии метрологӣ дар соҳаи тасдиқи воситаҳои ченак;

- ташаккул амалисозии сиёсати давлатӣ дар соҳаи гузаронидани сертификатсия дар қаламрави Ҷумҳурии Тоҷикистон ва пешниҳоди иттилооти расмӣ дар ин бора;

- иштирок дар якҷоягӣ бо дигар мақомоти иҷроияи ҳокимияти давлатӣ дар такмили тартиби тасдиқи мувофиқати молҳои истеъмолӣ ва хизматрасониҳо ба талаботи муқарраргашта;

- дар доираи ваколати худ қабул намудани қарорҳое, иҷрояшон барои ҳамин мақомотҳои давлатӣ, идораҳо ва корхонаҳо, новобаста аз тобеияти идоравӣ ва шакли моликият ҳатмӣ мебошад;

- гузаронидани экспертизаҳо ва тасдиқи стандартҳои миллӣ, паҳн намудани стандартҳои байналхалқӣ ва байнидавлатӣ, қоидахо ва тавсияҳо оид ба стандартизатсия, метрология, сертификатсия ва аккредитатсия;

- дар мувофиқа бо талаботи стандартҳои давлатӣ қабул намудани қарорҳои оид ба бекор, таҷдиди назар кардан ва ё маҳдуд намудани мӯҳлати амали санадҳои меъёрӣ - техникие, ки баландбардории сатҳи техникӣ ва сифати маҳсулотро таъмин менамоянд;

- амалӣ сохтани чорабиниҳои таъсиррасонандаи ҳуқуқӣ ва иқтисодӣ аз рӯи натиҷаҳои назорати давлатӣ ва нозирот, қоидаҳои савдо нисбати ҳамаи субъектҳои хоҷагидорӣ, новобаста аз тобеияти идоравӣ ва шаклҳои моликият мутобиқи қонунҳо ва дигар санадҳои меъёрии ҳуқуқии Ҷумҳурии Тоҷикистон;

- бо тартиби муқаррарнамуда ширкат варзидан дар таҳияи лоиҳаҳои санадҳои қонунгузорӣ ва даигар санадҳои меъёрӣ оид ба стандартизатсия, таъмини ченаки ягона, сертификатсия, аккредитатсия ва савдо;

- иштирок дар таҳия ва амалисозии барномаҳои давлатии рушди пахтакорӣ ва кирмакпарварӣ дар ҷумҳурӣ;

- созмон додани марказҳои ташхиси минтақавӣ оид ба ташхису сертификатсияи маҳсулоти хӯрокворӣ, кишоварзӣ ва дигар намудҳои маҳсулот дар шаҳру ноҳияҳои Ҷумҳурии Тоҷикистон;

- қабул намудани қарорҳо оид ба тасдиқи намудҳои воситаҳои ченак ва дохил намудани онҳо ба реестри давлатӣ;

- додани шаҳодатнома оид ба омодагии корхона ба истеҳсоли маҳсулоти дахлдор;

- додани сертификат ё аломатҳои мувофиқат;

- созмон додани низоми сертификатсияи маҳсулоти якхела ва муқаррар намудани қоидаҳои барасмиятдарорӣ ва идоракунӣ барои гузвронидани сертификатсия дар ин низомҳо (соҳаҳо);

- ба роҳ мондани назорати миқдори маҳсулоте, ки ҳангоми гузаронидани амалиёти савдо мусодира мешаванд, миқдори молҳои дар борбандиҳои гуногун пешакӣ баркашида ва савдои он;

- амалӣ намудани интихоби тарзи тасдиқи мувофиқати маҳсулот ба талаботи ҳуҷҷатҳои меъёрӣ (шакл, сертификатсия);

- аккредитатсияи мақомот оид ба сертификатсия ва лабораторияҳои (марказҳои) озмоишӣ ва додани иҷозат барои гузаронидани муайяни корҳо;

- муқаррар намудани тартиби ва додани иҷозат барои гузаронидани корҳои сертификатсионӣ;

- ҳамоҳангсозии фаъолияти мақомоти идораи давлатӣ, муассисаҳо ва дигар ташкилотҳо дар соҳаи стандартизатсия, метрология, сертификатсия ва аккредитатсия;

- ташкили таъмини мақомоти идораи давлатӣ, корхонаҳо, муассисаҳо ва дигар ташкилотҳо бо иттилооти илмӣ техникӣ, инчунин расонидани хизмат (дар асоси шартнома) дар соҳаи стандартизатсия, метрология, сертификатсия, аккредитатсия, савдо ва сифати маҳсулот, ташкил ва гузаронидани ҷамъомадҳо, семинарҳо, конференсияҳо вобаста ба ин самтҳои фаъолият;

- нашри иттилооти расмӣ дар бораи низоми дар Ҷумҳурии Тоҷикистон амалкунандаи сертификатсия ва аломатҳои мувофиқат ва бо тартиби муқарраршуда пешниҳод намудани онҳо ба ташкилотҳои байналхалқӣ (минтақавӣ) оид ба сертификатсия;

- муайян намудани тартиби сертификатсия ва гузаронидани қайди давлатии низоми сертификатсияи лабораторияҳои (марказҳои) озмоишӣ ва амалӣ сохтани назорат оид ба дуруст гузаронидани сертификатсияи молҳо (кор хизматрасонӣ);

- бо тартиби муқарраршуда пешниҳод намудани таклифҳо оид ба ҳамроҳшавии Ҷумҳурии Тоҷикистон ба низоми байналхалқии сертификатсия;

- намояндагии Ҷумҳурии Тоҷикистон дар ташкилотҳои байналхалқӣ оид ба масъалаҳои стандартизатсия, метрология, сертификатсия, аккредитатсия ва нозироти савдо;

- пешниҳоди иттилоот ба ташкилотҳои байналхалқӣ (минтақавӣ) оид ба сертификатсия дар бораи низоми дар кишвар амалкунандаи сертификатсия ва мақомот оид ба сертификатсия;

- амали сохтани назорати давлатӣ ва муқаррар намудани тартиби назорати нозирӣ (инспексионӣ) оид ба риояи қоидаҳои сертификатсия ва маҳсулоти сертификатсияшуда;

- муқаррар намудани тартиби ҳамкории мақомот оид ба сертификатсия ва воҳидҳои санҷишӣ бо мақомоти идораи давлатӣ ва мақомоти маҳаллии иҷроияи ҳокимияти давлатӣ оид ба масъалаҳои сифат ва бехатарии маҳсулот;

- муқаррар намудани шакли сертификатсияи ҳатмии маҳсулот бо дарназардошти таҷрибаи байналхалқӣ ва хориҷӣ;

- муқаррар намудани тартиби эътирофи сертификатҳои хориҷӣ, аломатҳои мувофиқат ва натиҷаҳои санҷишҳо;

- амалӣ сохтани бақайдгирии давлатии стандартҳои миллӣ ва шартҳои техникии Ҷумҳурии Тоҷикистон;

- ташаккул додани хазинаи ҳуҷҷатҳои меьёрӣ - техникӣ ва амалӣ сохтани нигоҳдории давлатии стандартҳои байналхалқӣ, байнидавлатӣ, стандартҳои миллӣ, дастурҳои техникӣ ва шартҳои техникие, ки аз қайди давлатӣ гуштаанд ва расман нашр гардидаанд;

- амалӣ сохтани идоракунии давлатӣ оид ба таъмини ченаки ягона;

- таъмин ва гузаронидани мониторинги сифат ва бехатарии маҳсулоти хӯрокворӣ дар асоси низомномае, ки аз тарафи Ҳукумати Ҷумҳурии Тоҷикистон тасдиқ шудааст;

- иштироки ҳатмӣ дар кори комиссияи байниидоравие, ки назоратро оид ба бехатарии маҳсулот, инчунин партов ё ин ки несту нобуд кардани маҳсулоти зараровар амалӣ менамояд;

- бо тартиби муқарраршуда таъсис додани экспертизаи судӣ дар соҳаи стандартизатсия, метрология, сертификатсия ва савдо;

- пешниҳоди таклифҳо оид ба тағйир додани Номгӯи молҳо (кор, хизматрасонӣ), ки бояд аз сертификатсияи ҳатмӣ гузаранд, барои тасдиқи минбаъдаи он аз ҷониби Ҳукумати Ҷумҳурии Тоҷикистон;

- пешниҳод намудани ҳисобот дар бораи ичрои корҳо ба Ҳукумати Ҷумҳурии Тоҷикистон дар ҳар семоҳа;

- бурдани (тартиб додани) реестри иштирокчиён ва объектҳои сертификатсия;

- дар доираи ваколати худ таъин намудани ҳифзи маълумоте, ки сирри давлатӣ дорад;

- гузаронидани таҳлили ҳарсолаи фаъолияти Агентӣ ва мақомоти марбутаи он;

- ташкил намудани тайёрии касбии кормандони Агентӣ ва субъектҳои фаъолияти хоҷагидории ҷумхурӣ, бозомӯзӣ, такмили ихтисос ва стажировкаи онҳо;

- ҳамкорӣ бо мақомоти ҳокимияти давлатии давлатҳои хориҷӣ, ташкилотҳои байналхалқӣ ва хориҷӣ дар соҳаи дахлдори фаъолият;

- тибқи қонунгузории Ҷумҳурии Тоҷикистон амалӣ сохтани корҳо оид ба пур кардан, нигоҳдорӣ, ҳисоб ва истифода намудани ҳуҷҷатҳои бойгонӣ, ки дар ҷараёни фаъолияти Агентӣ ҷамъ мешаванд;

- бо тартиби муайян гузаронидани конфронсҳо, семинарҳо, намоишҳо ва дигар чорабиниҳо дар соҳаҳои муқаррарнамудаи фаъолият;

- амалӣ сохтани дигар вазифаву ӯҳдадориҳое, ки санадҳои меъёрии ҳуқуқии Ҷумҳурии Тоҷикистон пешбинӣ намудаанд.

6. Бо мақсади амалӣ сохтани ваколат дар соҳаи муқарраршудаи фаъолият Агентӣ ҳуқуқ дорад:

- бо тартиби муқарраршуда лоиҳаҳои санадҳои қонунгузорӣ ва дигар санадҳои меъёрии ҳуқуқӣ, аз ҷумла масъалаҳои зарурии ба ваколати Агентӣ дохилшавандаро барои баррасӣ ба Ҳукумати Ҷумҳурии Тоҷикистон пешниҳод менамояд;

- ҳангоми зарурат таклифҳоро оид ба ташкили гурӯҳҳои муваққатии корӣ аз ҳисоби олимон ва мутахассисон барои тайёр намудани таклифҳо ба Ҳукумати Ҷумҳурии Тоҷикистон оид ба масъалаҳои нисбатан муҳиме, ки ба салоҳияти Агентӣ дахл доранд, пешниҳод менамояд;

- бо тартиби муқарраршуда мутахассисони вазоратҳо, идораҳо, корхонаҳо ва ташкилотҳоро барои таҳияи масъалаҳои ҷудогонаи стандартизатсия, таъмини ченаки ягона ва идораи сифати маҳсулот ҷалб менамояд;

- бо тартиби муайяншуда нуқтаҳои маслиҳатдиҳӣ ва марказҳои иттилоотии матбуотӣ, донишкадаҳои илмӣ - тадқиқотӣ ва дигар воҳидҳоро оид ба масъалаҳои стандартизатсия, метрология, сертификатсия, нозироти савдо ва тайёр намудани мутахассисон таъсис медиҳад;

- шикояти (аппелятсияи) аризадиҳандагонро оид ба амали мақомот оид ба сертификатсия, лабораторияҳои (марказҳои) озмоишӣ дар низоми миллии аккредитатсия баррасӣ менамояд;

- нисбати корхонаҳо (истифодабарандагон, фурӯшандагон) чораҳои таъсиррасонии ҳуқуқӣ ва иқтисодиро оид ба натиҷаи назорати давлатӣ дар соҳаи стандартизатсия, метрология, сертификатсия, аккредитатсия, нозироти савдо ва пахта мутобиқи қонунгузории Ҷумҳурии Тоҷикистон татбиқ менаомяд;

- ба мақомоти судӣ бо аризаи шикоятӣ нисбати истеҳсолкунандагон (иҷрокунандагон, фурӯшандагон) хангоми аз ҷониби онҳо риоя нашудани қонунгузорӣ дар бораи стандартизатсия, метрология, сертификатсия ва нозироти савдо, талаботи стандартҳо ва дастурҳои техникӣ оид ба сифат ва бехатарии маҳсулот (кор, хизматрасонӣ) муроҷиат менамояд;

- қарорро дар бораи муқаррар намудани муҷозоти ҷаримавӣ нисбати субъектҳои хоҷагидорӣ ва ҷарима шахсони мансабдор барои саркашӣ аз иҷро ва ё саривақт иҷро накардани нишондод ва қарорҳо ҳангоми расонидани зарар ба истеъмолкунандагон бо маҳсулоте, ки ҷавобгӯи талаботи сифат ва бехатарӣ нест, аз ҷумла барои риоя накардани қоидаҳои сертификатсия ва савдо, метрология ва аккредитатсия, инчунин дар дигар ҳолатҳои пешбининамудаи қонунгузории Ҷумҳурии Тоҷикистон қабул намояд;

- қарорро оид ба боздоштани истеҳсол ва фурӯши маводи хӯрока, озуқа ва маводи дигар, расонидани хизмат ва иҷрои корҳо дар давраи ислоҳи камбудиҳо ошкоргардида ва дигар имкони бартараф намудани камбудиҳоро қабул намуда, дар сурати имкон надоштани ислоҳи камбудиҳо амали сертификатсияи дахлдор ё дигар ҳуҷҷати иҷозатномадиҳандаро бекор кунад;

- ба субъектҳои хоҷагидор дар бораи аз муомилот баровардани маҳсулоти хӯрокаи бесифат ва хатарнок, маводҳо ва дигар маҳсулот амрияҳои барои иҷрои ҳатмӣ диҳад;

- дар якҷоягӣ бо мақомоти идораи давлатӣ ва мақомоти маҳаллии иҷроияи ҳокимияти давлатӣ, ки ба ҳайати комиссияҳои махсус шомиланд, дар бораи истифодаи партов ё нест кардани маҳсулоти хӯрокаи бесифати хатарнок, маводҳо ва дигар маҳсулот, инчунин аз муомилот бо мақсади муайянкунии имконияти минбаъдаи истифодаи партови ин гуна маҳсулот қарорҳои барои иҷрои субъектҳои хоҷагидор ҳатмӣ қабул намояд;

- дар бораи бартараф намудани камбудиҳои ошкоршудаи қоидаҳои савдо, интизоми технологӣ, сертификатсия, стандартизатсия ва метрология ҳангоми истеҳсол ва фурӯши маҳсулот (кор, хизматрасонӣ) ва аз фурӯш гирифтани маҳсулоти барои ҳаёт, саломатӣ ва моликияти шаҳрвандон хатарнок (зараровар) санадҳо тартиб дода, амрияҳои ҳатмӣ барои иҷрои субъектҳои хоҷагидор (истеҳсолкунандагон, тайёркунандагон, интиқолдиҳандагон ва фурӯшандагон) диҳад;

- бозомӯзии касбии мутахассисони соҳаи стандартизатсия, метрология, сертификатсия, аккредитатсия ва нозироти савдоро ташкил намояд;

- маводҳоро оиди ба ҷавобгарӣ кашидани шахсони мансабдор, ки чандин маротиба ба вайронкунии қоидаҳои савдо, истеҳсол, фурӯш роҳ додаанд, инчунин моли бадсифат, ки манфиати истеъмолкунандагонро халалдор месозад, таҳвил кардаанд, ба мақомоти ҳифзи ҳуқуқ супорад;

- бо тартиби муайяншуда маълумотҳои дақиқ ва дигар иттилооти даркориро барои иҷрои фаъолияти қонунӣ аз субъектҳои хоҷагидор дархост намояд ва гирад;

- ба шахсони воқеӣ ва ҳуқуқӣ оид ба масъалаҳои фаъолияти соҳаи муқарраршуда шарҳу эзоҳ диҳад;

- созмон додани мақомоти ҳамоҳангсозӣ ва экспертӣ (шуро, комиссия, гурӯҳ, ҳайати мушовара), инчунин мақомоти байниидоравӣ дар доираи муқаррарнамудаи фаъолияти худ;

- дар дираи ваколати худ дар асоси қонунгузории Ҷумҳурии Тоҷикистон қарорҳо, дастурамалҳо ва дигар санадҳои меъёрии ҳуқуқӣ, аз ҷумла дар якҷоягӣ бо дигар мақомоти иҷроияи ҳокимият интишор намояд;

- дигар ҳуқуқҳоро тибқи санадҳои меъёрии ҳуқуқии Ҷумҳурии Тоҷикистон амалӣ созад.

III. Ташкили фаъолият

7. Агентиро Директор роҳбарӣ мекунад, ки аз ҷониби Ҳукумати Ҷумҳурии Тоҷикистон ба вазифа таъин ва аз вазифа озод карда мешавад.

Директор ҳамзамон Сарнозири давлатии Ҷумҳурии Тоҷикистон оид ба назорати стандартҳо, воситаҳои ченак ва қоидаҳои савдо мебошад.

Директори Агентӣ барои иҷрои ваколатҳои ба Агентӣ вогузоршуда ва амалисозии сиёсати давлатӣ дар соҳаи марбутаи фаъолият ҷавобгарии шахсӣ дорад.

Директор дорои муовинон аз ҷумла як муовини аввал мебошад, ки бо пешниҳоди ӯ аз ҷониби Ҳукумати Ҷумҳурии Тоҷикистон ба вазифа таъин ва аз вазифа озод карда мешавад.

Шумораи муовинони Директори Агентӣ аз ҷониби Ҳукумати Ҷумҳурии Тоҷикистон муқаррар карда мешавад.

Муовинони Директор ҳамзамон муовинони Сарнозири давлатии Ҷумҳурии Тоҷикистон оид ба назорати стандартҳо, воситаҳои ченак ва қоидаҳои савдо мебошад.

8. Зерсохторҳои Агентӣ раёсатҳо ва шӯъбаҳои оид ба самтҳои асосии фаъолияти Агентӣ мебошанд. Ба таркиби шӯъбаҳо бахшҳо дохил мешаванд.

9. Директор:

- манфиатҳои Агентиро дар мақомоти давлатӣ, корхонаҳо, муассисаҳо ва дигар ташкилотҳо ҳимоя мекунад ва роҳбарии умумии фаъолияти Агентиро амалӣ месозад;

- фармонҳо ва қарорҳо интишор мекунад, ки иҷрои онҳо барои кормандони Дастгоҳи марказии Агентӣ, инчунин марказҳои вилоятӣ ва раёсатҳои минтақавии стандартизатсия, метрология ва сертификатсия, марказҳои ташхиси минтақавӣ ҳатмӣ мебошад;

- вазифаҳоро байни муовинони худ ва роҳбарони воҳидҳои сохтории Дастгоҳи марказӣ тақсим мекунад;

- дар мувофиқа бо мақомоти иҷроияи ҳокимияти давлатӣ масъалаҳоро оид ба таъин намудан, ба вазифа ва аз вазифа озод намудани роҳбарони марказҳои вилоятӣ ва минтақавӣ оид ба стандартизатсия, метрология, сертификатсия ҳал менамояд;

- низомномаҳои воҳидҳои сохтории Дастгоҳи марказӣ, мақомоти ҳудудии Агентӣ, воҳидҳои сохтории тобеъи худро тасдиқ мекунад;

- бо тартиби муқарраргардида маблағҳои ғайрибуҷетиро, ки бо ҳолатҳои пешбининамудаи қонунгузории Ҷумҳурии Тоҷикистон таъсис дода шудаанд, ихтиёрдорӣ менамояд;

- бо тартиби муқарраргардидаи фондҳои ҳавасмандгардонии иқтисодӣ, моддӣ ва дигар фондҳои марбут ба мақсадҳои намояндагиро чорабиниҳои дигари ғайринақшавиро таъсис медиҳад;

- барои тасдиқ ба Ҳукумати Ҷумҳурии Тоҷикистон оид ба воҳидҳои таркибии Дастгоҳи марказӣ таклифҳо пешниҳо менамояд;

- қарорҳои (амрияҳои) мақомоти ҳудудии Агентиро, ки бо вайрон намудани қонунгузории Ҷумҳурии Тоҷикистон қабул шудаанд, бекор мекунад;

- бо тартиби муқаррарнамудаи қонунгузорӣ амволи Агентиро бо ҳуқуқи идоракунии оперативӣ ихтиёрдорӣ мекунад, шартномаҳо мебандад ва боваринома медихад;

- суратҳисоб ва ҳисобҳои дигари Агентиро мекушояд;

- бо тартиби муқарраргардида рӯйхати вазифаҳои Дастгоҳи марказӣ ва мақомоти ҳудудии Агентиро тасдиқ менамояд;

- бо тартиби муқарраргардида кормандонро ба вазифа таъин ва аз вазифа озод менамояд, бо онҳо шартномаҳои (қарордодҳои) меҳнатӣ мебандад;

- бо тартиби муқаррарнамудаи қонунгузории Ҷумҳурии Тоҷикистон рӯйхати кормандони махсусан корнишондодаи дастгоҳи марказии Агентӣ ва мақомоти ҳудудии онро барои мукофотонидан бо нишонҳои давлатии Ҷумҳурии Тоҷикистон ба Ҳукумати Ҷумҳурии Тоҷикистон пешниҳод менамояд;

- тибқи қонунгузории Ҷумҳурии Тоҷикистон "Дар бораи хизмати давлатӣ" масъалаҳоро оид ба хизмати давлатӣ дар Агентӣ ҳал менамояд;

- ба Вазорати молияи Ҷумҳурии Тоҷикистон оид ба ташаккули буҷети ҷумҳуриявӣ ва маблағгузории Агентӣ таклифҳо пешниҳод менамояд;

- бо тартиби муқарраргардида ба Ҳукумати Ҷумҳурии Тоҷикистон оид ба таъсисдиҳӣ, азнавташкилкунӣ ва барҳамдиҳии ташкилоту муассисаҳои давлатӣ, ки дар ихтиёри Агентӣ мебошанд, дархостҳо пешниҳод мекунад;

- дигар ҳуқуқҳоро, ки тибқи қонунгузории амалкунандаи Ҷумҳурии Тоҷикистон ба зиммаи Агентӣ гузошта шудаанд, амалӣ мегардонад.

Директор узви Шӯрои байнидавлатии ИДМ оид ба стандартизатсия, метрология ва сертификатсия буда, ҷиҳати иҷрои вазифаҳо ваколатҳоеро дорост, ки ба зиммаи ин Шӯро гузошта шудаанд, инчунин Ҷумҳурии Тоҷикистонро дар ташкилотҳои байналмилалӣ намояндагӣ мекунад. Дар доираи салоҳияти худ ба мақомоти миллӣ оид ба стандартизатсия, метрология, сертификатсия ва аккредитатсияи давлатҳои хориҷӣ ҳамкорӣ барқарор мекунад.

Директор роҳбари Шӯрои ҳамоҳангсоз оид ба назорати сифат ва бехатарии маҳсулот (кор ва хизматрасонӣ) мебошад.

10. Маблағгузории дастгоҳи марказии Агентӣ, марказҳои вилоятӣ ва минтақавии он аз ҳисоби маблағи буҷетҳои ҷумҳуриявӣ, маҳаллӣ ва тариқи худмаблағгузорӣ сурат мегирад.

Сарчашмаҳои маблағгузории корҳо оид ба стандартизатсия, метрология, назораи риояи талаботи ҳуҷҷатҳои меъёрӣ ва дигар соҳаҳои фаъолият дар баробари маблағҷудокунии буҷетӣ, бо маблағҳое, ки тибқи тартиби муқарраргардида аз фурӯши стандартҳои нашршуда (азнавнашршуда), таснифкунандаҳои маълумоти техникӣ-иқтисодӣ, каталоги нашршуда (азнавшаршуда) озмоишҳо, ташхис ва сертификатсияи маҳсулот, санҷиши воситаҳои ченак, шаҳодат ва сертификатсияи хизматрасонӣ бо нишони мутобиқат тамғагузоришуда, инчунин даромадҳои дигар, ки аз хизматрасонии гуногун ба даст меояд, мебошанд.

Агентӣ барои таъмини фаъолияти бонизоми соҳа ҳуқуқ дорад дар доираи имкониятҳои воқеии молиявӣ шумораи зарурии кормандонро муқаррар намояд ва онҳоро аз ҳисоби маблағҳои аз фаъолияти хоҷагидорӣ ба дастомада маблағгузорӣ кунад.

11. Ба сохтори дастгоҳи марказии агентӣ идораҳо ва шӯъбаҳое дохил мешаванд, ки барои вазифаву ӯҳдадориҳои бо низомномаи мазкур ба зиммаи Агентӣ гузошташуда ҷавобгаранд, ки онҳо фаъолияти марказҳои тобеъро оид ба стандартизатсия, метрология ва сертификатсия, нозироти савдо ва пахта дар вилояту минтақаҳои Ҷумҳурии Тоҷикистон танзим менамоянд ва ҳамоҳанг месозанд.

12. Агентӣ шахси ҳуқуқист ва дорои мӯҳр бо тасвири Нишони давлатии Ҷумҳурии Тоҷикистон ва номи худ бо забонҳои тоҷикӣ ва русӣ, штамп, варақаҳои намунаи муқарраргардида, суратҳисоби ягонаи хазинадории Вазорати молияи Ҷумҳурии Тоҷикистон ва суратҳисобҳои дигар дар бонкҳо мебошад.

Номи мухтасари Агентӣ бо забони давлатӣ "Тоҷикстандарт", бо забони русӣ "Таджикстандарт".

13. Амволи Агентӣ моликияти давлатӣ ба ҳисоб меравад ба Агентӣ бо ҳуқуқи ихтиёрдорӣ ва идораи фаврӣ вогузошта шудааст.

14. Нишони ҳукуқии Агентӣ: 734018, шаҳри Душанбе, кӯчаи Н. Қарабоев, 42/2 мебошад.

Сохтори Дастгоҳи марказии Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон

Роҳбарият

Раёсати санҷиш ва нозироти давлатӣ оид ба риояи талаботи стандартҳо ва сифати маҳсулот

Раёсати таъминоти метрологии воситаҳои ченак ва ваколатдиҳӣ

Раёсати сертификатсиякунонии маҳсулот

Раёсати сертификатсиякунонӣ ва шаҳодатномадиҳии кору хизматрасонӣ

Раёсати корҳо ва ҳуқуқ

Нақшаи идоракунии Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон

Дастгоҳи марказӣ

Маркази стандартизатсия, метрология, сертификатсия ва нозироти савдои вилояти Хатлон

Маркази стандартизатсия, метрология, сертификатсия ва нозироти савдои вилояти Суғд

Раёсати стандартизатсия, метрология, сертификатсия ва нозироти савдои Вилояти Мухтори Куҳистони Бадахшон

Раёсати стандартизатсия, метрология, сертификатсия ва нозироти савдо дар минтақаи Кулоб

Нозироти савдо

Нозирот оид ба ташхис, сертификатсия ва назорати маҳсулоти пахта ва пилла

Марказҳои ташхиси минтақавӣ дар шаҳру ноҳияҳо

Муассисаи давлатии "Маҷмааи варзишии Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон" (қарори Ҳукумати ҶТ аз 30.12.2011 № 665).