Шӯрои Вазирони Ҷумҳурии Тоҷикистон

ҚАРОР

Дар бораи тадбирҳои ҳавасмандгардонии тараққиёти энергетикаи хурд ва истихроҷи ангишт дар Ҷумҳурии Тоҷикистон

Бо мақсади ҳавасмандгардонии истеҳсоли қувваи барқ дар Станцияҳои электрикии обии (СЭО) хурд, истифодаи манбаъҳои ғайримаъмулии энергия ва зиёд кардани истихроҷи ангишт дар корхонаҳои хурд, Шӯрои Вазирони Ҷумҳурии Тоҷикистон қарор мекунад:

1. Сохтмони СЭО-ҳои хурд дар тамоми иншоотҳои гидротехникӣ мавҷуда ва обанборҳои таъиноти ғайриэлектрикӣ, сарфи назар аз тобеияти идоравиашон, иҷозат дода шавад.

Ширкати давлатии саҳомию холдингии "Барқи Тоҷик", Вазорати иқтисоди Ҷумҳурии Тоҷикистон, Вазорати молияи Ҷумҳурии Тоҷикистон Низомномаи тартиби сохтмон ва истифодаи объектҳои манбаъҳои ғайримаъмулӣ энергия, аз ҷумла СЭО-ҳои хурдро дар Ҷумҳурии Тоҷикистон тасдиқ намоянд.

2. Пешниҳоди концерни "Тоҷикангиштсанг" оиди дар асоси озмун таъсис додани корхонаҳои шаклҳои мухталифи моликият дар соҳаи истихроҷу коркарди ангишт дар конҳо мувофиқи замимаи 1 маъқул дониста шавад.

3. Масъалаҳои ҳамоҳангсозии корҳои сохтмонии СЭО-ҳои хурд ва манбаъҳои ғайримаъмулии энергия ба зиммаи Ширкати давлатии саҳомию холдингии "Барқи Тоҷик" ва ҳамоҳангсозии корҳои таъсиси корхонаҳои истихроҷ ва коркарди ангишт бошад, ба ӯҳдаи концерни "Тоҷикангиштсанг" гузошта шавад.

4. Бо мақсади харидани таҷҳизот ва масолеҳ барои сохтмони СЭО-ҳои хурд, корхонаҳои истихроҷ ва коркарди ангишт дар давраи солҳои 1993-1995 ба Ширкати давлатии саҳомию холдингии "Барқи Тоҷик", концернҳои "Мадад" ва "Тоҷикангиштсанг" дар ҳаҷмҳои муқарраршудаи замимаи 2 кредит дода шавад.

5. Кумитаҳои иҷроияи Шӯроҳои вилоятӣ, шаҳрию ноҳиявии депутатҳои халқ ҳамаҷониба ба таъсиси объектҳои СЭО-ҳои хурд ва манбаъҳои ғайримаъмурии энергия, корхонаҳои истихроҷ ва коркарди ангишт, барои ин мақсадҳо дар асоси манфиатҳои мутақобила ҷалб намудани маблағҳои корхонаҳо, ташкилоту фирмаҳо ва пасандазҳои шахсии шаҳрвандон мусоидат намоянд.

6. Озод кардани СЭО-ҳои хурд, объектҳои манбаъҳои ғайримаъмулии энергия ва корхонаҳои хурди истихроҷ ва коркарди ангишт аз пардохти андоз аз фоида дар давоми се сол пас аз рӯзи ба истифода доданашон зарур дониста шавад.

Лоиҳаи Фармон оиди ин масъала ба баррасии Раёсати Шӯрои Олии Ҷумҳурии Тоҷикистон пешниҳод карда шавад.

7. Аз Банки миллии Ҷумҳурии Тоҷикистон хоҳиш карда шавад, ки ба Ширкати давлатии саҳомию холдингии "Барқи Тоҷик", концерни "Мадад" ва дигар ташкилотҳое, ки сохтмони СЭО-ҳои хурд ва объектҳои манбаъҳои ғайримаъмулии энергияро ба нақша мегиранд, инчунин ба концерни "Тоҷикангишт кредитҳои имтиёзнок диҳад.