Ҳукумати Ҷумҳурии Тоҷикистон

ҚАРОР

Дар бораи додани кредит ба хоҷагиҳо ва кучонидани онҳо аз минтақаҳои хавфноки Ҷумҳурии Тоҷикистон, ки дар давраи солҳои 2000-2004 таҳти таъсири равандҳои экзогенӣ қарор мегиранд

Бо мақсади дар навбати аввал кӯчонидани шаҳрвандон аз минтақаҳои хавфнок, ки дучори ярч, фурӯравии замин, тарма ва сел мебошанд, аз ҷумла маҳалҳои аҳолинишине, ки дар соли 1998 дучори офатҳои табиӣ гардидаанд, Ҳукумати Ҷумҳурии Тоҷикистон қарор мекунад:

1. Вазорати молияи Ҷумҳурии Тоҷикистон аз соли 2000 шурӯъ намуда, то соли 2004 ҳар сол дар буҷети ҷумҳурӣ барои ин мақсадҳо маблағ пешбинӣ намояд:

дар муддати панҷ сол аз соли 2000 шурӯъ намуда, барои кӯчонидани 7664 хоҷагиҳое, ки тибқи маълумоти Вазорати меҳнат ва шуғли аҳолии Ҷумҳурии Тоҷикистон, Вазорати ҳолатҳои фавқулоддаи Ҷумҳурии Тоҷикистон ва Саридораи геологияи дар назди Ҳукумати Ҷумҳурии Тоҷикистон дар минтақаҳои хавфнок қарор дошта, барои онҳо ба Бонки давлатии амонатгузории Ҷумҳурии Тоҷикистон "Амонатбонк" ҷудо кардани маблағҳо ба шакли захираҳои кредитӣ мувофиқи замима;

расонидани кӯмаки моддӣ ба маблағи 5 ҳазор рубл ба сардори оила ва 3 ҳазор рублӣ ба ҳар як узви оила бо ҷудо намудани он ба ҳукуматҳои вилояту шаҳру ноҳияҳо тибқи дархости асосноки бо Вазорати меҳнат ва шуғли аҳолии Ҷумҳурии Тоҷикистон мувофиқа намудани онҳо барои оилаҳое, ки аз минтақаҳои хавфноки дучори ярч, фурӯравии замин, тарма сел шуда, ба мавзеъҳои бехатар кӯчонидашаванд;

аз соли 2001 шурӯъ намуда, ҳар сол дар буҷети ҷумҳурӣ барои кӯчонидани хоҷагиҳо ҷиҳати кредитонӣ, бо дарназардошти сатҳи беқурбшавии пул маблағ пешбинӣ карда шавад.

2. Бонки давлатии амонатгузории Ҷумҳурии Тоҷикистон "Амонатбонк" барои оилаҳое, ки аз мавзеъҳои хавфноки дучори ярч, фурӯравии замин, тарма ва сел шуда бо фоизи имтиёзноки муқаррар ва ҷудонамудаи Вазорати молияи Ҷумҳурии Тоҷикистон ҷудо намудани кредитҳои дарозмӯҳлатро барои сохтмони хонаҳои истиқоматӣ ба маблағи 300 (сесад) ҳазор рубл барои як оила пешбинӣ намояд.

Захираҳои кредитӣ барои барқарор намудани хонаҳои ғайриқонунӣ сохташуда ҷудо карда намешаванд.

Пардохти кредити мазкур баъд аз сохтмони хонаи истиқоматӣ ба маблағи 60 ҳазор рубл аз ҳисоби буҷети ҷумҳурӣ, 90 ҳазор рубл аз ҳисоби корхонаҳо ва хоҷагиҳое, (колхозу, совхозҳо ва ғайра) ки оилаҳо ба ҳудуди онҳо кӯчонида шудаанд ва қисми боқимондаи кредит ба маблағи 150 ҳазор рубл аз ҳисоби маблағҳои оилаҳои кӯчонидашаванда дар муддати панҷ сол, аз соли сеюми гирифтани кредит оғоз карда, анҷом дода мешавад.

3. Вазорати меҳнат ва шуғли аҳолии Ҷумҳурии Тоҷикистон якҷоя бо Вазорати ҳолатҳои фавқулоддаи Ҷумҳурии Тоҷикистон, Саридораи геологияи гоназди Ҳукумати Ҷумҳурии Тоҷикистон ва ҳукуматҳои вилоятҳо шаҳру ноҳияҳои ҷумҳурӣ ҷиҳати тасдиқ ба Комиссияи давлатии Ҷумҳурии Тоҷикистон оид ба ҳолатҳои фавқулодда рӯйхати аниқшудаи хоҷагиҳоеро, ки бояд аз минтақаҳои хавфнок кӯчонида шаванд, таҳия ва пешниҳод намуда, назорати доимии ҷараёни кӯчонидани шаҳрвандонро мувофиқи нақшаи кӯчонидан амалӣ намоянд.