Бо Қарори Ҳукумати ҶТ аз 03.04.2007 с. № 169 беэътибор дониста шуд.

Ҳукумати Ҷумҳурии Тоҷикистон

ҚАРОР

Дар хусуси тадбирҳои татбиқи Фармони Президенти Ҷумҳурии Тоҷикистон аз 28 марти соли 2001 № 542

Бо мақсади иҷрои Фармони Президенти Ҷумҳурии Тоҷикистон аз 28 марти соли 2001 "Дар бораи пешбурди Дафтари бақайдгирии санҷиши субъектҳои хоҷагидор дар Ҷумҳурии Тоҷикистон" Ҳукумати Ҷумҳурии Тоҷикистон қарор мекунад:

1. Кумитаи давлатии омори Ҷумҳурии Тоҷикистон шакли ҳисоботи давлатии омории бақайдгирии санҷиши субъектҳои хоҷагидорро таҳия намуда, дар амал ҷорӣ намояд.

2. Муқаррар карда шавад, ки субъектҳои хоҷагидор тибқи тартиби ҷорӣ ба Кумитаи давлатии омори Ҷумҳурии Тоҷикистон оид ба санҷиши фаъолияташон ҳисобот пешниҳод менамоянд. Кумитаи давлатии омори Ҷумҳурии Тоҷикистон ҳар семоҳа ҳисоботро ҷамъбаст намуда, ба Ҳукумати Ҷумҳурии Тоҷикистон ва Прокуратураи генералии Ҷумҳурии Тоҷикистон пешниҳод намояд.

3. Вазорати адлияи Ҷумҳурии Тоҷикистон, Вазорати молияи Ҷумҳурии Тоҷикистон, Кумитаи андози назди Ҳукумати Ҷумҳурии Тоҷикистон бо мувофиқаи Прокуратураи генералии Ҷумҳурии Тоҷикистон ва Кумитаи давлатии назорати молиявии Ҷумҳурии Тоҷикистон дар мӯҳлати се моҳ лоиҳаи санадҳои меъёрию ҳуқуқиро, ки тартиби гузаронидани санҷишу тафтиши (ревизияи) фаъолияти молиявию хоҷагии субъектҳои хоҷагидорро муайян мекунанд, инчунин оид ба пурзӯр намудани ҷавобгарӣ барои вайрон намудани тартиби гузаронидани санҷишу тафтишҳои (ревизияҳои) фаъолияти молиявию хоҷагии субъектҳои хоҷагидор ва пешниҳод намудани ҳисобот. таклифҳо пешниҳод намоянд.