Бо қарори Ҳукумати ҶТ аз 6.12.2014 № 767 аз эътибор соқит дониста шуд.  

Ҳукумати Ҷумҳурии Тоҷикистон

ҚАРОР

Масъалаҳои Комиссияи Ҳукумати Ҷумҳурии Тоҷикистон оид ба ҳамоҳангсозии фаъолият дар мубориза бо ҳуқуқвайронкунӣ дар соҳаи моликияти зеҳнӣ

Мутобиқи моддаи 28 Қонуни конститутсионии Ҷумҳурии Тоҷикистон "Дар бораи Ҳукумати Ҷумҳурии Тоҷикистон" ва бо мақсади таъмини фаъолияти Комиссияи Ҳукумати Ҷумҳурии Тоҷикистон оид ба ҳамоҳангсозии фаъолият дар мубориза бо ҳуқуқвайронкунӣ дар соҳаи моликияти зеҳнӣ Ҳукумати Ҷумҳурии Тоҷикистон қарор мекунад:

1. Низомномаи замимагардидаи Комиссияи Ҳукумати Ҷумҳурии Тоҷикистон оид ба ҳамоҳангсозии фаъолият дар мубориза бо ҳуқуқвайронкунӣ дар соҳаи моликияти зеҳнӣ тасдиқ карда шавад.

2. Раисони Вилояти Мухтори Кӯҳистони Бадахшон, вилоятҳо, шаҳри Душанбе комиссияҳоро оид ба ҳамоҳангсозии фаъолият дар мубориза бо ҳуқуқвайронкунӣ дар соҳаи моликияти зеҳнӣ таъсис диҳанд.

Низомномаи Комиссияи Ҳукумати Ҷумҳурии Тоҷикистон оид ба ҳамоҳангсозии фаъолият дар мубориза бо ҳуқуқвайронкунӣ дар соҳаи моликияти зеҳнӣ

I. Муқаррароти умумӣ

1. Комиссияи Ҳукумати Ҷумҳурии Тоҷикистон оид ба ҳамоҳангсозии. фаъолият дар мубориза бо ҳуқуқвайронкунӣ дар соҳаи моликияти зеҳнӣ (минбаъд - Комиссия) мақоме мебошад, ки ҳамоҳангсозии фаъолияти ҳамкории вазорат, идора, мақомоти маҳаллии ҳокимияти давлатӣ ва дигар ташкилоту муассисаҳоро бо мақсади татбиқ намудани сиёсати ягонаи давлатӣ дар соҳаи моликияти зеҳнӣ амалӣ менамояд.

2. Комиссия дар фаъолияти худ Конститутсияи (Сарқонуни) Ҷумҳурии Тоҷикистон, санадҳои меъёрии ҳуқуқии Ҷумҳурии Тоҷикистон ва ҳамин Низомномаро ба роҳбарӣ мегирад.

II. Вазифаҳои асосии Комиссия

3. Вазифаҳои асосии Комиссия аз инҳо иборатанд:

- муайян намудани самтҳои афзалиятноки мубориза бо ҳуқуқвайронкунӣ дар соҳаи моликияти зехнӣ дар Ҷумҳурии Тоҷикистон;

- амалигардонии сиёсати ягонаи давлатӣ дар мубориза бо ҳуқуқвайронкунӣ дар соҳаи моликияти зеҳнӣ дар Ҷумҳурии Тоҷикистон;

- таҳлили фаъолияти вазорату идораҳо оид ба татбиқи қонунгузории Ҷумҳурии Тоҷикистон дар соҳаи моликияти зеҳнӣ;

- ҳамоҳангсозии фаъолияти мақомоти ваколатдори ҳокимият ва идоракунии давлатӣ, дигар ташкилоту муассисаҳо, комиссияҳои вилоятиву шахри Душанбе дар мубориза бо ҳуқуқвайронкунӣ дар соҳаи моликияти зеҳнӣ дар Ҷумҳурии Тоҷикистон;

- шунидани ҳисобот вобаста ба фаъолияти вазорату идораҳо, мақомоти маҳаллии ҳокимияти давлатӣ, дигар ташкилоту муассисаҳо оид ба масъалаҳои татбиқи қонунгузории Ҷумҳурии Тоҷикистон дар соҳаи моликияти зехнӣ;

- таҳияи пешниҳодҳо оид ба такмили заминаи меъёрии ҳуқуқӣ дар соҳаи моликияти зеҳнӣ;

- мусоидат дар масъалаҳои фаъолияти муштарак ва ҳамкории мақомоти ваколатдори давлатӣ ва соҳибҳуқуқон;

- расонидани кӯмаки машваратӣ ба ташкилотҳо ва шахсони манфиатдор дар мубориза бо ҳуқуқвайронкунӣ дар соҳаи моликияти зеҳнӣ дар Ҷумҳурии Тоҷикистон;

- ба Ҳукумати Ҷумҳурии Тоҷикистон манзур намудани пешниҳодҳо оид ба таъсис ва таҳкими мақомоту сохторҳое, ки дар мубориза бо ҳуқуқвайронкунӣ дар соҳаи моликияти зеҳнӣ ваколатдоранд;

- амалигардонии дигар вазифаҳо мутобиқи санадҳои меъёрии ҳуқуқии Ҷумҳурии Тоҷикистон.

III. Сохтори Комиссия

4. Ҳайати Комиссияро Ҳукумати Ҷумҳурии Тоҷикистон тасдиқ менамояд. Комиссия аз Раис, муовини ӯ, котиби масъул ва дигар аъзонамояндагони вазорату идораҳои дахлдор аз рӯи вазифа (масъалаҳои мубориза бо ҳуқуқвайронкунӣ дар соҳаи моликияти зеҳниро сарпарастӣ менамоянд) иборат аст. Масъалаи ҳайати шахсии Комиссия аз ҷониби Раис бо пешниҳоди вазорату идораҳои дахлдор ҳал мегардад.

5. Раиси Комиссия:

- маҷлисҳои Комиссияро даъват мекунад ва мегузаронад;

- нақшаҳои кории Комиссияро тасдиқ мекунад;

- протоколи маҷлисхо ва ҳуҷҷатҳои содиротиро имзо мекунад;

- мутобиқи тартиби муқарраргардида аз мақомоти давлатӣ, дигар ташкилоту муассисаҳо, комиссияҳои вилоятиву шаҳри Душанбе ахбор (мавод) оид ба масъалаҳое, ки ба ваколати Комиссия мансубанд, талаб мекунад;

- ҳисоботи аъзои Комиссия, роҳбарони мақомоти ҳокимият ва идоракунии давлатӣ, дигар ташкилоту муассисаҳо, комиссияҳои вилоятиву шаҳри Душанберо, оид ба ҷараёни амалигардонии санадҳои меъёрии ҳуқуқии соҳаи моликияти зеҳнӣ ва қарорҳои Комиссия мешунавад;

6. Муовини Раиси Комиссия:

- вазифаҳои Раиси Комиссияро дар вақти набудани ӯ иҷро менамояд;

- ҷиҳати беҳбудӣ бахшидан ба ҳамкории мақомоти дахлдори ваколатдор дар мубориза бо ҳуқуқвайронкунӣ дар соҳаи моликияти зехнӣ дар Ҷумҳурии Тоҷикистон чорабиниҳо пешниҳод мекунад;

- дигар супоришҳои Раиси Комиссияро иҷро менамояд.

7. Котиби масъули Комиссия:

- фаъолияти иттилоотию таҳлилӣ ва ташкилию техникии Комиссияро таъмин менамояд;

- лоиҳаҳои нақшаҳои кор таҳия ва онҳоро барои баррасии вазорату идораҳои дахлдор пешниҳод мекунад;

- таҳия ва ворид намудани пешниҳодҳои вазорату идорахои дахлдорро ба нақшаи кори Комиссия ташкил менамояд;

- ҷараёни иҷрои нақшаҳо ва қарорҳои Комиссияро таҳлил ва назорат карда, аз натиҷаҳои онҳо ба Раиси Комиссия ахбор пешниҳод мекунад;

- дигар супоришҳои Раиси Комиссияро иҷро мекунад.

8. Аъзои Комиссия:

- дар маҷлиси Комиссия ширкат меварзанд;

- чораҳои мушаххасро барои ворид намудан ба нақшаи кор ва рӯзномаи маҷлисҳои Комиссия пешниҳод менамоянд;

- мавод ва лоиҳаҳои қарорҳоро ба маҷлисҳои Комиссия оид ба масъалаҳое, ки бо ташаббуси онҳо ворид гардидаанд, таҳия менамоянд;

- дар бораи кори анҷомдодаи вазорат ё идорае, ки онро намояндагӣ мекунанд, ҳисобот медиҳанд;

- ахбори заруриро бо дархости Раиси Комиссия ё муовини ӯ оид ба масъалаҳои мубориза бо ҳуқуқвайронкунӣ дар соҳаи моликияти зеҳнӣ пешниҳод мекунанд.

IV. Ташкили фаъолияти Комиссия

9. Котиби масъули Комиссия, Агентии оид ба ҳуқуқи муаллиф ва ҳуқуқҳои вобаста ба они Вазорати фарҳанги Ҷумҳурии Тоҷикистон. Раёсати мубориза алайҳи ҷиноятҳои муташаккили Вазорати корҳои дохилии Ҷумҳурии Тоҷикистон ва сохторҳои вилоятии он кӯмаки машваратӣ ва амалӣ расонида, ба Комиссия ва комиссияҳои вилоятҳову шаҳри Душанбе оид ба масъалаҳои мубориза бо ҳуқуқвайронкунӣ дар соҳаи моликияти зеҳнӣ иттилооти зарурӣ пешниҳод менамоянд.

10. Комиссияҳо оид ба ҳамоҳангсозии фаъолият дар мубориза бо ҳуқуқвайронкунӣ дар соҳаи моликияти зеҳнии Вилояти Мухтори Кӯхистони Бадахшон, вилоятҳо, шаҳри Душанбе мақсаду вазифаҳои Комиссияро дар вилоятҳо ва шаҳр татбиқ намуда, инчунин оид ба фаъолияташон ба Комиссия ҳисобот медиҳанд. Ҳайат ва низомномаҳои комиссияҳои вилоятиву шаҳрӣ бо қарори раиси дахлдор дар мувофиқа бо Комиссия тасдиқ карда мешаванд.

11. Маҷлисҳои Комиссия на камтар аз як маротиба дар се моҳ баргузор мегарданд. Маҷлисҳои Комиссия дар сурати ширкат доштани на кам аз се ду ҳиссаи ҳайати он эътибор пайдо мекунанд.

12. Маҷлиси ғайринавбатии Комиссия бо даъвати Раис дар асоси пешниҳоди аъзои Комиссия гузаронида мешавад.

Номгӯи масъалаҳоро барои баррасӣ дар маҷлиси ғайринавбатии Комиссия Раис бо пешниҳоди аъзои Комиссия на дертар аз ҳафт рӯз пеш аз баргузории маҷлис тасдиқ менамояд.

13. Қарорҳои Комиссия бо овоздиҳии кушода қабул мегарданд ва агар ба онҳо аз миқдори умумии аъзои ҳузурдоштаи Комиссия овози бештар дода бошанд, қабулшуда ҳисобида мешаванд. Ҳангоми баробар будани овозҳо овози Раис ҳалкунада мебошад.

14. Ворид намудани тағйирот ба ин Низомнома ва ҳайати Комиссия, инчунин қатъ гардидани фаъолияти Комиссия бо қарори Ҳукумати Ҷумҳурии Тоҷикистон сурат мегирад.