Бо қарори Ҳукумати ҶТ аз 5.07.2014 № 463 аз эътибор соқит дониста шуд.

Ҳукумати Ҷумҳурии Тоҷикистон

ҚАРОР

Дар бораи ба таъхир гузоштани пардохти боҷи гумрукӣ ва андози арзиши иловашуда

Бо мақсади таъмини идораҳои нотариалии давлатӣ ва мақомоти Сабти асноди ҳолати шаҳрвандии ҷумҳурӣ бо коғазҳои дорои нишони дараҷаи ҳифзаш муқарраршуда ва ҳуҷҷатҳои сабти асноди ҳолати шаҳрвандӣ Ҳукумати Ҷумҳурии Тоҷикистон қарор мекунад:

1. Вазорати адлияи Ҷумҳурии Тоҷикистон, Вазорати молияи Ҷумҳурии Тоҷикистон дар номгӯи воридоту хароҷоти ҳисобномаи махсуси солҳои 2002-2005 пардохти арзиши маҳсулоти расондашуда, маблағи пардохти боҷҳои гумрукӣ ва андози арзиши иловашударо барои маҳсулоте, ки Ҷамъияти Саҳомии Пӯшидаи СИБПРО-и Федератсияи Россия мувофиқи шартномаи №5/2002 аз 1 феврали соли 2002 ба ҷумҳурӣ ворид менамояд, пешбинӣ намоянд.

2. Вазорати молияи Ҷумҳурии Тоҷикистон:

-мӯҳлати пардохти боҷи гумрукӣ ва андози арзиши иловашудаи маҳсулоти ба ҷумҳурӣ воридшавандаро, ки Ҷамъияти Саҳомии Пӯшидаи СИБПРО-и Федератсияи Россия мувофиқи шартномаи №5/2002 аз 1 феврали соли 2002 ба ҷумҳурӣ мерасонад, ба муддати шаш моҳ ба таъхир гузорад;

-арзиши маҳсулоти расондашуда, боҷи гумрукӣ ва андози арзиши иловашударо аз ҳисоби маблағҳои махсуси Вазорати адлияи Ҷумҳурии Тоҷикистон, ки аз фурӯши маҳсулоти аз тарафи Ҷамъияти Саҳомии Пӯшидаи СИБПРО-и Федератсияи Россия дохил мешаванд, пардохт намояд.