ҲУКУМАТИ ҶУМҲУРИИ ТОҶИКИСТОН

ҚАРОР

Оид ба ворид намудани тағйирот ба қарори Шӯрои Вазирони Ҷумҳурии Тоҷикистон аз 14 апрели соли 1994 № 182

Мутобиқи моддаи 496 Кодекси гумруки Ҷумҳурии Тоҷикистон, Ҳукумати Ҷумҳурии Тоҷикистон қарор мекунад:

Ба қарори Шӯрои Вазирони Ҷумҳурии Тоҷикистон аз 14 апрели соли 1994 № 182 "Дар бораи суғуртаи давлатии ҳатмии шахсии мансабдорони мақомоти гумруки Ҷумҳурии Тоҷикистон" чунин тағйирот ворид карда шавад:

1. Дар ном ва матни қарор калимаҳои "Шӯрои Вазирони Ҷумҳурии Тоҷикистон" ва "Кумитаи гумруки назди Шӯрои Вазирони Ҷумҳурии Тоҷикистон" бо калимаҳои "Ҳукумати Ҷумҳурии Тоҷикистон" ва "Мақомоти ваколатдор оид ба масъалаҳои гумруки Ҷумҳурии Тоҷикистон" иваз карда шаванд.

2. Зербандҳои "а", "б" ва "в" банди 3 дар таҳрири зайл баён карда шаванд:

"а) дар ҳолати ҳалокати (вафоти) шахсони мансабдори мақомоти гумрук дар давраи кор ё баъди ҷавоб шудан, агар он дар натиҷаи расонидани ҷароҳати ҷисмонӣ ё зарари дигаре ба саломатӣ, ки ба иҷрои вазифаҳои хизматиашон вобаста аст, ба амал омада бошад, - ба ворисонашон ба андозаи баробар ба ҳаҷми 180 - каратаи музди миёнаи якмоҳаи шахсони мансабдори мақомоти гумрук;

б) дар ҳолати ба шахсони мансабдори мақомоти гумрук ба иртиботи иҷрои фаъолияти хизматӣ расонидани ҷароҳати ҷисмонӣ ё зарари дигаре ба саломатиашон, ки минбаъд ба фаъолияти касби машғул шудани онҳоро ғайриимкон мегардонад, ба андозаи баробар ба ҳаҷми 36 - каратаи музди миёнаи якмоҳаашон;

в) дар ҳолати ба шахсони мансабдори мақомоти гумрук ба иртиботи иҷрои фаъолияти хизматӣ расонидани ҷароҳати ҷисмонӣ ё зарари дигаре ба саломатиашон, ки дар натиҷаи он қобилияти кориашон ба таври пойдор гум нашуда, ба қобилияти минбаъд машғул шудан ба фаъолияти касби асар накардааст, ба андозаи баробар ба ҳаҷми 12 - каратаи музди миёнаи якмоҳаашон".