ҲУКУМАТИ ҶУМҲУРИИ ТОҶИКИСТОН

ҚАРОР

Дар бораи инкишофи энергетикаи хурд дар Ҷумҳурии Тоҷикистон

Бо мақсади истифодаи самарабахши захираҳои барқароркардашавандаи энергетикӣ дар Ҷумҳурии Тоҷикистон ва бартараф намудани танқисии қувваи барқ Ҳукумати Ҷумҳурии Тоҷикистон қарор мекунад:

1. Ташаббуси Ширкати давлатии саҳомию ҳолдингии "Барқи Тоҷик" ва Ассоциацияи энергетикаи хурди ва ғайримаъмулии Россия оид ба таъсис додани "Ассоциацияи энергетикаи хурди Тоҷикистон" (АЭХТ) маъқул дониста шавад.

Муассисон мувофиқи тартиби муқарраргардида дар муддати ду моҳ ҳуҷҷатҳои заруриро таҳия ва тасдиқ намоянд.

2. Ба зиммаи Ассоциацияи энергетикаи хурди Тоҷикистон инҳо гузошта шаванд:

таҳияи барномаи дарозмуддати инкишофи энергетикаи хурди ҷумҳурӣ;

ҳамоҳангсозии ҳамаи корҳо оид ба азнавбарқароркунӣ, лоиҳакашӣ, сохтмон ва истифодаи манбаъҳои офтобӣ, бодӣ, обҳои гарми зеризаминӣ ва дигар навъҳои ғайримаъмулии энергия;

ба роҳ мондани истеҳсоли таҷҳизоти технологии худии энергетикаи хурд дар ҷумҳурӣ ва сертификацияи он.

3. Раисони вилоятҳо, шаҳрҳо ва ноҳияҳо, вазорату идораҳо, корхонаву ташкилотҳои ҷумҳурӣ:

инвентаризацияи СБО-и хурди мавҷударо гузаронанд ва масъалаи истифодаи минбаъдаи онҳоро ҳал намоянд;

ҷиҳати ҷалб намудани инвестиция барои сохтмони объектҳои хурди энергетикӣ кӯмаки зарурӣ расонанд ва мусоидат намоянд.

4. Вазорати иқтисод ва робитаҳои иқтисодии хориҷии Ҷумҳурии Тоҷикистон ва Вазорати молияи Ҷумҳурии Тоҷикистон аз соли 1998 сар карда, ҳангоми таҳияи буҷети ҷумҳурӣ барои ҳукуматҳои вилоятҳо, шаҳрҳо ва ноҳияҳо ҷиҳати татбиқи барномаи инкишофи энергетикаи хурди ҷумҳурӣ ҷудо кардани маблағи баробар ба на камтар аз 500 ҳазор доллари ШМА (аз рӯи қурби муқаррарнамудаи Бонки миллӣ дар лаҳзаи ҷудокунӣ) маблағгузории асосиро пешбинӣ намоянд.

5. Ширкати давлатии саҳомию ҳолдингии "Барқи Тоҷик" қувваи барқи зиёдатиеро, ки СБО хурди шаклҳои моликияти ғайридавлатӣ истеҳсол мекунанд, аз рӯи тарифи миёнаи ҷумҳуриявӣ харидорӣ кунад.

6. Ширкати давлатии саҳомию ҳолдингии "Барқи Тоҷик" ҳар сол аз ҷониби маблағҳои худаш барои инкишофи энергетикаи хурд дар ноҳияву минтақаҳое, ки қувваи барқашон бо хароҷоти калон таъмин карда мешаванд, ҷудо кардани маблағро пешбинӣ намоянд.

7. Ба Бонки миллии Ҷумҳурии Тоҷикистон, бонкҳои саҳомию тиҷоратии Ҷумҳурии Тоҷикистон тавсия карда шавад, ки дар татбиқи барномаи инкишофи энергетикаи хурди ҷумҳурӣ бо роҳи ҷалб намудани инвестицияҳо, чудо кардани маблағҳои хурд, додани қарзҳои дарозмуддати имтиёзнок саҳмгирӣ намоянд.

8. Вазорати иқтисод ва робитаҳои иқтисодии хориҷии Ҷумҳурии Тоҷикистон, ассоциацияи энергетикаи хурди Ҷумҳурии Тоҷикистон, Маркази ҳамоҳангсозии кӯмаки хориҷии назди Ҳукумати Ҷумҳурии Тоҷикистон ҷиҳати ҷалб намудани инвестиция барои маблағгузории сохтмони объектҳои хурди энергетикӣ корҳои дахлдорро анҷом диҳанд.

9. Воридоти таҷҳизоти комплектӣ, мавод ва қисмҳо барои объектҳои хурди энергетикӣ бо пешниҳоди Вазорати иқтисод ва робитаҳои иқтисодии хориҷии Ҷумҳурии Тоҷикистон аз боҷи гумрукӣ озод карда шавад.