ПРЕЗИДЕНТИ ҶУМҲУРИИ ТОҶИКИСТОН

ФАРМОН

Дар бораи зиёд кардани маоши ҳадди ақал, музди меҳнати кормандони ташкилоту муассисаҳои буҷетӣ, нафақа ва стипендия

Бо мақсади беҳтар намудани вазъи моддии аҳоли, тақвияти нақши ҳавасмандкунандаи музди меҳнат ва баланд бардоштани дараҷаи ҳифзи иҷтимоии аҳоли фармон медиҳам:

1. Аз 1 январи соли 1998:

маоши ҳадди ақал дар тамоми соҳаҳои иқтисоди Ҷумҳурии Тоҷикистон ба андозаи 1 000 рубл дар як моҳ;

андозаи ҳадди ақали нафақа аз рӯи синну сол, дар сурати барои ҳисоби нафақаи пурра мувофиқ будани собиқаи кор, ба андозаи 1000 рубл дар як моҳ;

даромади ҳадди ақали андозбандинашаванда ба андозаи 2 000 рубл муқаррар карда шавад.

2. Ставкаҳои амалкунандаи музди меҳнати муаллимони ҳама гуна навъ ва номгӯи мактабҳои маълумоти умуми аз 1 январи соли 1998 1,4 баробар ва аз 1 июли соли 1998 1,1 баробар зиёд карда шаванд.

3. Андозаи ставкаҳои амалкунандаи музди меҳнат ва маоши вазифавии кормандони ташкилоту муассисаои аз ҳисоби буҷет маблағгузоришаванда, хизматчиёни ҳарби ва ашхоси ҳайати қаторию фармондиҳии мақомоти корҳои дохилӣ ва воҳидҳои дигаре, ки аз рӯи пардохти музди меҳнат ба идораҳои соҳибқудрат баробар карда шудаанд, инчунин андозаи нафақаю стипендия, ба истиснои кормандони дар банди 2 ҳамин Фармон зикргардида, аз 1 январи соли 1998 1,2 баробар ва аз 1 июли соли 1998 1,1 баробар зиёд карда шавад (зимнан тафриқа, дараҷа ва коэффициентҳои тарифии мавҷудаи онҳо нигоҳ дошта шавад).

4. Аз 1 январи соли 1998 андозаи музди меҳнате, ки ба он коэффициенти ноҳияви ва коэффициент барои шароити баландкӯҳ, биёбон ва беоби зам мегардад, ба андозаи ду маоши ҳадди ақал муқаррар карда шавад.

5. Ҳукумати Ҷумҳурии Тоҷикистон:

андозаи нафақа ва стипендияро мутобиқи банди 3 ҳамин фармон таҷдиди назар намояд;

тартиб ва манбаъҳои маблағгузории тадбирҳоро оид ба иҷрои Фармони мазкур муайян намояд;

тартиби муайян намудани музди меҳнати миёнаро барои пардохти корношоямии муваққати, рухсатипули ва ҳолатҳои дигаре, ки ҳисоби музди меҳнати миёна зарур аст, тасдиқ намояд;

дар хусуси такмили таъминоти нафақавии шаҳрвандони Ҷумҳурии Тоҷикистон, ки то 1 январи соли 1996, инчунин аз вазифаҳою истеҳсолоти дорои шароити вазнин ва зарарноки меҳнат ба нафақа баромадаанд, пешниҳодот таҳия намояд.

6. Банди 3 Фармон ба кормандони дастгоҳи Маҷлиси Олии Ҷумҳурии Тоҷикистон, дастгоҳи иҷроияи Президенти Ҷумҳурии Тоҷикистон, мақомоти идораи давлатӣ, дастгоҳҳои Судҳои конститутсионӣ, олӣ, олии иқтисодии Ҷумҳурии Тоҷикистон, Ҳукуматҳои вилоятҳо ва шаҳру ноҳияҳо, ҷамоатҳои шаҳраку деҳот, судҳои вилояти ва шаҳрию ноҳиявӣ, прокуратура, идораҳои нотариати давлатӣ, мақомоти андоз (ҷумҳуриявӣ, вилоятӣ, шаҳрӣ ва ноҳиявӣ), қисми тиббию санитарӣ ва маҷмӯи меҳмонхонаҳои Идораи молиявию хоҷагии дастгоҳи иҷроияи Президенти Ҷумҳурии Тоҷикистон, дигар ташкилоту муассисаҳое, ки шартҳои пардохти музди меҳнати кормандонашон ба шартҳои пардохти музди меҳнат дар ташкилоту муассисаҳои дар ҳамин банд номбаршуда баробар карда шудаанд, дахл надорад.