Бо қарори Ҳукумати ҶТ аз 20.02.2009с. № 104 беэътибор дониста шуд

ҲУКУМАТИ ҶУМҲУРИИ ТОҶИКИСТОН

ҚАРОР

Дар бораи танзими тақсимоти нишонҳои бақайдгирии силсилаи "РТ" барои воситаҳои нақлиёт

Бинобар тағйироти сохтори дар мақоми қонунгузори ва мақомоти ҳокимияти давлатии Ҷумҳурии Тоҷикистон бо мақсади танзими додани нишонҳои бақайдгирии силсилаи "РТ" барои воситаҳои нақлиёт мутобиқи талаботи ГОСТ 1020-95, ҳукумати Ҷумҳурии Тоҷикистон қарор мекунад:

1. Тартиби тақсимоти нишонҳои бақайдгирии силсилаи "РТ" барои воситаҳои нақлиёт мутобиқи катеторияҳои шахсони мансабдор ва Низомномаи тартиби додани нишонҳои бақайдгирии силсилаи "РТ" барои воситаҳои нақлиёт, ки замима мегарданд, тасдиқ карда шаванд.

2. Вазорати корҳои дохилии Ҷумҳурии Тоҷикистон:

дар мӯҳлати ду моҳ дар ҳаҷми пурра баргашта гирифтани нишонҳои бақайдгирии силсилаи "РТ"-и қаблан додашударо анҷом дода, аз нав бақайдгирии онҳоро таъмин намояд;

додани нишонҳои бақайдгирии силсилаи "РТ"-ро барои воситаҳои нақлиёт катъиян мутобиқи Тартиби бо ҳамин қарор тасдиқгардида таъмин намояд.

3. Муқаррар карда шавад, ки бақайдгири ва додани нишонҳои бақайдгирии силсилаи "РТ", инчунин нигоҳдории миқдори захиравии онҳо ба зиммаи Раёсати бозрасии давлатии автомобилии Вазорати корҳои дохилии Ҷумҳурии Тоҷикистон гузошта мешавад.

4. Муқаррар карда шавад, ки Раёсати бозрасии давлатии автомобилии Вазорати корҳои дохилии Ҷумҳурии Тоҷикистон тайёр кардан ва додани нусхаи нишонҳои бақайдгирии гумшудаи силсилаи "РТ", ҳамчунин миқдори эҳтиётии онҳоро фақат дар асоси иҷозати хаттии Роҳбари Дасхгоҳи иҷроияи Президенти Ҷумҳурии Тоҷикистон анҷом медиҳад.

5. Роҳбарони Дастгоҳи иҷроияи Президенти Ҷумҳурии Тоҷикистон, дастгоҳҳои Маҷлиси миллии Маҷлиси Олии Ҷумҳурии Тоҷикистон ва Маҷлиси намояндагони Маҷлиси Олии Ҷумҳурии Тоҷикистон, роҳбарони вазорату идораҳо,раисони Вилояти Мухтори Кӯҳистони Бадахшон, вилоятҳо, шаҳру ноҳияҳо аз нав бақайдгирии саривақти, истифодаи мақсаднок ва бе осеб нигоҳ доштани нишонҳои бақайдгирии силсилаи "РТ"-ро, ки барои воситаҳои нақлиёти ташкилоту идораҳои тобеъ дода шудаанд, таъмин намоянд.