ФАРМОНИ ПРЕЗИДЕНТИ ҶУМҲУРИИ ТОҶИКИСТОН
Дар хусуси Конвенсияи Созмони Милали Муттаҳид дар бораи ҳуҷҷатҳои боркашонии гардишӣ
Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» фармон медиҳам:
1.Матни Конвенсияи Созмони Милали Муттаҳид дар бораи ҳуҷҷатҳои боркашонии гардишӣ, ки 15 декабри соли 2025, №80/162 дар Иҷлосияи 80 Маҷмаи Умумии Созмони Милали Муттаҳид қабул шудааст, маъқул дониста шавад.
2.Вазири нақлиёти Ҷумҳурии Тоҷикистон Конвенсияи мазкурро аз номи Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.
3.Вазорати корҳои хориҷии Ҷумҳурии Тоҷикистон бо тартиби муқарраргардида сана ва маҳалли имзои Конвенсияи мазкурро бо Котиботи Созмони Милали Муттаҳид мувофиқа намояд.
Президенти Ҷумҳурии Тоҷикистон Эмомалӣ Раҳмон
ш. Душанбе, аз 8 октябри соли 2026, № 1227
КОНВЕНСИЯИ СОЗМОНИ МИЛАЛИ МУТТАҲИД ДАР БОРАИ ҲУҶҶАТҲОИ БОРКАШОНИИ ГАРДИШӢ
БОБИ I. МУҚАРРАРОТИ УМУМӢ
Моддаи 1. Доираи амал
1.Конвенсияи мазкур нисбат ба баровардан, интиқол ва оқибатҳои ҳуқуқии ҳуҷҷатҳои боркашонии гардишӣ татбиқ мегардад, ки дорои истиноди возеҳ ба ин Конвенсия буда, ҳамлу нақли байналмилалии борро тавассути як ё якчанд намуди нақлиёт танзим менамояд, ба шарте ки:
a)маҳалли қабули мол барои боркашонӣ, ки дар ҳуҷҷат қайд шудааст, дар ҳудуди Давлати иштирокдор воқеъ бошад;
b)маҳалли супоридани мол ба борқабулкунанда, ки дар ҳуҷҷат қайд шудааст, дар ҳудуди Давлати иштирокдор воқеъ бошад; ё
c)маҳалли додани ҳуҷҷати боркашонии гардишӣ, ки дар худи ҳамин ҳуҷҷат нишон дода шудааст, дар ҳудуди Давлати иштирокдор ҷойгир мебошад.
...
