Дар Вазорати адлияи Ҷумҳурии Тоҷикистон

аз 7-уми майи соли 2026, №1409

ба қайди давлатӣ гирифта шудааст

Дастурамали №265 дар бораи пур кардани шакли ҳисоботи омории 1-ГПН «Ҳисобот оид ба гардиши пули нақд»

Дастурамали №265 дар бораи пур кардани шакли ҳисоботи омории 1-ГПН «Ҳисобот оид ба гардиши пули нақд» (минбаъд – Дастурамал) мутобиқи қисми 4 моддаи 42 ва моддаи 86 Қонуни Ҷумҳурии Тоҷикистон «Дар бораи Бонки миллии Тоҷикистон», моддаҳои 41 ва 52 Қонуни Ҷумҳурии Тоҷикистон «Дар бораи фаъолияти бонкӣ» ва моддаи 23 Қонуни Ҷумҳурии Тоҷикистон «Дар бораи ташкилотҳои маблағгузории хурд» таҳия гардида, тартиби пур кардан ва пешниҳоди шакли ҳисоботи оморӣ оид ба гардиши пули нақдро муайян менамояд.

1. МУҚАРРАРОТИ УМУМӢ

1. Дар Дастурамал мафҳумҳои асосии зерин истифода мешаванд:

- асъори пардохт – асъоре, ки бо он арзиши амалиёт ва бақияҳои дар қарордоди байни ду тараф зикршуда ифода меёбанд;

- бахши идоракунии давлатӣ – маҷмуи корхона, ташкилот ва муассисаҳое, ки дар моликияти давлат қарор доранд ва аз тарафи мақомоти давлатӣ ё шахсони таъинкардаи онҳо идора карда мешаванд;

- ташкилотҳои дигари молиявӣ – ташкилотҳо, аз ҷумла ширкатҳои лизингӣ, ломбард, ташкилотҳои суғуртавӣ, ғайр аз ташкилотҳои қарзии молиявӣ, ки фаъолияти асосии онҳо миёнаравии молиявӣ мебошад;

- имзои электронӣ (минбаъд - ИЭ) – иттилооте, ки барои аз сохтакорӣ ҳифз намудани ҳуҷҷатҳои электронӣ, муайян кардани шахсе, ки ҳуҷҷатро имзо кардааст ва ё барои ҳифзи ҳуҷҷат аз дигаргунсозӣ ва азназаргузаронии шахси сеюм пешбинӣ шудааст;