ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаҳои 8, 14, 15, 16 ва 17 Қонуни Ҷумҳурии Тоҷикистон «Дар бораи сармоя ва ҳавасмандгардонии фаъолияти сармоягузорӣ», бо мақсади рушди иқтидорҳои истеҳсолӣ, ташкили ҷойҳои нави корӣ, ҷалби сармояи иловагӣ, ҷорӣ намудани технологияҳои пешқадам, Ҳукумати Ҷумҳурии Тоҷикистон қарор мекунад:

1.Лоиҳаи созишномаи сармоягузорӣ байни Ҳукумати Ҷумҳурии Тоҷикистон ва Ҷамъияти дорои масъулияти маҳдуди «Аён Энерҷӣ» оид ба сохтмон ва мавриди истифодабарӣ қарор додани неругоҳи фотоэлектрикӣ бо иқтидори 250 МВт дар ноҳияи Ашти вилояти Суғди Ҷумҳурии Тоҷикистон ва неругоҳи фотоэлектрикӣ бо иқтидори 250 МВт дар ноҳияи Ҷайҳуни вилояти Хатлони Ҷумҳурии Тоҷикистон маъқул дониста шавад (замимаи 1).

2. Номгўйи молҳо, воситаҳои нақлиёт, техника ва таҷҳизоти аз ҷониби Ҷамъияти дорои масъулияти маҳдуди «Аён Энерҷӣ» барои амалисозии лоиҳа ба Ҷумҳурии Тоҷикистон воридшаванда, ки пас аз тасдиқ гардидани созишномаи сармоягузории мазкур аз пардохтҳои гумрукӣ озод карда мешаванд, тасдиқ карда шавад (замимаи 2).

3. Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон созишномаи сармоягузории мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.

4. Кумитаи давлатии сармоягузорӣ ва идораи амволи давлатии Ҷумҳурии Тоҷикистон тибқи тартиби муқарраргардида бо Ҷамъияти дорои масъулияти маҳдуди «Аён Энерҷӣ» сана ва маҳалли имзои созишномаи сармоягузории мазкурро мувофиқа намояд.

5. Созишномаи сармоягузории мазкур пас аз ба имзо расидан барои тасдиқ ба Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

6. Хадамоти гумруки назди Ҳукумати Ҷумҳурии Тоҷикистон бо тартиби муқарраргардида назорат ва сари вақт гузаронидани расмиёти гумрукии молҳои воридшавандаро таъмин намояд.