ҲУКУМАТИ ҶУМҲУРИИ ТОҶИКИСТОН

ҚАРОР

Қарори Шурои Маҷлиси намояндагони Маҷлиси Олии Ҷумҳурии Тоҷикистон аз 23 июни соли 2025, №245 «Дар бораи лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон»-ро баррасӣ намуда, Ҳукумати Ҷумҳурии Тоҷикистон қарор мекунад:

Хулосаи замимагардидаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

Хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон»

Ҳукумати Ҷумҳурии Тоҷикистон лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон»-ро, ки бо қарори Шурои Маҷлиси намояндагони Маҷлиси Олии Ҷумҳурии Тоҷикистон аз 23 июни соли 2025, №245 барои додани хулоса ба Ҳукумати Ҷумҳурии Тоҷикистон пешниҳод гардидааст, мавриди баррасӣ қарор дода, ба он пешниҳоди зеринро манзур менамояд:

1) қисми 1 лоиҳа хориҷ карда шавад, зеро он ба номуайянӣ ва гуногунфаҳмӣ оварда мерасонад;

2) қисми 3 моддаи 4¹ ба Қонуни мазкур иловашаванда дар таҳрири зерин ифода карда шавад:

«3. Дар Ҷумҳурии Тоҷикистон ҷиҳати истифодаи имову ишора барои ногӯён ва ношунавоён бо дигар забонҳо низ шароит фароҳам оварда мешавад.»;

3) моддаҳои 4² ва 4³ иловашаванда дар шакли пешниҳодшуда қобили қабул намебошанд, зеро салоҳияти Ҳукумати Ҷумҳурии Тоҷикистон номушаххас ва ба таври умумӣ пешбинӣ гардида, ваколатҳои мақоми ваколатдори давлатӣ тибқи Низомномаи Кумитаи забон ва истилоҳоти назди Ҳукумати Ҷумҳурии Тоҷикистон, ки бо қарори Ҳукумати Ҷумҳурии Тоҷикистон аз 13 феврали соли 2024, №57 «Дар бораи Кумитаи забон ва истилоҳоти назди Ҳукумати Ҷумҳурии Тоҷикистон» тасдиқ гардидааст, муфассал ва ба таври дақиқ муайян гардида, зарурати дар Қонуни мазкур такрор намудани онҳо дида намешавад;

4) қисми 4 бо дарназардошти амалияи ҳуқуқтатбиқкунӣ таҷдиди назар карда шавад;

5) дар қисми 5 калимаи «Дар» ба калимаи «Ба» иваз карда шавад;

6) қисми 6 дар таҳрири зерин ифода карда шавад:

«6. Моддаи 12¹ бо мазмуни зерин илова карда шавад:

Моддаи 12¹. Забони нишастҳои матбуотӣ

Дар Ҷумҳурии Тоҷикистон нишастҳои матбуотии вазорату идораҳо, корхона, муассиса ва ташкилотҳои дигар бо забони давлатӣ баргузор мешаванд.»;

7) дар сархати дуюми қисми 8 калимаҳои «бо мазмуни» ба калимаҳои «дар таҳрири» иваз карда шаванд;

8) моддаи 18¹ иловашаванда бинобар мавзуи танзими қонунҳои дигари соҳавӣ будан хориҷ карда шавад.

Ҳамзамон хатоҳои имлоӣ ва грамматикии лоиҳа ислоҳ гардида, матни забони русӣ ба матни забони тоҷикӣ мутобиқ карда шавад.