ҲУКУМАТИ ҶУМҲУРИИ ТОҶИКИСТОН 

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Сербия оид ба ҳамлу нақли байналмилалии автомобилии мусофирон ва борҳо маъқул дониста шавад.

2. Вазири нақлиёти Ҷумҳурии Тоҷикистон Созишномаи мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон бо тартиби муқарраргардида сана ва маҳалли ба имзо расонидани Созишномаи мазкурро бо ҷониби Сербия мувофиқа намояд.

СОЗИШНОМА байни Ҳукумати Ҷумҳурии Тоҷикистон ва Ҳукумати Ҷумҳурии Сербия оид ба ҳамлу нақли байналмилалии автомобилии мусофирон ва борҳо

Ҳукумати Ҷумҳурии Тоҷикистон ва Ҳукумати Ҷумҳурии Сербия, ки минбаъд «Тарафҳои Аҳдкунанда» номида мешаванд,

бо мақсади мусоидат намудан ба рушди мутақобилан судманди муносибатҳои тиҷоратӣ-иқтисодӣ;

бо дарназардошти аҳаммияти ҳифзи муҳити зист ва бехатарии ҳаракат;

ба инобати вусъат бахшидани ҳамкориҳо дар ҳамлу нақли байналмилалӣ;

ба мувофиқаи зайл расиданд:

I. МУҚАРРАРОТ

Моддаи 1

1.Муқаррароти Созишномаи мазкур нисбат ба ҳамлу нақли байналмилалии автомобилии мусофирон ва борҳо дар байни давлатҳои Тарафҳои Аҳдкунанда ва тавассути ҳудуди онҳо транзитӣ, инчунин ба ё аз кишварҳои сеюм ки аз ҷониби интиқолдиҳандагони воситаҳои нақлиёт дар ҳудуди яке аз Тарафҳои Аҳдкунанда ба қайд гирифта шудаанд, татбиқ карда мешаванд.

2.Созишномаи мазкур ба ҳуқуқ ва уҳдадориҳои Тарафҳои Аҳдкунанда, ки иштирокчии шартномаҳои дигари байналмилалӣ мебошанд, дахолат намекунад.

II. МАФҲУМҲО

Моддаи 2

Мафҳумҳое, ки дар Созишномаи мазкур истифода шудаанд:

1. «Интиқолдиҳанда» - шахси воқеӣ ё ҳуқуқӣ, ки дар ҳудуди яке аз Тарафҳои Аҳдкунанда ба қайд гирифта шуда, барои анҷом додани ҳамлу нақли байналмилалии автомобилӣ мутобиқи санадҳои меъёрии ҳуқуқии кишвари бақайдгиранда ваколатдоранд;

2. «Воситаи нақлиёт» – маънои воситаи нақлиёти автомобилиро дорад:

барои ҳамлу нақли мусофирон – автобусе, ки барои интиқоли мусофирон пешбинӣ шуда, дорои зиёда аз 9 ҷойи нишаст, аз ҷумла ҷойи нишасти ронанда мебошад;

барои ҳамлу нақли борҳо – воситаи нақлиёти автомобилӣ, ки барои кашондани бор, аз ҷумла воситаи нақлиёти боркаш, воситаи нақлиёти боркаш бо ядак, автопоездҳо ва ё автопоездҳо бо нимядак таъин шудааст.

3. «Ҳамлу нақли мунтазами мусофирон» – ҳамлу нақли мусофирон бо автобус, ки аз рӯйи хатсайрҳо, ҷадвалҳо, тарифҳо нуқтаҳои таваққуф, ки дар он мусофирон савор шуда ва ё аз автобус баромада метавонанд, қаблан байни мақоми ваколатдори Тарафҳои Аҳдкунанда мувофиқашуда анҷом меёбанд.

4. «Ҳамлу нақли номунтазами мусофирон» - ҳама гуна ҳамлу нақли дигари мусофирон тариқи автобус, ки ба истилоҳи «ҳамлу нақли мунтазами мусофирон» дохил намешаванд.

5. «Иҷозатнома» - ҳуҷҷати аз ҷониби мақоми ваколатдори давлатии Тарафҳои Аҳдкунанда додашуда ба нақлиёте, ки дар ҳудуди Тарафи дигари Тарафҳои Аҳдкунанда ба қайд гирифта шудааст ва ҳуқуқи иҷрои ҳамлу нақли байналмилалии автомобилиро дар ҳудуди он медиҳад;

6. «Транзит» маънои ҳамлу нақли мусофирон ва молҳо тавассути ҳудуди Тарафи Аҳдкунандаро дорад, агар нуқтаҳои интиқол ва таъинот берун аз ҳудуди ҳамин Тарафи Аҳдкунанда бошанд.

7. «Ҳамлу нақл аз/ба кишвари сеюм» – ҳамлу нақли борҳо тавассути воситаҳои нақлиёти автомобилии интиқолдиҳандагон, ки дар ҳудуди яке аз Тарафҳои Аҳдкунанда ба қайд гирифта шудааст, дар байни ду нуқтае, ки яке аз онҳо дар ҳудуди Тарафи Аҳдкунанда ва Тарафи дигар дар ҳудуди сеюм, ки иштирокчии Созишномаи мазкур нестанд, ҷойгир аст.

8. «Борҳои хатарнок» – моддаҳо, мавод, маснуот, партовҳое, ки бинобар сабаби хислат ва хусусиятҳои ба онҳо хос ҳангоми мавҷуд будани омилҳои муайян метавонанд дар раванди интиқол, корҳои борбардорӣ ва борфарорӣ сабаби таркиш, сӯхтор ё осеб дидани борҳои интиқолшаванда, таҷҳизоти техникӣ, дастгоҳҳои интиқолшаванда, биноҳо ва объектҳои дигар шавад, инчунин ба ҳаёт ва саломатии одамон ва муҳити зист зарар расонанд.

III. ҲАМЛУ НАҚЛИ МУСОФИРОН

Моддаи 3

1. Ҳамлу нақли мунтазами мусофирон дар асоси низоми иҷозатдиҳӣ, ки аз ҷониби мақоми ваколатдори давлатии Тарафҳои Аҳдкунанда ва дар ҳолати зарурӣ аз ҷониби кишварҳои транзитӣ дода мешавад, анҷом меёбад.

2. Ҳамлу нақли мунтазами мусофирон байни Тарафҳои Аҳдкунанда ё транзит тавассути ҳудуди онҳо дар асоси иҷозатномаи мақоми ваколатдори давлатии Тарафҳои Аҳдкунанда барои масире, ки аз ҳудуди Тарафҳои Аҳдкунанда мегузарад, анҷом дода мешавад.

3. Дархост барои иҷозатнома ба мақоми ваколатдор дар кишвари бақайдгирандаи интиқолдиҳанда пешниҳод карда шавад ва он маълумоти зеринро бояд дар бар гирад:

4. Агар мақоми ваколатдори давлатии як Тарафи Аҳдкунанда аризаро дар бораи иҷозатнома қабул намояд, аризаи тасдиқшуда ба мақоми ваколатдори давлатии Тарафи дигари Аҳдкунанда дода мешавад.

5. Қарор дар бораи маъқул донистан ё рад кардани иҷозатнома аз ҷониби мақоми ваколатдори давлатии Тарафи дигари Аҳдкунанда дар муддати ду моҳ қабул карда мешавад.

6. Агар мақоми ваколатдори давлатии Тарафи Аҳдкунандаи дигар дархостро дар бораи иҷозатнома қабул намояд, мақоми ваколатдори кишвари таъсисёбии ҳамлу нақлкунанда дар мавриди зарурат аризаи тасдиқшударо инчунин ба мақоми ваколатдори давлатии кишварҳои транзитӣ ирсол менамояд.

7. Иҷозатномаҳои мақоми ваколатдори давлатии Тарафҳои Аҳдкунанда ва дар ҳолати зарурӣ аз кишварҳои транзит барои ҳамлу нақли мунтазами мусофирон ва борҳо дар қитъаҳои масир, ки аз ҳудуди онҳо мегузаранд, аз ҷониби мақоми ваколатдори давлатии кишвари таъсисёбии ҳамлу нақлкунанда ба интиқолдиҳанда дода мешавад.

Моддаи 4

1. Ҳамлу нақли номунтазами мусофирон дар байни Тарафҳои Аҳдкунанда ё транзит тариқи ҳудуди онҳо, ба истиснои ҳамлу нақли дар моддаи 5 ҳамин Созишномаи мазкур пешбинишуда, дар асоси иҷозатномаи аз ҷониби мақоми ваколатдори давлатии Тарафҳои Аҳдкунанда додашудааст, амалӣ карда мешавад.

2. Мақоми ваколатдори давлатии Тарафҳои Аҳдкунанда барои масире, ки аз ҳудуди кишварҳои онҳо мегузарад, иҷозат медиҳанд.

3. Барои ҳар як ҳамлу нақли номунтазами мусофирон иҷозати алоҳида дода мешавад, ки он ҳуқуқи рафту омади якдафъаинаро медиҳад, агар тартиби дигаре дар иҷозатнома пешбинӣ нагардида бошад.

4. Иҷозатномаҳо барои ҳамлу нақли мусофирон хусусияти фардӣ дошта, ба интиқолдиҳандагони дигар ё шахсони сеюм дода намешаванд.

5. Мақоми ваколатдори давлатии Тарафҳои Аҳдкунанда расмиёти мубодилаи иҷозатномаҳоро мувофиқа мекунанд.

Моддаи 5

1. Иҷозатномаи дар моддаи 4 Созишномаи мазкур зикргардида барои интиқоли номунтазами мусофирбарӣ дар ҳолатҳои зерин талаб карда намешавад:

2. Ҳангоми анҷом додани ҳамлу нақли дар банди а) қисми 1 моддаи мазкур пешбинишуда ронандаи автобус бояд бо худ рӯйхати мусофиронро дар шакли мувофиқакардаи мақоми ваколатдори давлатии Тарафҳои Аҳдкунанда дошта бошад.

IV. ҲАМЛУ НАҚЛИ БОРҲО

Моддаи 6

1. Молҳо байни Тарафҳои Аҳдкунанда зимни транзит тавассути ҳудуди онҳо, инчунин ба/аз кишварҳои сеюм, ба истиснои ҳамлу нақли дар моддаи 7 ҳамин Созишномаи мазкур пешбинишуда, бо воситаҳои нақлиёт тибқи иҷозатномаҳое, ки мақоми ваколатдори давлатии Тарафҳои Аҳдкунанда медиҳанд, интиқол дода мешаванд.

2. Барои ҳар як воситаи нақлиёт иҷозатномаи алоҳида дода мешавад. Ҳар як чунин иҷозатнома ҳуқуқи иҷрои як маротиба боркашониро медиҳад. Иҷозатномаи дар давоми соли ҷорӣ пешниҳодшуда то 31 январи соли оянда эътибор дорад. Инчунин барои воситаҳои нақлиёти бидуни бор низ иҷозатнома зарур мебошад.

3. Иҷозатномаҳо барои ҳамлу нақли борҳо фардӣ буда, ба интиқолдиҳандагони дигар ё Тарафи сеюм дода намешаванд.

4. Мақоми ваколатдори давлатии Тарафҳои Ахдкунанда ҳар сол миқдори иҷозатномаҳои ба ҳамдигар мувофиқашудаи ҳамлу нақли борҳоро мубодила мекунанд. Иҷозатномаҳо бояд бо муҳри мақоми ваколатдори Тарафҳои Аҳдкунанда ва имзои шахсе, ки ин иҷозатномаро додааст, тасдиқ шуда бошанд. Бо дархости яке аз Тарафҳои Аҳдкунанда метавон мубодилаи иловагии иҷозатномаҳо анҷом дод.

5. Мақоми ваколатдори давлатии Тарафҳои Аҳдкунанда расмиёти мубодилаи иҷозатномаҳоро мувофиқа мекунанд.

Моддаи 7

1. Барои ҳамлу нақли зерин иҷозатнома талаб карда намешавад:

1) интиқоли молҳо тавассути нақлиёти автомобилӣ, ки вазни умумии иҷозатдодашудаи бори онҳо аз ҷумла ядакҳо, аз 3,5 тонна зиёд нест;

2) интиқоли молҳо ба таври номунтазам ба фурудгоҳҳо ё аз фурудгоҳҳо, дар ҳолатҳое, ки самти хизматрасонӣ иваз шуда бошад;

3) интиқоли воситаҳои нақлиёти вайроншуда ва корношоям, инчунин интиқоли воситаҳои нақлиёт, ки ба таъмир ниёз доранд;

4) ҳаракати бебор тавассути як мошини боркаш, ки барои дар кишвари дигар иваз кардани мошини вайроншуда фиристода шудааст, инчунин баргардонидани автомобили вайроншуда баъд аз таъмир;

5) интиқоли чорво дар воситаҳои нақлиёте, ки махсусан барои интиқоли чорво муқаррар шудаанд ё ба таври доимӣ ҷиҳати интиқоли чорво табдил дода шудаанд ва аз ҷониби мақомоти дахлдори кишварҳои марбута чунин эътироф шудаанд;

6) расонидани қисмҳои эҳтиётӣ барои киштиҳо ва ҳавопаймоҳо;

7) интиқол додани лавозимоти тиббӣ ва таҷҳизот барои ҳолатҳои фавқулода, махсусан дар вокуниш ба офатҳои табиӣ ва эҳтиёҷоти башардӯстона;

8) интиқоли асарҳо ва ашёи санъат бо мақсадҳои ғайритиҷоратӣ барои ярмарка ва намоишгоҳҳо;

9) интиқоли молу мулк бо мақсадҳои ғайритиҷоратӣ, лавозимот ва ҳайвонот барои театр, намоишҳои мусиқӣ, кино, варзиш ё сирк, ярмаркаҳо ё фестивалҳо ва ҳамчунин аз онҳо, ки барои сабти радио ё наворбардории филм ё телевизион пешбинӣ шудаанд;

10) интиқоли борҳо аз ҳисоби худӣ;

11) интиқоли ҷаноза;

12) интиқоли почта, ки ҳамчун хизмати давлатӣ амалӣ карда мешавад;

13) интиқоли воситаҳои нақлиёти нав харидашудаи бе бор ба ҷои таъиноти ниҳоии онҳо.

2. Кумитаи муштарак метавонад ба мақомоти ваколатдор дар бораи ворид намудани тағйирот ба рўйхати банди 1 пешниҳод намояд.

V. МУҚАРРАРОТИ УМУМӢ

Моддаи 8

1. Ҳамлу нақл тибқи Созишномаи мазкур дар роҳҳое, ки барои ҳаракати байналмилалии автомобилӣ кушода аст, тавассути гузаргоҳҳои сарҳадии давлатии таъиншудаи ҳар як Тарафҳои Аҳдкунанда анҷом дода мешавад.

2. Воситаҳои нақлиёте, ки ҳамлу нақли автомобилии байналмилалиро анҷом медиҳанд, бояд дорои рақамҳои бақайдгирӣ ва аломатҳои бақайдгирии давлатӣ дошта бошанд. Ядак ва нимядакҳо метавонанд рақамҳои бақайдгирӣ ва аломатҳои кишварҳои дигарро низ дошта бошанд, агар воситаи нақлиёти боркаш рақами қайд ва аломатҳои бақайдгирии Тарафҳои Аҳдкунандаро дошта бошанд.

3. Ба интиқолдиҳандагон иҷозат дода намешавад, ки мусофирон ё борҳоро байни ду нуқтаи дохилии ҳудуди кишвари Тарафи дигари Аҳдкунанда интиқол диҳанд.

Моддаи 9

1. Ронандагони воситаҳои нақлиёти Тарафҳои Аҳдкунанда бояд шаҳодатномаи ронандагии миллӣ ё байналмилалӣ, ки ба категорияи воситаҳои нақлиёти онҳо мувофиқанд ва ҳуҷҷатҳои миллии бақайдгирии воситаи нақлиётро дошта бошанд.

2. Шаҳодатномаи ронандагии миллӣ ё байналмилалӣ ва ҳуҷҷатҳои миллии бақайдгирии воситаи нақлиёт бояд ба талаботи муқаррарнамудаи Конвенсия оид ба ҳаракат дар роҳ, ки 8 ноябри соли 1968 дар Вена ба имзо расидааст, мувофиқат намоянд.

3. Иҷозатномаҳо ва дигар ҳуҷҷатҳои тибқи муқаррароти Созишномаи мазкур талабшаванда, бояд дар дохили воситаи нақлиёте, ки ба онҳо тааллуқ доранд, мавҷуд бошанд ва бо дархости мақоми ваколатдори давлатии Тарафҳои Аҳдкунанда пешниҳод карда шаванд.

Моддаи 10

1. Интиқолдиҳанда бояд тибқи санадҳои меъёрии ҳуқуқии Тарафи дигари Аҳдкунанда иҷозатномаи махсуси мақоми ваколатдори давлатии Тарафҳои Аҳдкунандаро дарёфт намояд, агар вазну андозаи воситаи нақлиёт, ки бе бор ё боркаш аз меъёрҳои муқаррарнамудаи дар ҳудуди ҳамин Тарафҳои Аҳдкунанда зиёд бошад.

2. Интиқол бояд танҳо тибқи талаботи дар иҷозатномаи махсус зикргардида сурат гирад.

Моддаи 11

1.Воситаҳои нақлиёте, ки ба интиқоли борҳои хатарнок ё зудвайроншаванда машғул мебошанд, бояд мутобиқи талаботи Созишномаи аврупоӣ «Дар бораи ҳамлу нақли байналмилалии борҳои хатарнок тавассути автомобил» ва Созишнома «Оид ба интиқолоти байналмилалии маҳсулоти зудвайроншавандаи озуқа ва воситаҳои нақлиёти махсуси барои ин интиқолот таъингардида», дар чунин ҳамлу нақл таҷҳизонида шаванд.

2.Таҷҳизоте, ки барои назорати ронандагони воситаи нақлиёт ва вақти истироҳат дар воситаҳои нақлиёт истифода мешавад, бояд ба муқаррароти Созишномаи аврупоӣ оид ба кори ронандагони воситаҳои нақлиётӣ, ки дар ҳамлу нақли байналмилалии автомобилӣ машғуланд, мувофиқат кунад.

3. Тарафҳои Аҳдкунанда уҳдадор мешаванд, ки дар доираи Созишномаи мазкур ба истифодабарии воситаҳои нақлиёте, ки ба стандартҳои қатъии бехатарӣ ва партовҳои гази карбон мувофиқанд, мусоидат кунанд.

Моддаи 12

1. Интиқолдиҳандагони яке аз Тарафҳои Аҳдкунанда, ки тибқи Созишномаи мазкур амалиёти нақлиётиро дар ҳудуди Тарафи дигари Аҳдкунанда анҷом медиҳанд, дар асоси баробарӣ аз пардохтҳо, боҷҳо ва андозҳое, ки дар ин ҳудуд ситонида мешаванд ва барои истифода ва ихтиёрдории воситаҳои нақлиёт, инчунин барои иҷрои амалиёти нақлиётӣ тибқи муқаррароти санадҳои меъёрии ҳуқуқии амалкунанда дар ҳудуди ҳамин Тарафи Аҳдкунанда, озод карда мешаванд.

2. Имтиёзи мазкур нисбат ба пардохти боҷҳо ва пардохтҳо барои истифодаи роҳҳо, пулҳо ва нақбҳо, инчунин барои пардохтҳо ва боҷҳо барои вазн, андоза ва иқтидори борбардории воситаи нақлиёт аз меъёри муқаррарнамудаи санадҳои меъёрии ҳуқуқии Тарафҳои Аҳдкунанда татбиқ намегардад.

Моддаи 13

1. Ҳангоми ҳамлу нақл тибқи Созишномаи мазкур ашёҳои зерин, ки ба ҳудуди Тарафҳои Аҳдкунанда ворид мешаванд ё аз он хориҷ карда мешаванд, мутақобилан аз боҷҳои гумрукӣ, андозҳо ва пардохтҳо озод карда мешаванд:

2. Асбобу ва қисмҳои эҳтиётии истифоданашуда бояд баргардонида шаванд ва қисмҳои эҳтиётии ивазшуда бояд содир карда шаванд, ё таҳти назорати кормандони гумрук нобуд карда шаванд.

Моддаи 14

Назорати сарҳадӣ, гумрукӣ ва санитарӣ тибқи созишномаҳои байналмилалӣ, ки Тарафҳои Аҳдкунанда иштирокчии он мебошанд, амалӣ карда мешавад. Дар сурати дигар танзими санадҳои меъёрии ҳуқуқии давлатҳои ҳар як Тарафи Аҳдкунанда татбиқ мегардад.

Моддаи 15

Интиқолдиҳандагон ва ронандагони воситаҳои нақлиёти Тарафҳои Аҳдкунанда вазифадоранд қоидаҳои ҳаракати роҳ ва санадҳои меъёрии ҳуқуқии Тарафи Аҳдкунандаро, ки воситаи нақлиёт дар ҳудуди он ҷойгир аст, риоя намоянд.

Моддаи 16

1. Дар сурати аз ҷониби интиқолдиҳанда ё ронандагони он вайрон кардани муқаррароти созишномаи мазкур макомоти ваколатдори Тарафи Аҳдкунандае, ки дар ҳудуди он ҳуқуқвайронкунӣ ба амал омадааст, ба Тарафи дигари Аҳдакунанда хабар медиҳад, ки нисбат ба ҳуқуқвайронкунии мазкур чораҳои пешбининамудаи қонунгузории миллии худро меандешад.

2. Мақоми ваколатдори давлатии Тарафҳои Аҳдкунанда дар хусуси чораҳое андешидашуда нисбат ба интиқолдиҳандагоне, ки ба ҳуқуқвайронкунӣ роҳ додаанд, якдигарро хабардор мекунанд.

3. Муқаррароти моддаи мазкур барои татбиқи чораҳои муҷозотӣ нисбат ба интиқолдиҳандаи Тарафи Аҳдкунандаи дигар тибқи қонунгузории давлате, ки дар ҳудуди он ҳуқуқвайронкунӣ ба амал омадааст, монеъ намешавад.

VI. КОМИССИЯИ МУШТАРАК

Моддаи 17

1. Барои таъмини иҷрои дурусти муқаррароти Созишномаи мазкур ва ҳалли фаврии баҳсҳое, ки дар ҷараёни татбиқи он ба миён меоянд ва бо роҳи робитаҳои мустақими мақоми ваколатдори давлатии Тарафҳои Аҳдкунанда ҳал карда намешаванд, комиссияи муштарак таъсис дода мешавад.

2. Комиссияи муштарак аз намояндагони Тарафҳои Аҳдкунанда иборат буда, бо дархости яке аз Тарафҳои Аҳдкунанда дар ҳудуди ҳар кадоми онҳо бонавбат баргузор мегардад.

3. Комиссияи муштарак метавонад тавсияҳоро оид ба ворид намудани тағйиру иловаҳо ба моддаҳои Созишномаи мазкур қабул кунад.

Моддаи 18

1. Мақоми ваколатдори давлатӣ оид ба татбиқи муқаррароти Созишномаи мазкур инҳоянд:

аз ҷониби Ҷумҳурии Тоҷикистон – Вазорати нақлиёти Ҷумҳурии Тоҷикистон,

аз ҷониби Ҷумҳурии Сербия – Вазорати сохтмон, нақлиёт ва инфрасохтори Ҷумҳурии Сербия.

2. Дар ҳолати тағйир ёфтани номҳои расмӣ ва вазифаҳои мақоми ваколатдори давлатии Тарафҳои Аҳдкунанда, Тарафҳои Аҳдкунанда фавран дар ин бора якдигарро тавассути роҳҳои дипломатӣ огоҳ менамоянд.

Моддаи 19

Ҳама гуна баҳсҳое, ки вобаста бо тафсир ё татбиқи муқаррароти Созишномаи мазкур ба миён меоянд, аз ҷониби Тарафҳои Аҳдкунанда тавассути машварат ва гуфтушунид ҳал карда мешаванд.

VII. МУҚАРРАРОТИ ХОТИМАВӢ

Моддаи 20

Ворид намудани тағйиру иловаҳо ба Созишномаи мазкур бо розигии Тарафҳои Аҳдкунанда тавассути ба расмият даровардани протоколҳои алоҳида, ки қисмҳои ҷудонашавандаи ин Созишнома маҳсуб ёфта, тибқи моддаи 21 ҳамин Созишнома эътибори ҳуқуқӣ пайдо мекунанд, анҷом дода мешаванд.

Моддаи 21

1. Созишномаи мазкур пас аз 30 рӯз аз рӯзи тавассути роҳҳои дипломатӣ гирифтани огоҳиномаи хаттии охирини як Тарафи Аҳдкунанда аз ҷониби Тарафи дигари Аҳдкунанда дар бораи ба анҷом расонидани расмиёти дохилидавлатӣ, ки барои эътибор пайдо кардани ин Созишнома заруранд, эътибори ҳуқуқӣ пайдо мекунад.

2. Созишномаи мазкур ба муҳлати номуайян баста шуда, то ба охир расидани шаш моҳ аз рӯзи гирифтани огоҳиномаи хаттии яке аз Тарафҳои Аҳдкунанда аз ҷониби Тарафи дигари Аҳдкунанда бо мақсади бекор кардани Созишномаи мазкур амал мекунад.

Дар шаҳри ___________ «___» ________20__, дар ду нусхаи аслӣ бо забонҳои тоҷикӣ, сербӣ ва англисӣ ба имзо расида, ҳамаи матнҳо эътибори яксон доранд. Дар ҳолати ба вуҷуд омадани ихтилофот дар тафсири муқаррароти Созишномаи мазкур бартарӣ ба матни забони англисӣ дода мешавад.