ҲУКУМАТИ ҶУМҲУРИИ ТОҶИКИСТОН 

ҚАРОР

Қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 6 январи соли 2025, №2525 «Дар бораи лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҷамъоварӣ, нигоҳдорӣ ва истифодабарии оқилонаи захираҳои генетикии набототи корам»-ро баррасӣ намуда, Ҳукумати Ҷумҳурии Тоҷикистон қарор мекунад:

Хулосаи замимагардидаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҷамъоварӣ, нигоҳдорӣ ва истифодабарии оқилонаи захираҳои генетикии набототи корам» ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

Хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҷамъоварӣ, нигоҳдорӣ ва истифодабарии оқилонаи захираҳои генетикии набототи корам»

Ҳукумати Ҷумҳурии Тоҷикистон лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҷамъоварӣ, нигоҳдорӣ ва истифодабарии оқилонаи захираҳои генетикии набототи корам»-ро, ки бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 6 январи соли 2025, №2525 барои додани хулоса ба Ҳукумати Ҷумҳурии Тоҷикистон пешниҳод гардидааст, мавриди баррасӣ қарор дода, вобаста ба моддаи 1 таклифҳои зеринро манзур менамояд:

1) аз муқаддима аломат ва рақами «, №892» хориҷ карда шаванд;

2) сархати дуюми қисми 1 бинобар коста ва душворфаҳм таҳия гардидан, такмил дода шавад;

3) дар қисми 2 калимаи «Дар» ба калимаи «Аз» иваз карда шавад;

4) дар қисми 4, оид ба моддаи 71 ба Қонуни мазкур иловашаванда:

- дар ном ва муқаддимаи қисм калимаҳои «мақомоти ваколатдори ҳокимияти» ба калимаҳои «мақоми ваколатдори» иваз карда шаванд;

- сархатҳои дуюм, сеюм ва чорум равшану возеҳ набуда, мушаххас ва дақиқ ифода карда шаванд. Ҳамзамон истифодаи якхелаи истилоҳи пешбинишаванда мутобиқ ба матни Қонуни мазкур таъмин карда шавад;

5) дар сархати дуюми қисми 5 калимаҳои «сархати нӯҳум» ба калимаҳои «дар сархати ҳаштум аломати нуқта ба аломати нуқтавергул «;» иваз гардида, сархати нуҳум» иваз карда шаванд;

6) сархати дуюми қисми 6 хориҷ карда шавад, зеро муқаррароти онро моҳиятан сархати шашуми қисми 2 моддаи 9 Қонуни мазкур дар бар мегирад.

7) дар қисми 8 калимаи «якуми» ба рақами «1» иваз карда шавад.

Пешниҳод мегардад, ки хатоҳои техникию ҳуқуқӣ ва имлоии дигар ислоҳ карда шуда, матни русии лоиҳа ба матни тоҷикии он мутобиқ гардонида шавад.