ҲУКУМАТИ ҶУМҲУРИИ ТОҶИКИСТОН 

ҚАРОР

Қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 23 декабри соли 2024, №2496 «Дар бораи лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи бехатарии радиатсионӣ»-ро баррасӣ намуда, Ҳукумати Ҷумҳурии Тоҷикистон қарор мекунад:

Хулосаи замимагардидаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйироту иловаҳо ба Қонуни Ҷумҳурии Тоҷикистон «Дар бораи бехатарии радиатсионӣ» ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

Хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйироту иловаҳо ба Қонуни Ҷумҳурии Тоҷикистон «Дар бораи бехатарии радиатсионӣ»

Ҳукумати Ҷумҳурии Тоҷикистон лоиҳаи Қонуни Ҷумҳурии Тоҷикистон «Оид ба ворид намудани тағйироту иловаҳо ба Қонуни Ҷумҳурии Тоҷикистон «Дар бораи бехатарии радиатсионӣ»-ро, ки бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 23 декабри соли 2024, №2496 барои додани хулоса ба Ҳукумати Ҷумҳурии Тоҷикистон пешниҳод гардидааст, мавриди баррасӣ қарор дода, оид ба моддаи 1 таклифҳои зеринро манзур менамояд:

1) қисми 1 дар иртибот бо номи модда таҷдид карда шавад;

2) ба қисми 2 пеш аз калимаҳои «ба» калимаи «мувофиқан» илова гардида, ивази калимаи «иондоркунандаро» ба калимаи «ионофарро» пешбинӣ карда шавад, зеро дар моддаҳои 2, 10 ва 26 Қонуни амалкунанда истилоҳи мазкур истифода шудааст;

3) оид ба қисми 3:

- сархатҳои якум ва дуюм хориҷ карда шаванд, зеро меъёрҳои амалкунанда дуруст ва фаҳмо мебошанд;

- сархати нуздаҳуми дар таҳрири нав ифодашаванда хориҷ карда шавад, зеро мафҳуми «бехатарии радиатсионии аҳолӣ» дар сархати ҳафтуми моддаи 2 Қонуни мазкур шарҳ дода шудааст;

4) оид ба қисми 5:

- дар сархати якум калимаҳои «матни муқаддимавии» ба калимаҳои «муқаддимаи қисми» иваз карда шаванд;

- сархатҳои дуюм ва сеюми қисми 5 муттаҳид гардида, дар таҳрири зерин ифода карда шавад:

«- дар сархати чордаҳум аломати нуқта ба аломати нуқтавергул «;» иваз гардида, сархати понздаҳум бо мазмуни зерин илова карда шавад:»;

5) қисмҳои 6 ва 8, сархати дуюми қисми 13 ва қисми 15 ба талаботи техникаи ҳуқуқэҷодкунӣ, ки Қонуни Ҷумҳурии Тоҷикистон «Дар бораи санадҳои меъёрии ҳуқуқӣ» муайян кардааст, мутобиқ карда шавад, зеро қисмҳои моддаи Қонуни Ҷумҳурии Тоҷикистон «Дар бораи бехатарии радиатсионӣ» рақамгузорӣ карда нашудаанд;

6) дар қисми 7:

- дар сархати якум калимаҳои «матни муқаддимавӣ» ба калимаҳои «муқаддимаи қисм» иваз карда шуда, пас аз калимаи «салоҳияти» калимаи «мақомоти» илова карда шавад;

- дар сархати дуюм калимаи «шаванд» ба калимаи «шавад» иваз карда шавад;

- дар сархати сеюм пас аз калимаи «Тоҷикистон» аломати нуқта гузошта шавад;

7) қисми 9 дар таҳрири зерин ифода карда шавад:

«9. Дар қисми якуми моддаи 13, қисми панҷуми моддаи 19 ва сархати чоруми моддаи 23 калимаҳои «мақомотҳои ҳокимияти давлатӣ дар маҳалҳо (ҳукуматҳо)» ба калимаҳои «мақомоти маҳаллии ҳокимияти давлатӣ» иваз карда шаванд.»;

8) қисми 11 бо қисми 2 лоиҳа муттаҳид карда шавад;

9).дар сархати якуми қисми 13 калимаҳои «нигаҳдошт» ва «нигоҳдорӣ» мувофиқан ба калимаҳои «Нигаҳдошт» ва «Нигоҳдорӣ» иваз карда шаванд;

10) қисми 14 хориҷ карда шавад, зеро меъёри амалкунанда возеҳу фаҳмо ифода шудааст;

11) дар қисми 16, дар моддаи 32 дар таҳрири нав ифодашаванда калимаҳои «бо тартиби муқаррарнамудаи» ба калимаи «мутобиқи» иваз карда шаванд.

Пешниҳод карда мешавад, ки хатоҳои имлоӣ, грамматикӣ ва техникии дар лоиҳа ҷойдошта ислоҳ гардида, матни забони русӣ ба матни забони тоҷикӣ мутобиқ карда шавад.