ҲУКУМАТИ ҶУМҲУРИИ ТОҶИКИСТОН

ҚАРОР

Қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 23 декабри соли 2024, №2498 «Оид ба лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон»-ро баррасӣ намуда, Ҳукумати Ҷумҳурии Тоҷикистон қарор мекунад:

Хулосаи замимагардидаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Дар бораи ворид намудани тағйироту иловаҳо ба Кодекси ҳуқуқвайронкунии маъмурии Ҷумҳурии Тоҷикистон» ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

Хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Дар бораи ворид намудани тағйироту иловаҳо ба Кодекси ҳуқуқвайронкунии маъмурии Ҷумҳурии Тоҷикистон»

Ҳукумати Ҷумҳурии Тоҷикистон лоиҳаи Қонуни Ҷумҳурии Тоҷикистон «Дар бораи ворид намудани тағйироту иловаҳо ба Кодекси ҳуқуқвайронкунии маъмурии Ҷумҳурии Тоҷикистон»-ро, ки бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 23 декабри соли 2024, №2498 барои додани хулоса ба Ҳукумати Ҷумҳурии Тоҷикистон пешниҳод гардидааст, баррасӣ карда, вобаста ба он чунин пешниҳод менамояд:

1)дар ном калимаи «ТАҒЙИРОТУ» ба калимаи «ТАҒЙИРУ» иваз карда шавад;

2)дар қисми муқаддимавии моддаи 1 сарчашмаи интишори расмӣ пурра нишон дода шавад;

3) оид ба қисми 1:

- сархати якум дар иртибот бо қисми 4 ба моддаи 311 Кодекси мазкур иловашаванда таҷдид карда шавад, зеро сарборӣ ба меҳвари воситаи нақлиёт бевосита ба вазни воситаи нақлиёт алоқамандӣ дошта, дар ду қисми алоҳида ҳамчун аломати муайянкунандаи таркиби ҳуқуқвайронкунии маъмурӣ пешбинӣ гаштани онҳо боиси пайдо шудани ихтилоф, татбиқи нодуруст ва омилҳои коррупсионӣ хоҳад шуд;

- қисми 4 ба моддаи 311 Кодекси мазкур иловашаванда дар робита бо принсипҳое, ки дар моддаҳои 7, 8 ва 10 Кодекси мазкур пешбинӣ шудаанд, инчунин бинобар ба вуҷуд овардани мушкилот ва гуногунфаҳмӣ дар амалия ва боиси пайдо шудани баҳсҳо татбиқи онро ғайриимкон гардонида, дар шакли пешниҳодшуда қобили қабул намебошад;

4)қисми 2 хориҷ карда шавад, зеро мутобиқи диспозитсияи моддаи 668 Кодекси мазкур барои пинҳон намудан аз баҳисобгирӣ, ба расмият надаровардани ҳуқуқвайронкунии маъмурии ошкоршуда, ғайриқонунӣ аз ҷавобгарии маъмурӣ озод намудан ё доир ба ин ҳуқуқвайронкунӣ қабул намудани қарори ба кирдор ошкоро номувофиқ ҷавобгарии маъмурӣ муқаррар гардида, пешбинӣ ва пурзӯр кардани ҷавобгарӣ барои кирдорҳо вобаста ба соҳаҳои алоҳида ба мақсад мувофиқ намебошад.

Бинобар гуфтаҳои боло лоиҳаи Қонуни мазкур дар шакли пешниҳодгардида қобили қабул намебошад.