ҲУКУМАТИ ҶУМҲУРИИ ТОҶИКИСТОН 

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Протокол байни Хадамоти гумруки назди Ҳукумати Ҷумҳурии Тоҷикистон ва Вазорати савдои Ҷумҳурии Туркия оид ба методологияи омори савдои хориҷӣ ва ҳамкории иттилоотӣ маъқул дониста шавад.

2. Сардори Хадамоти гумруки назди Ҳукумати Ҷумҳурии Тоҷикистон Протоколи мазкурро ба имзо расонад ва ҳангоми зарурат ба матни лоиҳа тағйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон бо мутобиқи тартиби муқарраргардида сана ва маҳалли ба имзо расонидани Протоколи мазкурро бо ҷониби Туркия мувофиқа намояд.

ПРОТОКОЛ БАЙНИ ХАДАМОТИ ГУМРУКИ НАЗДИ ҲУКУМАТИ ҶУМҲУРИИ ТОҶИКИСТОН ВА ВАЗОРАТИ САВДОИ ҶУМҲУРИИ ТУРКИЯ ОИД БА МЕТОДОЛОГИЯИ ОМОРИ САВДОИ ХОРИҶӢ ВА ҲАМКОРИИ ИТТИЛООТӢ

Хадамоти гумруки назди Ҳукумати Ҷумҳурии Тоҷикистон ва Вазорати савдои Ҷумҳурии Туркия, ки минбаъд «Тарафҳо» номида мешаванд,

бо дарназардошти Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Туркия дар бораи ёрии мутақобила байни хадамоти гумруки Тарафҳо, ки дар Анқара 17 сентябри соли 1998 ба имзо расидааст,

бо дарки он, ки ҳамкорӣ дар самти омори савдои хориҷӣ ва ҳамоҳангсозии омори гумрукӣ оид ба савдои хориҷии дуҷониба на танҳо барои муайян кардани сабабҳои ихтилоф дар омор, балки барои пешбурди солимгардонии савдои дуҷониба муфид аст,

дар масъалаҳои зерин ба мувофиқа расиданд:

МОДДАИ 1 МУҚАРРАРОТИ УМУМӢ

Бо мақсади татбиқи Протоколи мазкур Тарафҳо дар соҳаи мубодилаи маълумоти омор дар бораи савдои дуҷониба, инчунин мубодилаи иттилоот дар бораи методологияи омори савдои хориҷӣ ва тағйироти ҷиддӣ дар чунин методологияҳо ҳамкорӣ хоҳанд кард. Протоколи мазкур ба мубодилаи маълумоти оморӣ, ки маълумоти махфӣ мебошад, инчунин маълумоте, ки дорои сирри давлатӣ, аз ҷумла сирри тиҷоратӣ мебошад, татбиқ карда намешавад.

МОДДАИ 2 ОБЪЕКТ ВА ДОИРАИ ТАТБИҚ

1. Мақсад аз табодули маълумот дар бораи усулҳое, ки дар омори савдои хориҷӣ истифода мешаванд, инчунин табодули маълумоти оморӣ дар доираи Протоколи мазкур пешниҳоди маълумоти зарурӣ дар бораи савдои дуҷонибаи Тарафҳо мебошад.

2. Тамоми ёрӣ дар доираи Протоколи мазкур аз ҷониби Тарафҳо тибқи қонунгузории дохилии ҳар яке аз Тарафҳо ва дар доираи салоҳият ва захираҳои мавҷудаи Тарафҳо расонида мешавад.

МОДДАИ 3 МУБОДИЛАИ МАЪЛУМОТИ ОМОРӢ

1. Тарафҳо маълумоти савдои хориҷии дуҷонибаро тибқи номгӯйи нишондиҳандаҳои савдои хориҷии дар замимаи Протоколи мазкур, овардашуда ба таври ройгон мубодила мекунанд.

2. Маълумоти мубодилашаванда байни Тарафҳо мувофиқи замимаи Протоколи мазкур, ки қисми ҷудонашавандаи он мебошад, ба роҳ монда мешавад.

3. Тарафҳо омори гумрукиро дар бораи тиҷорати дуҷониба тибқи сатҳи 6-рақамаи низоми ҳамоҳангшуда ҳар сол ё давра ба давра мубодила мекунанд.

4. Тарафҳо ҷиҳати беҳтар татбиқ намудани Протоколи мазкур методологияи сохтори ташкилӣ ва шартҳои техникии интиқоли маълумотро мубодила мекунанд.

МОДДАИ 4 ИСТИФОДАИ МАЪЛУМОТ

1. Тарафҳо кафолат медиҳанд, ки маълумоти дар доираи Протоколи мазкур дарҷгардида танҳо бо мақсадҳои дар Протокол зикршуда истифода бурда мешавад.

2. Ҳама гуна маълумот, ҳуҷҷатҳо ва/ё маводде, ки тибқи Протоколи мазкур гирифта шудаанд, махфӣ ҳисобида мешаванд ва ба розигии хаттии Тарафе, ки маълумот додааст, ба шахсони сеюм дода намешаванд.

МОДДАИ 5 РАВАНДИ ТАТБИҚ

1. Тарафҳо номгӯйи шахсони мансабдори дахлдори гумрукро муйаян мекунанд, ки барои барқарор кардани робитаҳои мустақим бо мақсадҳои зерин ваколатдоранд:

a)таҳия ва мувофиқа кардани шартҳои техникии мубодилаи маълумот ва технологияи интиқоли маълумот, инчунин талабот ба амнияти маълумот,

b)бартараф намудани мушкилоти техникӣ, ки дар ҷараёни татбиқи Протоколи мазкур ба миён меояд.

2. Тарафҳо якдигарро дар бораи ҳама гуна тағйироту иловаҳо тариқи шахси ваколатдор дар шакли хаттӣ огоҳ мекунанд.

3. Тарафҳо забони англисиро ҳамчун забони корӣ барои интиқоли маълумот истифода мебаранд.

4. Тарафҳо дар давоми шаш моҳ аз санаи ба имзо расидани Протоколи мазкур анҷоми чорабиниҳои заруриро мувофиқа мекунанд.

МОДДАИ 6 СОЗИШНОМАҲОИ ДИГАР

Муқаррароти Протоколи мазкур ба ҳуқуқ ва уҳдадориҳои Тарафҳое, ки аз дигар созишномаҳо ва конвенсияҳои байналмилалӣ бармеоянд, таъсир намерасонанд.

МОДДАИ 7 ВОРИД НАМУДАНИ ТАҒЙИРУ ИЛОВАҲО ВА ҲАЛЛИ БАҲСҲО

1. Тағйиру иловаҳо ба Протоколи мазкур метавонанд бо розигии хаттии Тарафҳо ворид карда шаванд. Чунин тағйиру иловаҳо дар шакли протоколҳои алоҳида, ки қисми ҷудонашавандаи Протоколи мазкур мебошанд, ба расмият дароварда шуда, тибқи муқаррароти моддаи 8 Протоколи мазкур эътибор пайдо мекунанд.

2. Ҳама гуна ихтилофоте, ки метавонад дар робита бо тафсир ва ё татбиқи Протоколи мазкур ба миён оянд, тавассути гуфтушунид ва машварат байни Тарафҳо ҳал карда мешаванд. Масъалаҳои ҳалношуда дар ҷараёни чунин раванд тавассути роҳҳои дипломатӣ ҳал карда мешаванд.

МОДДАИ 8 МУҚАРРАРОТИ НИҲОӢ ВА ҚАТЪИ ПРОТОКОЛ

1. Протоколи мазкур аз рӯзи имзои он эътибор пайдо мекунад.

2. Ҳар яке аз Тарафҳо метавонад амали Протоколи мазкурро қатъ кунад, ба шарте ки Тарафи дигар пешакӣ дар бораи нияти қатъ кардани амали протокол огоҳ карда бошад. Дар ин ҳолат амали Протокол се моҳ пас аз санаи чунин огоҳинома қатъ карда мешавад.

3. Қатъи амали Протоколи мазкур ба анҷоми ҳама гуна ҳамкорӣ, ки дар давоми муҳлати татбиқи он мувофиқа шудааст, монеъ намешавад.

4. Уҳдадориҳои Тарафҳо, аз ҷумла риояи махфияти маълумот ҳатто дар сурати бекор кардани Протокол нигоҳ дошта мешаванд.

Дар шаҳодати он, имзокунандагони зерин, ки барои ин ваколатдор шудаанд, Протоколи мазкурро баимзо расонид.

Дар ../.../... дар се нусхаи асл, ҳар яке бо забонҳои тоҷикӣ, туркӣ ва англисӣ ба имзо расонида шуд, зимнан ҳамаи матнҳо эътибори якхела доранд. Ҳангоми ба вуҷуд омадани ихтилофот дар тафсири муқаррароти Протоколи мазкур, ба матни забони англисӣ афзалият дода мешавад.

1.Рамзи ҷавобгар

2.Аломати содирот/воридот: E-содирот, I-Воридот

3.Сол

4.Давра

5.Рамзи кишвари шарик

6.Рамзи мол аз рӯйи НМ ФИХ (6 рақам)

7.Оморӣ, арзиши мол,. долл. ИМА

8.Вазни мол (нетто, кг)

9. Миқдор дар воҳиди иловагии ченак

10. Рамзи воҳиди иловагии ченкунӣ