ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Туркия дар бораи ёрии ҳамдигарии маъмурӣ дар масъалаҳои гумрукӣ маъқул дониста шавад.

2. Сардори Хадамоти гумруки назди Ҳукумати Ҷумҳурии Тоҷикистон Созишномаи мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон мутобиқи тартиби муқарраргардида сана ва маҳалли имзои Созишномаи мазкурро бо ҷониби Туркия мувофиқа намояд. 

СОЗИШНОМА БАЙНИ ҲУКУМАТИ ҶУМҲУРИИ ТОҶИКИСТОН ВА ҲУКУМАТИ ҶУМҲУРИИ ТУРКИЯ ДАР БОРАИ ЁРИИ ҲАМДИГАРИИ МАЪМУРӢ ДАР МАСЪАЛАҲОИ ГУМРУКӢ

Ҳукумати Ҷумҳурии Тоҷикистон ва Ҳукумати Ҷумҳурии Туркия, ки минбаъд «Тарафҳо» номида мешаванд;

бо дарназардошти пешгирии зарар ба манфиатҳои иқтисодӣ, тиҷоратӣ, молиявӣ (фискалӣ), иҷтимоӣ, фарҳангӣ ва саломатии ҷомеаи кишварҳо, ки дар натиҷаи вайрон кардани қонунгузории гумрукӣ расонида мешавад,

бо дарназардошти аҳаммияти баҳодиҳии дақиқи боҷҳои гумрукию андоз ва ҳама гуна пардохтҳои дигар, ҳангоми воридоту содирот ва таъмини иҷрои дурусти чораҳои мушаххаси мамнуияту маҳдудият ва назорат,

бо мақсади ба роҳ мондани ҳамкории байналмилалӣ дар масъалаҳои марбут ба татбиқ ва иҷрои қонунгузории гумрукӣ,

бо мақсади афзоиши нигаронии ҷаҳон ба амният ва содагардонии занҷираи байналмиллалии таъминоти савдо ва қарори Шурои ҳамкориҳои гумрукии Созмони умумиҷаҳонии гумрук аз июни соли 2002 ҷиҳати амалисозии онҳо,

бо итминон ба самаранокии фаъолият бар зидди ҳуқуқвайронкуниҳои гумрукӣ дар асоси қоидаҳои муайяншудаи ҳуқуқие, ки дар Созишномаи мазкур пешбинӣ шудаанд, тавассути ҳамкории зич байни маъмуриятҳои гумрукии ҷонибҳо,

бо нигаронӣ ба миқёс ва тамоюли афзоиши гардиши ғайриқонунии воситаҳои нашъадор ва моддаҳои прекурсорҳое, ки ба саломатии инсон ва ҷомеа хатар доранд,

ҳамзамон, бо такя ба конвенсияҳои байналмиллалии дахлдор, ки ёрии дутарафаро ташвиқ менамоянд, инчунин тавсияҳо оид ба ҳамин мавзуъ, аз ҷумла тавсиянома оид ба ёрии байниҳамдигарии маъмурӣ, ки 5 декабри соли 1953 Шурои ҳамкориҳои гумрукӣ қабул кардааст,

ба мувофиқаи зерин расиданд:

Моддаи 1 Мафҳумҳо

Барои мақсадҳои Созишномаи мазкур калимаҳо ва ибораҳои зерин чунин маъноро доранд, агар дар матн тартиби дигаре пешбинӣ нашуда бошад:

а) «Маъмурияти гумрукӣ»

- аз ҷониби Ҷумҳурии Тоҷикистон - Хадамоти гумруки назди Ҳукумати Ҷумҳурии Тоҷикистон;

- аз ҷониби Ҷумҳурии Туркия - Вазорати савдо;

б) «қонунгузории гумрукӣ» - қонунҳо ва қоидаҳое мебошанд, ки аз ҷониби Тарафҳои аҳдкунанда барои воридот, содирот интиқол ва транзити молҳо ё воситаҳои пардохт, нисбат ба боҷҳои гумрукӣ, аз ҷумла боҷҳои ҷубронӣ ва зиддидемпингӣ, андозҳо ва дигар пардохтҳо ё чораҳои вобаста ба татбиқи мамнуият, маҳдудият ва назорат равона гардида, маъмурикунонӣ ва иҷрои онҳо ба зиммаи Тарафҳои аҳдкунанда вогузор карда шудааст;

в) «ҳуқуқвайронкунии гумрукӣ» - ҳама гуна вайронкунӣ ё кӯшиши вайрон кардани қонунгузории гумрукӣ;

г) «маълумот» - ҳама гуна иттилоот, ҳуҷҷатҳо, ҳисоботҳо, нусхаҳои тасдиқшудаи онҳо ё дигар маълумот, аз ҷумла нусхаҳои электронӣ;

ғ) «шахси мансабдор» - ҳама гуна корманди гумрук ё дигар агенти давлатие, ки барои татбиқи қонунгузории гумрукӣ таъин шудаанд;

д) «боҷҳои гумрукӣ ва андозҳо» - ҳама боҷҳои гумрукӣ ва дигар боҷҳо, андозҳо, пардохтҳо ё пардохтҳое, ки ҳангоми воридот ё содироти мол, ё вобаста ба он ситонида мешаванд, ғайр аз хироҷ ва пардохтҳое, ки маблағи онҳо бо арзиши тахминии хизматрасонии пешниҳодшуда маҳдуданд;

е) «шахс» - тамоми шахсони вокеӣ ва ҳуқуқӣ, агар дар матн тартиби дигаре пешбинӣ нашуда бошад;

ё) «маълумоти шахсӣ» - ҳама гуна маълумоте, ки ба шахси воқеии муайян ё муайяншаванда дахл дорад;

ж) «маъмурияти дархостшаванда» - маъмурияти гумрукие, ки аз он ёрӣ дархост карда мешавад;

з) «маъмурияти дархосткунанда» - маъмурияти гумрукие, ки ёрӣ дархост мекунад;

к) «занҷираи байналмилалии таъминоти савдо» - ҳама равандҳое, ки бо интиқоли фаромарзии молҳо аз маҳалли истеҳсол то макони таъиноти ниҳоӣ алоқаманданд;

л) «маводди нашъадор» ҳама гуна моддаҳои табиӣ ё синтетикие, ки дар Рӯйхати I ва Рӯйхати II Конвенсияи ягона оид ба маводди мухаддири соли 1961 номбар шудаанд;

м) «моддаҳои психотропӣ» - ҳама гуна моддаҳои табиӣ ё синтетикие, ки дар рӯйхатҳои I, II, III ва IV Конвенсияи СММ оид ба моддаҳои психотропӣ аз соли 1971 номбар шудаанд;

н) «прекурсорҳо» - моддаҳои химиявии назоратшавандае, ки дар истеҳсоли воситаҳои нашъадор ва моддаҳои психотропӣ истифода мешаванд, ки дар рӯйхатҳои I ва II Конвенсияи СММ оид ба муомилоти ғайриқонунии воситаҳои нашъадор ва моддаҳои психотропӣ аз соли 1988 номбар шудаанд;

о) «ҳудуд» - ҳудуди хушкӣ, обҳои дохилӣ, баҳри ҳудудӣ ва фазои ҳавоии болои онҳо, инчунин минтақаҳои баҳрие, ки Тарафҳо мутобиқи ҳуқуқи байналмилалӣ бо мақсади ҷустуҷӯ, истифода ва ҳифзи захираҳои табиии зинда ё ғайризиндае, ки нисбати онҳо ҳуқуқи ихтиёрдорӣ доранд.

Моддаи 2 Доираи амали Созишнома

1. Маъмуриятҳои гумрукӣ тибқи шартҳои Созишномаи мазкур бо мақсади татбиқи дурусти қонунгузории гумрукӣ, пешгирӣ, тафтиш ва мубориза бо ҳуқуқвайронкуниҳои гумрукӣ ва таъмини амнияти занҷираи савдои байналмилалӣ ба ҳамдигар ёрӣ мерасонанд.

2. Ҳама гуна ёрӣ дар доираи Созишномаи мазкур аз ҷониби ҳар маъмурияти гумрукӣ тибқи муқаррароти қонунгузории миллӣ ва маъмурии он ва дар доираи салоҳияту захираҳои мавҷудаи он расонида мешавад.

3. Созишномаи мазкур ёрии мутақобилаи маъмурии байни ду маъмурияти гумрукиро дар бар мегирад ва ба созишномаҳо дар бораи ёрии ҳуқуқии мутақобилаи тарафҳои онҳо таъсир намерасонад. Агар ёрии мутақобила аз ҷониби мақомоти дигари Тарафҳо расонида шавад, маъмурияти дархостшуда ин мақомотро муайян менамояд ва дар ин робита агар Созишнома ё тавофуқи дахлдор бошад, онро нишон медиҳад.

4. Муқаррароти Созишномаи мазкур ба ягон шахси воқеӣ ҳуқуқ намедиҳад, ки ягон далелро ба даст оварад, манъ ё истисно кунад, ё ба иҷрои дархост монеа эҷод намояд.

Моддаи 3 Маълумот оид ба татбиқ ва иҷрои қонунгузории гумрукӣ

1. Маъмуриятҳои гумрукӣ тибқи дархост ё бо ташаббуси худ ба ҳамдигар маълумоте пешниҳод менамоянд, ки ба таъмини татбиқи дурусти қонунгузории гумрукӣ, пешгирӣ, тафтиш ва мубориза бо ҳуқуқвайронкуниҳои гумрукӣ ва амнияти занҷираи байналмиллалии савдо мусоидат мекунад. Чунин маълумотро метавонад дар бар гирад:

а) усулҳои нави ҳифзи ҳуқуқие, ки самаранокии худро исбот кардаанд;

б) тамоюлҳо, воситаҳо ё усулҳои нави содир намудани ҳуқуқвайронкуниҳои гумрукӣ;

в) моле, ки объекти ҳуқуқвайронкунии гумрукӣ мебошад, инчунин усулҳои нақлиёт ва нигоҳдории нисбати ин молҳо истифодашаванда;

г) ҳама гуна маълумот дар бораи фаъолияти банақшагирифташуда, ҷоришаванда ё анҷомдодашудае, ки барои боварӣ ҳосил кардани ҳуқуқвайронкунии гумрукӣ дар ҳудуди Тарафи дигар асосҳои воқеӣ доранд;

ғ) ашхосе, ки дар содир намудани ҳуқуқвайронкунии гумрукӣ маълуманд, ё ба содир намудани ҳуқуқвайронкунии гумрукӣ гумонбар шудаанд;

д) ҳама гуна маълумоти дигаре, ки метавонад ба маъмурияти гумрукӣ дар арзёбии хатарҳо бо мақсади назорат ва мусоидат намудан ёрӣ расонад;

е) таҷрибаи беҳтарини ҳарду маъмурияти гумрукӣ.

2. Мувофиқи дархост Маъмурияти дархостшаванда ба Маъмурияти дархосткунанда маълумотро дар бораи:

а) молҳое, ки ба ҳудуди Тарафи дархосткунанда ворид карда шудаанд, ба таври қонунӣ аз ҳудуди тарафи дархостшуда бароварда шудаанд;

б) моли аз ҳудуди Тарафи дархосткунанда содиршуда, оё ба ҳудуди маъмурияти дархостшаванда қонунӣ ворид карда шудааст ё не, инчунин хизматрасонии гумрукӣ, дар сурати мавҷуд будани чунин ҳолате, ки тибқи он мол ҷойгир гардида буд, пешниҳод менамояд.

3. Маъмурияти дархостшаванда тибқи дархост бидуни расонидани зарар ба моддаи 15 ва бо мақсади ёрӣ ба татбиқи дурусти қонунгузории гумрукӣ ё пешгирии қаллобии гумрукӣ маълумотеро пешниҳод намояд, ки шубҳанокӣ ё дурустии декларатсияро муайян сохта, ба Маъмурияти дархосткунанда ёрӣ расонад.

4. Дар дархост бояд маълумоти мушаххаси дархостшуда нишон дода шавад.

5. Маъмуриятҳои гумрукӣ метавонанд тибқи созиши мутақобила мутобиқи моддаи 18 ҳама гуна иттилооти дар Созишнома пешбинишударо, ба таври автоматӣ мубодила намоянд.

6. Маъмуриятҳои гумрукӣ метавонанд тибқи Созишномаи мутақобила дар асоси моддаи 18 маълумоти мушаххасро пеш аз ворид шудани борҳо ба ҳудуди Тарафи дигар мубодила намоянд.

Моддаи 4 Ёрии нобаҳангом

Дар ҳолатҳое, ки метавонад ба иқтисодиёт, саломатии аҳолӣ, амнияти ҷамъиятӣ, аз ҷумла ба амнияти занҷираи таъминоти байналмилалии савдо ё дигар манфиатҳои ҳаётан муҳимми ҳар як Тараф зарари ҷиддӣ расонад, Маъмурияти гумрукии Тарафи дигар то ҳадди имкон бо ташаббуси худ ёрии фаврӣ мерасонад.

Моддаи 5 Назорат

Дар асоси дархост Маъмурияти дархостшаванда ба қадри имкон назоратро идома дода, ба Маъмурияти дархосткунанда дар бораи маълумоти зерин хабар медиҳад:

a) молҳое, ки ҳангоми интиқол ё нигоҳдорӣ маълуманд, ки барои содир кардани ҷинояти гумрукӣ дар ҳудуди Тарафи дархосткунанда истифода ё гумонбар дониста шудаанд;

б) воситаҳои нақлиёте, ки маълуманд, ки барои содир кардани ҷинояти гумрукӣ дар ҳудуди Тарафи дархосткунанда истифода шудаанд ё гумонбар дониста мешаванд;

в) биноҳое, ки дар ҳудуди Тарафи дархостшуда истифода шудаанд ё дар робита ба содир намудани ҳуқуқвайронкунии гумрукӣ дар ҳудуди Тарафи дархосткунанда гумонбар дониста мешаванд;

г) шахсоне, ки ҷинояти гумрукӣ содир кардаанд ё дар қасди содир кардани он дар ҳудуди Тарафи дархосткунанда гумонбар дониста мешаванд, хусусан онҳое, ки ба ҳудуди Тарафи дархостшуда ворид ва хориҷ мешаванд.

Моддаи 6 Интиқоли назоратшаванда

1. Маъмуриятҳои гумрукии Тарафҳо дар доираи қонунгузории миллӣ ва салоҳияти худ бо мақсади ошкор намудани шахсоне, ки дар муомилоти ғайриқонунӣ ширкат меварзанд, усули таҳвили назоратшавандаро метавонанд мувофиқа намоянд.

2. Интиқоли назоратшаванда метавонад дар шакли бетағйир мондани бор, дар марҳилаи мобайнӣ бардоштан ё ҳабс кардани бор, пурра ё қисман иваз намудани бор сурат гирад.

3. Маъмуриятҳои гумрукии Тарафҳо шакл ва воситаҳои дархостро дар ҳар як ҳолати интиқоли назоратшаванда, инчунин дар ҳисоббаробаркуниҳои молиявӣ танзим менамоянд.

4. Аз натиҷаҳои интиқоли назоратшаванда Тарафҳо дар муҳлати кутоҳтарин огоҳ карда мешаванд.

Моддаи 7 Мутахассисон ва шоҳидон

Маъмурияти гумрукии дархостшуда тибқи дархост, метавонад ба шахсони мансабдори худ иҷозат диҳад, ки дар ҳудуди Тарафи дархосткунанда ба ҳайси коршинос ё шоҳид оид ба масъалаи марбут ба татбиқи қонунгузории гумрукӣ ба суд ҳозир шаванд, ба шарте ки муқаррароти моддаи 17-и Созишномаи мазкур риоя карда шавад.

Моддаи 8 Маълумот дар бораи муомилоти ғайриқонунии молҳои ҳасос

1. Маъмуриятҳои гумрукӣ бо ташаббуси худ ё тибқи дархост тамоми маълумоти дахлдор оид ба ҳама гуна амалҳои банақшагирифташуда ё ҷорие, ки вайронкунии қонунгузории гумрукии Тарафҳоро оид ба муомилоти ғайриқонунӣ ташкил медиҳад, ё имконияти ташкил доданро дорад, ба ҳамдигар пешниҳод менамоянд:

а) силоҳ, фазопаймоҳо (ракетаҳо), маводди тарканда ва маводди ҳастаӣ,

б) асарҳои санъати тасвирии дорои арзиши назарраси таърихӣ, фарҳангӣ ё археологӣ;

в) воситаҳои нашъадор, моддаҳои психотропӣ, прекурсорҳо ва моддаҳои заҳролуд, инчунин моддаҳое, ки барои муҳити зист ва саломатии аҳолӣ хатарноканд,

г) молҳои дуздӣ ва қалбакӣ,

д) навъҳои набототу ҳайвонот, инчунин маҳсулоти онҳо, ки дар зери хатари нобудшавӣ қарор доранд.

2. Маълумоте, ки мутобиқи ҳамин модда гирифта шудааст, метавонад ба идораҳои дахлдори давлатии Тарафи дархосткунанда ирсол карда шавад. Аммо он набояд ба кишварҳои сеюм интиқол дода шавад.

Моддаи 9 Интиқоли дархостҳо

1. Дархостҳо оид ба ёрӣ тибқи Созишномаи мазкур бевосита ба дигар маъмурияти гумрукӣ ирсол карда мешаванд. Ҳар як Маъмурияти гумрукӣ барои ин мақсад шахси тамосро таъин мекунад.

2. Дархостҳо оид ба ёрӣ тибқи Созишномаи мазкур бояд дар шакли хаттӣ ё электронӣ пешниҳод карда шаванд ва бо ҳама гуна иттилооте, ки барои иҷрои чунин дархостҳо муфид ҳисобида мешаванд, ҳамроҳ карда шавад. Маъмурияти дархостшаванда метавонад тасдиқи хаттии дархостҳои электрониро талаб намояд. Бо тақозои вазъ дархост метавонад ба таври шифоҳӣ низ пешниҳод гардад. Чунин дархостҳо бояд ҳарчи зудтар дар шакли хаттӣ ё агар барои ҳарду маъмурияти гумрукӣ мақбул бошад, тавассути воситаҳои электронӣ тасдиқ карда шавад.

3. Дархостҳо бояд ба забони англисӣ пешниҳод карда шаванд. Ҳама ҳуҷҷатҳое, ки ба чунин дархост ҳамроҳ карда мешаванд, бояд ба андозаи зарурӣ ба забони англисӣ тарҷума гарданд.

4. Дархостҳо оид ба ёрӣ дар доираи Созишномаи мазкур бояд тафсилоти зеринро дар бар гиранд:

а) номи маъмурияти дархосткунанда;

б) масъалаи гумрукии баррасишаванда, намуди ёрии дархостшуда ва сабаби дархост;

в) тавсифи мухтасари парвандаи баррасишаванда ва унсурҳои маъмурию ҳуқуқии он;

г) ному насаб, инчунин суроғаи шахсоне, ки дархост ба онҳо дахл дорад, агар маълум бошанд;

ғ) санҷишҳое, ки мутобиқи банди 4 моддаи 3 гузаронида шудаанд;

д) маълумотнома мутобиқи банди 2 моддаи 15.

5. Агар маъмурияти дархосткунанда талаб намояд, ки тартиби муайян ё методология риоя карда шавад, маъмурияти дархостшаванда бо дарназардошти муқаррароти қонунгузории миллӣ ва маъмурии худ чунин дархостро иҷро менамояд.

6. Маълумоти аслӣ танҳо дар ҳолатҳое талаб карда мешавад, ки нусхаҳои онҳо нокифоя бошанд ва дар фурсати аввал баргардонида шаванд. Ҳуқуқҳои маъмурияти дархостшуда ё шахсони сеюми марбут ба он бетағйир мемонанд.

Моддаи 10 Воситаи гирифтани маълумот

1. Агар маъмурияти дархостшаванда маълумоти дархостшударо надошта бошад, он барои гирифтани ин маълумот ташаббус зоҳир менамояд.

2. Агар маъмурияти дархостшаванда мақоми дахлдори оғоз намудани таҳқиқ барои гирифтани маълумоти дархостшаванда набошад, он метавонад ба ғайр аз нишон додани мақоми дахлдор дархостро ба ин мақоми дахлдор ирсол намояд.

Моддаи 11 Ҳузури мансабдорон дар ҳудуди тарафи дигар

1. Дар сурати дархости хаттӣ ва бо мақсади тафтиши ҳуқуқвайронкунии гумрукӣ мақомоти аз ҷониби дархосткунанда таъиншуда метавонанд бо иҷозати мақомоти дархосткунанда ва бо дарназардошти шартҳое, ки ин мақомот муайян кардааст:

а) дар идораҳои маъмурияти дархостшаванда ҳуҷҷатҳо ва ҳама гуна маълумоти дигарро оид ба ҳуқуқвайронкунии гумрукӣ баррасӣ мекунад ва нусхаи онҳо пешниҳод карда мешавад;

б) дар рафти пурсиш, ки аз ҷониби маъмурияти дархостшаванда оид ба дархости маъмурияти дархосткунанда гузаронида мешавад, ҳозир бошад. Шахсони мансабдор танҳо нақши машваратӣ доранд.

2. Маъмурияти дархостшаванда метавонад аз маъмурияти дархосткунанда хоҳиш намояд, ки шахсони мансабдори худро барои расонидани ёрӣ дар иҷрои дархост, бо дарназардошти ҳама гуна шартҳои муайянкардаи худ фиристад.

Моддаи 12 Ташкили ташрифи шахсони расмӣ

1. Ҳангоме ки шахсони мансабдори ҳар як Тараф тибқи шартҳои Созишномаи мазкур дар ҳудуди Тарафи дигар ҳузур доранд, онҳо бояд ҳамеша ба забони барои Тарафи дигар мақбул ҳуҷҷати шахсият ва мақоми худро дар Идораи гумруки онҳо ё дигар мақомоти давлатӣ пешниҳод намоянд.

2. Шахсони мансабдоре, ки дар ҳудуди Тарафи дигар тибқи Созишномаи мазкур ҳузур доранд, аз ҳамон ҳимояе, ки ба кормандони гумруки он Тараф дода шудааст, ба андозаи пешбининамудаи муқаррароти ҳуқуқӣ ва маъмурӣ истифода менамоянд ва чунин шахсони мансабдор барои ҳар як ҷинояти содиркардаашон ҷавобгар мебошанд.

Моддаи 13 Истифодаи маълумот

1. Ҳама гуна иттилооте, ки тибқи Созишномаи мазкур гирифта мешавад, танҳо аз ҷониби маъмурияти гумрукии Тарафҳо ва танҳо бо мақсади ёрии маъмурӣ тибқи шартҳои дар Созишномаи мазкур муқарраршуда истифода мешавад.

2. Тибқи дархост маъмурияти гумрукие, ки ин маълумотро пешниҳод намудааст, метавонад ба дигар мақомот бо дарназардошти риояи ҳама шартҳои муайянгардида ҷиҳати истифодабарии дигар мақсадҳо иҷозат диҳад. Чунин истифодабарӣ бояд ба муқаррароти ҳуқуқӣ ва маъмурии Тарафе, ки мехоҳад маълумотро истифода намояд, мувофиқ бошад. Истифодаи дигари маълумот истифодабарие мебошад, ки дар тафтишоти ҷиноятӣ, таъқиб ё мурофи судӣ дида мешавад.

Моддаи 14 Махфият ва ҳифзи маълумот

1. Ҳама гуна маълумоте, ки тибқи Созишномаи мазкур ба даст оварда шудааст, бояд дар шакли махфӣ баррасӣ карда шавад ва ҳадди ақал ҳамон махфият ва муҳофизате, ки нисбат ба намудҳои шабеҳи чунин маълумот дар асоси талаботи ҳуқуқӣ ва маъмурии Тарафе, ки дастрас гардидааст, таъмин карда шавад.

2. Мубодилаи маълумоти шахсӣ дар доираи Созишномаи мазкур оғоз нахоҳад шуд то замоне, ки маъмуриятҳои гумрукӣ мувофиқи созиши мутақобила дар асоси моддаи 18 қарор қабул накунанд, ки чунин маълумот дар ҳудуди Тарафе, ки он гирифта мешавад, бо сатҳи муҳофизат таъмин гардида, ба талаботи муқарраршудаи қонунгузории миллии маъмурияти гумрукие, ки маълумотро пешниҳод намудааст, ҷавобгӯ бошад.

3. Дар сурати мавҷуд набудани созишномаи мутақобила, ки дар қисми 2 ҳамин модда зикр шудааст, пешниҳоди маълумоти шахсӣ танҳо дар сурате имконпазир мегардад, ки Маъмурияти гумрукии пешниҳодкунанда боварӣ дошта бошад, ки чунин маълумоти шахсӣ дар ҳудуди Тарафе, ки мувофиқи бандҳои 4-10 ҳамин модда пешниҳод мегардад, ҳифз карда шавад.

4. Мувофиқи дархост Маъмурияти гумрукие, ки маълумоти шахсиро қабул мекунад, бояд ба Маъмурияти гумрукии пешниҳодкунанда дар бораи истифодаи маълумот ва натиҷаҳои бадастомада хабар диҳад.

5. Маълумоти шахсии тибқи Созишномаи мазкур пешниҳодшуда танҳо дар вақти зарурӣ барои ноил шудан ба ҳадафе, ки он пешниҳод гардидааст, нигоҳ дошта мешавад.

6. Маъмурияти гумрукие, ки маълумоти шахсиро пешниҳод мекунад, то ҳадди имкон бояд одилона ва қонунӣ ҷамъоварӣ гардидани маълумотро таъмин намояд, он бояд дақиқ ва мувофиқ буда, нисбат ба ҳадафҳои пешбинигардида набояд аз ҳад зиёд бошад.

7. Агар маълумоти шахсии пешниҳодшуда нодуруст ё ғайри қобили мубодила гардад, дар ин бора бояд фавран огоҳнома ирсол карда шавад. Маъмурияти гумрукие, ки чунин маълумотро гирифтааст, бояд онро нобуд созад.

8. Маъмуриятҳои гумрукӣ пешниҳод ё гирифтани маълумоти шахсиро, ки тибқи Созишномаи мазкур мубодила мешавад, ба қайд мегиранд.

9. Маъмуриятҳои гумрукӣ барои ҳифзи маълумоти шахсии дар доираи Созишномаи мазкур мубодилашуда аз дастрасии беиҷозат, тағйирот ё паҳнкунӣ бояд чораҳои зарурии муҳофизатӣ андешанд.

10. Ҳар як Тараф мувофиқи муқаррароти ҳуқуқӣ ва маъмурии худ барои ҳама гуна зараре, ки дар доираи Созишномаи мазкур дар натиҷаи истифодаи маълумоти шахсии мубодилашуда ба шахс расонида шудааст, ҷавобгар мебошад. Инчунин ин масъала ба ҳолатҳое низ дахл дорад, ки зарар аз ҷониби маъмурияти гумрук ҳангоми пешниҳод намудани маълумоти нодуруст ё маълумоти хилофи Созишномаи мазкур расонида шудааст.

Моддаи 15 Истисноҳо

1. Дар доираи Созишномаи мазкур ёрӣ агар ба соҳибихтиёрӣ, амният ва тартиботи ҷамъиятӣ, сиёсати давлатӣ ё дигар манфиатҳои муҳимми миллии Тараф халал расонад, метавонад рад карда шавад ва ё бо дарназардошти чунин шартҳое, ки маъмурияти дархостшаванда талаб кардааст, расонида шавад.

2. Дар сурате, ки маъмурияти дархосткунанда дархости шабеҳи маъмурияти дархостшавандаро иҷро карда натавонад, вай ин далелро дар дархости худ қайд менамояд. Иҷрои ин гуна дархост ба салоҳияти маъмурияти дархостшаванда вобаста аст.

3. Ёрӣ дар сурате мавқуф гузошта мешавад, ки агар асосе барои халалдор намудани тафтишот, таъқиб ё мурофиаи ҷиноятӣ дошта бошад. Дар чунин маврид маъмурияти дархостшаванда бо маъмурияти дархосткунанда машварат мекунад, то муайян намояд, ки оё ёриро мувофиқи чунин шартҳое, ки маъмурияти дархостшаванда муайян кардааст, расонидан мумкин аст ё не.

4. Агар маъмурияти дархостшаванда чунин шуморад, ки кӯшишҳои зарурӣ барои иҷрои дархост ба манфиати пешбинишудаи маъмурияти дархосткунанда номутаносиб аст, он метавонад аз расонидани ёрии дархостшуда даст кашад.

5. Дар сурати рад ё мавқуф гузоштани ёрӣ, сабабҳои он нишон дода мешаванд.

Моддаи 16 Ёрии техникӣ

Маъмуриятҳои гумрукӣ тибқи барномаи мувофиқашуда ба ҳамдигар ёрии техникӣ мерасонанд, аз ҷумла:

а) мубодилаи иттилоот ва таҷриба дар истифодаи таҷҳизоти техникӣ барои назорат;

б) таълими кормандони мақомоти гумрук;

в) табодули коршиносон дар фаъолияти гумрукӣ;

г) мубодилаи иттилооти мушаххас, илмию техникие, ки бо истифодаи самараноки қонунгузории гумрукӣ алоқаманданд.

Моддаи 17 Хароҷот

1. Бо дарназардошти бандҳои 2 ва 3 ҳамин модда хароҷот ҳангоми татбиқи Созишномаи мазкур аз ҷониби маъмурияти дархостшаванда пардохт карда мешавад.

2. Хароҷот ва ёрдампулие, ки ба коршиносон ва шоҳидон дода мешавад, инчунин хароҷоти тарҷумонҳое, ки корманди давлатӣ нестанд, аз ҳисоби маъмурияти дархосткунанда пардохт карда мешаванд.

3. Агар иҷрои дархост хароҷоти дорои хусусияти назаррас ё фавқулодаро талаб намояд, маъмурияти гумрук барои муайян кардани шартҳои иҷрои дархост, инчунин тарзи пардохти хароҷот машварат менамоянд.

Моддаи 18 Татбиқи иҷрои созишнома

Маъмуриятҳои гумрукӣ дар бораи тадбирҳое, ки ба татбиқ ва мавриди амал қарор додани Созишномаи мазкур мусоидат менамоянд, қарор қабул мекунанд.

Моддаи 19 Доираи ҳудудӣ

Созишномаи мазкур дар ҳудудҳои Тарафҳо, ки дар қонунгузории миллӣ ва муқаррароти маъмурии онҳо муайян шудааст, татбиқ карда мешавад.

Моддаи 20 Дигар созишномаҳо

Муқаррароти Созишномаи мазкур ба ҳуқуқ ва уҳдадориҳои Тарафҳо, ки аз дигар шартномаҳо ва конвенсияҳои байналмилалӣ бармеоянд, таъсир намерасонад.

Моддаи 21 Ҳалли баҳсҳо

1. Ҳама гуна ихтилофоте, ки дар натиҷаи тафсир ё татбиқи Созишномаи мазкур ба миён меоянд, асосан бо роҳи гуфтушунидҳо ва машваратҳо байни мақомоти салоҳиятдор байни Тарафҳо ҳал карда мешаванд. Масъалаҳои ҳалнашуда тавассути ин раванд бо роҳҳои дипломатӣ ҳал карда мешаванд.

2. Ҳар яке аз Тарафҳо метавонад аз Тарафи дигар оид ба тафсир, татбиқ ва ислоҳи Созишномаи мазкур ё ҳалли ҳар гуна баҳси имконпазире, ки метавонад ба миён ояд, машварат пурсад.

3. Агар тартиби дигаре мувофиқа нашуда, ҳама гуна гуфтушунид ё машваратҳое, ки байни Тарафҳо дар доираи бандҳои 1 ё 2 ҳамин модда гузаронида мешаванд, бояд дар давоми бист (20) рӯзи баъди гирифтани дархости хаттӣ оғоз гарданд.

Моддаи 22 Тағйиру иловаҳо

1. Бо розигии хаттии мутақобилаи Тарафҳо, Созишномаи мазкур метавонад ҳама гуна тағйиру иловаҳо бо роҳҳои дипломатӣ ворид карда шаванд.

2. Чунин тағйиру иловаҳо дар шакли протоколҳои алоҳида, ки қисми таркибии Созишномаи мазкур ба шумор мераванд, ба расмият даровардашуда, тибқи муқаррароти моддаи 23 Созишномаи мазкур эътибор пайдо мекунанд.

Моддаи 23 Эътибор ва қатъи амал

1. Созишномаи мазкур дар рӯзи сиюми баъди гирифтани охирин огоҳиномаи хаттӣ, ки тавассути он Тарафҳо дар бораи иҷрои расмиёти дохилидавлатии худ, ки барои эътибор пайдо кардани Созишнома зарурӣ, якдигарро тавассути роҳҳои дипломатӣ огоҳ менамоянд, эътибор пайдо мекунад.

2. Созишномаи мазкур ба муҳлати номуайян баста мешавад ва ҳар яке аз Тарафҳо метавонад бо ирсоли огоҳиномаи хаттӣ дар бораи нияти худ оид ба қатъ кардани Созишнома тавассути роҳҳои дипломатӣ онро қатъ намояд. Дар ин ҳолат Созишномаи мазкур дар давоми се (3) моҳ пас аз санаи чунин огоҳинома қатъ карда мешавад. Огоҳинома дар бораи қатъ кардан ба амалиёти транзитӣ, ки аллакай оғоз шуда буд, таъсир намерасонад. Қатъи амал ба расмиёти ҷорӣ дар лаҳзаи қатънамоӣ таъсир нарасонида, бояд тибқи муқаррароти ҳуҷҷати мазкур анҷом дода шавад.

3. Уҳдадориҳои Тарафҳо, аз ҷумла махфияти маълумот ҳатто дар сурати қатъ гардидани амали Созишномаи мазкур идома меёбанд.

Бо ҳамин хотир, имзогузорандагон, ки ба таври дахлдор ваколатдор шудаанд, Созишномаи мазкурро ба имзо расониданд.

Дар.... дар .../.../... дар ду нусхаи аслӣ, бо забонҳои тоҷикӣ, туркӣ ва англисӣ, ки ҳамаи матнҳо эътибори якхела доранд, ба имзо расонида шуд. Дар ҳолати ба вуҷуд омадани ихтилофот дар тафсири муқаррароти Созишномаи мазкур, ба матни забони англисӣ афзалият дода мешавад.