ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Созишнома байни Ҳукумати Ҷумҳурии Тоҷикистон ва Ҳукумати Иттиҳоди Доминика оид ба мутақобилан озод намудани талаботи раводид барои дорандагони шиносномаҳои дипломатӣ, хизматӣ ва умумишаҳрвандии хориҷӣ маъқул дониста шавад.

2. Вазири корҳои хориҷии Ҷумҳурии Тоҷикистон Созишномаи мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон бо тартиби муқарраргардида сана ва маҳалли баимзорасонии Созишномаи мазкурро бо ҷониби Доминика мувофиқа намояд.

Созишнома байни Ҳукумати Ҷумҳурии Тоҷикистон ва Ҳукумати Иттиҳоди Доминика оид ба мутақобилан озод намудани талаботи раводид барои дорандагони шиносномаҳои дипломатӣ, хизматӣ ва умумишаҳрвандии хориҷӣ

Ҳукумати Ҷумҳурии Тоҷикистон ва Ҳукумати Иттиҳоди Доминика, ки минбаъд Тарафҳо номида мешаванд,

бо нияти таҳким ва густариши муносибатҳои дӯстонаи ҳамдигар

ба мувофиқаи зайл расиданд:

Моддаи 1

Шиносномаҳои дар Созишномаи мазкур дарҷшуда инҳоянд:

1. Дар Ҷумҳурии Тоҷикистон: шиносномаҳои амалкунандаи дипломатӣ, хизматӣ ва умумишаҳрвандии хориҷӣ;
2. Дар Иттиҳоди Доминика: шиносномаҳои амалкунандаи дипломатӣ, хизматӣ ва оддӣ.

Моддаи 2

Шаҳрвандони Тарафҳо, ки дорандагони шиносномаҳои дар моддаи 1 Созишномаи мазкур мушаххасшуда мебошанд, метавонанд дар муддати навад (90) рӯз аз рӯзи воридшавӣ ба ҳудуди Тарафи дигар бе раводиди воридшавӣ ворид, убур ва хориҷ шаванд.

Моддаи 3

Шаҳрвандони Тарафҳо, ки дорандагони шиносномаҳои дар моддаи 1 Созишномаи мазкур мушаххасшуда мебошанд ва аъзои ҳайати дипломатӣ/консулӣ ё созмонҳои байналмилалии дар ҳудуди Тарафи дигар аккредитатсия шудаанд, дар илова ба аъзои оилаи бо онҳо иқоматкунанда, ки дорандагони шиносномаҳои дар моддаи 1 Созишномаи мазкур мушаххасшуда мебошанд, бо шарте ки расмиёти аккредитатсияро дар муддати сӣ (30) рӯз аз рӯзи воридшавӣ ба итмом расонанд, метавонанд ба ҳудуди Тарафи дигар бе раводиди воридшавӣ дар муҳлати фаъолияти таъиноти худ ворид, убур ё хориҷ шаванд.

Моддаи 4

Дорандагони шиносномаҳои дар моддаи 1 Созишномаи мазкур мушаххасшуда метавонанд танҳо аз нуқтаҳои гузаргоҳи байналмилалии сарҳадии қонунӣ сарҳадро гузар намоянд.

Моддаи 5

Ҳар ду Тараф ҳуқуқ доранд:

1. Воридшавӣ ё будубоши шаҳрвандони Тарафи дигарро бо сабабҳои амнияти давлатӣ, тартиботи ҷамъиятӣ ё саломатии аҳолӣ рад намояд.
2. Муддати будубоши шаҳрвандони Тарафи дигарро мутобиқи қонун ва қоидаҳои амалкунандаи кишвари қабулкунанда кӯтоҳ ё қатъ намояд.

Моддаи 6

Шаҳрвандони Тарафҳо, ки дорандагони шиносномаҳои дар моддаи 1 Созишномаи мазкур мушаххасшуда мебошанд, бояд қонунҳо ва қоидаҳои дар ҳудуди Тарафи дигар амалкунандаро ҳангоми убури сарҳад ё будубош дар ҳудуди Тарафи қабулкунанда риоя намоянд.

Моддаи 7

Ҳар яке аз Тарафҳо ҳуқуқи боздоштани татбиқшавии пурра ё ҷузъи Созишномаи мазкурро бо сабабҳои марбут ба амнияти давлатӣ, тартиботи ҷамъиятӣ ё саломатии аҳолӣ нигоҳ медорад. Дар ҳолати қабули чунин қарор, Тарафи дигар бояд дар шакли хаттӣ тавассути роҳҳои дипломатӣ огоҳонида шавад.

Моддаи 8

1. Бо мақсади татбиқи Созишномаи мазкур, мақомоти дахлдори Тарафҳо намунаи шиносномаҳои амалкунандаи дипломатӣ, хизматӣ ва умумишаҳрвандиро дар муддати сӣ (30) рӯзи пас аз баимзорасонии Созишномаи мазкур мубодила менамоянд.
2. Дар ҳолате, ки яке аз Тарафҳо шиносномаҳои дипломатӣ, хизматӣ ё умумишаҳрвандии навро судур намояд ё онҳоро иваз намояд, мақомоти ваколатдори ин ҷониб бояд мақомоти ваколатдори Тарафи дигарро огоҳ намуда, бо намунаи шиносномаҳои нав тавассути роҳҳои дипломатӣ сӣ (30) рӯз пеш аз истифодабарии чунин намуди шиносномаҳо таъмин намояд.

Моддаи 9

Ҳама гуна баҳсҳое, ки аз тафсир ва/ё татбиқи муқаррароти Созишномаи мазкур бармеоянд, бо роҳи машварат ва гуфтушунидҳои байни Тарафҳо тавассути роҳҳои дипломатӣ ҳаллу фасл карда мешаванд.

Моддаи 10

Созишномаи мазкур ё муқаррароти он метавонад дар шакли розигии хаттии Тарафҳо тағйир дода шавад; чунин тағйирот бо тартиби дар моддаи 11 Созишномаи мазкур пешбинишуда эътибор пайдо мекунад.

Моддаи 11

1. Созишномаи мазкур пас аз сӣ (30) рӯзи гирифтани огоҳиномаи охирини хаттӣ, ки дар он Тарафҳо ба якдигар тавассути роҳҳои дипломатӣ оид ба анҷом ёфтани расмиёти дохилидавлатие, ки барои эътибор пайдо кардани Созишномаи мазкур заруранд, огоҳ менамоянд, эътибор пайдо мекунад.
2. Созишномаи мазкур ба муҳлати номуайян то лаҳзае, ки як Тараф Тарафи дигарро дар шакли хаттӣ тавассути роҳҳои дипломатӣ роҷеъ ба нияти худ оид ба қатъ намудани он хабар медиҳад, эътибор дорад. Дар ин ҳолат Созишномаи мазкур баъд аз навад (90) рӯзи гирифтани чунин огоҳинома қатъ мегардад.

Бо тасдиқи он имзокунандагони зерин аз ҷониби ҳукуматҳои худ бо тартиби муқарраргардида ваколатдор шудаанд, Созишномаи мазкурро ба имзо расонанд.

Дар шаҳри _________________ «___» ________ соли 2024 дар ду нусхаи аслӣ бо забонҳои тоҷикӣ ва англисӣ, ки ҳар ду матн эътибори якхела доранд, ба имзо расонида шуд.