ҲУКУМАТИ ҶУМҲУРИИ ТОҶИКИСТОН 

ҚАРОР

Мутобиқи моддаи 12 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

Шартнома байни Ҳукумати Ҷумҳурии Тоҷикистон ва Ҳукумати Малайзия дар бораи ёрии мутақобилаи ҳуқуқӣ оид ба парвандаҳои ҷиноятӣ, ки 7 майи соли 2024 дар шаҳри Душанбе ба имзо расидааст, барои тасдиқ ба Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

Қарори Маҷлиси намояндагони Маҷлиси Олии Ҷумҳурии Тоҷикистон 

Мутобиқи моддаи 57 Конститутсияи Ҷумҳурии Тоҷикистон Маҷлиси намояндагони Маҷлиси Олии Ҷумҳурии Тоҷикистон қарор мекунад:

1. Шартнома байни Ҳукумати Ҷумҳурии Тоҷикистон ва Ҳукумати Малайзия дар бораи ёрии мутақобилаи ҳуқуқӣ оид ба парвандаҳои ҷиноятӣ, ки 7 майи соли 2024 дар шаҳри Душанбе ба имзо расидааст, тасдиқ карда шавад.

2. Ҳукумати Ҷумҳурии Тоҷикистон бо тартиби муқарраргардида Ҳукумати Малайзияро дар бораи аз ҷониби Ҷумҳурии Тоҷикистон иҷро гардидани расмиёти дохилидавлатие, ки барои эътибор пайдо кардани Шартномаи мазкур заруранд, огоҳ намояд.

ШАРТНОМА БАЙНИ ҲУКУМАТИ ҶУМҲУРИИ ТОҶИКИСТОН ВА ҲУКУМАТИ МАЛАЙЗИЯ ДАР БОРАИ ЁРИИ МУТАҚОБИЛАИ ҲУҚУҚӢ ОИД БАПАРВАНДАҲОИ ҶИНОЯТӢ

Ҳукумати Ҷумҳурии Тоҷикистон ва Ҳукумати Малайзия (ки минбаъд дар алоҳидагӣ “Тараф” ва дар якҷоягӣ “Тарафҳо” номида мешаванд),

бо хоҳиши баланд бардоштани самаранокии фаъолияти мақомоти ҳифзи ҳуқуқи Тарафҳо дар самти таъқиб ва тафтиши ҷиноятҳо, инчунин пайгирӣ, ба ҳабс гузоштан ва мусодира намудани даромад ва олоти ҷиноят тавассути ҳамкорӣ ва ёрии мутақобилаи ҳуқуқӣ оид ба парвандаҳои ҷиноятӣ,

ба мувофиқаи зайл расиданд:

МОДДАИ 1 ДОИРАИ ТАТБИҚ

1. Тарафҳо дар асоси ин Шартнома ва тибқи қонунгузории хеш ба якдигар доираи васеи ҳамкориҳоро дар самти таҳқиқ, тафтишот ва мурофиаи судӣ нисбат ба ҷиноятҳое, ки Тарафи дархосткунанда ҳангоми ирсол намудани дархост ба он ваколатдор мебошад, пешкаш менамоянд.
2. Ёрии мутақобилае, ки тибқи ин Шартнома расонида мешавад, инҳоро дар бар гирад:

а) гирифтани далелҳо ё баёноти шахсон;

б) мусоидат намудан ба шахсон барои додани нишондод ё расонидани кӯмак ба тафтишот, аз ҷумла интиқоли шахсони дар ҳабс қарордошта;

в) расонидан ва хизматрасонии санадҳои судӣ;

г) анҷом додани кофтуков ва мусодира;

ғ) азназаргузаронии ашёҳо ва маҳалҳо;

д) пешниҳоди ҳуҷҷатҳо ва сабтҳои дахлдор, аз ҷумла сабтҳои бонкӣ, молиявӣ, корпоративӣ ё тиҷоратӣ;

е) баргардонидан, ба ҳабс гузоштан ё мусодираи молу мулки марбуг ба ҷиноят;

ё) боздоштани амалҳо вобаста ба расмият даровардани ҳуқуқи моликият ё ба ҳабс гирифтани моликияте, ки метавонад дар робита бо ҷиноят баргардонида шавад;

ж) муайян кардани макони будубош ва шахсияти шоҳидон ва гумонбаршудагон;

з) муайян ё пайгирӣ кардани даромадҳо ва моликияти бо роҳи ҷиноят бадастомада, инчунин олоти барои содир намудани ҷиноят истифодашуда;

и) ситонидани ҷаримаҳои марбут ба ҷиноят;

ӣ) ҳама гуна шаклҳои дигари ёрӣ, ки бо қонунҳои Тарафи дархосткунанда манъ карда нашудаанд.

3. Шартномаи мазкур танҳо баҳри расонидани ёрии мутақобилаи Тарафҳо ба якдигар равона карда шудааст. Муқаррароти Шартномаи мазкур набояд ба манфиати ягон шахси алоҳида баҳри ба даст овардан, нест кардан ё истисно кардани ягон далел хизмат расонад ё ба иҷрои дархостҳо оид ба расонидани ёрии ҳуқуқӣ халал расонад.

МОДДАИ 2 МАҲДУДИЯТ ДАР ТАТБИҚИ ШАРТНОМА

1. Шартномаи мазкур нисбати инҳо татбиқ намегардад:

а) ҳабс кардан ва дар боздоштгоҳ нигоҳ доштани шахсон бо мақсади истирдоди онҳо;

б) иҷроиши ҳукмҳои судии қабулнамудаи Тарафи дархосткунанда дар ҳудуди Тарафи дархостшаванда, ба истиснои ҳолатҳое, ки қонунгузории Тарафи дархостшаванда онро имконпазир мешуморад;

в) интиқоли маҳкумшудагон барои адои минбаъдаи ҷазо;

г) супоридани парвандаҳои ҷиноятӣ барои тафтиши минбаъда.

2. Ин Шартнома ба ҳеҷ як Тараф иҷозат намедиҳад, ки дар ҳудуди Тарафи дигар амалиёт, чорабиниҳо ва вазифаву уҳдадориҳое, ки ба ваколати истисноии он Тараф вобаста мебошанд, ба амал барорад.

МОДДАИ 3 МАҲДУДИЯТҲО ҲАНГОМИ РАСОНИДАНИ ЁРИИ ҲУҚУҚӢ

1. Мақомоти марказии Тарафи дархостшаванда дархост оид ба расонидани ёрии ҳуқуқиро рад мекунад, агар ба хулосае ояд, ки:

а) дархост ба таҳқиқ, тафтиш ё ҷазо додани шахс барои содир намудани ҷинояти сиёсӣ бошад, ё ин ки ҳолатҳои эҳтимолии содиршавӣ ё содиршудаи он ба ҷиноятҳои сиёсӣ алоқаманд бошад;

б) дархост ба таҳқиқ, тафтиш ё ҷазо додани шахс барои содир намудани ҳаракат ё беҳаракатие ирсол шуда бошад, ки тибқи қонунҳои Тарафи дархостшаванда, агар дар ҳудуди Тарафи дархостшаванда содир мешуд, ҷинояти ҳарбӣ буда, тибқи қонунҳои умумии ҷиноятии Тарафи дархостшаванда ҷиноят набошад;

в) асосҳои кофӣ вуҷуд дошта бошанд, ки дархост бо мақсади таҳқиқ, тафтиш ё ҷазо додани шахс ё ба тариқи дигар расонидани зарар ба шахс аз рӯи нишонаҳои нажодӣ, динӣ, ҷинс, бавуҷудоии этникӣ, миллат ё афкори сиёсӣ ирсол карда шудааст.

г) дархост марбут ба таҳқиқ, тафтиш ё ҷазо додани шахс барои ҷинояте бошад, ки дар он шахс:

I. Аз ҷониби суди салоҳиятдор ё дигар мақомоти Тарафи дархосткунанда маҳкум, сафед ё бахшида шуда бошад; ё

II. ҷазоро тибқи қонуни Тарафи дархосткунанда барои ҳамон ҷиноят ё ҷинояти дигари ҳаракат ё беҳаракатиаш ба ҷинояти аввал монанд, адо карда бошад;

ғ) дархост ба таҳқиқ, тафтиш ё ҷазо додани шахс барои ҳаракат ё беҳаракатие бошад, ки дар ҳолати дар Тарафи дархостшаванда рух доданаш тибқи қонунҳои Тарафи дархостшаванда ҷиноят ҳисобида нашавад;

д) расонидани ёрии ҳуқуқӣ тавонад ба соҳибихтиёрӣ, амният, тартиботи ҷамъиятӣ ё дигар манфиатҳои ҷамъиятии Тарафи дархостшаванда таъсир расонад;

е) агар мақомоти марказии Тарафи дархосткунанда оиди истифодаи ашёи дархостшуда танҳо дар доираи дархости ёрии ҳукуқӣ ва парвандаи ҷиноятиро ба уҳда гирифта натавонад, дар ҳолате, ки мақомоти марказии Тарафи дархостшаванда оиди бекор кардани чунин талабот розӣ нашуда бошад;

ё) агар мақомоти марказии Тарафи дархосткунанда баъди ба итмом расидани тафтиши парвандаи ҷиноятӣ тибқи дархости мақомоти марказии Тарафи дархостшаванда оиди баргардонидани ҳама гуна ашё, ки тибки дархост гирифта шудааст, ба уҳда гирифта натавонад;

ж) расонидани ёрии ҳуқукӣ тавонад ба ҳар тафтишот ё мурофиаи ҷиноятӣ дар Тарафи дархостшаванда халал расонад; ё

з) расонидани ёрии ҳуқуқӣ андешидани чораҳоеро талаб кунад, ки хилофи қонунҳои Тарафи дархостшаванда бошад.

2. Мақомоти марказии Тарафи дархостшаванда метавонад дар ҳолатҳои мазкур аз расонидани ёрии ҳуқуқӣ даст кашад:

а) мақомоти марказии Тарафи дархосткунанда дар робита бо дархост шартҳои муҳими ин Шартнома ё дигар муқарраротро риоя накунад;

б) расонидани ёрии ҳуқуқӣ тавонад ё эҳтимолан метавонад ба амнияти дилхоҳ шахс, новобаста аз он, ки шахс дар ҳудуди Тарафи дархостшаванда ё берун аз он қарор дорад, зарар расонад; ё

в) иҷрои дархост оид ба ёрии ҳуқуқӣ хароҷоти аз ҳад зиёди Тарафи дархостшавандаро талаб намояд.

3. Барои мақсади татбиқи муқаррароти зербанди 1 (а) ҷиноятҳои зерин ҳамчун ҷиноятҳои дорои хусусияти сиёсидошта ҳисобида намешаванд:

а) ҷиноят ба муқобили ҳаёт ё шахсияти роҳбари давлат ё аъзои наздики оилаи роҳбари давлат;

б) ҷиноят ба муқобили ҳаст ё шахсияти раиси ҳукумат ё вазири ҳукумат;

в) ҷинояте, ки тибқи ҳар шартномаи байналмилалии бисёрҷониба, ки Тарафҳо иштирокчии он мебошанд, муқаррар шудааст ва дар он шартномаи байналмилалӣ қайд гардидааст, ки бо мақсади расонидани ёрии мутақобилаи ҳуқуқӣ вобаста ба парвандаҳои ҷиноятӣ он ҳамчун ҷинояти дорои хусусияти сиёсидошта ҳисобида нашавад; ва

г) ҳама гуна сӯиқасд, қасд ё шарикие, ки бо мақсади содир намудани дилхоҳ ҷиноятҳои пешбинишудаи зербандҳои “а-в” равона карда шудаанд.

4. Мақомоти марказии Тарафи дархостшаванда метавонад татбиқи ҳар муқаррароти дар банди 3 пешбинишударо манъ кунад, агар Тарафи дархосткунанда дар қонунҳои худ чунин маҳдудиятро муқаррар карда бошад.

5. Расонидани ёрии ҳуқуқӣ набояд бо сабаби махфияти фаъолияти бонкҳо ва ташкилотҳои молиявии ба он монанд ё агар ҷиноят ба масъалаҳои молиявӣ алоқаманд бошад, рад карда шавад.

6. Тарафи дархостшуда метавонад иҷроиши дархостро мавқуф гузорад, агар дарҳол иҷро намудани он ба ҳар тафтишоти дар истеҳсолот буда ё мурофиаи дигари ҷиноятӣ дар Тарафи дархостшаванда халал расонад.

7. Пеш аз рад кардан ё мавқуф гузоштани иҷрои дархост бо дастрасии модаи мазкур, мақомоти марказии Тарафи дархостшаванда бояд эҳтимолияти расонидани ёрии ҳуқуқиро бо шартҳои муайян баррасӣ намояд.

8. Агар Тарафи дархосткунанда ёрии ҳуқуқиро тибқи шартҳои дар банди 7 пешбинишуда қабул намояд, ӯ бояд чунин шарту шароитҳоро риоя намояд.

9. Агар мақоми марказии Тарафи дархостшаванда дархости ёрии ҳуқуқиро рад кунад ё ба таъхир гузорад, он бояд фавран ба мақомоти марказии Тарафи дархосткунанда дар бораи асосҳои радкунӣ ё ба таъхир гузоштани дархост хабар диҳад.

10. Тарафҳо ба зимма мегиранд, ки онҳо дар асоси қонунгузории дохилии худ ба якдигар ёрии ҳуқуқии ҳамсонро вобаста ба ҳамон намуди ҷиноят новобаста аз ҷазои барои он пешбинишуда мерасонанд.

МОДДАИ 4 ТАЪЙИНИ МАҚОМОТИ МАРКАЗӢ

1. Ҳар Тараф тибқи Шартномаи мазкур баҳри тавассути роҳҳои дипломатӣ ирсол намудан ва қабул намудани дархост оид ба расонидани ёрии ҳуқуқӣ мақомоти марказӣ таъин мекунад.

2. Барои Ҷумҳурии Тоҷикистон мақомоти марказӣ Прокуратураи генералии Ҷумҳурии Тоҷикистон ё шахси таъиннамудаи Прокуратураи генералии Ҷумҳурии Тоҷикистон мебошад.

3. Барои Малайзия мақомоти марказӣ Прокурори генералӣ ё шахси таъинкардаи Прокурори генералӣ мебошад.

4. Ҳар Тараф Тарафи дигарро фавран дар бораи ҳама гуна тағйирот вобаста ба мақомоти марказии худ огоҳ мекунад.

МОДДАИ 5 ШАКЛИ ДАРХОСТҲО

1. Дархостҳо оид ба расонидани ёрии ҳуқуқӣ бояд дар шакли хаттӣ ва ё ба қадри имкон, тавассути ҳама гуна воситақое, ки имконияти дар шакли хаттӣ сабт намудани дархостро дошта, Тарафи дархостшаванда аслияти онҳоро тасдиқ карда тавонад, пешниҳод карда шаванд. Дар ҳолатҳои фавқулода ва дар мавриде, ки қонунгузории Тарафи дархостшаванда иҷозат медиҳад, дархостҳо метавонанд дар шакли шифоҳӣ пешниҳод карда шаванд, аммо дар чунин ҳолатҳо дархостҳо бояд дар давоми даҳ рӯз дар шакли хаттӣ тасдиқ карда шаванд.

2. Мақомоти марказӣ ирсоли ҳама дархостҳо ва ҳама гуна муросилоти марбут ба онҳоро коркард мекунанд. Дар ҳолатҳои фавқулода ва дар мавриде, ки қонунгузории Тарафи дархостшуда иҷозат медиҳад, дархостҳо ва ҳама гуна муросилоти марбут ба онҳо тавассути Ташкилоти байналмилалии политсияи ҷиноятӣ (INTERPOL) интиқол дода мешаванд.

МОДДАИ 6 МУНДАРИҶАИ ДАРХОСТҲО

1. Дар дархост бояд маълумотҳое мавҷуд бошанд, ки барои Тарафи дархостшаванда, мақомоти таҳқиқ ё тафтиши ҷиноятӣ баҳри иҷрои он заруранд, аз ҷумла:

а) номи идораи дархосткунанда ва мақомоти салоҳиятдори пешбарандаи таҳкиқ ё тафтиши ҷиноятие, ки дархост ба он марбут аст;

б) мақсади дархост ва хусусияти ёрии ҳуқуқии дархостшуда;

в) тавсифи ҷинояте, ки дархост ба он вобастагӣ дорад, аз ҷумла ҷазои максималӣ;

г) ба истиснои дархостҳо вобаста ба хизматрасонии ҳуҷҷатҳои судӣ, тавсифи далелҳое, ки ҷиноят будани кирдорро тасдиқ мекунанд ва муқаррарот ё матни қонунҳои дахлдор;

ғ) ба истиснои дархостҳо вобаста ба хизматрасонии ҳуҷҷатҳои судӣ, тавсифи ҳаракат ё беҳаракатӣ, масъалаҳои баррасишаванда ё масъалаҳое, ки бояд тибқи дархост муайян карда шаванд;

д) тавсифи далелҳо, маълумот ё дигар ёрии ҳуқуқии дархостшуда;

е) мақсад ва мушаххасоти ҳар ҳаракати тафтишотӣ ё талаботе, ки Тарафи дархосткунанда мехоҳад иҷро шавад;

ё) мушаххас кардани муҳлати иҷроиши дархост;

ж) ҳар талаботи махсус оид ба махфияти иҷроиши дархост ва сабабҳои он; ва

з) дигар маълумоте, ки барои иҷрои дурусти дархост зарур аст.

2. Дар ҳолатҳои зарурӣ, дархостҳо оид ба расонидани ёрии ҳуқуқӣ инчунин метавонад маълумотҳои зеринро дар бар гиранд:

а) шахсият, шаҳрвандӣ на маҳалли ҷойгиршавии шахс ё шахсоне, ки мавзӯи таъқиб ё тафтиши ҷиноятӣ мебошанд;

б) шахсият ва маҳалли ҷойгиршавии шахсони нишондодашон зарурбуда;

в) шахсият ва маҳалли ҷойгиршавии шахси хидматшаванда, муносибати ӯ ба таъқиби ҷиноятӣ ва тартиби хизматрасонӣ;

г) маълумот дар бораи шахсият ва маҳалли ҷойгиршавии шахсе, ки бояд дарёфт карда шавад;

ғ) мушаххасоти чӣ гуна гирифтани баёнот ё нишондод ва сабт намудани он;

д) рӯйхати саволҳое, ки бояд аз шоҳид пурсида шаванд;

е) тавсифи ҳуҷҷатҳо, сабтҳо ё далелҳои шайъие, ки бояд гирифта шаванд, инчунин тавсифи шахси дахлдоре, ки гирифтани онҳо аз ӯ пурсида шавад ва агар тартиби дигаре пешбинӣ нашуда бошад, шакли гирифтан ва тасдиқи онҳо;

ё) талабот оид ба гирифтани нишондод ё баёнот таҳти қасам ё нишондодҳои тасдиқшуда;

ж) тавсифи молу мулк, дороиҳо ё ашёи марбут ба дархост, аз ҷумла мушаххасот ва маҳхалли ҷойгиршавии он; ва

з) ҳар қарори суд барои иҷрои дархости ёрии ҳуқуқӣ зарурбуда ва муқаррарот дар бораи ниҳоӣ будани он.

3. Дархостҳо, ҳуҷҷатҳои тасдиқкунанда ва ҳама гуна мукотиботе, ки тибқи ин Шартнома тартиб дода мешаванд бо забони англисӣ тартиб дода шуда, дар ҳолатҳои зарурӣ бо тарҷума бо забони Тарафи дархостшаванда ё забони дигаре, ки барои Тарафи дархостшаванда қобили қабул аст, замима карда мешаванд.

4. Агар мақомоти марказии Тарафи дархостшаванда маълумоти дар дархост зикршударо барои баррасӣ намудани дархост нокифоя ҳисобад, ӯ метавонад маълумоти иловагӣ талаб намояд. Тарафи дархосткунанда маълумоти иловагиеро, ки Тарафи дархостшаванда барои иҷрои пурраи дархост зарур шуморидааст, пешниҳод менамояд.

5. Дар сурати дархост кардан, Мақомоти марказии Тарафи дархосткунанда бояд дар назди мақомоти марказии Тарафи дархостшаванда уҳдадорӣ гирад, ки ҳамаи расмиёти дохилии Тарафи дархосткунанда марбут дар дархост риоя карда шудаанд ва дар чунин ҳолатҳо Тарафи дархостшаванда уҳдадор нест, ки то лаҳзаи ба зимма гирифтани чунин уҳдадорӣ дархостро иҷро намояд.

МОДДАИ 7 ИҶРОИ ДАРХОСТҲО 

1. Дархостҳо оид ба расонидани ёрии ҳуқуқӣ бояд дар муҳлат мувофиқи тартиби пешбининамудаи қонунгузорӣ ва амалия Тарафи дархостшаванда иҷро карда шаванд. Тарафи дархостшаванда то он ҳадде, ки қонунгузорӣ ва амалияи ӯ имкон медиҳад, метавонад дархостро тибқи тартиби муқаррарнамудаи Тарафи дархосткунанда иҷро кунад.

2. Дар сурати дархост кардан, мақомоти марказии Тарафи дархостшаванда тамоми тадбирҳои заруриро барои ҳузури намояндаи Тарафи дархосткунанда дар Тарафи дархостшаванда дар ҳама гуна мурофиаҳое, ки аз дархости ёрии ҳуқукӣ бармеоянд, меандешад ё ба тариқи дигар, манфиатҳои Тарафи дархосткунандаро худ намояндагӣ мекунад.

3. Мақомоти марказии Тарафи дархостшананда дар муҳлатҳои оқилона ба дархостҳои мақомоти марказии Тарафи дархосткунанда оид ба рафти иҷрои дархост ҷавоб медиҳад.

4. Мақомоти марказии Тарафи дархостшаванда метавонад аз мақомоти марказии Тарафи дархосткунанда маълумотро дар шакли зарурие талаб кунад, ки барои иҷрои дархост зарур мебошад ё барои иҷрои ҳама гуна амалҳое, ки тибқи қонунҳо ва амалияи Тарафи дархостшаванда барои иҷрои дархости Тарафи дархосткунанда заруранд, чораандешӣ намояд.

МОДДАИ 8 МАҲДУДИЯТИ ИСТИФОДАИ ДАЛЕЛҲОИ БАДАСТОМАДА

1. Тарафи дархосткунанда бе розигии Тарафи дархостшаванда ва бо риояи шартҳое, ки Тарафи дархостшаванда онҳоро зарур мешуморад, маълумот ё далелҳои барои таъқиб ва тафтиши ҷиноятӣ пешниҳоднамудаи Тарафи дархостшавандаро истифода ва интиқол дода наметавонад, ба ҷузъ он мақсадҳое, ки дар дархост пешбинӣ шудаанд.

2. Сарфи назар аз банди 1, дар сурати иваз шудани айб, маълумот ё далелҳои пешниҳодшуда метавонанд дар ҳолате истифода шаванд, ки айби ивазшуда ҷиноят ҳисобида шуда, нисбати он метавонист тибқи ин Шартнома ёрии мутақобилаи ҳуқуқӣ расонида шавад.

МОДДАИ 9 ҲИФЗИ МАХФИЯТ ВА МАҲДУДИЯТИ ИСТИФОДАИ ДАЛЕЛҲО ВА МАЪЛУМОТҲО

1. Тарафи дархостшаванда тибқи дархост ва дар доираи қонунгузории худ барои махфӣ нигоҳ доштани дархост оид ба расонидани ёрии ҳуқуқӣ, мундариҷа ва ҳуҷҷатҳои тасдиқкунандаи он, далели расонидани чунин ёрии ҳуқуқӣ ва ҳама гуна амалҳое, ки мутобиқи он андешида мешаванд, кӯшиш ба харҷ медиҳад. Агар иҷрои дархост бе вайрон кардани талаботи махфияти дар дархост зикршуда ғайриимкон бошад, Тарафи дархостшаванда бояд дар ин хусус Тарафи дархосткунандаро огоҳ созад ва охирон бояд муайян намояд, ки дархост новобаста ба чунин ҳолат иҷро карда шавад ё не.

2. Тарафи дархосткунанда тибқи дархост ва дар доираи қонунгузории хеш далелҳо ва маълумоти махфиеро, ки Тарафи дархостшаванда пешниҳод намудааст, нигоҳ медорад, ба истиснои ои ҳолатҳое, ки далелҳо ва маълумотҳо барои таҳқик ва тафтиши ҷиноятии дар дархост зикршуда заруранд.

МОДДАИ 10 БА ДАСТ ОВАРДАНИ ДАЛЕЛҲО

1. Тарафи дархостшаванда тибқи дархост ва дар доираи қонунгузории хеш нишондоди таҳти қасам додашуда ё тасдиқкардашударо ба даст меорад, ё тариқи роҳи дигар нишондоди шахсро мегирад, ё аз онҳо пешниҳод кардани ҳуҷҷатҳо, сабтҳо ё далелҳои шайъиро барои интиқол додан ба Тарафи дархосткунанда талаб менамояд.

2. Бо дархости Тарафи дархосткунанда тарафҳои мурофиаи дахлдори Тарафи дархосткунанда, намояндагони қонунии онҳо ва намояндагони Тарафи дархосткунанда метавонанд то ҳадде, ки қонунҳо ва расмиёти Тарафи дархостшаванда иҷозат додаанд, дар иҷрои дархост иштирок намоянд.

3. Ягон муқаррароти моддаи мазкур барои истифодаи видеои мустақим ё пахши мустақими телевизионӣ, ё дигар воситаҳои алоқа ва таҷҳизоти мултимедия, ки мутобиқи қонунҳо ва расмиёти Тарафи дархостшаванда барои иҷрои ин модда ва баҳри таъмини адолат мақсаднок мебошанд, монеа шуда наметавонад.

МОДДАИ 11 ҲУҚУҚ Ё УҲДАДОРИИ РАД КАРДАНИ ДОДАНИ НИШОНДОД

1. Шахсе, ки мутобиқи моддаи 10 ин Шартнома бояд дар доираи дархости ёрии ҳуқуқӣ ба Тарафи дархостшаванда ё дархосткунанда нишондоди таҳти қасам ё тасдиқшуда диҳад, ҳуҷҷатҳо, сабтҳо ё далелҳои шайъиро пешниҳод намояд, метавонад аз иҷрои он даст кашад, дар ҳолате ки:

а) конуни Тарафи дархостшаванда иҷозат диҳад ё пешбинӣ намуда бошад, ки дар ҳолатҳои шабеҳи мурофиаҳое, ки дар Тарафи дархостшаванда оғоз шудаанд, шахс метавонад аз чунин талабот даст кашад; ё

б) қонуни Тарафи дархосткунанда иҷозат диҳад ё пешбинӣ намуда бошад, ки дар ҳолатҳои шабеҳи мурофиаҳое, ки дар Тарафи дархосткунанда оғоз шудаанд, шахс метавонад аз чунин талабот даст кашад.

2. Агар шахс даъво намояд, ки ҳуқуқ ё уҳдадории рад кардани додани нишондод таҳти қасам ё тасдиқшуда, пешниҳод намудани ҳуҷҷатҳо, сабтҳо ё далелҳои шайъии пешбинигаридаи моддаи 10 ин Шартнома мутобиқи қонунгузории Тарафи дигар пешбинӣ шудааст, Тарафе, ки шахс дар ҳудуди он ҳузур дорад, бояд ба муқаррарот ё изҳороти пешниҳоднамудаи Тарафи дигар дар бораи будан ё набудани чунин ҳуқуқ ё уҳдадорӣ такя намояд.

3. Моддаи мазкур дар ҳолатҳое татбиқ намегардад, ки агар нишондод, ариза, ҳуҷҷатҳо, сабт ё далелҳои шайъӣ ихтиёран дода ё пешниҳод шуда бошанд.

МОДДАИ 12 ТАЪМИН НАМУДАН БО ҲУҶҶАТҲО ВА ДИГЛР САБТҲОИ ДАСТРАСИ ОММА

1. Тарафи дархостшаванда ба Тарафи дархосткунанда нусхаи сабтҳои дастраси омма, аз ҷумла ҳуҷҷатҳо ё маълумотҳоро дар ҳар шакле, ки дар ихтиёри сохторҳо ва муассисаҳои давлатии Тарафи дархостшаванда қарор доранд, пешниҳод менамояд.

2. Тарафи дархостшаванда метавонад то ҳадде, ки қонунҳои он иҷозат додаанд, ба Тарафи дархосткунанда нусхаи дилхоҳ сабтҳо, аз ҷумла ҳуҷҷатҳо ё маълумотҳоро дар дилхоҳ шакл, ки дар ихтиёри сохторҳо ва муассисаҳои давлатии Тарафи дархостшуда буда, дастраси омма нестанд, низ пешниҳод намояд. Тарафи дархостшуда метавонад мувофиқи салоҳдиди худ дар асоси банди мазкур дархостро пурра ё қисман рад кунад.

МОДДАИ 13 ҲУЗУРИ ШАХС ДАР ТАРАФИ ДАРХОСТКУНАНДА

1. Тарафи дархостшаванда метавонад тибқи дархост ва то ҳадде, ки қонунгузории он иҷозат додааст, дар асоси розигии шахс барои ҳузури шахс дар Тарафи дархосткунанда дар ҳолатҳои зерин мусоидат намояд:

а) мусоидат намудан ба тафтиши парвандаи ҷиноятӣ дар Тарафи дархосткунанда; ё

б) иштирок намудан дар баррасии парвандаи ҷиноятӣ дар Тарафи дархосткунанда, ба шарте, ки агар ин шахс айбдоршаванда набошад.

2. Тарафи дархостшаванда бояд шахсро барои ба сифати шоҳид ё коршиноси мурофиаи ҷиноятӣ ё мусоидат намудан ба тафтишот даъват намояд. Дар ҳолатҳои зарурӣ, Тарафи дархостшаванда бояд боварии комил дошта бошад, ки барои бехатарии шахс чораҳои зарурӣ андешида шудаанд.

3. Агар ҳузури шахс дар Тарафи дархосткунанда дархост шуда бошад, дархост бояд маълумотҳои зеринро дарбар гирад:

а) пардохтҳо, иловапулиҳо ва хароҷотҳо, агар онҳо мавҷуд бошанду шахс ба онҳо ҳуқуқ дошта бошад;

б) чораҳо оид ба таъмини бехатарии ӯ ҳангоми сафар, ҳузур доштан дар Тарафи дархосткунанда ва дар мавриди тарк кардани он, агар чунин чораҳо мавҷуд бошанд; ва

в) чораҳо баҳри таъмини хароҷоти будубоши ӯ ҳангоми дар Тарафи дархосткунанда ҳузур доштанаш.

4. Дар ҳолатҳои имконпазир ва мувофиқ бо принсипҳои асосии қонунгузории дохилӣ ва агар ҳузури шахси манфиатдор дар Тарафи дархосткунанда имконнопазир бошад, Тарафи дархостшаванда метавонад бо дархости Тарафи дархосткунанда баҳри гузаронидани мурофиа тавассути видеои мустақим, пахши мустақими телевизионӣ ё воситаҳои дигари дахлдори алоқа ва таҷҳизоти мултимедия тибқи қонунҳо ва расмиёти Тарафи дархостшаванда иҷозат диҳад. Тарафҳои манфиатдор метавонанд байни худ ба мувофиқа оянд, ки мурофиа аз ҷониби мақомоти судии Тарафи дархосткунанда тибқи қонунҳо ва расмиёти Тарафи дархосткунанда гузаронида шуда, дар он мақомоти судии Тарафи дархостшаванда иштирок мекунад.

МОДДАИ 14 ҲУЗУРИ ШАХСИ ДАР ҲАБС ҚАРОРДОШТА ДАР ТАРАФИ ДАРХОСТКУНАНДА

1. Тарафи дархостшаванда метавонад тибқи дархост ва дар доираи қонунгузории худ барои муваққатан интиқол додани шахси дар Тарафи дархостшаванда дар ҳабс қарордошта барои додани нишондод ё мусоидат намудан ба тафтишот дар Тарафи дархосткунанда, дар асоси розигии худи ӯ розигӣ диҳад.

2. Ҳангоми зарурати тибқи қонунгузории Тарафи дархостшаванда дар ҳабс нигоҳдоштани шахси интиқолдодашуда, Тарафи дархосткунанда бояд шахсро дар ҳабс нигоҳ дошта, ин шахси дар ҳабс қарордоштаро баъди ба итмом расидани амалҳои барои интиқол зарурбуда ё барвақттар, агар иштироки минбаъдаи ӯ дигар зарур набошад, ба Тарафи дархостшаванда баргардонад.

3. Агар Тарафи дархостшаванда ба Тарафи дархосткунанда хабар диҳад, ки зарурати дар ҳабс нигоҳ доштани шахси интиқолшуда аз байн рафтааст, ин шахс бояд озод карда шуда, нисбати ӯ ҳамчун шахси дар моддаи 13 ин Шартнома муқарраршуда муносибат карда мешавад.

4. Тарафи дархосткунанда набояд аз Тарафи дархостшаванда барои баргардонидани шахси интиқолшуда оғози раванди истирдодро талаб намояд.

5. Муҳлате, ки чунин шахс дар ҳабси Тарафи дархосткунанда нигоҳ дошта мешавад, бояд аз лаҳзаи дастгиршавӣ ва дар ҳабс қарор доштани ӯ дар Тарафи дархостшаванда ба ҳисоб гирифта шавад.

6. Агар мақомоти марказии Тарафи дархосткунанда муқаррароти зеринро ба уҳда нагирад, интиқол тибқи ин модда сурат намегирад:

а) тамоми хароҷотро вобаста ба интиқоли шахси дар ҳабс қарордошта ба уҳда гирад ва ҷавобгар бошад;

б) таҳти ҳабс қарор доштани шахсро дар тамоми давраи интиқоли ӯ аз рӯи асосҳои қонунӣ таъмин намояд; ва

в) фавран ӯро баъди аз байн рафтапи зарурати ҳузур доштанаш дар назди мақоми ваколатдор ё суди Тарафи дархосткунанда ба ҳабси Тарафи дархостшаванда баргардонад.

7. Дар ҳолатҳои имконназир ва мувофиқ бо принсипҳои асосии қонунгузории дохилӣ ва агар ҳузури шахси манфиатдор дар Тарафи дархосткунанда имконнопазир бошад, Тарафи дархостшаванда метавонад бо дархости Тарафи дархосткупанда баҳри гузаронидани мурофиа тавассути видеои мустақим, пахши мустақими телевизионӣ ё дигар васоити мувофиқи алоқа ва таҷҳизоти мултимедия тибқи қонунҳо ва расмиёти Тарафи дархостшаванда иҷозат диҳад. Тарафҳои манфиатдор метавонанд байни худ ба мувофиқа оянд, ки мурофиа аз ҷониби мақомоти судии Тарафи дархосткунанда тибқи қонунҳо ва расмиёти Тарафи дархосткунанда гузаронида шуда, дар он мақомоти судии Тарафи дархостшаванда иштирок мекунад.

МОДДАИ 15 КАФОЛАТИ БЕХАТАРӢ

1. Бо дарназардошти банди 2, агар шахс дар Тарафи дархосткунанда тибқи дархосте, ки мувофиқи моддаи 13 ё 14 ин Шартнома пешбинишуда ҳузур дошта бошад, пас:

а) ин шахс набояд дар Тарафи дархосткунанда дастгир шавад, ба ҷавобгарии ҷиноятӣ кашида ё ҷазо дода шавад, ё ин ки нисбати ӯ барои ҳаракат ё беҳаракатӣ, ё ҳукм барои содир намудани ҷиноят барои вайрон кардани қонунгузории Тарафи дархосткунанда, ки пеш аз баромадан аз ҳудуди Тарафи дархостшаванда содир шудааст, дилхоҳ намуди маҳдуд кардани озодии шахсӣ раво дида шавад;

б) ин шахс набояд бе розигии худи ӯ барои додани нишондод ё мусоидат ба тафтишоти Тарафи дархосткунанда, ба ҷузъ додани нишондод ё мусоидат ба тафтишоте, ки марбут ба дархост аст, ҷалб карда шавад; ё

в) ин шахс набояд дар Тарафи дархосткунанда барои ҳаракат ё беҳаракатие, ки то баромадан аз Тарафи дархостшаванда ба вуқуъ пайвастааст, ба мурофиаи гражданӣ ҷалб карда шавад.

2. Агар шахс озод буда, қобили тарк намудани Тарафи дархосткунандаро дошта бошаду, дар муҳлати 15 шабонарӯз баъди шифоҳӣ ё расмӣ дар бораи аз байн рафтани зарурати буданаш огоҳонида шуда, Тарафи дархосткунандаро тарк накарда бошад, ё ин ки тарк карда ихтиёран баргашта бошад, пас муқаррароти банди 1 нисбати ӯ татбиқ карда намешавад.

3. Шахсе, ки дар мурофиаҳои мақомоти салоҳиятдор ё судии Тарафи дархосткунанда баҳри иҷрои дархост мувофиқи моддаи 13 ё 14 Шартномаи мазкур ирсолшуда иштирок кардааст, барои нишондодҳои додааш зери таъқиботи судӣ қарор намегирад, ба истиснои ҳолатҳое, ки нисбат ба ин шахс қонунҳои Тарафи дархосткунанда дар бораи беҳурматӣ ба суд ва додани нишондоди бардурӯғ татбиқ гарданд.

4. Агар нисбати шахси мувофиқи моддаи 13 ё 14 Шартномаи мазкур дархостгардида ҳар муқаррароти банди 1 татбиқ карда шавад, Тарафи дархосткунанда дар ин хусус бояд Тарафи дархостшавандаро огоҳ созад ва дар ҳолати шаҳрванди давлати сеюм будани шахс, давлати сеюмро огоҳ созад.

5. Сарфи назар аз муқаррароте, ки дар дархост дарҷ шудааст, шахсе, ки барои ҳузураш дар Тарафи дархосткунанда тибқи дархосте, ки мутобиқи моддаи 13 с 14 ин Шартнома карда шудааст, розигӣ надиҳад, набояд барои надодани чунин розигӣ ҷазо дода шавад, ё ба ҳар ҷавобгарӣ кашида шавад ё ба тариқи дигар зарар бинад.

МОДДАИ 16 ТРАНЗИТИ ШАХСИ ДАР ҲАБС ҚАРОРДОШТА

1. Тарафи дархостшаванда метавонад тибқи дархост ва то ҳадде, ки қонунгузории он имконият медиҳад, аз қаламрави худ транзити шахси дар ҳабс қарордоштаро аз ҷониби Тарафи дархосткунанда ё давлати сеюм, ки ҳузураш дар таъкиб, мурофиаи ҷиноятӣ ва судии Тарафи дархосткунанда зарур аст, иҷозат диҳад.

2. Агар хавопаймо, киштӣ ё каторае, ки тавассути он шахс интиқол дода мешавад ба Тарафи дархостшуда бозистад, ё оид ба вазъияти мавҷуда маълумот пурсад, кормандони масъул ва ё ҳамроҳкунандаи Тарафи дархосткунанда ё дар сурати зарурӣ давлати сеюме, ки ба Тарафи дархосткунанда баҳри интиқол додан мусоидат менамояд, масъулияти нигоҳдории шахси интиқолшавандаро ҳангоми транзити ӯ дар Тарафи дархостшаванда ба уҳда дорад, ба шарте ки агар Тарафи дархостшаванда тартиби дигаре пешбинӣ накарда бошад.

3. Бе зарар ба муқаррароти банди 2 ва дар ҳолати розигии Тарафи дархостшаванда, шахси интиқолшаванда метавонад то идома додани интиқолаш муваққатан дар ҳабси мақомоти ваколатдори Тарафи дархостшаванда нигоҳ дошта шавад.

4. Агар шахс ҳангоми транзит намудан дар Тарафи дархостшаванда таҳти ҳабс қарор дошта бошад ва интиқоли он дар муҳлати мувофиқашуда идома дода нашавад, мақомоти марказии Тарафи дархостшаванда метавонад ӯро ба давлате, ки ӯ аз онҷо бори аввал интиқол ёфта буд, фиристад.

5. Ҳама хароҷот ва талофоте, ки Тарафи дархостшаванда ҳангоми иҷрои бандҳои 3 ва 4 мебарад, аз ҷониби Тарафи дархосткунанда ҷуброн карда мешаванд.

МОДДАИ 17 КОФТУКОВ ВА МУСОДИРА

1. Тарафи дархостшаванда тибқи дархост ва то ҳадде, ки қонунгузории он иҷозат медиҳад, дархости Тарафи дархосткунандаро оид ба кофтуков, мусодира ва дархост карда гирифтани ҳама гуна ҳуҷҷат, сабт ё ашёро иҷро мекунад, ба шарте, ки агар асосҳои кофӣ ва боварӣ ҳосил намояд, ки ин ҳуҷҷатҳо, сабтҳо ё ашёҳо бо мақсади далел дар доираи парвандаи ҷиноятӣ дархост шудаанд ва агар дархост маълумотеро дар бар гирад, ки тибқи қонунҳои Тарафи дархостшаванда ин амалро ҳифз намуда, ҳуқуқҳои шахсони сеюми бовиҷдонро ҳимоя намояд.

2. Тарафи дархосткунанда бояд ҳар шартҳоеро, ки Тарафи дархостшаванда нисбат ба тамоми ҳуҷҷатҳо, сабтҳо ё ашёҳои мусодирашуда, ки метавонанд ба Тарафи дархосткунанда интиқол дода шаванд ва Тарафи дархостшаванда барои ҳифзи ҳуҷҷатҳо, сабтҳо ё ашёе, ки бояд интиқол дода шаванд зарур мешуморад, риоя менамояд.

3. Тарафи дархостшаванда харчи зудтар дар муҳлатҳои имконпазир Тарафи дархосткунандаро дар бораи натиҷаҳои бадастомада огоҳ месозад.

МОДДАИ 18 БАРГАРДОНИДАНИ ДАЛЕЛҲО

1. Тарафи дархосткунанда дар асоси дархост, ҳангоми анҷомёбии парвандаи ҷиноятӣ, ки нисбаташ дархост оид ба расонидани ёрии ҳуқуқӣ ирсол шуда буд, ҳама гуна ҳуҷҷатҳо, сабтҳо ё ашёҳоеро, ки тибқи дархост дар асоси Шартномаи мазкур ба Тарафи дархосткунанда пешниҳод шуда буданд, бармегардонад.

2. Сарфи назар аз муқаррароти банди 1, Тарафи дархосткунанда ҳар вақт тибқи дархост ба Тарафи дархостшаванда муваққатан ҳама гуна ҳуҷҷатҳо, сабтҳо ё ашёеро, ки баҳри тафтишот ё мурофиаи ҷиноятӣ зарур буда, тибқи дархост ва дар асоси Шартномаи мазкур ба Тарафи дархосткунанда пешниҳод шуда буданд, бармегардонад.

МОДДАИ 19 МАКОНИ ҶОЙГИРШАВӢ Ё МУАЙЯН КАРДАНИ ШАХСИЯТ

Тарафи дархостшаванда тибқи дархост ва то ҳадде, ки қонунгузории он иҷозат медиҳад, барои муайян кардани макони ҷойгиршавӣ ё муайян кардани шахсияти шахсе, ки дар дархост зикр шуда, эҳтимолан дар ҳудуди он қарор дорад, кӯшиш ба харҷ медиҳад.

МОДДАИ 20 ХИЗМАТРАСОНИИ ҲУҶҶАТҲО

1. Тарафи дархостшаванда тибқи дархост ва то ҳадде, ки қонунҳои он иҷозат медиҳанд, барои хизматрасонии ҳама гуна ҳуҷҷати марбут ба парвандаи ҷиноятие, ки дар Тарафи дархосткунанда оғоз шуда, аз ҷониби Тарафи дархостшаванда бо ин мақсад ба ӯ ирсол карда мешавад, кӯшиш ба харҷ медиҳад.

2. Тарафи дархосткунанда бояд дилхоҳ дархости хизматрасонии ҳуҷҷат, ки ҷавобро металабад ё ҳозиршавии шахсро дар Тарафи дархосткунанда талаб менамояд, на дертар аз сӣ рӯз пеш аз ҷавоби ба нақша гирифташуда ё ҳозиршавии шахс мефиристад;

3. Тарафи дархостшаванда тасдиқнамоии хизматрасониро тибқи тартиби мутақобилаи мувофиқашудаи тарафҳои манфиатдор бармегардонад.

4. Бо мақсади татбиқи банди 3, мафҳуми "тасдиқнамоии хизматрасонӣ" маълумотро дар шакли ҳуҷҷат дар бораи вақт ва тарзи расонидани ҳуҷҷат ва дар ҳолати имкон будан, расид бо имзои шахси қабулкунандаи он ва агар корманди хидматрасон хуҷҷатро дар вақти мувофиқашуда расонида натавониста бошад, далел ва сабаби чунин номуваффақиро дар бар мегирад.

МОДДАИ 21 МУСОИДАТ ДАР РАВАНИ МУСОДИРА НАМУДАН

1. Тарафи дархостшаванда тибқи дархост ва то ҳадде, ки қонунгузории он иҷозат додааст, баҳри пайдо намудан, пайгирӣ намудан, маҳдуд кардан амалиёт бо он, ба ҳабс гирифтан ва мусодира намудани даромадҳои бо роҳи ҷиноят бадастомада ва олоти ҷиноят кӯшиш ба харҷ медиҳад.

2. Тарафи дархостшаванда ба Тарафи дархосткунанда вобаста ба раванди мусодира намудани даромадҳои бо роҳи ҷиноят бадастомада, олоти ҷиноят ва ситонидани ҷаримаҳои пулӣ дар он ҳаҷм ва андозае, ки қонунгузории он иҷозат додааст, ёрии ҳуқуқиро ба роҳ мемонад. Ин ёрии ҳуқуқӣ метавонад манъи амалҳои минбаъдаро бо даромадҳо ва олоти ҷиноят, ки дар арафаи барасмиятдарорианд, дар бар гирад.

3. Дар ҳолатҳое, ки Тарафи дархосткунанда баҳри иҷрои санадҳои судие, ки ба маҳдуд кардани амалиёт, ба ҳабс гирифтан, мусодира намудан ё ба тариқи дигар ба ҳабс гирифтани молу амвол равона шудаанд, кӯмак мепурсад, ба дархост бояд нусхаи аслии санади баимзорасидаи судӣ ё нусхаи он, дар ҳарду ҳолат бо муҳри расмии мақомоти марказии Тарафи дархосткунанда тасдиқшуда замима карда шавад.

4. Тарафи дархостшаванда, ки молу мулки мусодирашуда, аздастрафта, дороиҳо ё ҷаримаҳои пулии ситонидашударо бояд тибқи қонунгузории худ ихтиёрдорӣ намояд. То ҳадде, ки қонунгузории Тарафи дархостшаванда иҷозат медиҳад, ӯ метавонад ба Тарафи дархосткунанда ҳама ё як қисми чунин молу мулк, инчунин даромади аз фурӯши он бадастомада ё ҷаримаҳои пулиро бо шартҳои ба тарафҳо қобили қабул супорад.

5. Ҳангоми татбиқи моддаи мазкур ҳуқуқҳои шахсони сеюми бовиҷдон бояд риоя карда шаванд.

МОДДАИ 22 МУВОФИҚАТНАМОӢ БО УҲДАДОРИҲОИ ДИГАР

1. Муқаррароти Шартномаи мазкур ба Тарафҳо ҳангоми ба ҳамдигар расонидани ёрии ҳуқуқӣ тибқи шартномаҳои дигар, расмиёт ва муқаррароти қонунгузории миллиионҳо монеа шуда наметавонад.

2. Агар Тарафҳо тартиби дигаре пешбинӣ накарда бошанд, Шартномаи мазкур набояд ҳамчун дахолаткунанда ё маҳдудкунандаи уҳдадориҳои амалкунандаи байни Тарафҳо, ки аз дигар шартномаву созишномаҳои байналмилалии дуҷониба ё бисёрҷониба бар омада, муқаррароташон пурра ё қисман танзимкунандаи ҷанбаҳои мушаххаси ёрии ҳуқуқии байналмилалии ҷиноятӣ мебошад ё метавонад таҷрибаҳои нисбатан мусоидеро дар бар гирад, ки Тарафҳо метавонанд дар ин масъала истифода баранд, тафсир карда шавад.

МОДДАИ 23 СЕРТИФИКАТСИЯ ВА ТАСДИҚНАМОӢ

1. Ҳар як Тараф тибқи дархост бояд аслияти дилхоҳ ҳуҷҷат ё маводи дигарро, ки тибқи Шартномаи мазкур ба Тарафи дигар интиқол дода мешавад, тасдиқ намояд.

2. Бо мақсади татбиқи ин Шартнома ҳуҷҷат дар ҳолатҳои зерин тасдиқшуда ба ҳисоб меравад, агар:

а) мазмуни он аз ҷониби судя, магистр ё шахси мансабдоре, ки ба таври муқарраргардидаи қонунгузории Тарафи дархостшаванда ваколатдор шудааст, ба имзо расида ё тасдиқ шуда бошад;

б) ё ин ки:

i. бо қасам ё тасдиқи шоҳид, ё шахси мансабдори ҳукумати Тарафи дархостшаванда тасдиқ шудааст; ё

ii. мазмуни он аз ҷониби шахси мансабдор, муҳри расмии Тарафи дархостшаванда ё Вазири давлатӣ, раёсат ё шахси мансабдори давлатии Тарафи дархостшаванда тасдиқ шуда бошад.

3. Ягон муқаррароти моддаи мазкур наметавонад дар раванди исбот намудани ҳама гуна масъала ё ба сифати далел ҷоиз донистани ягон ҳуҷҷат мувофиқи қонунгузории Тарафи дархосткунанда монеагӣ эҷод намояд.

4. То ҳадде, ки қонунгузории ҳар Тараф иҷозат медиҳад:

а) ҳуҷҷате, ки мувофиқи имзои рақамӣ ё электронӣ имзо шудааст, мутобиқи қонунгузории Тарафи дахлдор дорои ҳамон қувваи ҳуқуқие мебошад, ки ҳуҷҷати дорои имзои дастӣ, бо ангушти калон ё дигар тамға ба расмият даровардашуда доро мебошад; ва

б) имзои рақамӣ ё электроние, ки мутобиқи қонунгузории Тарафи дахлдор таҳия шудааст, имзои ҳуқуқии уҳдадоркунанда ба ҳисоб меравад.

МОДДАИ 24 ХАРОҶОТ

1. Тарафи дархостшаванда тамоми хароҷоти оддии иҷрои дархости расонидани ёрии ҳуқуқиро ба зимма мегирад, ба истиснои хароҷоте, ки Тарафи дархосткунанда ба зимма дорад:

а) музди машваратчӣ, ки бо дархости Тарафи дархосткунанда даъват карда мешавад;

б) музд ва хароҷоти коршиносон - шоҳидон;

в) хароҷоти тарҷума, тафсир ва транскрипт;

г) хароҷоти марбут ба интиқол додани ягон шахс ба/аз қаламрави Тарафи дархостшаванда, инчунин пардохтҳо, ҷубронпулӣ ва хароҷоти ба шахси дахлдор пардохтшаванда дар ҳолате, ки ин шахс тибқи дархости мувофиқи моддаҳои 13 ё 14 Шаргномаи мазкур тартибдодашуда дар Тарафи дархосткунанда ҳозир мебошад; ва

д) хароҷот вобаста ба интиқол додани афсарони парасторӣ ва ё ҳамроҳикунанда.

2. Хароҷот вобаста ба барқарор намудани видеои мустақим ё пахши мустақими телевизионӣ ва ё воситаҳои дигари алоқа ва таҷҳизоти мултимедия, хароҷот вобаста ба таъминоти техникии видеои мустақим ё пахши мустақими телевизионӣ, ё дигар воситаҳои алоқа ва таҷҳизоти мултимедия, ҳаққи хизмати тарҷумонҳои пешкашнамудаи Тарафи дархостшаванда ва иловапулиҳо ба шоҳидон ва хароҷоти сафари онҳо дар Тарафи дархостшаванда, агар Тарафҳо ба мувофиқаи дигар нарасида бошанд, аз ҷониби Тарафи дархосткунанда ба Тарафи дархостшаванда пардохт карда мешавад.

3. Агар ҳангоми иҷрои дархост маълум шавад, ки барои иҷрои дархост хароҷоти фавқулодда зиёд ё ҷиддӣ зарур аст, Тарафҳо барои муайян кардани шартҳое, ки дар асоси он дархост бояд иҷро ё идома дода шавад, машварат мекунанд.

МОДДАИ 25 МАШВАРАТ

1. Мақомоти марказии Тарафҳо бо мақсади мусоидат ба татбиқи самарабахши Шартномаи мазкур бо ҳам бо мувофиқати мутақобила машварат мекунанад.

2. Тарафҳо барои мусоидат баҳри амалишавии Шартномаи мазкур метавонанд чораҳои амалие коркард намоянд, ки зарур мебошанд.

МОДДАИ 26 ТАҒЙИРОТ

1. Ба Шартномаи мазкур ҳар вақт бо розигии хаттии Тарафҳо метавонанд тағйирот ё иловаҳо ворид карда шаванд. Чунин тағйирот ё иловаҳо аз санаи мувофиқакардаи Тарафҳо эътибор пайдо карда, ҷузъи Шартномаи мазкурро такшил медиҳанд.

2. Ҳама гуна тағйирот ё иловаҳо ба ҳуқуқҳо ва уҳдадориҳое, ки аз Шартномаи мазкур бармеоянд ё ба он асос ёфтаанд, то санаи эътибор пайдо карданашон таъсир намерасонанд.

МОДДАИ 27 ҲАЛЛИ БАҲСҲО 

Ҳама гуна мухолифат ё баҳсҳое, ки байни Тарафҳо ҳангоми тафсир ё татбиқи муқаррароти Шартномаи мазкур ба вуҷуд меоянд, байни Тарафҳо бо роҳи машварат ё гуфтушунид тавассути роҳҳои дипломатӣ бидуни интиқол додани маълумот ба ягон ҷониби сеюм ё суди байналмилалӣ ҳал карда мешаванд.

МОДДАИ 28 ТАСДИҚ, ЭЪТИБОР ПАЙДО КАРДАН ВА ҚАТЪ ГАРДИДАН

1. Шартномаи мазкур бояд тасдиқ (ратификатсия) карда шуда, тасдиқномаҳо бояд дар фурсати наздиктарин мубодила карда шаванд.

2. Шартномаи мазкур пас аз мубодилаи тасдиқномаҳо эътибор пайдо мекунад.

3. Шартномаи мазкур нисбати ҳама дархостҳое, ки пас аз эътибор пайдо кардани он пешниҳод карда мешаванд, татбиқ карда мешавад, ҳатто агар ҳаракат ё беҳаракатие, ки ҷиноятро ташкил медиҳад қабл аз эътибор пайдо намудани он рух дода бошад.

4. Ҳар яке аз Тарафҳо метавонад ҳар вақт пас аз фиристодани огоҳиномаи хаттӣ ба Тарафи дигар амали Шартномаи мазкурро катъ намояд. Чунин қатънамоӣ бо гузаштани шаш (6) моҳ аз санаи пешниҳоди огоҳинома эътибор пайдо менамояд.

5. Қатъи Шартномаи мазкур ба ҳуқуқ ва уҳдадориҳое, ки аз Шартномаи мазкур бармеоянд ва ба он асос ёфтаанд, инчунин ба иҷроиши дархостҳое, ки тибқи Шартномаи мазкур пешниҳод карда шудаанд то ба охир расидани муҳлати амали он таъсир намерасонад.

Бо тасдиқи гуфтаҳои боло, имзокунандагони зерин, ки ба таври дахлдор аз ҷониби ҳукуматҳои худ ваколатдор шудаанд, Шартномаи мазкурро ба имзо расониданд.

Шартномаи мазкур дар шаҳри Душанбе, 7 майи соли 2024, дар ду нусхаи асл бо забонҳои тоҷикӣ, малаӣ ва англисӣ ба имзо расида, ҳамаи матнҳо эътибори яксон доранд. Дар ҳолати ба миён омадани ихтилофот дар тафсир, афзалият ба матни забони англисӣ дода мешавад.