ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Созишнома байни Ҳукумати Ҷумҳурии Тоҷикистон ва Ҳукумати Шоҳигарии Арабистони Саудӣ оид ба ҳамкорӣ ва ёрии мутақобилаи маъмурӣ дар самти фаъолияти гумрукӣ маъқул дониста шавад.

2. Сардори Хадамоти гумруки назди Ҳукумати Ҷумҳурии Тоҷикистон Созишномаи мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон бо тартиби муқарраргардида сана ва маҳалли ба имзо расонидани Созишномаи мазкурро бо ҷониби Шоҳигарии Арабистони Саудӣ мувофиқа намояд.

 СОЗИШНОМА БАЙНИ ҲУКУМАТИ ҶУМҲУРИИ ТОҶИКИСТОН ВА ҲУКУМАТИ ШОҲИГАРИИ АРАБИСТОНИ САУДӢ ОИД БА ҲАМКОРӢ ВА ЁРИИ МУТАҚОБИЛАИ МАЪМУРӢ ДАР САМТИ ФАЪОЛИЯТИ ГУМРУКӢ 

Ҳукумати Ҷумҳурии Тоҷикистон ва Ҳукумати Шоҳигарии Арабистони Саудӣ, ки минбаъд дар якҷоягӣ «Тарафҳои Аҳдкунанда» ва дар алоҳидагӣ «Тарафи Аҳдкунанда» номида мешаванд;

бо эътирофи он, ки вайронкунии қонунгузории гумрукӣ ба манфиатҳои иқтисодӣ, тиҷоратӣ, молиявӣ, иҷтимоӣ ва фарҳангии ҳарду кишвар зарар мерсонад;

бо дарки зарурати таъмини баҳисобгирии амиқ ва ситонидани боҷҳои гумрукӣ ва андозҳо, инчунин пардохтҳои дигаре, ки барои содирот ё воридоти молҳо ситонида мешаванд ва таъмини иҷрои дурусти татбиқи чораҳои мамнуият, маҳдудият ва назорат;

бо дарки зарурати ҳамкориҳои байналмилалӣ дар масъалаҳои марбут ба татбиқ ва иҷрои қонунгузории гумрукии онҳо;

бо итминон бар он, ки самаранокии фаъолият оид ба пешгирии вайронкунии қонунгузории гумрукӣ ва таъмини дурусти ситонидани боҷҳои гумрукӣ ва андозҳои воридотиву содиротӣ метавонад тавассути ҳамкориҳои мутақобила самаранок анҷом дода шавад;

бо дарназардошти санадҳои дахлдори Шӯрои ҳамкориҳои гумрукӣ (Созмони умумиҷаҳонии гумрук), махсусан Тавсияҳо оид ба ёрии байниҳамдигарии маъмурӣ аз 5 декабри соли 1953; ва

инчунин, бо дарназардошти конвенсияҳои байналмилалӣ вобаста ба мамнуият, маҳдудият ва чораҳои махсуси назорати молҳои хос, ки яке аз Тарафҳои Аҳдкунанда узви онҳо мебошад;

ба мувофиқаи зерин расиданд:

Моддаи 1 Мафҳумҳо

Истилоҳот вобаста ба мақсадҳои Созишномаи мазкур нисбат ба ҳар як банд шарҳ дода шуда, маънои зеринро ифода менамоянд, агар дар муқаррароти матн тартиби дигаре пешбинӣ нашуда бошад:

1. «Қонунгузории гумрукӣ» - қонунҳо ва қоидаҳое, ки аз ҷониби Тарафҳои Аҳдкунанда барои воридот, содирот, интиқол ва транзити молҳо ё воситаҳои пардохт, нисбат ба боҷҳои гумрукӣ, аз ҷумла боҷҳои ҷубронӣ ва зиддидемпингӣ, андозҳо ва пардохтҳои дигар ё чораҳои вобаста ба татбиқи мамнуият, маҳдудият ва назорат равона гардида, маъмурикунонӣ ва иҷрои онҳо ба зиммаи Тарафҳои Аҳдкунанда вогузор карда шудааст;

2. «ҳуқуқвайронкунии гумрукӣ» - ҳама гуна қоидавайронкунӣ ва ё кӯшиши вайрон кардани қонунгузории гумрукӣ;
3. «шахс» – тамоми шахсони воқеӣ ва ҳуқуқӣ;
4. «маълумот» - ҳама гуна иттилоот, ҳуҷҷатҳо, ҳисоботҳо, нусхаҳои тасдиқшудаи онҳо ё маълумоти дигар, аз ҷумла нусхаҳои электронӣ;
5. «маълумоти фаврӣ»- иттилооте, ки барои ба даст овардани далелҳои ҳуқуқвайронкунии гумрукӣ аллакай коркард ё таҳлил карда шудааст; ва
6. «Маъмурияти гумрукӣ» маънои зерин дорад:

- барои Ҳукумати Ҷумҳурии Тоҷикистон - Хадамоти гумруки назди Ҳукумати Ҷумҳурии Тоҷикистон;

- барои Ҳукумати Шоҳигарии Арабистони Саудӣ - Маъмурияти закот, андоз ва гумрук.

Моддаи 2 Доираи амали Созишнома

1. Тарафҳои Аҳдкунанда тибқи шартҳои дар Созишнома пешбинишуда бо мақсади дуруст татбиқ намудани қонунгузории гумрукии худ, пешгирӣ, тафтиш ва рафъи ҳуқуқвайронкуниҳои гумрукӣ ба ҳамдигар кумаки маъмурӣ мерасонанд.

2. Ҳама гуна кумаке, ки дар доираи Созишномаи мазкур аз ҷониби Тарафҳои Аҳдкунанда расонида мешавад, бояд мутобиқи қонунгузории амалкунандаи Тарафҳо ва дар доираи салоҳият ва имкониятҳои мавҷуда расонида шавад.

Моддаи 3 Шаклҳои ҳамкорӣ ва ёрии байниҳамдигарӣ

Тарафҳои Аҳдкунанда тибқи дархост ё бо ташаббуси худ корҳои зеринро иҷро мекунанд:

1. Ҳамдигарро бо тамоми маълумоти мавҷуда дар бораи қонунгузории гумрукии худ ва расмиёти марбут ба ҳуқуқвайронкуниҳои гумрукӣ, инчунин тамоми маълумоти мувофиқи муқаррароти ҳамин Созишномаи мазкур заруриро пешниҳод менамоянд.

2. Мубодилаи таҷрибаро оид ба фаъолияти онҳо ва маълумот оид ба тамоюлҳо, воситаҳо ва усулҳои нави содир намудани ҳуқуқвайронкуниҳо, аз ҷумла ҳамкорӣ дар соҳаи тайёр намудани кормандони гумрук анҷом медиҳанд.

3. Тағйиру иловаҳои муҳим ба қонунгузории гумрукӣ, усулҳои назорат ва усулҳои татбиқи онро ба ҳамдигар хабар дода, инчунин масъалаҳои мавриди таваҷҷуҳи тарафайнро баррасӣ менамоянд.

4. Мубодилаи маълумот ва таҷрибаро оид ба истифодаи воситаҳои назорати техникӣ анҷом медиҳанд.

5. Мубодилаи таҷрибаро оид ба масъалаҳои гумрукӣ анҷом медиҳанд.

Моддаи 4 Маълумот оид ба татбиқ ва иҷрои қонунгузории гумрукӣ

Тарафҳои Аҳдкунанда тибқи дархост ё бо ташаббуси худ ба ҳамдигар маълумоти зеринро пешниҳод менамоянд:

1. Моли ба ҳудуди гумрукии Тарафи дигари Аҳдкунанда воридшуда, оё қонунан аз ҳудуди гумрукии он содир шудааст ё не; ва

2. Моли аз ҳудуди гумрукии Тарафи дигари Аҳдкунанда содиршуда оё қонунан ба ҳудуди гумрукии он ворид карда шудааст ё не.

Моддаи 5 Назорати одамон, молҳо, воситаҳои нақлиёт ва биноҳо

Тарафҳои Аҳдкунанда тибқи дархост ё бо ташаббуси худ ба ҳамдигар иттилоот ва маълумоти фавриро дода, аз рӯйи масъалаҳои зерин назорат мебаранд:

1. Ҳаракати шахсоне, ки дар содир намудани ҷиноятҳои қонунгузории гумрукӣ маълум ё гумонбар мешаванд, аз ҷумла онҳое, ки ба ҳудуди ин Тарафи Аҳдкунанда ҳаракат мекунанд ва аз он хориҷ мешаванд;

2. Интиқоли мол дар марҳилаи интиқол ё нигоҳдорӣ, ки аз ҷониби Тарафи дигари Аҳдкунанда дар бораи гумонбаршуда дар интиқоли ғайриқонунии онҳо бо мақсади ба қаламрави гумрукии худ интиқол додани онҳо хабар медиҳад;

3. Воситаи нақлиёте, ки Тарафи дигари Аҳдкунанда гумон мекунад, ки барои содир намудани ҳуқуқвайронкуниҳои гумрукӣ дар ҳудуди гумрукии яке аз Тарафҳои Аҳдкунанда истифода шудааст; ва

4. Биноҳое, ки дар робита ба содир намудани ҳуқуқвайронкуниҳои гумрукӣ дар ҳудуди гумрукии ҳар як Тарафи Аҳдкунанда истифода мешаванд.

Моддаи 6 Назорати дигар фаъолиятҳо

1. Тарафҳои Аҳдкунанда бо ташаббуси худ ё тибқи дархост ба ҳамдигар тамоми маълумотро дар бораи амалҳои муайяншуда ё банақшагирифташуда, ки вайронкунии қонунгузории гумрукиро дар ҳудуди яке аз Тарафҳои Аҳдкунанда ташкил медиҳад, ё имконияти ташкил доданро дорад, пешниҳод менамоянд.
2. Тарафҳои Аҳдкунанда ба қадри имкон барои пешниҳоди иттилоот ва маълумоти оперативӣ дар ҳолатҳое, ки метавонанд ба иқтисодиёт, саломатӣ, амнияти ҷамъиятӣ, ё дигар масъалаҳои ҳаётан муҳим зарар расонад, чораҳо андешанд.

Моддаи 7 Файлҳо ва ҳуҷҷатҳо

1. Бо дарназардошти маҳдудиятҳои пешбининамудаи қонунгузории миллӣ ҳар яке аз Тарафҳои Аҳдкунанда ба Тарафи дигари Аҳдкунанда нусхаҳои аслии гузоришҳо ва ҳуҷҷатҳо, аз ҷумла иттилооти электрониро, ки Тарафи дигари Аҳдкунанда барои баррасии парванда ва тафтишот зарур мешуморад, пешниҳод менамояд, ба шарте ки ҳуҷҷатҳои аслӣ дар аввалин фурсати муносиб баргардонида шаванд.

2. Дар сурати имконнопазирии додани ҳуҷҷатҳои аслӣ, ҳуҷҷатҳои тасдиқшуда, ё нусхаҳои тасдиқшудаи ҳуҷҷатҳо ва маводди дигар супорида мешаванд.

Моддаи 8 Коршиносон ва Шоҳидон

Тарафҳои Аҳдкунанда тибқи дархост метавонанд ба шахсони мансабдори худ дар робита ба вайрон кардани қонунгузории гумрукӣ иҷозат диҳанд, ки ба сифати коршинос ё шоҳид дар мақомоти судӣ ё масъалаҳои марбут ба ҳуқуқвайронкунии маъмурии давлати дигари Аҳдкунанда баромад намоянд.

Моддаи 9 Маълумот дар бораи муомилоти ғайриқонунии моли таъиноти дуҳадафадошта

Маъмуриятҳои гумрукӣ бо ташаббуси худ ё тибқи дархост ба ҳамдигар тамоми маълумоти дахлдорро оид ба ҳама гуна амалҳои банақшагирифташуда ё анҷомдодашудае, ки дар ҳудуди яке аз онҳо бар хилофи қонунгузории гумрукӣ баромад менамоянд ё баромад хоҳанд намуд, пешниҳод мекунанд, аз ҷумла муомилоти ғайриқонунии:

1) силоҳ, ракетаҳо, маводди тарканда ё ядроӣ,

2) осори санъати дорои арзиши назарраси таърихӣ, фарҳангӣ ё археологӣ;

3) воситаҳои нашъадор, моддаҳои психотропӣ, прекурсорҳои дар таркиби онҳо истифодашаванда ва моддаҳои заҳрнок, инчунин моддаҳои барои муҳити зист ва саломатии аҳолӣ хатарнок;

4) молҳои қалбакӣ;

5) номгўйи дигари молњои таъиноти дуҳадафа, ки сохтори њуќуќии яке аз Тарафњо муайян мекунад.

Моддаи 10 Шакл ва мазмуни дархост барои расонидани кумак

1. Дархостҳо оид ба расонидани кумак тибқи Созишномаи мазкур бояд дар шакли хаттӣ пешниҳод карда шаванд ва бо ҳуҷҷатҳои барои иҷро зарурӣ ҳамроҳ карда шаванд. Дархост дар ҳолати зарурат ё дар ҳолатҳои таъхирнопазир бо шарти тасдиқи хаттии минбаъда метавонад шифоҳӣ қабул карда шавад.

2. Дархостҳое, ки мутобиқи қисми 1 ҳамин модда дода шудаанд, бояд маълумоти зеринро дар бар гиранд:

а) номи мақоми дархосткунанда;

б) чорае, ки бояд андешида шавад;

в) мавзуъ ва сабаби дархост;

г) қоидаҳо, муқаррарот ва ҳуҷҷатҳои дахлдори дигар; ва

ғ) тавсифи дақиқ ва пурраи шахсони манфиатдор, агар маълум бошанд.

3. Дархостҳо бояд ба забони англисӣ пешниҳод карда шаванд.

4. Агар дархост ба талаботи асосӣ ҷавобгӯ набошад, он метавонад бидуни зарар ба дархост оид ба кафолатҳо ислоҳ ё пурра карда шавад.

5. Ҷавоб ба дархостҳо оид ба расонидани кумак мувофиқи қонунгузории Тарафи Аҳдкунандаи дархостшуда амалӣ карда мешавад.

6. Маълумот ва иттилоот тибқи Созишномаи мазкур ба шахсони мансабдоре, ки аз ҷониби ҳарду Тарафи Аҳдкунанда барои ин мақсад таъин карда мешаванд, фиристода мешавад.

Моддаи 11 Иҷрои дархостҳо

1. Тарафҳои Аҳдкунанда тамоми чораҳои расмӣ, аз ҷумла ҳама гуна амали ҳуқуқиро, ки барои иҷрои дархостҳо заруранд, меандешанд.

2. Дархостҳо оид ба расонидани кумак тибқи тартиби дархости Тарафи Аҳдкунанда иҷро карда мешаванд, агар он ба қонунгузорӣ ва расмиёти маъмурии Тарафи дархостшудаи Аҳдкунанда мухолифат накунад.

3. Бо дархости Тарафи Аҳдкунандаи дархосткунанда Тарафи Аҳдкунанда метавонад ба шахсони мансабдори давлатии худ ваколат диҳад, ки ба сифати коршинос хулосаи худро пешниҳод намоянд, инчунин дар ҳолати зарурӣ маводди исботкунандаи марбут ба масъалаҳои гумрукӣ, аз ҷумла нуқтаи назари худро оид ба масъалаҳои тасниф, арзиш ва пайдоиши мол манзур намоянд.

4. Дар ҳолатҳое, ки Тарафи Аҳдкунандаи дархостшуда мақоми мувофиқ барои қонеъ кардани дархост набошад, Тарафи Аҳдкунандаи дархостшуда дархостро ба мақоми дахлдор ирсол менамояд.

Моддаи 12 Ҳузури шахсони мансабдор

1. Шахсони мансабдоре, ки яке аз Тарафҳои Аҳдкунанда таъин кардааст, метавонанд бо иҷозати Тарафи дигари Аҳдкунанда ва мутобиқи шартҳои тафтиши ҳуқуқвайронкунии гумрукӣ амалҳои зеринро анҷом диҳанд:

а) бо мақсади ба даст овардани маълумот дар бораи ҳуқуқвайронкунии гумрукӣ ҳуҷҷатҳо, сабтҳо ва маълумоти дигари дахлдорро дар ҳудуди Тарафи Аҳдкунандаи дархостшуда тафтиш намоянд;

б) гирифтани нусхаҳои ҳуҷҷатҳо, сабтҳо ва маълумоти дигари дахлдорро нисбати чунин ҳуқуқвайронкуниҳои гумрукӣ;

в) дар ҳама гуна тафтишоте, ки нисбати Тарафи Аҳдкунандаи дархосткунанда, ки Тарафи Аҳдкунандаи дархостшуда дар ҳудуди гумрукии он анҷом медиҳад, ҳузур дошта бошанд.

2. Шахсони мансабдори дар банди 1 ҳамин модда зикргардида дар давоми давраи будубоши худ дар ҳудуди гумрукии Тарафи дигари Аҳдкунанда бояд тасдиқи мақоми расмии худро пешниҳод намоянд.

3. Шахсони мансабдор ҳангоми дар ҳудуди Тарафи дигари Аҳдкунанда буданашон аз ҳамон ҳимояе истифода бурда метавонанд, ки тибқи қонунгузории он ба кормандони гумруки ин Тарафи Аҳдкунанда дода шудааст, ба шарте ки онҳо барои ҳама гуна ҳуқуқвайронкуние, ки содир карда метавонанд, масъулият дошта бошанд.

Моддаи 13 Махфияти маълумот

1. Маълумот, мукотиба ва ҳуҷҷатҳое, ки яке аз Тарафҳои Аҳдкунанда тибқи Созишномаи мазкур гирифтааст, метавонад танҳо барои мақсадҳои гумрукии Тарафҳо истифода бурда шавад. Онро ба ягон мақсади дигар додан ё истифода бурдан мумкин нест, ба истиснои иҷозати хаттии Тарафи аҳдкунанда, ки онро пешниҳод кардааст.

2. Дархостҳо, маълумот, хулосаҳои мутахассисон ё мукотибаи дигар, ки дар ҳама гуна шакл аз ҷониби ҳар яке аз Тарафҳои Аҳдкунанда тибқи Созишномаи мазкур гирифта шудаанд, аз ҳамон ҳимояе бархӯрдоранд, ки ҳангоми чунин иттилооти шабеҳ ба ин Тарафи Аҳдкунанда тибқи қонунгузории ин ҷониб истифода бурда мешавад.

3. Агар иттилооте, ки дар доираи Созишномаи мазкур гирифта шудааст, барои пешбурди парвандаи ҷиноятӣ зарур бошад, он тибқи қонуне, ки барои кумаки мутақобила оид ба масъалаҳои ҷиноятӣ татбиқ мегарданд, бо дарназардошти қонунҳои татбиқшавандаи ҳар яке аз Тарафҳои Аҳдкунанда дархост карда шавад.

Моддаи 14 Истисно

1. Ҳар яке аз Тарафҳои Аҳдкунанда метавонад дар ҳолатҳои зерин аз расонидани кумак мутобиқи Созишномаи мазкур пурра ё қисман даст кашад:

а) агар иҷрои дархост ба истиқлолияти миллӣ, амният, тартиботи ҷамъиятӣ ё манфиатҳои дигари муҳимми миллӣ зарар расонад;

б) агар иҷрои дархост ба вайрон кардани сирри саноатӣ, тиҷоратӣ, касбӣ ё сирри дигари бо қонун ҳифзшаванда боис гардад;

в) агар дархост ба масъалаҳои ғайригумрукӣ алоқаманд бошад; ё

г) агар дархости муроҷиатшуда аз ҷониби Тарафи Аҳдкунанда иҷро нагардад.

2. Ҳар яке аз Тарафҳои Аҳдкунанда метавонад барои рад кардани ёрӣ шартҳои муайян муқаррар намояд, ба шарте ки Тарафи дигари Аҳдкунанда онҳоро қабул ва риоя кунад.

3. Агар Тарафи Аҳдкунанда дархостро иҷро карда натавонад, дар ин бора бояд Тарафи дигари Аҳдкунандаро ба таври хаттӣ фавран огоҳ намуда, сабабҳои онро шарҳ диҳад.

Моддаи 15 Хароҷот

Ҳар яке аз Тарафҳои Аҳдкунанда хароҷоти марбут ба татбиқи Созишномаи мазкурро ба ӯҳда мегирад. Агар иҷрои дархостҳо хароҷоти назарраси фавқулодаро талаб кунад, Тарафҳои Аҳдкунанда барои муайян кардани муҳлат ва шартҳои иҷрои дархост, инчунин усули пӯшонидани хароҷот машварат менамоянд.

Моддаи 16 Татбиқи Созишнома

Ҳамкорие, ки дар Созишномаи мазкур пешбинӣ шудааст, бевосита дар байни Тарафҳои аҳдкунанда ба шарте амалӣ мегирад, ки агар онҳо дар бораи ҷузъиёт ва тадбирҳои амалии мусоидат намудан ба татбиқи Созишномаи мазкур ба мувофиқа расида бошанд.

Тарафҳои Аҳдкунанда ҷиҳати ҳалли ҳама гуна мушкилоте, ки зимни тафсир ё татбиқи Созишномаи мазкур ба вуҷуд меояд, бо мувофиқаи якдигар онҳоро бартараф хоҳанд намуд.

Моддаи 17 Доираи ҳудудӣ

Созишномаи мазкур дар ҳудудҳои гумрукии давлатҳои ҳарду Тарафи Аҳдкунанда татбиқ мегардад.

Моддаи 18 Муқаррароти ниҳоӣ

1. Созишномаи мазкур аз рӯзи гирифтани огоҳиномаи охирини хаттӣ тариқи роҳҳои дипломатӣ, ки ба таври зарурӣ анҷомёбии тамоми расмиёти ҳуқуқии Созишномаи мазкурро тасдиқ менамояд, эътибор пайдо мекунад.

2. Ба Созишномаи мазкур бо розигии Тарафаҳои Аҳдкунанда метавонанд тағйиру иловаҳо ворид карда шаванд, ба шарте ки ин тағйиру иловаҳо тибқи тартиби банди 1 ҳамин модда эътибор пайдо кунанд.

3. Созишномаи мазкур ба муҳлати номуайян баста мешавад ва се моҳ пас аз санаи ба воситаи роҳҳои дипломатӣ гирифтани огоҳиномаи хаттии ҳар яке аз Тарафҳои Аҳдкунанда, ки дар бораи қатъи он хоҳиш намудааст, катъ мегардад. Қатъи амали он ба ягон дархост ё фаъолияти ҳамкорӣ, ки то санаи қатъ оғоз шуда буд, таъсир намерасонад.

Дар шаҳри __________ «__» _________ 2024 дар се нусха ҳар кадом бо забонҳои тоҷикӣ, арабӣ ва англисӣ, ки ҳар як нусхаи он эътибори баробар дорад, ба имзо расонида шуд. Дар ҳолати ихтилофи назар дар тафсир ё татбиқи Созишномаи мазкур, матни англисӣ бартарӣ дорад.