ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Созишнома дар бораи таъсиси долони содакардашудаи гумрукӣ байни Ҳукумати Ҷумҳурии Тоҷикистон ва Ҳукумати Ҷумҳурии Туркия маъқул дониста шавад.
2. Сардори Хадамоти гумруки назди Ҳукумати Ҷумҳурии Тоҷикистон Созишномаи мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон бо тартиби муқарраргардида сана ва маҳалли имзои Созишномаи мазкурро бо ҷониби Туркия мувофиқа намояд.

СОЗИШНОМА ДАР БОРАИ ТАЪСИСИ ДОЛОНИ СОДАКАРДАШУДАИ ГУМРУКӢ БАЙНИ ҲУКУМАТИ ҶУМҲУРИИ ТОҶИКИСТОН ВА ҲУКУМАТИ ҶУМҲУРИИ ТУРКИЯ

Ҳукумати Ҷумҳурии Тоҷикистон ва Ҳукумати Ҷумҳурии Туркия, ки минбаъд «Тарафҳо» номида мешаванд,

мутобиқи Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Туркия дар бораи ҳамкории гумрукӣ, ки 17 сентябри соли 1998 дар Анкара ба имзо расонида шудааст,

бо эътирофи зарурати баланд бардоштани самаранокии назорати гумрукии молҳо ва воситаҳои нақлиёти, ки байни Тарафҳо ҳаракат мекунанд,

бо дарки муҳим будани нақши маъмурияти гумрук ҷиҳати мусоидат ба ҳаракати молҳо тавассути занҷираи таъминот,

бо дарназардошти муқаррароти қонунгузории миллии давлатҳои Тарафҳо, стандартҳо ва тавсияҳои Созмони Милали Муттаҳид ва Созмони умумиҷаҳонии гумруки, инчунин ба таҷрибаи байналмилалӣ оид ба мубодилаи маълумот,

ба мувофиқаи зайл расиданд:

МОДДАИ 1 МАФҲУМҲОИ АСОСӢ

Барои мақсадҳои Созишномаи мазкур истилоҳоти зерин ба маъноҳои зайл истифода мегарданд:

а) «долони содакардашудаи гумрукӣ» (минбаъд – ДСГ) – низоми электроние мебошад, ки мақсади он мубодилаи пешакии маълумот оид ба молҳои дар савдои байни Тарафҳо интиқолшаванда, таъмини содагардонии ҳадди имкон ҳарчи бештари низоми расмиёти гумрукӣ байни Тарафҳо буда, истифодабарии он дар асоси ихтиёрӣ сурат мегирад ва нисбат ба ҳамаи намудҳои нақлиёт татбиқ гардад;

б) «танзимгарони тиҷоратӣ» - шахсоне, дар бораи мол ва воситаҳои нақлиёт маълумоти боэътимод пешниҳод намуда, тибқи муқаррароти Созишномаи мазкур дар раванди расмиёти гумрукӣ ва анҷоми он ширкат меварзанд;

в) «мубодилаи маълумот» - маълумот дар бораи моли содиротӣ ва воситаҳои нақлиёти байни давлатҳои Тарафҳо интиқолшаванда;

г) «шартҳои техникӣ» - барсохтори техникӣ ва коркарди маълумот, ки бо протоколи алоҳида муфассал баён мегардад ва қисми ҷудонашавандаи Созишномаи мазкур мебошад.

МОДДАИ 2 МУҚҚАРАРОТИ УМУМӢ

1. Тарафҳо ба мақомоти гумрукии зерини давлатҳои якдигар ваколати татбиқи Созишномаи мазкурро медиҳанд:

- дар Ҷумҳурии Тоҷикистон - Хадамоти гумруки назди Ҳукумати Ҷумҳурии Тоҷикистон;

- дар Ҷумҳурии Туркия - Вазорати тиҷорати Ҷумҳурии Туркия.

2. ДСГ ба мубодилаи маълумот дар бораи ҳаракати молҳо ва воситаҳои нақлиёт тавассути теҳнологияҳои мубодилаи маълумот байни мақомоти гумруки Ҷумҳурии Тоҷикистон ва Ҷумҳурии Туркия асос ёфтааст.

МОДДАИ 3 ОБЪЕКТ ВА ДОИРАИ АМАЛ

1.Мундариҷаи маълумоти мубодилашуда тибқи замимаи Созишномаи мазкур, ки қисми ҷудонашавандаи Созишномаи мазкур мебошад, ташаккул меёбад.

2.Мубодилаи маълумот аз рӯйи интиқоле, ки танзимгарони тиҷоратӣ бо истифода аз ДСГ амалӣ менамоянд, сурат мегирад ва он дар асоси ихтиёрӣ татбиқ мегардад.

3.Шартҳои техникии мубодилаи маълумот аз ҷониби мақомоти гумруки давлатҳои Тарафҳо дар давоми шаш (6) моҳи баъди имзои Созишномаи мазкур таҳия ва тасдиқ карда мешаванд.

4.ДСГ нисбат ба операторони савдои Тоҷикистон ва Туркия татбиқ мешавад.

5.ДСГ таҷрибаи умумӣ мебошад, ки барои ҳама намудҳои нақлиёт ва ҳама намудҳои мол татбиқ мегардад.

6. Зиддиятҳое, ки нисбат ба Созишномаи мазкур дар робита ба хусусияти қоидаҳои ихтиёрӣ ширкат накардани ташкилотҳо дар доираи ДСГ ба вуҷуд меоранд ва имкони расонидани зарар ба онҳоро низ доранд, бояд аз ҷониби мақомоти гумруки давлатҳои Тарафҳо пешгирӣ карда шаванд.

7. ДСГ бояд шаффоф, пешбинишаванда ва бидуни табъиз бошад. Амалиёти ДСГ набояд ба рақобати беинсофона оварда расонад.

МОДДАИ 4 ИМТИЁЗҲО ДАР ДОИРАИ ДСГ НИСБАТ БА ТАНЗИМГАРОНИ ТИҶОРАТӢ

Танзимгарони тиҷоратӣ аз имтиёзҳои зерин бархӯрдоранд:

а) тартиби афзалиятноки барасмиятдарории гумрукӣ дар гузаргоҳҳо/нуқтаҳои таъинот мутобиқи қонунгузории миллии давлатҳои Тарафҳо;

б) содагардонии харчи бештари расмиёти гумрукӣ, аз ҷумла хатҳои алоҳида барои кам кардани вақти барасмиятдарории гумрукӣ;

в) кам кардани ҳаҷми назорати гумрукӣ дар нуқтаҳо/гузаргоҳҳо, ба истиснои ҳолатҳое, ки метавонанд боиси вайрон кардани қонунгузории гумрукии давлатҳои Тарафҳо гарданд. Агар азназаргузаронии гумрукӣ зарур бошад, он бояд ҳарчи зудтар гузаронида шавад.

МОДДАИ 5 ИСТИФОДАИ МАЪЛУМОТ ВА ҲУҶҶАТҲО

1.Мақомоти гумруки давлатҳои Тарафҳо истифодаи маълумоти дар доираи Созишномаи мазкур гирифташударо бо мақсадҳои барасмиятдарории гумрукӣ ва назорати гумрукии молу воситаҳои нақлиёт, ки байни давлатҳои Тарафҳо интиқол дода мешаванд, таъмин менамоянд.

2.Маълумотеро, ки мақомоти гумруки давлатҳои Тарафҳо гирифтаанд, танҳо барои мақсадҳои гумрукӣ истифода менамоянд ва бе розигии хаттии мақомоти гумруки давлати Тарафе, ки ин маълумотро пешниҳод намудааст, ба шахсони сеюм намедиҳанд.

3.Мақомоти гумруки давлатҳои Тарафҳо ҳангоми ташкили мубодилаи электронии маълумот дар бораи молҳо ва воситаҳои нақлиёти байни давлатҳои Тарафҳо интиқолшаванда аз меъёрҳо, стандартҳо ва тавсияҳои Созмони Милали Муттаҳид, Созмони умумиҷаҳонии гумрук, қонунгузории миллии давлатҳои Тарафҳо ва таҷрибаи пешқадами байналмилалӣ дар самти мубодилаи маълумот истифода мебаранд.

4.Мақомоти гумруки давлатҳои Тарафҳо тибқи қонунгузории миллии худ дар ҳолати вайрон гардидани Созишномаи мазкур, чораҳои дахлдор меандешанд ва дар бораи ин ҳуқуқвайронкуниҳо, инчунин дар бораи носаҳеҳӣ ва (ё) бардурӯғии маълумоти ҳангоми мубодилаи маълумот дар бораи мол ва воситаҳои нақлиёти байни давлатҳои Тарафҳо ҳаракаткунанда пешниҳодгардида якдигарро хабар медиҳанд.

МОДДАИ 6 РАВАНДИ ТАТБИҚ

Мақомоти гумруки давлатҳои Тарафҳо рӯйхати шахсони мансабдори дахлдори ваколатдори мақомоти гумрукро барои муқаррар намудани робитаҳои мустақим бо мақсадҳои зерин муайян менамоянд:

а) таҳия ва ҳамоҳангсозии шартҳои техникии мубодилаи маълумот, технологияҳои коркард ва интиқоли маълумот, инчунин талаботи ҳифзи маълумот;

б) бартараф намудани мушкилоти техникие, ки дар рафти амалисозии Созишномаи мазкур ба миён омадаанд.

Тарафҳо мутобиқи қонунгузории миллии худ нисбат ба ҳама гуна вайронкуниҳои моддаҳои Созишномаи мазкур чораҳои дахлдор меандешанд ва дар бораи чунин вайронкуниҳо, инчунин носаҳеҳӣ ва/ё бардурӯғ будани маълумоте, ки тавассути мубодилаи маълумот дар бораи мол ва воситаҳои нақлиёти байни давлатҳои Тарафҳо интиқолшаванда гирифта шудааст, якдигарро огоҳ месозанд.

МОДДАИ 7 ЛОИҲАИ САНҶИШӢ (ПИЛОТӢ)

1.Бо мақсади рушди технологияҳои мубодилаи маълумот, ки дар Созишномаи мазкур пешбинӣ шудаанд, мақомоти гумруки давлатҳои Тарафҳо лоиҳаи озмоиширо пас аз эътибор пайдо кардани Созишномаи мазкур бо давомнокии шаш (6) моҳ ташкил ва татбиқ менамоянд, ки он метавонад бо розигии хаттии мутақобилаи мақомоти гумруки давлатҳои Тарафҳо тамдид карда шавад.

2.Дар давоми се (3) моҳи аввали татбиқи лоиҳаи озмоишӣ мақомоти гумруки давлатҳои Тарафҳо масъалаҳои зеринро мувофиқа менамоянд:

а) хусусиятҳои асосии технологияи мубодилаи маълумот;

б) номгӯйи дорои сохтор ва формати маълумоти интиқолшаванда;

в) талаботи бехатарии ҳифзи маълумот;

г) тартиби ташкили ҳамкориҳо байни мақомоти гумруки Тарафҳо дар доираи расмиёти ДСГ;

ғ) мақомоти гумруки давлатҳои Тарафҳо маъмуриятҳои дахлдори худро, ки дар онҳо амалиётҳои гумрукӣ нисбат ба молҳои таҳти ДСГ интиқол меёбанд, муайян менамоянд.

3.Мақомоти гумруки давлатҳои Тарафҳо оид ба оғози лоиҳаи озмоишӣ ҷиҳати омодагии хеш якдигар, инчунин сохторҳои дигари гумрукии иштирокдори лоиҳаро ба таври хаттӣ огоҳ менамоянд.

4.Дар давоми се (3) моҳи баъдӣ Тарафҳо дар амал татбиқ намудани ДСГ-ро роҳандозӣ менамоянд.

МОДДАИ 8 МУНОСИБАТ БО СОЗИШНОМАҲОИ БАЙНАЛМИЛАЛИИ ДИГАР

Муқаррароти Созишномаи мазкур ба ҳуқуқ ва уҳдадориҳое, ки аз созишномаҳо ва конвенсияҳои дигари байналмилалӣ бармеоянд ва Тарафҳо иштирокчии онҳо мебошанд, дахолат намекунад.

МОДДАИ 9 ҲАЛЛИ БАҲСҲО

1.Ҳама гуна баҳсҳое, ки дар робита бо тафсир ё татбиқи Созишномаи мазкур ба вуҷуд меоянд, пеш аз ҳама тавассути гуфтушунид ва машваратҳои байни Тарафҳо ҳал карда мешаванд. Масъалаҳои дар доираи чунин раванд ҳалношуда бояд тавассути роҳҳои дипломатӣ ҳал гарданд.

2.Ҳар яке аз Тарафҳо метавонад дар робита ба тафсир, татбиқ ва тағйир додани Созишномаи мазкур ё ҳалли ҳама гуна баҳсҳои эҳтимолие, ки метавонанд ба вуҷуд оянд, аз Тарафи дигар машварат пурсад.

3.Ҳама гуна гуфтушунид ё машваратҳое, ки дар доираи банди 1 ё 2 ҳамин модда байни Тарафҳо гузаронида мешавад, дар давоми бист (20) рӯзи гирифтани дархости хаттӣ оғоз меёбад, агар дар ин робита тартиби дигаре пешбинӣ нашуда бошад.

МОДДАИ 10 ТАҒЙИРОТУ ИЛОВАҲО

1. Ба Созишномаи мазкур метавонад ҳар вақт бо розигии хаттии мутақобилаи Тарафҳо бо протоколҳои алоҳида, ки қисми ҷудонашавандаи Созишномаи мазкур мебошад, тағйирот ворид карда шавад.

2. Тағйирот мутобиқи муқаррароти моддаи 11 Созишномаи мазкур эътибор пайдо мекунад.

МОДДАИ 11 ЭЪТИБОР ПАЙДО КАРДАН, МУҲЛАТИ АМАЛ ВА ҚАТЪИ АМАЛ

1.Тарафҳо якдигарро дар бораи иҷрои расмиёти дохилидавлатие, ки барои эътибор пайдо кардани Созишномаи мазкур заруранд, ба таври хаттӣ тавассути роҳҳои дипломатӣ огоҳ менамоянд. Созишномаи мазкур пас аз сӣ рӯз аз санаи гирифтани огоҳиномаи хаттии охирин, ки бо он Тарафҳо якдигарро огоҳ намудаанд, эътибор пайдо мекунад.

2.Созишномаи мазкур ба муҳлати номуайян баста мешавад ва ҳар яке аз Тарафҳо метавонад бо ирсоли огоҳиномаи хаттӣ дар бораи нияти қатъ кардани амали Созишнома тавассути роҳҳои дипломатӣ амали онро қатъ намояд. Дар ин ҳолат Созишномаи мазкур пас аз се (3) моҳи қабули чунин огоҳинома қатъгардида эътироф мешавад. Огоҳӣ дар бораи қатъ кардан ба амалиёти транзитӣ, ки аллакай оғоз шудааст, таъсир намерасонад. Чунин қатъкунӣ ба мурофиаҳои ҷорӣ дар лаҳзаи қатъ, ки бояд тибқи муқаррароти Созишномаи мазкур анҷом дода шавад, таъсир намерасонад.

3. Қатъи амали Созишномаи мазкур ба муомилоти иҷрошаванда таъсир намерасонад.

Созишномаи мазкур «____» ______________ соли 20___ дар шаҳри__________ дар се нусхаи аслӣ бо забонҳои тоҷикӣ, туркӣ ва англисӣ ба имзо расонида шуд, зимнан ҳамаи матнҳо эътибори якхела доранд. Дар ҳолати ба вуҷуд омадани ихтилофот дар тафсири он, ба матни забони англисӣ афзалият дода мешавад.

МАЗМУНИ МАЪЛУМОТ ИНТИҚОЛШАВАНДА

• Рамзи содироти гумрук
• Номи борфиристанда/содиркунанда
• Суроғаи молфиристанда/содиркунанда
• Ададҳо
• Маҷмӯаҳои умумӣ
• Рақами маълумотнома
• Номи қабулкунанда
• Шахсият, миллати воситаи нақлиёт ҳангоми рафтан
• Контейнер
• Шартҳои интиқол
• Шахсият, шаҳрвандии воситаҳои фаъоли нақлиёти аз сарҳад убуршаванда
• Асъор ва маблағи умумии ҳисобнома-фактура
• Идораи баромад
• Бастаҳо ва тавсифи мол (тамғаҳо ва рақамҳо, рақами контейнер, рақам ва намуд)
• № банди
• Рамзи мол (10 рақам)
• Рамзи пайдоиши кишвар
• Вазни умумии - кг
• Массаи холис
• Воҳидҳои иловагӣ
• Маълумоти иловагӣ / Хуҷҷатҳои таҳияшуда / Шаҳодатномаҳо ва иҷозатномаҳо
• Идораи сафар
• Идораи таъинот (ва кишвар)
• Рақам ва санаи ҳисобнома-фактура
• Рамзи мақомоти гумрук
• Рамзи воридоти гумрук
• Ном ва рақами ҳуҷҷати нақлиётӣ
• Шумораи ҳуҷҷатҳои замимашуда
• Санаи ҳуҷҷати интиқол
• Маълумот дар бораи кишвари тавлидшуда
• Арзиши гумрукӣ