ҲУКУМАТИ ҶУМҲУРИИ ТОҶИКИСТОН

ҚАРОР 

Мутобиқи моддаи 12 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

Созишнома байни Ҳукумати Ҷумҳурии Тоҷикистон ва Фонди Иқлими Сабз дар бораи имтиёзҳо ва масуниятҳо, ки 18 июли соли 2024 дар шаҳри Инчхон, Ҷумҳурии Корея ба имзо расидааст, барои тасдиқ ба Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

Қарори Маҷлиси намояндагони Маҷлиси Олии Ҷумҳурии Тоҷикистон 

Мутобиқи моддаи 57 Конститутсияи Ҷумҳурии Тоҷикистон Маҷлиси намояндагони Маҷлиси Олии Ҷумҳурии Тоҷикистон қарор мекунад:

1. Созишнома байни Ҳукумати Ҷумҳурии Тоҷикистон ва Фонди Иқлими Сабз дар бораи имтиёзҳо ва масуниятҳо, ки 18 июли соли 2024 дар шаҳри Инчхон, Ҷумҳурии Корея ба имзо расидааст, тасдиқ карда шавад.

2. Ҳукумати Ҷумҳурии Тоҷикистон бо тартиби муқарраргардида Фонди Иқлими Сабзро дар бораи аз ҷониби Ҷумҳурии Тоҷикистон иҷро гардидани расмиёти дохилидавлатие, ки барои эътибор пайдо кардани Созишномаи мазкур зарур аст, огоҳ намояд.

СОЗИШНОМА БАЙНИ ҲУКУМАТИ ҶУМҲУРИИ ТОҶИКИСТОН ВА ФОНДИ ИҚЛИМИ САБЗ

Ҳукумати Ҷумҳурии Тоҷикистон («Ҳукумат») ва Фонди Иқлими Сабз («ФИС») аз зарурати таъмини талаботи бандҳои 7 ва 8 Воситаи идоракунии Фонди Иқлими Сабз («Воситаи идоракунӣ») хабардоранд, ки ФИС ва шахсони бо ФИС алоқаманд дар Ҷумҳурии Тоҷикистон бояд аз имтиёзҳо ва масуниятҳо истифода баранд;

Ҳукумат ва ФИС розӣ ҳастанд, ки додани имтиёзҳо ва масуниятҳо ба ФИС ва шарикони он барои иҷрои самараноки вазифаҳои ФИС зарур аст;

ва

бо мақсади бастани шартнома аз рӯи ин масъала:

Моддаи 1 Мафҳумҳо

Барои мақсадҳои Созишномаи мазкур мафҳумҳои зерин истифода мешаванд:

а) «Созишнома» маънои ба мувофиқа омадани созиш байни ФИС ва Ҷумҳурии Тоҷикистонро дорад;

б) «Бойгонии ФИС» маънои ҳамагуна сабтҳо, мукотибаҳо, ҳуҷҷатҳо, дасти ависҳо, расмҳо ва тавсирҳои ҳаракаткунанда, филмҳо, сабтҳои овозӣ, маълумоти компютерӣ ё медиавӣ, сабтҳои дигари рақамӣ ва электронӣ, ё дигар маҷмӯаҳои маълумот ё маводи дигари дар мошин хондашаванда ё шакли дигарро дорад, ки ба ФИС тааллуқ дорад ё дар он нигоҳ дошта мешавад;

в) «Раёсат» маънои Раёсати ФИС-ро дорад;

г) «Конвенсия» маънои Конвенсияи қолабии Созмони Милали Муттаҳид оид ба тағйирёбии иқлимро дорад, ки 9 майи соли 1992 дар Ню-Йорк қабул шуда, 21 марти соли 1994 эътибор пайдо кардааст;

д) «Баҳс» маънои ҳама гуна баҳс ё даъвоеро дорад, ки аз (ё) дар робита бо Созишномаи мазкур ё мавҷудият, тафсир, татбиқ, вайронкунӣ, қатъ ё беэътибор будани он бармеояд;

е) «Директори иҷроия» маънои роҳбари Котиботро дорад, ки онро Раёсат таъин мекунад:

ё) «Коришнос» - маънои коршинос ё мушовиреро дорад, ки дар доираи созишномаҳо қарордодӣ бо ФИС (ё байни коршинос ва ФИС, ё байни субъект ва ФИС), аз ҷумла воҳидҳои мустақил ва аъзои кумитаҳо, комиссияҳо ва гурӯҳҳои кории Раёсат, идораҳо, объектҳо ё ташкилоте, ки ФИС метавонад дар Ҷумҳурии Тоҷикистон таъсис диҳад, хизматрасониро анҷом медиҳад;

ж) «Воҳидҳои мустақил» маънои воҳиди мустақили арзёбӣ, воҳиди мустақили таъмини софдилона ва механизми мустақили ҷуброни зарарро дорад, ки аз ҷониби Раёсат тибқи дастури роҳбарикунанда таъсис дода шудааст;

з) «ФИС» маънои Фонди Иқлими Сабз ва ҳама гуна ташкилот ё иншоотеро дорад, ки мумкин аст аз ҷониби Фонди Иқлими Сабз ва идора дигар дар Ҷумҳурии Тоҷикистон таъсис дода шуда, Раёсат метавонад дар бораи таъсис дар мувофиқа бо Ҳукумат қарор қабул кунад;

и) «Ҳукумат» маънои Ҳукумати Ҷумҳурии Тоҷикистонро дорад;

к) «Нозирон» маънои нозирони фаъоле, ки барои иштирок дар ҷаласаҳои Раёсат даъват шудаанд ва ҳама гуна намояндаи таъиншудаи нозирро дорад, ки аз ҷониби ФИС ваколатдор шудааст;

л) «Шахсони мансабдор» маънои аъзо ва муовинони аъзои раёсат ва мушовирони онҳо, Директори иҷроия, кормандони Котибот ва шахсони мансабдор ва кормандони дигар, аз ҷумла кормандони воҳидҳои мустақил ва ҳама гуна идора ё иншоот ё муассисаро дорад, ки ФИС метавонад новобаста аз шаҳрвандии онҳо дар Ҷумҳурии Тоҷикистон қабул кунад;

м) «Тараф» ё «Тарафҳо» маънои ФИС ва/ё Ҳукумати Ҷумҳурии Тоҷикистонро вобаста ба ҳолатҳои имконпазир доранд;

н) «Моликияти ФИС» маънои дороиҳо, маблағҳо, даромад ва ҳуқуқҳоеро дорад, ки ба ФИС таллуқ доранд, ё дар ихтиёр доранд ё идора мекунанд; ва

о) «Котибот» маънои Котиботи ФИС-ро дорад, ки аз ҷониби ФИС мутобиқи Дастури роҳбарикунанда таъсис дода шудааст.

Моддаи 2 Мақсад

Барои ба таври муассир иҷро кардани ҳадафҳои худ ва иҷрои вазифаҳои ба он вогузошташуда ба ФИС дар ҳудуди Ҷумҳурии Тоҷикистон мақом, масуниятҳо, ҳуқуқи мусодира ва имтиёзҳои дар Созишномаи мазкур муқарраршуда дода мешаванд.

Моддаи 3 Вазъи ҳуқуқӣ

ФИС дорои ҳуқуқи пурраи шахси ҳуқуқӣ, аз ҷумла дорои қобилияти пурраи молумулкии:

- имзои қарордодҳо;

- харидорӣ намудани молу мулки ғайриманқул ва манқул; ва

- оғози мурофиаи судӣ мебошад.

Моддаи 4 Масуният аз мурофиаи судӣ

ФИС, инчунин моликияти он, ки дар ҳудуди Ҷумҳурии Тоҷикистон қарор дошта, бевосита ба Фондн Иқлими Сабз таалуқ дорад, аз ҳама гуна шаклҳои мурофиаи судӣ, ба истиснои ҳолатҳое, ки дар ҳама ҳолатҳои мушаххас аз дахлнопазирии худ даст кашидааст, аз масуният истифода мебаранд. Бо вуҷуди ин, ба назар гирифта мешавад, ки даст кашидан аз масуният ба ягон чораи иҷрои маҷбурӣ паҳн намегардад.

Моддаи 5 Дахлпоназирии бино ва дороиҳо

1. Ҳама гуна биноҳое, ки аз ҷониби ФИС дар мувофиқа бо Ҳукумат дар Ҷумҳурии Тоҷикистон истифода мешаванд, дахлнопазир буда, таҳти назорат ва салоҳияти ФИС мебошанд. Ҳукумат ҳифз ва пешниҳоди хизматрасониҳои коммуналиро барои ҳама гуна ин биноҳо таъмин мекунад.
2. Молу мулки ФИС, новобаста аз он ки дар куҷо ҷойгир аст ва аз ҷониби кӣ нигоҳ дошта мешавад, аз кофтуков, реквизитсия, мусодира, бегонакунӣ ё ҳама гуна шаклҳои дигари ситонидан ё пешниҳод ба амали иҷроия, маъмурӣ ё қонунгузорӣ эмин аст.

Моддаи 6 Масунияти ҳуҷҷатҳои бойгонӣ

Бойгониҳои ФИС ва умуман ҳама ҳуҷҷатҳо ва маълумот, новобаста аз он, ки дар кадом шакл, аз ҷумла форматҳои электронӣ, ки ба он тааллуқ доранд ё дар он нигоҳ дошта мешаванд, дар куҷое, ки ҷойгиранд, дахлнопазир мебошанд.

Моддаи 7 Озодии молу мулк аз уҳдадориҳо

1. Дар доираи амалӣ намудани мақсаду вазифаҳои ФИС ва бо дарназардошти муқаррароти Созишномаи мазкур, тамоми молу мулки ФИС бояд аз маҳдудиятҳо, қоидаҳо, назорат ва мораторияи ҳар гуна хусусият озод бошад.
2. ФИС бидуни маҳдудияти назорати молиявӣ, қоидаҳо ё мораторияи ҳама гуна шакл:

• метавонад дорои маблағҳо, тилло ё асъори ҳама гуна шакл ва суратҳисобҳо дар ҳама гуна асъор бошад; ва
• озод аст, ки маблағҳои худ, тилло ё асъори худро аз як кишвар ба кишвари дигар ё дар дохили ягон кишвар интиқол диҳад ва ҳар як асъори ивазшавандаи дар ихтиёри худ доштаро ба ҳама гуна асъори дигари ивазшаванда табдил диҳад.

3. Дар татбиқи ҳуқуқҳои худ, ки дар банди 2 моддаи мазкур ифода ёфтаанд, ФИС ба ҳама гуна пешниҳодҳои Ҳукумат диққати зарурӣ медиҳад, бо дарназардошти он, ки ин пешниҳодҳо барои пешгирии зарари манфиятҳои ФИС равона шуда бошанд.

Моддаи 8 Бартарӣ барои муросилот

Муросилоти расмии ФИС дар реҷаи на кам аз он истифода бурда мешавад, ки барои муросилоти расмии созмонҳои байналмилалии дар Ҷумҳурии Тоҷикистон фаъолияткунанда муқаррар шудааст.

Моддаи 9 Масуниятҳо ва имтиёзҳои мансабдорони ФИС

1. Ҳамаи шахсони мансабдор ва коршиносон:

• аз мурофиаи судӣ нисбат ба амалҳое, ки онҳо дар доираи мансабашон анҷом додаанд, масуният доранд, ба истиснои ҳолатҳое, ки ФИС аз масуният даст кашад;
• агар онҳо шаҳрвандони маҳаллӣ ё ҳамватанон набошанд, ба талаботи муҳоҷират, талаботи бақайдгирии хориҷӣ ва уҳдадориҳои хизматрасонии миллӣ низ ҳамон шароите, ки Ҷумҳурии Тоҷикистон барои қоидаҳои мубодилаи асъор пешбинӣ кардааст, ба намояндагон, шахсони мансабдор ва кормандони рутбаи муқоисашавандаи ташкилотҳои байналмилалии дигар дода мешавад.
• нисбат ба хароҷоти сафар ҳамон гуна муносибатҳое дода мешавад, ки Ҷумҳурии Тоҷикистон ба намояндагон, шахсони мансабдор ва кормандони дигар ташкилотҳои байналмилалии рутбаи муқоисашаванда муқаррар кардааст; ва
• дар ҳолати буҳрони байналмилалӣ ба онҳо ҳамон гуна шароити бозгашт ба ватан, ки фиристодагони дипломатӣ доранд, дода мешавад.

2. Ба ғайр аз муқаррароти дар банди 1 ҳамин модда муқарраргардида аъзо ва аъзои алтернативии Раёсат ва Директори иҷроия ҳангоми иҷрои вазифаҳо ва ҳангоми сафар ба Ҷумҳурии Тоҷикистон ва аз он баромадан аз ҳабси шахсӣ ё боздошт шудан, мусодираи бағоҷи шахсӣ масуният доранд.
3. Нозирон ва шахсоне, ки дар банди 1 ҳамин модда пешбинӣ нашудаанд ва аз ҷониби ФИС барои иштирок дар конфронсҳо ва маҷлисҳо даъват шудаанд, нисбат ба тамоми амалҳое, ки онҳо ба сифати даъватшудаи ФИС анҷом додаанд, аз мурофиаи судии тамоми шаклҳо масуният доранд.

Моддаи 10 Осонсозии сафар ва эътирофи ҳуҷҷати сафар

1. Ҷумҳурии Тоҷикистон дар ҳолатҳои зарурӣ барои шахсони мансабдор ва коршиносон ҳаракати транзитиро аз ҷумла тавассути барасмиятдарории фаврии дархости раводид таъмин менамояд.
2. Ҷумҳурии Тоҷикистон барои додани раводид ба нозирон ва шахсони дигаре, ки аз ҷониби ФИС барои иштирок дар вохӯриҳо ё конфронсҳои аз ҷониби ФИС ташкилшуда даъват шудаанд, дар ҳолати зарурӣ мусоидат менамояд.
3. Ҳукумат истифодабарии иҷозатномаҳои Созмони Милали Муттаҳид аз ҷониби даъватшудагони ФИС ва истифодаи ҳама гуна ҳуҷҷатҳои сафарро, ки ФИС барои шахсони расмӣ ва коршиносон тасдиқ кардааст, эътироф мекунад.

Моддаи 11 Озодкунӣ аз андозбандӣ

1. Молу мулки ФИС, амалиёт ва доду гирифти он аз ҳама гуна андозбандӣ ва аз ҳама боҷҳои гумрукӣ озод карда мешаванд. ФИС инчунин аз ҳама гуна уҳдадориҳо оид ба пардохт, нигоҳ доштан ё ситонидани ҳама гуна андоз ё боҷ озод карда мешавад.
2. Аз маош ва мукофотпулие, ки аз ҷониби ФИС ба шахсони мансабдор ва коршиносон пардохта мешавад, андоз ситонида намешавад. Сарфи назар аз ин, Тоҷикистон ҳуқуқи андозбандии маош ва мукофотпулиро, ки аз ҷониби ФИС ба шаҳрвандони Тоҷикистон ва ё шахсоне, ки дар Тоҷикистон истиқомат мекунанд, нигоҳ медорад.
3. Ҷумҳурии Тоҷикистон аз ҳама гуна уҳдадорӣ ё коғазҳои қиматноки аз ҷониби ФИС баровардашуда, аз ҷумла ҳама гуна фоидаҳо ё фоизҳо аз онҳо андоз намегирад, ба касе, ки онҳо тааллуқ надошта бошанд:

• агар он бар зидди чунин уҳдадорӣ ё таъминот танҳо барои он табъиз кунад, ки он аз ҷониби ФИС бароварда шудааст; ё
• агар асоси ягонаи ҳуқуқии чунин андозбандӣ ҷой ё асъоре, ки бо он бароварда шудааст, бояд пардохт карда шавад ё маҳали ҷойгиршавии ҳама гуна идора ё ҷои тиҷорате, ки аз ҷониби ФИС нигоҳ дошта мешавад.

4. Ҳеҷ гуна андоз аз ҳама гуна уҳдадорӣ ё қоғазҳои қиматнок бо кафолати аз ҷониби ФИС додашуда, аз ҷумла ҳама гуна фоидаҳо ё фоизҳои онҳо, ки ба ҷониби касе, ки тааллуқ надошта бошанд:

• ки бар зидди чунин уҳдадорӣ ё қоғазҳои қиматнок табъиз мекунад, чунки он аз ҷониби ФИС кафолат дода шудааст; ё
• агар асоси ягонаи ҳуқуқҳои чунин андозбандӣ макони ҷойгиршавии ҳама гуна идора ё макони тиҷорат бошад, ки аз ҷониби ФИС нигоҳдошта мешавад.

Моддаи 12 Даст кашидан аз ҳуқуқи истифодабарӣ

ФИС мувофиқи салоҳдиди худ метавонад аз ҳама гуна имтиёзҳо, масуниятҳо ва озодкуниҳое, ки тибқи Созишномаи мазкур дода шудаанд, дар ҳама ҳолат ё мавридҳо, дар чунин тарз ва шартҳое, ки ба манфиати беҳтарини ФИС мувофиқ дониста мешаванд, даст кашад. Ба назар гирифта шавад, ки имтиёзу масуниятҳо ба шахсони мансабдор ва коршиносон на ба манфиати шахсии онҳо, балки ба манфиати фаъолияти пурсамари ФИС дода мешаванд. Аз ин рӯ, ФИС на танҳо ҳуқуқ дорад, балки вазифадор аст, ки аз дахлноназирии шахсони мансабдор ва коршиносон даст кашад, дар ҳар сурат, ки ба ақидаи ФИС, вобаста ба вазъият, дахлнопазирӣ ба ҷараёни адолат халал мерасонад, ва дар он ҷое, ки аз он даст кашидан мумкин аст, бе зарар ба мақсаде, ки барои он дахлнопазирӣ дода мешавад ва ё ба манфиатҳои ФИС, вобаста ба вазъият.

Моддаи 13 Ҳалли баҳсҳо

1. Тарафҳо кӯшиш мекунанд, ки ҳама гуна баҳсро тавассути машваратҳои мутақобила ҳал кунанд.
2. Агар Ҳукумат ва ФИС дар давоми навад (90) рӯз баҳсро тавассути машварати мутақобила ҳал карда натавонанд, ҳар як Тараф мставонад дархост намояд, ки чунин баҳс тибқи Қоидаҳои доимии ҳакамии (ҚДҲ) 2012 ва аз тариқи ҳакамӣ ҳал карда шавад, ба шарте, ки агар:

• Шумораи ҳакамҳо бояд се нафар бошад;
• Ҷойи ҳаками Гаага, Нидерландия, дар ҷойгиршавии ҚДҲ бошад;
• забоне, ки дар мурофмаи ҳакамӣ истифода мешавад, забони англисӣ бошад; ва

- Тарафҳо бо ҳамин аз ҳуқуқи худ ба ҳама гуна шаклҳои муроҷиат нисбат ба ҳукми арбитраж ё мақомоти салоҳиятдори дигар, ба шарте, ки чунин дасткашӣ тибқи қонуни амалкунанда имконпазир аст, даст мекашанд.

Моддаи 14 Муқаррароти дигар

1. Бо розигии хаттии Тарафҳо тавассути намояндагони ба таври дуруст ваколатдоршуда ба Созишномаи мазкур метавонад тағйирот ворид карда шавад, ки дар шакли протоколҳои алоҳида, ки қисми ҷудонашавандаи Созишнома мебошанд ба расмият дароварда шуда, бо тартиби пешбининамудаи банди 3 моддаи 14 эътибор пайдо мекунад.
2. Дар ҳолати зарурӣ Тарафҳо метавонанд созишномаҳои иловагӣ дар доираи Созишномаи мазкур ба имзо расонанд.
3. Созишномаи мазкур аз лаҳзаи аз ҷониби ФИС тавассути роҳҳои дипломатӣ гирифтани огоҳиномаи хаттӣ дар бораи иҷрои расмиёти дохилидавлатӣ аз тарафи Ҷумҳурии Тоҷикистон, ки барои эътибор пайдо кардани он зарур мебошад, эътибор пайдо мекунад.
4. Созишномаи мазкур дар ду нусхаи аслӣ бо забонҳои тоҷикӣ ва англисӣ ба имзорасонидани шуд, зимнан ҳар яке аз онҳо эътибори якхелаи ҳуқуқӣ дорад. Дар ҳолати ба миён омадани баҳсҳо дар раванди татбиқи Созишномаи мазкур, бартарӣ ба нусхаи англисӣ дода мешавад.

БАРОИ ТАСДИҚИ СОЗИШМОМА намояндагони дахлдори ваколатдор онро имзо карданд: