ҲУКУМАТИ ҶУМҲУРИИ ТОҶИКИСТОН

ҚАРОР

Мувофиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Ёддошти тафоҳум байни Вазорати корҳои дохилии Ҷумҳурии Тоҷикистон, Вазорати меҳнат, муҳоҷират ва шуғли аҳолии Ҷумҳурии Тоҷикистон ва Идораи муҳоҷирати Хадамоти федералии давлатии корҳои дохилии Подшоҳии Белгия маъқул дониста шавад.

2. Вазири корҳои хориҷии Ҷумҳурии Тоҷикистон Ёддошти тафоҳуми мазкурро ба имзо расонад ва ҳангоми зарурат ба матни он таѓйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон тибқи тартиби муқарраргардида сана ва маҳалли баимзорасонии Ёддошти тафоҳуми мазкурро бо ҷониби Белгия мувофиқа намояд.

ЁДДОШТИ ТАФОҲУМ БАЙНИ ВАЗОРАТИ КОРҲОИ ДОХИЛИИ ҶУМҲУРИИ ТОҶИКИСТОН, ВАЗОРАТИ МЕҲНАТ, МУҲОҶИРАТ ВА ШУҒЛИ АҲОЛИИ ҶУМҲУРИИ ТОҶИКИСТОН ВА ИДОРАИ МУҲОҶИРАТИ ХАДАМОТИ ФЕДЕРАЛИИ ДАВЛАТИИ КОРҲОИ ДОХИЛИИ ПОДШОҲИИ БЕЛГИЯ

Вазорати корҳои дохилии Ҷумҳурии Тоҷикистон, Вазорати меҳнат, муҳоҷират ва шуғли аҳолии Ҷумҳурии Тоҷикистон ва Идораи муҳоҷирати Хадамоти федералии давлатии корҳои дохилии Подшоҳии Белгия, ки минбаъд дар алоҳидагӣ Тараф ва дар якҷоягӣ Тарафҳо номида мешаванд,

бо тасдиқи он, ки Ёддошти тафоҳуми мазкур ба ҳуқуқ ва уҳдадориҳои иштирокчиён тибқи Эъломияи умумии ҳуқуқи башар аз 10 декабри соли 1948 ва созишномаҳои байналмилалӣ, аз ҷумла:

1. Конвенсия оид ба мақоми гурезаҳо аз 28 июли соли 1951, ки бо протокол аз 31 январи соли 1967 оид ба мақоми гурезаҳо тағйиру илова ворид карда шудааст;
2. Паймони байналмилалӣ оид ба ҳуқуқҳои шаҳрвандӣ ва сиёсӣ аз 16 декабри соли 1966;
3. Паймони байналмилалӣ оид ба ҳуқуқҳои иқтисодӣ, иҷтимоӣ ва фарҳангӣ аз 16 декабри соли 1966;
4. Конвенсия оид ба авиатсияи байналмилалии шаҳрвандӣ ва замимаҳои он, ки 1 декабри соли 1944 дар Чикаго ба имзо расидааст, мухолифат намекунад,

бо кӯшиши тасдиқ намудани саъю талошҳои умумї ҷиҳати мусоидат ба муҳоҷирати қонунӣ ва муборизаи муассир бар зидди ҳама гуна шаклҳои муҳоҷирати ғайриқонунӣ,

ба мувофиқаи зерин расиданд:

I. Ҳамкорӣ дар соҳаи муҳоҷират

Моддаи 1. Мақомоти ваколатдор

Мақомоти ваколатдори Тарафҳо, ки барои иҷрои Ёддошти тафоҳум уҳдадоранд, инҳоянд:

аз ҷониби Тоҷикистон - Вазорати корҳои дохилии Ҷумҳурии Тоҷикистон ва Вазорати меҳнат, муҳоҷират ва шуғли аҳолии Ҷумҳурии Тоҷикистон;

аз ҷониби Белгия - Идораи муҳоҷирати Хадамоти федералии давлатии корҳои дохилии Подшоҳии Белгия.

Тарафҳо метавонанд мақомоти дигари ваколатдорро, ки барои ҳалли масъалаҳои дар Ёддошти тафоҳуми мазкур дарҷшуда мусоидат менамоянд, ҷалб намоянд.

Моддаи 2. Соҳаҳои ҳамкорӣ

Тарафҳо ҳамкориро дар соҳаҳои зерин ба роҳ мемонанд:

• таҳкими ҳамкориҳои минбаъда дар сатҳи BENELUX тариқи созишномаи алоҳида дар соҳаи муҳоҷират;
• тақвияти ҳамкориҳои минбаъда дар самти баргардонидан (реадмиссия)-и шаҳрвандон мутобиқи созишномаи алоҳида;
• мубодилаи иттилоот дар бораи тағйирот ба қонунгузорӣ ва санадҳои меъёрӣ ҳуқуқии онҳо дар самти муҳоҷират;
• мубодила ва таҳлили муштараки воситаҳо ва системаҳое, ки ҳарду Тараф барои ҳавасмандгардонии муҳоҷирати мунтазам истифода мебаранд;
• тақвияти ҳамкорӣ байни мақомоти консулӣ ва муҳоҷират тавассути таҳияи ташаббусҳои марбут ба соҳаҳои мавриди таваҷҷуҳи тарафайн дар самти муҳоҷират;
• пешгирии муҳоҷирати ғайриқонунӣ ва пешбурди роҳҳои муҳоҷирати қонунӣ тавассути ташаббусҳои гуногун;

• таъмин намудани муҳоҷирони меҳнатӣ (довталабон) бо раводид ва тамоми маълумоти лозима дар бораи шартҳои додани раводид ва ҳуҷҷатгузории он барои сабук гардонии раванди дастрасии раводид;
• мусоидат намудан дар пешбурди муҳоҷирати муваққатӣ ҳангоми пешгирии кӯчиши зеҳнҳо, Тоҷикистон ва Белгия лоиҳаҳои имконпазирро дар ин соҳа меомӯзанд;
• мусоидат намудан барои интиқол ва мубодилаи дониш ва таҳкими барномаҳои мобилӣ, ки мубодилаи академиро байни донишҷӯён, муҳаққиқон, олимон, донишкадаҳо ва намояндагони фарҳанг пешбарӣ менамояд;
• мусоидат намудан барои сафарҳои корӣ бо мақсади сармоягузорӣ;
• татбиқи лоиҳаҳои муштарак ва ташкил намудани тренингҳо ҷиҳати баланд бардоштани иқтидори намояндагони мақомоти ваколатдор.

II. Бозгашти муҳоҷирони ғайриқонунӣ

Моддаи 3. Шартҳои ҳамкорӣ

Ҳар яке аз Тарафҳо барои бозгашти шаҳрвандони худ, ки дар ҳудуди Тарафи дигар ғайриқонунӣ қарор доранд, мусоидат менамояд.

Ҳар яке аз Тарафҳо бо дархости Тарафи дигар шахсеро, ки ғайриқонунӣ дар ҳудуди Тарафи дархосткунанда қарор дорад, агар исбот ва/ё эътироф карда шавад, ки ӯ шаҳрвандии Тарафи дархостшударо дорад, ба худуди давлати худ қабул мекунад.

Моддаи 4. Тартиби тафтиши шаҳрвандӣ

Шаҳрвандӣ тавассути пешниҳоди шиноснома ё корти шахсии миллӣ, ҳатто дар ҳолати эътибор надоштани онҳо, тасдиқ карда мешавад.

Дар ҳолате, ки шахси қабулшаванда ҳуҷҷати эътибори сафар (шиносномаи аслӣ ё корти шахсӣ) дошта бошад, дархост дар бораи реадмиссия талаб карда намешавад.

Шаҳрвандӣ инчунин тавассути ҳуҷҷати расмии дигаре, ки метавонад шаҳрвандии шахси қабулшударо тасдиқ кунад, ҳатто агар эътибор надошта бошад ҳам, тасдиқ карда мешавад, масалан:

- ҳуҷҷати сафари таъҷилӣ, ки аз Тарафи дархостшаванда пешниҳод мегардад;

- шиноснома ё ҳуҷҷати дигаре, ки шахсият ва ё шаҳрвандии шахсро муайян мекунад;

- шаҳодатнома ё билети ҳарбӣ;

- тасдиқи шахсият аз натиҷаи машварати Низоми иттилоотии раводид;

- ҳуҷҷати дахлдори дигаре, ки метавонад шахсияти манфиатдорро тасдиқ намояд.

Моддаи 5. Имкониятҳои иловагии тасдиқкунандаи шахсият 

Шаҳрвандӣ метавонад бо пешниҳоди нусхаи ҳуҷҷатҳои дар модда дарҷгардида ё пешниҳоди ҳуҷҷатҳои зерин тасдиқ карда шавад:

- шаҳодатномаи ронандагӣ ё нусхаи он;

- шаҳодатномаи таваллуд ё нусхаи он;

- шаҳодатномаи бозгашт ба Ватан;

- баёнияе, ки ҳангоми таҳлили забондонӣ ба шахси манфиатдор дода шудааст;

- ҳуҷҷати расмии дигаре, ки шаҳрвандии шахс дарҷ гардидааст;

- натиҷаи муқоисаи биометрикӣ, аз ҷумла изи ангушт.

Дар ҳолати мавҷуд набудани ҳуҷҷатҳои қайдгардида ё ҳуҷҷатҳои дар банди мазкур дарҷгардида, бо мақсади муайян намудани шаҳрвандии Тарафи дархостшуда Тарафи дархосткунанда метавонад ҳамкориро бо Тарафи дархостшуда тариқи ташкил намудани мусоҳиба ё вохӯрӣ ба роҳ монад.

Дархости мусоҳиба бояд на камтар аз 10 (даҳ) рӯз баъд аз пешниҳоди дархости аввалин дар шакли вохӯрӣ ё видеоконференсия сурат гирад. Натиҷаи он ба Тарафи дархосткунанда дар муддати 3 (се) рӯз баъд аз мусоҳиба пешниҳод мегардад.

Тарафи дархосткунанда тибқи дархости Тарафи дархостшуда интиқоли маълумоти биометрӣ, аз ҷумла акс ва изи ангушти шахси реадмиссияшавандаро ирсол менамояд. Ин маълумот танҳо бо мақсади муайян намудани шахсияти реадмиссияшаванда истифода мешавад.

Моддаи 6. Мубодилаи иттилоот

Дар ҳолати тибқи моддаҳои 4 ва 5 муайян намудани шаҳрвандӣ, Тарафи дархостшуда фавран дар муддати на зиёдтар аз понздаҳ (15) рӯз аз лаҳзаи дархост бо розигии шахси манфиатдор бояд ҳуҷҷати сафарро, ки муҳлати эътибори он на камтар аз шаш (6) моҳ аст, ба таври ройгон таъмин намояд.

Агар бо сабабҳои ҳуқуқӣ ё воқеӣ шахси манфиатдор дар давраи зикргардида баргардонида нашавад, Тарафи дархостшуда дар муҳлати се (3) рӯз ҳуҷҷати навро бо муҳлати эътибор ба Тарафи дигар тариқи ройгон таъмин менамояд.

Моддаи 7. Тадбирҳои иловагӣ

Тарафҳо барои пеш аз боздошт муайян намудани шахсоне, ки ғайриқонунӣ дар ҳудуди давлатҳои Тарафҳо қарор доранд, ҳамкорӣ менамоянд.

Тарафи дархостшуда ҳамроҳӣ кардани шахсони муайянкунандаро аз ҷониби Тарафи дархосткунанда иҷозат медиҳад.

Намояндагии дипломатии Тарафи дархостшуда ба шахсони ҳамроҳ дар додани раводид мусоидат мекунанд, то ки онҳо имкон пайдо намоянд, ки ҳангоми иҷрои вазифаҳои хизматиашон ба ҳудуди он кишвар роҳ дода шаванд.

Тамоми хароҷот вобаста ба баргардонидани шаҳрвандон, ки дар ҳудуди кишвари яке аз Тарафҳо ғайриқонунӣ қарор доранд, аз ҷониби Тарафи дархосткунанда пардохт карда мешавад.

Тарафҳо ба мувофиқа расиданд, ки ба шахсони осебпазир пас аз баргаштани онҳо дастгирии мушаххас ва мусоидати иловагӣ мерасонанд.

III. Муқаррарот оид ба ҳифзи маълумоти шахсӣ

Моддаи 8. Тартиби интиқоли маълумоти шахсӣ

Интиқоли маълумоти шахсӣ байни мақомоти ваколатдори Тарафҳо дар он маврид сурат мегирад, ки чунин муошират барои амалисозии Ёддошти тафоҳуми мазкур зарур бошад.

Омода намудани маълумоти шахсӣ дар ҳолати муайян бояд бо қонунгузории Ҷумҳурии Тоҷикистон ва барои ҷониби Белгия тибқи муқаррароти Низомномаи (ИА) 2016/679 аз 27 апрели соли 2016 ва қонунгузории миллӣ танзим карда шавад. Дар ҳар сурат маълумоти шахсӣ бояд:

а) ба таври қонунӣ, одилона ва шаффоф вобаста ба мавзуи маълумот коркард шавад («қонунӣ, одилона ва шаффоф»);

б) барои мақсадҳои мушаххас, возеҳ ва қонунӣ ҷамъоварӣ шуда, минбаъд бо ин усул коркард нашавад («маҳдудияти мақсад»);

в) вобаста ба мақсадҳои зарурӣ мушаххас, мувофиқ ва маҳдуд бошанд («кам кардани маълумот»);

г) дақиқ ва ҳангоми зарурат такмил дода шуда, тамоми чораҳои зарурӣ андешида шавад, то ки маълумоти нодурусти шахс бо дарназардошти мақсадҳо бартараф ё бе таъхир ислоҳ карда шавад («дақиқӣ»);

д) дар шакле нигоҳ дошта шавад, ки барои муайян кардани субъектҳои маълумот, ки барои коркарди мақсади маълумоти шахсӣ заруранд, имкон диҳад («маҳдудияти нигоҳдорӣ»);

е) тавре ислоҳ карда шавад, ки бехатарии дурусти маълумоти шахсӣ, аз ҷумла муҳофизат аз ислоҳоти беиҷозат ё ғайриқонунӣ, талафоти тасодуфӣ, нобудшавӣ ё вайроншавиро бо истифода аз чораҳои дахлдори техникӣ ва ташкилӣ таъмин намояд (ягонагӣ ва махфият);

ё) махфияти иттилооти интиқолшавандаро таъмин ва пешгирии интиқоли маълумотро ба шахси сеюм пешгирї намояд.

IV. Ҳалли баҳсҳо

Моддаи 9. Ҳалли баҳсҳо ва истилоҳот

Ҳама гуна ихтилофоте, ки метавонад зимни тафсир ё татбиқи Ёддошти тафоҳуми мазкур ба миён ояд, бо роҳи гуфтушунид ва машваратҳои байни Тарафҳо ҳал карда мешавад.

Бо розигии мутақобилаи хаттӣ Тарафҳо метавонанд ба Ёддошти тафоҳуми мазкур бо протоколи алоҳида, ки қисми ҷудонашавандаи Ёддошти тафоҳуми мазкур мебошад, тағйирот ворид намоянд.

V. Муқаррароти ниҳоӣ

Моддаи 10. Дигар масъалаҳо

Ёддошти тафоҳуми мазкур аз лаҳзаи гирифтани тавассути роҳҳои дипломатӣ огоҳиномаи охирони хаттӣ оид ба иҷрои расмиёти дохилидавлатие, ки барои эътибор пайдо намудани он аз ҷониби Тарафҳо заруранд, эътибор пайдо мекунад.

Ёддошти тафоҳуми мазкур ба муҳлати панҷ сол баста шуда, агар яке аз Тарафҳо на дертар аз шаш моҳ пеш аз ба охир расидани муҳлати амали Ёддошти тафоҳуми мазкур Тарафи дигарро аз нияти худ оид ба қатъи амали он ба таври хаттӣ огоҳ насозад, амали он метавонад барои 5 соли минбаъда тамдид карда мешавад.

Дар шаҳри _____________ «___» _________ соли 20__ дар ду нусхаи аслӣ бо забонҳои тоҷикӣ ва англисӣ ба имзо расонида шуд, зимнан ҳамаи матнҳо эътибори якхела доранд.

Дар сурати ба миён омадани ихтилоф дар тафсири Ёддошти тафоҳуми мазкур, ба матни англисӣ бартарӣ дода мешавад.