ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Ёддошти тафоҳум байни Ҳукумати Ҷумҳурии Тоҷикистон ва Ҳукумати Давлати Кувайт оид ба ҳамкории тиҷоратӣ маъқул дониста шавад.

2. Вазири рушди иқтисод ва савдои Ҷумҳурии Тоҷикистон Ёддошти тафоҳуми мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон тибқи тартиби муқарраргардида бо ҷониби Кувайт сана ва маҳалли имзои Ёддошти тафоҳуми мазкурро мувофиқа намояд.

Ёддошти тафоҳум байни Ҳукумати Ҷумҳурии Тоҷикистон ва Ҳукумати Давлати Кувайт оид ба ҳамкории тиҷоратӣ

Ҳукумати Ҷумҳурии Тоҷикистон ва Ҳукумати Давлати Кувайт, ки минбаъд «Тарафҳо» номида мешаванд,

бо илҳом аз хоҳиши қавии таҳкими робитаҳои дӯстӣ ва ҳамкориҳои мавҷуда байни худ,

бо иродаи саҳмгузорӣ тавассути ҳамкориҳои тиҷоратӣ барои ба даст овардани шукуфоии бештар барои мардумони худ,

бо хоҳиши таҳкими минбаъдаи ҳамкориҳои тиҷоратӣ,

ба мувофиқаи зерин расиданд:

Моддаи 1. Мақсадҳо 

Ёддошти тафоҳуми мазкур ба мақсадҳои зерин баста мешавад:

1.Таҳкими муносибатҳои иқтисодӣ дар соҳаҳои савдо ва сармоягузорӣ.

2. Тақвияти ҳамкорӣ бо мақсади озодсозии савдо ва сармоягузорӣ байни иштирокдорон мутобиқи қонунҳои дахлдори онҳо ва уҳдадориҳои байналмилалӣ.

3. Тавсеаи иштироки бахши хусусӣ дар ҳамкориҳои савдо ва сармоягузорӣ.

4. Ташвиқи муҳити мусоид ва фаъолияти иловагӣ барои ҷалби сармоягузории бахши хусусӣ байни иштирокдорон.

5. Таъмини пайвастаи гардиши молҳо дар ҳолати буҳрон ва офатҳои табиӣ.

Моддаи 2. Механизми татбиқ 

1. Тарафҳо зеркумита оид ба ҳамкориҳои тиҷоратиро таъсис медиҳанд. Зеркумита аз намояндагони вазорату идораҳои дахлдори ҳар ду Тараф иборат хоҳад буд.

2. Ҷаласаҳои зеркумита бо мувофиқаи Тарафҳо баргузор мешаванд.

3. Зеркумита кӯшиш хоҳад кард, ки ҳамкориҳоро дар соҳаи савдо ва сармоягузорӣ рушд диҳад ва пешбарӣ кунад.

4. Зеркумита метавонад гурӯҳҳои кориро дар соҳаҳои мушаххаси ҳамкорӣ таъсис диҳад.

Моддаи 3. Зеркумита бо мақсади ҳавасманд намудани рушди муносибатҳои тиҷоратии байни Тоҷикистон ва Кувайт фаъолияти зеринро анҷом медиҳад:

a) мубодилаи маълумот дар бораи имкониятҳои савдо ва сармоягузорӣ дар ҳарду кишвар;

б) ташкили мулоқотҳои тиҷоратӣ ва фаъолияти дигари иловагӣ барои густариши муносибатҳои савдо ва сармоягузорӣ байни бахшҳои хусусии ҳарду кишвар;

в) ташвиқ ва дастгирии фаъолиятҳои пешбарии савдо, аз ҷумла семинарҳо, коргоҳҳо, намоишгоҳҳои савдо ва саноат, сафари ҳайатҳо, ва таҳқиқоти бозорӣ;

г) муайян намудани соҳаҳои манфиатдор, ки метавонанд барои афзоиши ҷараёнҳои савдо ва сармоягузорӣ байни Тоҷикистону Кувайт ва ҳатто кишвари саввум мусоидат кунанд;

д) ҳамкорӣ байни муассисаҳои расмии масъули соҳаҳои савдо, иқтисод ва сармоягузорӣ;

е) мубодилаи маълумот дар бораи савдои минтақавӣ ва ҷаҳонӣ дар молу хизматрасониҳо.

Моддаи 4. Тафсир ва татбиқ

Тарафҳо ҳама ихтилофҳои эҳтимолиро дар тафсир ё татбиқи Ёддошти тафоҳуми мазкур тавассути машварат ва гуфтушунидҳо бо воситаи роҳҳои дипломатӣ ҳал мекунанд.

Моддаи 5. Муқаррароти ниҳоӣ 

Ёддошти тафоҳуми мазкур аз рӯзи қабул шудани огоҳиномаи охирин, ки дар он яке аз Тарафҳо ба Тарафи дигар дар шакли хаттӣ тавассути роҳҳои дипломатӣ хабар медиҳад, ки расмиёти конститутсионӣ ё ҳуқуқии заруриро барои эътибор пайдо кардани он анҷом додааст, эътибор пайдо мекунад.

Ёддошти тафоҳуми мазкур метавонад бо розигии Тарафҳо тағйир дода шавад ва пас аз татбиқи тағйирот тибқи расмиёти дар банди қаблӣ зикршуда эътибор пайдо мекунад.

Ёддошти тафоҳуми мазкур ба муҳлати панҷ сол аз рӯзи эътибор пайдо карданаш амал хоҳад кард. Пас аз анҷоми ин муҳлат он худ аз худ барои муҳлатҳои минбаъда ё такрорӣ тамдид карда мешавад, агар яке аз Тарафҳо дар бораи қатъи амали он тариқи роҳҳои дипломатӣ огоҳӣ надиҳад.

Дар шаҳри __________ «__» _________ 2024 дар се нусха ҳар кадом бо забонҳои тоҷикӣ, арабӣ ва англисӣ, ки ҳар як нусхаи он эътибори баробар дорад, ба имзо расонида шуд. Дар ҳолати ихтилофи назар дар тафсир ё татбиқи Ёддошти тафоҳуми мазкур, матни англисӣ бартарӣ дорад.