ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Ёддошти тафоҳум байни Ҳукумати Ҷумҳурии Тоҷикистон ва Ҳукумати Давлати Кувайт оид ба ҳамкорӣ дар соҳаи стандартизатсия маъқул дониста шавад.
2. Директори Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон Ёддошти тафоҳуми мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳим надоштаро ворид намояд.
3. Вазорати корҳои хориҷии Ҷумҳурии Тоҷикистон бо тартиби муқарраргардида сана ва маҳалли имзои Ёддошти тафоҳуми мазкурро бо ҷониби Кувайт мувофиқа намояд.

Ёддошти тафоҳум байни Ҳукумати Ҷумҳурии Тоҷикистон ва Ҳукумати Давлати Кувайт оид ба ҳамкорӣ дар соҳаи стандартизатсия

Ҳукумати Ҷумҳурии Тоҷикистон дар шахси «Агентии стандартизатсия, метрология, сертификатсия ва нозироти савдо» (ТОҶИКСТАНДАРТ) ва Ҳукумати Давлати Кувайт дар шахси Мақомоти Давлатӣ оид ба саноат (МДС) «Раёсати стандартҳо ва метрология» (KOWSMD), ки (минбаъд «Тарафҳо» номида мешаванд),

бо майлу хоҳиши ҳар ду Тараф барои таҳкимбахши муносибатҳои ҳамкорӣ дар самтҳои стандартизатсия ва менеҷменти сифат, озмоишгоҳҳо ва баҳодиҳии мутобиқат;

ҷиҳати ба даст овардани кафолати сифати маҳсулоти саноатӣ (ба истиснои маҳсулоти хӯрокворӣ) барои воридоту содироти молу маҳсулот, бартараф намудани монеаҳои техникӣ дар савдо ва ҳимояи ҳуқуқи истеъмолкунандагон байни ду кишвар;

барои пешгирии такроршавии баҳодиҳии мутобиқат дар сарҳад тибқи талаботи байналмилалӣ;

Тарафҳо ба мувофиқаи зерин расиданд:

Моддаи 1 Доираи ҳамкорӣ

Ба роҳ мондани ҳамкориҳои техникӣ ва илмӣ, ки ба ҳамгироӣ дар соҳаи стандартизатсия, натиҷаҳои санҷиш ва баҳодиҳии мутобиқат ба манфиати Тарафҳо ноил мегардад.

Моддаи 2 Соҳаҳои ҳамкорӣ

Ҳамкории Тарафҳо соҳаҳои кории дуҷонибаро дар бар мегирад:

1. Стандартизатсия:

а). омӯзиши имконияти қабули стандартҳо ва таснифот дар ҳар ду кишвар, ки истинодҳои онҳо байналмилалӣ, аврупоӣ, минтақавӣ ё арабӣ мебошанд ва ба қонунгузории давлатҳо мухолифат надоранд.

б). баррасии таснифоти стандартии тарафҳо, ки истинодҳои байналмилалӣ доранд, яъне стандарти ISO ҳамчун истиноди асосӣ ҳангоми таҳия кардани таснифот дар ҳар ду кишвар.

в). Тарафҳо бояд стандартҳо ва регламентҳои техникиро, ки ба маҳсулот вобастагӣ доранд ва дар байни ду кишвар бештар мубодила мешаванд, бо нишон додани истинодҳои онҳо ва бо дарназардошти шартҳои зерин истифода намоянд:

- барои маҳсулоте, ки дар ҳар ду кишвар стандартҳо ва қоидаҳои ягонаи техникӣ доранд, бояд талаботи стандартҳо ва қоидаҳои ягонаи байни ду кишвар ба инобат гирифта шаванд.

- барои молҳое, ки дар ҳар ду кишвар стандартҳо ва қоидаҳои техникии гуногун доранд, стандартҳо ва қоидаҳои қабулкардаи кишвари воридкунанда ба назар гирифта мешаванд.

г). дар мувофиқа бо стандартҳои байналмилалӣ омӯхтани имконияти наздик шудан ба хусусиятҳои муқоисашавандаи маҳсулот ва молҳое, ки дар байни ду кишвар савдо мешаванд (ба истиснои маҳсулоти хӯрокворӣ).

2. Баҳодиҳии мутобиқат:

а). омӯзиши имкониятҳои эътирофи сертификатҳои мутобиқат, ки аз ҷониби ҳар ду тараф дар асоси ҳуҷҷатҳои тасдиқкунандаи ташкилотҳои байналмилалӣ ва механизми мувофиқашудаи байни тарафҳо дода шудаанд.

б). омӯзиши имконияти эътироф намудани натиҷаҳои санҷиш ва озмоиш, ки аз ҷониби тарафҳо дар асоси далелҳо ва ҳуҷҷатҳои тасдиқкунанда, инчунин эътирофи санҷишҳои озмоишгоҳӣ ва натиҷаҳои онҳо, ки аз ҷониби озмоишгоҳҳои аккредитатсияшуда дода шуданд.

3. Озмоишгоҳҳо:

а). омода намудани барномаҳои санҷиши донишу малака ва муқоисаҳои байниозмоишгоҳӣ оид ба санҷиш.

б). иштирок дар барномаҳо ва омӯзишҳо оид ба усулҳои ташхисӣ ва озмоишӣ мутобиқ ба талаботи стандартҳои байналмилалӣ.

Моддаи 3 Роҳҳои ҳамкорӣ

Ҳамкории байни Тарафҳо мувофиқи нишондодҳои зерин амалӣ мешаванд:

1. Омӯзиш, семинарҳо, конфронсҳо ва вохӯриҳои марбут ба мавзӯъҳои мубодилаи коршиносон ва омӯзгорон, иштирок дар давраҳои омӯзишии пешбинишуда дар доираи ҳамкории соҳавӣ, ки дар ҳар ду кишвар баргузор мешаванд.
2. Мубодилаи иттилоот, аз ҷумла мақолаҳо, нашрияҳо, тадқиқот, омор ва талаботи техникӣ дар соҳаи стандартизатсия, сифат, натиҷаҳои санҷиш ва баҳодиҳии мутобиқат.
3. Мубодилаи иттилоот оид ба низоми ягонаи менеҷменти идоракунӣ ва сертификатсияи дорои аккредитатсияи байналмилалӣ дар соҳаи стандартизатсия ва озмоишгоҳҳо мутобиқи стандартҳои байналмилалӣ барои баҳрабардорӣ аз таҷрибаи ҳар як кишвар дар ин соҳа.
4. Мубодилаи иттилоот оид ба қонунҳои нав ё ислоҳоти дар марҳилаи омодагӣ пешниҳодшуда.
5. Баланд бардоштани савияи дониш дар соҳаҳои стандартизатсия, сифат, натиҷаҳои санҷиш ва баҳодиҳии мутобиқат.
6. Ҳамоҳангсозии корҳо дар самтҳои фаъолият бо созмонҳои байналмилалӣ ва минтақавӣ.

Моддаи 4 Амалигардонӣ

Татбиқи Ёддошти тафоҳуми мазкур аз ҷониби Тарафҳо мувофиқи барномаҳои муайяншудаи корӣ амалӣ мешавад, ки байни ду Тараф тасдиқ ва мувофиқа карда шудаанд.

Моддаи 5 Ҳамоҳангсозӣ ва пайгирӣ

- Вохӯриҳо бояд давра ба давра байни ду тараф бо дархости яке аз Тарафҳо барои пайгирӣ ва арзёбӣ гузаронида шаванд.

- Тамос дар байни тарафҳо бояд муайян карда шавад.

Моддаи 6 Махфият

- Тарафҳо оид ба махфӣ нигоҳ доштани ҳуҷҷатҳое, ки аз ҷониби Тарафи дигар махфӣ эълон мегарданд, розигӣ медиҳанд.

- Ҳуҷҷатҳои дигари ғайримахфӣ, ки ҳангоми ҳамкории Тарафҳо ба даст оварда шудаанд, танҳо пас аз гирифтани розигии тарафи дигар метавонанд озод истифода бурда шаванд.

Моддаи 7 Ҳалли баҳсҳо

Ҳангоми ба миён омадани ягон ихтилофот байни Тарафҳо оид ба амали Ёддошти тафоҳуми мазкур, чунин ихтилоф тавассути роҳҳои дипломатӣ ё тавассути машварат ва гуфтушунидҳо ҳал карда мешаванд.

Моддаи 8 Муқаррароти умумӣ

Муқаррароти Ёддошти тафоҳуми мазкур ба ҳуқуқ ва уҳдадориҳои Тарафҳо, ки аз созишномаҳо ё дигар ҳуҷҷатҳое, ки яке ё ҳар ду Тараф бар дӯш гирифтаанд, таъсир намерасонад.

Моддаи 9 Тағйирот ба Меморандум

Тарафҳо дар мувофиқа метавонанд ба Ёддошти тафоҳуми мазкур бо тариқи протоколи алоҳида тағйирот ворид намоянд.

Протоколҳо қисми ҷудонашавандаи Ёддошти тафоҳуми мазкур ба ҳисоб рафта, мутобиқи муқаррароти моддаи 10 Ёддошти тафоҳуми мазкур эътибор пайдо мекунад.

Моддаи 10 Муҳлат ва эътибор пайдо кардан

Ёддошти тафоҳум аз рӯзи қабул огоҳиномаи Тарафҳо тавассути роҳҳои дипломатӣ оид ба анҷом додани расмиёти дохилидавлатӣ эътибор пайдо мекунад.

Ёддошти тафоҳум ба муҳлати 5 (панҷ) сол аз рӯзи пайдо кардани эътибори он амал намуда, худ аз худ ба як ва ё зиёда давраи иловагӣ тамдид карда мешавад, агар яке аз Тарафҳо қабл аз шаш моҳ онро бо роҳи ирсоли огоҳиномаи хаттӣ тариқи роҳҳои дипломатӣ ба тарафи дигар қатъ накунад.

Қатъи Ёддошти тафоҳум ба фаъолият ва лоиҳаҳое, ки қаблан дар асоси Ёддошти тафоҳуми мазкур ба имзо расидаанд, таъсир намерасонад.

Ёддошти тафоҳуми мазкур дар шаҳри _____________ дар таърихи ___________ бо се нусхаи аслӣ, бо забонҳои тоҷикӣ, арабӣ ва англисӣ, ки ҳар кадом эътибори ҳуқуқӣ доранд, ба имзо расонида шуд. Дар сурати ба миён омадани ихтилоф дар матни тарҷума, нусхаи матни англисӣ баррасӣ карда мешавад.