ҲУКУМАТИ ҶУМҲУРИИ ТОҶИКИСТОН 

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Ёддошти тафоҳум оид ба ҳамкорӣ байни Вазорати корҳои дохилии Ҷумҳурии Тоҷикистон ва Вазорати адлияи Иёлоти Муттаҳидаи Америка маъқул дониста шавад.
2. Вазири корҳои дохилии Ҷумҳурии Тоҷикистон Ёддошти тафоҳуми мазкурро ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.
3. Вазорати корҳои хориҷии Ҷумҳурии Тоҷикистон мувофиқи тартиби муқарраргардида бо ҷониби Америка сана ва маҳалли ба имзо расонидани Ёддошти тафоҳуми мазкурро мувофиқа намояд.

Ёддошти тафоҳум оид ба ҳамкорӣ байни Вазорати корҳои дохилии Ҷумҳурии Тоҷикистон ва Вазорати адлияи Иёлоти Муттаҳидаи Америка

Вазорати корҳои дохилии Ҷумҳурии Тоҷикистон ва Вазорати адлияи Иёлоти Муттаҳидаи Америка, ки минбаъд дар алоҳидагӣ «Тараф» ва дар якҷоягӣ «Тарафҳо» номида мешаванд,

дар асоси принсипҳои соҳибихтиёрӣ, баробарӣ ва мутақобила;

бо эътироф ва рушди минбаъдаи ҳамкориҳои дутарафа дар соҳаи мубориза бар зидди ҷинояткорӣ ва ҳифзи ҳуқуқу озодиҳои асосии инсон;

ҳар яке аз Тарафҳо дар доираи салоҳияти худ амал карда,

ба мувофиқаи зерин расиданд:

Моддаи 1

Тарафҳо тибқи қонунгузории миллии худ дар соҳаи мубориза бар зидди ҷинояткорӣ ва ҳифзи ҳуқуқу озодиҳои асосии инсон ҳамкорӣ менамоянд.

Моддаи 2

Тарафҳо дар шакли мубодилаи иттилоот дар бораи қонунгузории амалкунандаи миллӣ, фаъолияти ҳуқуқэҷодкунӣ, амалияи татбиқи қонун, аз ҷумла усулҳои тафтиш тибқи қонунгузории миллӣ ҳамкорӣ менамоянд. Ҳамаи иттилооте, ки дар доираи Ёддошти тафоҳуми мазкур мубодила мешавад, бояд ба қонунгузорӣ ва талаботе, ки Тарафҳо риоя менамоянд, ҷавобгӯ бошад.

Моддаи 3

Тарафҳо метавонанд таҳқиқотҳои амалӣ ва назариявиро оид ба масъалаҳои техникии фаъолияти мақомоти ҳифзи ҳуқуқ тариқи расмӣ мубодила намоянд.

Моддаи 4

Ёддошти мазкур ба Тарафҳо барои муайян кардан ва такмил додани ҳама гуна шаклҳои дигари қобили қабули ҳамкорӣ монеъ намешавад.

Моддаи 5

Бо мақсади мубодилаи иттилооти марбут ба раванди адолати ҷиноятӣ, Тарафҳо метавонанд бо мувофиқа/созиши мутақобила вохӯриҳо, боздидҳо ва мулоқоти ҳайатҳоро ташкил намоянд. Ҳамчунин Ёддошти мазкур ба Тарафҳо имкон медиҳад, ки мубодилаи иттилоотро дар ҳамоҳангӣ бо Раёсати ҳамкориҳои байналмилалӣ ва Раёсати мубориза бар зидди ҷиноятҳои муташаккили Вазорати корҳои дохилии Ҷумҳурии Тоҷикистон ва атташеи Барномаи байналмилалии омӯзишии ёрирасони тадқиқотии ҷиноӣ оид ба кумак ба мақомоти ҳифзи ҳуқуқ дар Осиёи Миёна воқеъ дар шаҳри Душанбе, Тоҷикистон амалӣ намоянд.

Моддаи 6

Ёддошти мазкур мубодилаи байни Тарафҳоро тавассути дархости хаттӣ тариқи почта, факс, почтаи электронӣ ё воситаҳои дигари техникие, ки барои интиқоли ҳуҷҷатҳо дар шакли хаттӣ истифода мешаванд, пешбинӣ менамояд. Ёддошти мазкур ҳамчунин мубодилаи иттилоотро ба таври шифоҳӣ иҷозат медиҳад, аммо дар ҳолати зарурӣ Тарафи дигар метавонад тасдиқи хаттии маълумоти интиқолшударо талаб кунад.

Тарафҳо кӯшиш мекунанд махфияти маълумотеро, ки дар доираи Ёддошти тафоҳуми мазкур дастрас мешавад, таъмин намоянд.

Иттилоот ва ҳуҷҷатҳое, ки дар доираи Ёддошти тафоҳуми мазкур ба даст оварда мешавад, бо дигар мақсадҳо истифода шуда наметавонанд, ки дар ибтидо дархост шуданд, ҳамзамон чунин иттилоот ва ҳуҷҷатҳо ба тарафи сеюм бе розигии пешакии хаттии Тарафҳо, ки иттилоот ё ҳуҷҷатҳоро пешниҳод намудааст, дода намешаванд.

Тарафҳо метавонанд бо мувофиқа/созиши мутақобила ба ҳамдигар маълумот дар бораи шахс(ҳо)-и тамос, инчунин тафсилоти тамоси онҳоро пешниҳод кунанд. Дар ҳолати тағйир ёфтани шахси тамос ё маълумоти тамос, Тарафҳо уҳдадоранд, ки якдигарро ҳарчи зудтар дар шакли хаттӣ огоҳ созанд.

Моддаи 7

Маълумот ва маводде, ки дар доираи Ёддошти мазкур пешниҳод мешаванд, бо мақсади дастрас будан барои Тарафҳо, бояд аз ҷониби Тарафи ирсолкунанда ба забонҳои тоҷикӣ ё русӣ ва англисӣ тарҷума карда шаванд.

Моддаи 8

Ёддошти тафоҳуми мазкур ба зиммаи Тарафҳо ҳеҷ гуна уҳдадории ҳуқуқӣ ё молиявӣ вогузор намекунад ва ҳуқуқу уҳдадориҳои Тарафҳоро, ки аз шартномаҳои байналмилалӣ бармеоянд ва давлатҳои Тарафҳо аъзои онҳо мебошанд, дахолат намекунад. Тарафҳо хароҷоти худро вобаста ба татбиқи Ёддошти тафоҳуми мазкур дар доираи маблағҳои пешбининамудаи қонунгузории миллии онҳо ба зимма мегиранд, агар дар Ёддошти тафоҳуми мазкур тартиби дигаре пешбинӣ нагардида бошад. Ҳеҷ муқаррарот дар Ёддошти тафоҳуми мазкур набояд ҳамчун уҳдадории истифодаи фондҳои Ҳукумати Иёлоти Муттаҳидаи Америка ё Ҳукумати Ҷумҳурии Тоҷикистон фаҳмида ё шарҳ дода шавад. Ёддошти тафоҳуми мазкур созишномае намебошад, ки яке аз Тарафҳо тибқи ягон қонунгузории татбиқшаванда ягон масъулият ё талаботро ба зимма гиранд ё рад кунанд.

Тарафҳо эътироф мекунанд, ки Ёддошти тафоҳуми мазкур қонуни амалкунандаро, ки ҳама гуна талаботро оид ба масъулияти шаҳрвандӣ, дар натиҷаи ҳама гуна фаъолияте, ки мутобиқи Ёддошти тафоҳуми мазкур амалӣ карда мешавад ва ё ба тариқи дигаре ба Ёддошти тафоҳуми мазкур алоқаманд аст, тағйир намедиҳад.

Моддаи 9

Ҳама гуна баҳсҳо миёни Тарафҳо, ки ҳангоми тафсир ва амалигардонии муқаррароти Ёддошти тафоҳуми мазкур ба вуҷуд меоянд, бо роҳи гузаронидани маслиҳат ва музокирот ҳал карда мешаванд.

Моддаи 10

Ёддошти тафоҳуми мазкур метавонад бо розигии мутақобилаи Тарафҳо тавассути протоколи алоҳида тағйир дода мешавад.

Моддаи 11

Ёддошти тафоҳуми мазкур аз санаи имзо шудан эътибор пайдо мекунад. Тарафҳо ҳамкориро ба муҳлати номуайян идома дода, бояд на камтар аз се моҳ қабл аз нияти худ оид ба қатъ кардани ҳамкорӣ дар доираи ин Ёддошти тафоҳум мазкур тавассути роҳҳои дипломатӣ хаттӣ хабар диҳанд.

Ёддошти тафоҳуми мазкур дар шаҳри ______ «___» _____соли 202__ дар ду нусха бо забонҳои тоҷикӣ ва англисӣ ба имзо расонида шуд.