ҲУКУМАТИ ҶУМҲУРИИ ТОҶИКИСТОН

ҚАРОР 

Қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 10 июни соли 2024, №2279 «Дар бораи лоиҳаи Қонуни Ҷумҳурии Тоҷикистон «Оид ба ворид намудани тағйироту илова ба Қонуни Ҷумҳурии Тоҷикистон «Дар бораи олами ҳайвонот»-ро баррасӣ намуда, Ҳукумати Ҷумҳурии Тоҷикистон қарор мекунад:

Хулосаи замимагардидаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйироту илова ба Қонуни Ҷумҳурии Тоҷикистон «Дар бораи олами ҳайвонот» ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

Хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйироту илова ба Қонуни Ҷумҳурии Тоҷикистон «Дар бораи олами ҳайвонот»

Ҳукумати Ҷумҳурии Тоҷикистон лоиҳаи Қонуни Ҷумҳурии Тоҷикистон «Оид ба ворид намудани тағйироту илова ба Қонуни Ҷумҳурии Тоҷикистон «Дар бораи олами ҳайвонот»-ро, ки бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 10 июни соли 2024, №2279 барои додани хулоса ба Ҳукумати Ҷумҳурии Тоҷикистон пешниҳод гардидааст, баррасӣ карда, ба моддаи 1 таклифҳои зеринро манзур менамояд:

1. Қисми 1 таҷдиди назар карда шавад, зеро на ҳамаи калимаҳои ивазшаванда дуруст нишон дода шудаанд.
2. Қисми 2 хориҷ карда шавад, зеро зарурати он ҷой надорад.
3. Қисми 3 таҷдид карда шавад, зеро дар сархати шашуми моддаи 8 Қонуни мазкур меъёри амалкунанда ба таври дақиқ пешбинӣ гардида, дар сурати ворид кардани тағйир дар шакли пешниҳодгардида он нопурра ва моҳиятан коста мегардад. Инчунин, пешниҳод менамоем, ки зимни такмили сархати шашуми моддаи 8 Қонуни мазкур талаботи Қонуни Ҷумҳурии Тоҷикистон «Дар бораи низоми иҷозатдиҳӣ» ба инобат гирифта шавад.
4. Дар қисми 4 калимаи «мебарад» ба калимаи «мекунанд» иваз карда шавад.
5. Қисми 5 хориҷ карда шавад, зеро муқаррароти меъёри амалкунанда дуруст ифода гардида, зарурати тағйири он ҷой надорад.
6. Қисми 6 дар таҳрири зерин ифода карда шавад:

«6. Дар моддаи 17:

• аз номи модда калимаи «кардан» хориҷ карда шавад;
• дар қисми муқаддимавии қисми якум калимаи «Шахсҳои» ба калимаи «Шахсони» иваз гардида, калимаи «кардан» хориҷ карда шавад;
• дар қисми дуюм калимаи «қаламрави» ба калимаи «ҳудуди» иваз карда шавад.».

7. Қисми 9 хориҷ карда шавад, зеро муқаррароти меъёри амалкунанда дуруст ифода гардида, зарурати тағйири он ҷой надорад.
8. Сархати дуюми қисми 11 хориҷ карда шавад, зеро меъёри амалкунанда фаҳмо ва дақиқ мебошад.
9. Дар қисми 12 калимаи «истисно» ба калимаи «истисноӣ» иваз карда шавад.

Матни забони русии лоиҳа ба матни забони тоҷикии он мутобиқ гардонида, хатоҳои имлоӣ ва техникии дар лоиҳа ҷойдошта ислоҳ карда шаванд.