ҲУКУМАТИ ҶУМҲУРИИ ТОҶИКИСТОН

ҚАРОР

Қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 3 июни соли 2024, №2243 «Дар бораи лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҳифзи ҳуқуқҳои кӯдак»-ро баррасӣ намуда, Ҳукумати Ҷумҳурии Тоҷикистон қарор мекунад:

Хулосаи замимагардидаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҳифзи ҳуқуқҳои кӯдак» ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

 Хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҳифзи ҳуқуқҳои кӯдак»

 Ҳукумати Ҷумҳурии Тоҷикистон лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ҳифзи ҳуқуқҳои кӯдак»-ро, ки бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 3 июни соли 2024, №2243 барои додани хулоса ба Ҳукумати Ҷумҳурии Тоҷикистон пешниҳод гардидааст, мавриди баррасӣ қарор дода, ба моддаи 1 таклифҳои зеринро манзур менамояд:

1) қисми 1 таҷдид карда шавад, зеро муқаддимаи дар таҳрири нав пешниҳодшаванда дар иртибот бо матни Қонуни мазкур қобили қабул набуда, бинобар нопурра будан дар шакли пешниҳодгардида соҳаи танзимро маҳдуд менамояд;

2) қисми 2 хориҷ карда шавад, зеро шарҳи мафҳуми «кӯдаки ятим» дар Қонуни мазкур дуруст буда, зарурати тағйир додани он дида намешавад;

3) қисмҳои 3, 7 ва сархати якуми қисми 4 бинобар коста, нопурра ва номукаммал будан таҷдиди назар карда шаванд;

4) аз қисми 6 калимаҳои «матни» ва «мувофиқан» хориҷ карда шаванд;

5) дар қисмҳои 8 ва 10 калимаҳои «дуюми», «якуми», «машруботи спиртӣ, воситаҳои нашъаовар, маҳсулоти тамоку, моддаҳои психотропӣ ё дигар моддаҳои мадҳушкунанда» мувофиқан ба рақамҳо ва калимаҳои «2», «1», «маҳсулоти тамоку, машруботи спиртӣ, воситаҳои нашъадор, моддаҳои психотропӣ, сахтаъсир ва мадҳушкунандаи дигар» иваз карда шаванд;

6) қисми 11 дар иртибот бо моддаҳои 124 ва 125 Кодекси оилаи Ҷумҳурии Тоҷикистон таҷдиди назар карда шавад;

7) аз қисми 12 калимаҳои «ва эътибори корӣ» хориҷ карда шаванд, зеро зарурати онҳо дида намешавад.

Дар маҷмуъ, лоиҳа бо дар назар доштани талаботи умумӣ нисбат ба техникаи ҳуқуқэҷодкунӣ такмил гардида, хатоҳои имлоӣ ва грамматикии он ислоҳ карда шавад.