ҲУКУМАТИ ҶУМҲУРИИ ТОҶИКИСТОН 

ҚАРОР 

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Ёддошти тафоҳум байни Вазорати меҳнат, муҳоҷират ва шуғли аҳолии Ҷумҳурии Тоҷикистон ва Вазорати шуғл ва меҳнати Ҷумҳурии Корея оид ба фиристодан ва қабули кормандон тавассути низоми иҷозати кор маъқул дониста шавад.
2. Вазири меҳнат, муҳоҷират ва шуғли аҳолии Ҷумҳурии Тоҷикистон Ёддошти тафоҳуми мазкурро ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.
3. Вазорати корҳои хориҷии Ҷумҳурии Тоҷикистон бо тартиби муқарраргардида сана ва маҳалли ба имзо расонидани Ёддошти тафоҳуми мазкурро бо ҷониби Корея мувофиқа намояд.

Ёддошти тафоҳум байни Вазорати меҳнат, муҳоҷират ва шуғли аҳолии Ҷумҳурии Тоҷикистон ва Вазорати шуғл ва меҳнати Ҷумҳурии Кореяоид ба фиристодан ва қабули кормандон тавассути низоми иҷозати кор

Вазорати меҳнат, муҳоҷират ва шуғли аҳолии Ҷумҳурии Тоҷикистон ва Вазорати шуғл ва меҳнати Ҷумҳурии Корея, ки минбаъд «Тарафҳо» номида мешаванд, бо эҳтиром ба принсипҳои баробарӣ ва манфиатҳои мутақобила, густариши муносибатҳои дӯстонаи мавҷудаи байни ду кишвар тавассути ҳамкорӣ дар соҳаи шуғл ва масъалаҳои меҳнатӣ, бо нияти рушди нерӯи инсонӣ, бо дарки манфиатҳои аз ҳамкориҳои ҳар ду кишвар бадастомада, ба мувофиқаи зайл расиданд.

Моддаи 1. Ҳадаф

Мақсади Ёддошти тафоҳуми мазкур (минбаъд - «Ёддошт») пойдории заминаи ҳамкорӣ байни Тарафҳо ва баланд бардоштани шаффофият ва самаранокӣ дар раванди фиристодани кормандон ба Ҷумҳурии Корея (минбаъд - «Корея») бо муайян намудани муқаррарот оид ба фиристодан ва қабули коргарон тавассути низоми иҷозати кор (минбаъд - «ЕРS») мутобиқи Қонун дар бораи шуғли коргарони хориҷӣ ва дигар санадҳои Корея (минбаъд - «Қонун дар бораи шуғли коргарони хориҷӣ») мебошад.

Ёддошти тафоҳуми мазкур дар доираи қонунҳо ва санадҳои меъёрии ҳуқуқии дахлдори ҳар ду кишвар ва бо дарназардошти мавҷудияти маблағҳои ҷудошуда ва ҳайати кормандони Тарафҳо амалӣ карда мешавад ва ҳар ду ҷониб розӣ ҳастанд, ки Ёддошти тафоҳуми мазкур эътибори ҳатмии ҳуқуқӣ надорад.

Моддаи 2. Мафҳумҳо

Бо мақсади Ёддошти мазкур:

(а) истилоҳи «корфармо» ба соҳибкоре дахл дорад, ки тибқи Қонун дар бораи шуғли коргарони хориҷӣ аз Вазорати шуғл ва меҳнати Ҷумҳурии Корея (минбаъд - «ВШМ») барои ҷалби коргарони хориҷӣ иҷозат гирифтааст;

(б) истилоҳи «корҷӯй» ба шаҳрванди Тоҷикистон дахл дорад, ки мехоҳад як давраи муайян дар Корея тибқи Қонун дар бораи шуғли коргарони хориҷӣ кор кунад;

(в) истилоҳи «коргар» шаҳрванди Тоҷикистонро дар назар дорад, ки тибқи Қонун дар бораи шуғли коргарони хориҷӣ бо ҳадафи кор кардан дар Корея ба муддати муайян бо корфармо дар Корея шартномаи меҳнатӣ бастааст ё имзо карданӣ аст;

(г) истилоҳи «ниҳоди фиристонанда» ба мақомоте дахл дорад, ки тибқи Қонун дар бораи шуғли коргарони хориҷӣ барои ҷалб ва фиристодани коргароне, ки мехоҳанд дар Корея кор кунанд, салоҳият доранд;

(ғ) мафҳуми «ниҳоди қабулкунанда» ба муассисае дахл дорад, ки тибқи Қонун дар бораи шуғли коргарони хориҷӣ салоҳияти идоракунии рӯйхати корҷӯён ва қабули коргарони тоҷикро аз агентии фиристодаи Ҷумҳурии Тоҷикистон (минбаъд - «Тоҷикистон») дорад;

(д) истилоҳи «ниҳоди тестӣ» ба муассисае дахл дорад, ки аз ҷониби ВШМ ваколатдор шудааст, ки ба он татбиқи умумии ЕРS - санҷиш оид ба донистани забони кореягӣ (минбаъд - «ЕРS -ТОРIK»), санҷиши малакаҳо ва арзёбии салоҳият, аз ҷумла эълони тестҳо, қабули дархостҳо, таҳияи саволҳои тестӣ ва гузаронидани санҷиш тибқи Қонун дар бораи шуғли хориҷӣ гузаронида мешавад;

(е) истилоҳи «системаи холҳо» ба раванди ҷалбкунӣ дахл дорад, ки ЕРS -ТОРIK, санҷиши малака ва арзёбии салоҳиятро дар бар мегирад;

(ё) истилоҳи «Маркази ЕРS Корея» намояндагии Тоҷикистонро дар назди ниҳоди қабулкунанда ифода мекунад, ки раванди сафарбарсозӣ ва қабули коргарони тоҷикро аз номи ВШМ ва ниҳоди қабулкунанда назорат менамояд.

Моддаи 3. Ниҳоди фиристонанда ва қабулкунанда

Вазорати меҳнат, муҳоҷират ва шуғли аҳолии Ҷумҳурии Тоҷикистон (минбаъд - «ВММША») ниҳоди давлатӣ буда, асосан барои фиристодани коргарони тоҷик ба Корея масъул мебошад. Бо вуҷуди ин, Тарафҳо ба қарор омаданд, ки ҳангоми татбиқи Ёддошти тафоҳуми мазкур ВММША МД «Агентии бокортаъминкунӣ дар хориҷа»-ро (минбаъд - «АБХ») ҳамчун агентии фиристонанда таъин менамояд.

АБХ воҳиди давлатии ғайритиҷоратӣ дар зерсохтори ВММША буда, бевосита ба ҷалб ва фиристодани коргарони тоҷик дар асоси принсипҳои ғайритиҷоратӣ ва худмаблағгузорӣ масъул хоҳад буд. Ягон агентӣ ғайр аз АБХ наметавонад дар раванди фиристодан дар доираи Ёддошти тафоҳуми мазкур иштирок намояд.

ВШМ ниҳоди давлатӣ аст, ки асосан масъули қабули коргарони тоҷик тавассути системаи ЕРS ба Корея мебошад. Аммо Тарафҳо ба қарор омаданд, ки дар татбиқи Ёддошти мазкур ВШМ Хадамоти рушди захираҳои инсонии Корея (минбаъд - «ХРЗИ Корея») ҳамчун ниҳоди қабулкунанда таъин карда шавад.

ХРЗИ Корея ниҳоди зертобеи ВШМ буда, аз ҳисоби буҷети миллӣ маблағгузорӣ мешавад ва бевосита масъули идоракунии феҳристи корҷӯён ва қабули коргарони тоҷик мебошад.

Моддаи 4. Хароҷоти фиристонидан

Ҳар як коргар хароҷоти воқеиро ба ниҳоди фиристонанда дар ҷараёни қабули ариза ва фиристодани коргар пардохт мекунад (минбаъд «пардохти фиристодан»).

Мутобиқи зербанди 1 пас аз имзои Ёддошти тафоҳуми мазкур ниҳоди фиристонанда ба ВШМ маълумот дар бораи маблағи умумии боҷи фиристондан, ки бояд аз як коргар ситонида шавад, инчунин тақсимоти пардохтро пешниҳод менамояд. ВШМ метавонад аз ниҳоди фиристонанда дархост намояд, ки пардохти ирсолкуниро кам кунад, дар сурате, ки пардохти мазкур дорои ҷузъҳои нолозим бошад ё ҳангоми баррасии вазъи иқтисодии Тоҷикистон (аз қабили даромади миллӣ) ё пардохти интиқоли кишварҳои дигар аз ҳад зиёд баланд арзёбӣ шуда бошад.

Ниҳоди фиристонанда бо қарори муштарак бо ВШМ пардохти ирсолкуниро муқаррар намуда, оид ба тақсими пардохт (аз ҷумла арзиши муоинаи тиббӣ, ЕРS -ТОРIK, додани шиноснома ва раводид, бақайдгирии феҳрист, таълими пеш аз сафар ва чипта/андоз) тавассути пахши оммавӣ ё интишор дар веб-сайтҳои давлатӣ корбарӣ намояд. Дар сурати зарурат ВМШ метавонад маблағи пардохт ва таркиби онро аз коргарони тоҷик, ки барои кор ба Корея фиристода мешаванд, санҷиш намояд.

Дар сурати ногузирии тағйирот дар интиқоли пардохт бо сабабҳои таваррум ё мушкилоти дигар, ниҳоди фиристонанда вобаста ба ин масъала ҳадди аққал як (1) моҳ пеш машварат намуда, уҳдадор аст ба ВШМ маълумот пешниҳод намояд.

Моддаи 5. Арзёбӣ дар ҷалби корҷӯёни мувофиқ

ВШМ системаи холҳоро татбиқ намуда, ХРЗИ Кореяро ҳамчун агентии санҷишӣ барои таъмини объективӣ дар раванд таъин менамояд. Барои ҷалби корҷӯёни мувофиқ ВШМ нақшаҳои татбиқи системаи холҳоро муқаррар мекунад. Санаи татбиқ бо машварати мутақобилаи Тарафҳо муайян карда мешавад.

ВММША ва ниҳоди фиристонандаро дар самтҳои зерин барои татбиқи мунтазами системаи холҳо мусоидат хоҳанд кард:

(а) паҳн ва қабули варақаҳои дархост барои системаи холҳо;

(б) таъмин намудани макон барои қабули дархостҳо ва гузаронидани санҷишҳо, нигоҳ доштани тартибот дар ҷой ва атрофи он;

(в) ба тартиб даровардани барасмиятдарории гумрукӣ ва озодкунӣ аз боҷҳои гумрукӣ ба маводи марбут ба санҷиш, ки барои системаи холҳо ворид ва хориҷ мешаванд;

(г) мусоидат ба раванди муҳоҷират, аз ҷумла расмиёти раводид (мувофиқи қонунгузории Тоҷикистон) барои кормандони агентии тестӣ ё кормандони дигар, ки дар татбиқи системаи холҳо ҷалб шудаанд;

(ғ) озод кардани пардохти дархости ЕРS -ТОРIK аз андозбандӣ ва мусоидат ба интиқоли маблағ;

(д) ҳама гуна кумаки дигаре, ки аз ҷониби ВШМ ва агентии тестӣ дархост карда мешавад.

ВШМ ва агентии тестӣ мувофиқи дархости ВММША ва агентии фиристонанда барои татбиқи одилона ва самараноки системаи холҳо кумак ва дастгирӣ хоҳанд кард.

Талабот барои довталабони ЕРS -ТОРIK инҳоянд:

(а) нафарони аз 18 то 39-сола (дар рӯзи аввали бақайдгирӣ аз 39-сола зиёд набошад);

(б) шахсоне, ки ба ҷиноятҳои вазнин ва махсусан вазнин маҳкум нашуда бошанд;

(в) шахсоне, ки сабти депортатсия ё қарор дар бораи ихроҷ аз Корея надоранд;

(г) шахсоне, ки баромаданашон аз ҳудуди Тоҷикистон маҳдуд карда нашудааст.

Пас аз татбиқи системаи холҳо, санҷиши малакаҳо барои онҳое, ки аз ЕРS-ТОРIK мегузаранд, ҳатмӣ хоҳад шуд.

Натиҷаи системаи холҳо (маҷмуи холҳои ЕРS-ТОРIK, санҷиши маҳорат ва арзёбии салоҳият) дар давоми ду (2) сол аз рӯзи эълони он эътибор дорад ва ба корфармоён ҳамчун маълумоти иловагӣ дар бораи корҷӯён дар давоми ҷустуҷӯи кор пешниҳод карда мешавад.

Агентии тестӣ ва ниҳоди фиристонанда ҳарчи зудтар барои танзими масъалаҳои мушаххас оид ба татбиқи системаи холҳо Шартномаи уҳдадории хизматрасониро ба имзо мерасонанд.

Дар ҳолати зарурӣ агентии тестӣ ва ниҳоди фиристонанда як муассисаи давлатӣ ё агентиро барои дастгирии вазифаҳои марбут ба системаи холҳо тавассути машварати қаблӣ таъин мекунанд. Агентии таъиншуда вазифаҳои марбут ба системаи холҳоро, ки аз ҷониби агентии тестӣ ва ниҳоди ирсолкунанда муайян карда шудаанд, иҷро менамояд.

Агар дар татбиқи системаи холҳо бо сабаби набудани ҳамкорӣ байни агентии тестӣ ва ниҳоди фиристонанда мушкилие ба амал ояд ё агар системаи холҳо татбиқ карда нашавад, ВШМ метавонад чораҳои зарурӣ, аз ҷумла боздоштани системаи холҳоро андешад.

Моддаи 6. Тартиб додани феҳристи корҷӯён

Корҷӯёне, ки аз арзёбии системаи холҳоро гузаштаанд, аризаи кории худро ба ниҳоди фиристонанда пешниҳод менамоянд.

Ниҳоди фиристонанда рӯйхат ва профилҳои корҷӯёнро (минбаъд «рӯйхати қаблӣ» номида мешавад), ки ба ҳамаи шартҳои дар поён зикршуда ҷавобгӯ мебошанд, таҳия намуда, ба ниҳоди қабулкунанда ирсол менамояд:

(а) шахсоне, ки аз арзёбии системаи холҳо гузаштаанд (дар давоми муҳлати эътибори системаи холҳо);

(б) шахсоне, ки эътибори шиносномаашон на камтар аз як (1) сол аст;

(с) шахсоне, ки аз муоинаи тиббии аз ҷониби ВШМ муайяншуда гузаштаанд.

Рӯйхати қаблӣ маълумоти зеринро дар бар мегирад:

(а) маълумоти шахсии корҷӯй (аз ҷумла ном, миллат, санаи таваллуд, рақами мушаххас ва ҳолати ҷисмонӣ);

(б) нусхаи шиносномаи корҷӯй;

(в) шароити дилхоҳи шуғл (аз ҷумла музди меҳнат ва намуди фаъолият);

(г) маълумоти шахсӣ ва касбӣ (аз ҷумла маълумоти таҳсилот, таҷрибаи корӣ ва шаҳодатномаҳо);

(ғ) маълумот оид ба системаи холҳои аз ҷониби корҷӯй гирифташуда (аз ҷумла санаи санҷиш ва холҳо).

Ниҳоди қабулкунанда дар асоси феҳристи қаблӣ аз ҷониби ниҳоди фиристонанда феҳрист тартиб медиҳад. Агар дар рӯйхати қаблӣ хатогие мавҷуд бошад, он ба ниҳоди фиристонанда барои ислоҳ баргардонида мешавад ва дар давоми чордаҳ (14) рӯз аз лаҳзаи дархост дар бораи ислоҳ ба ниҳоди қабулкунанда дубора пешниҳод карда мешавад. Дар ҳолатҳои махсусе, ки вақти бештарро талаб мекунанд, ниҳоди фиристонанда бо ниҳоди қабулкунанда машварат менамоянд.

Агар шумораи корҷӯёни соҳибихтисос дар феҳрист аз шумораи ҷудогардидаи корҷӯёни тоҷик зиёд бошад, интихоб тибқи усулҳои муштараки Тарафҳо муайян карда мешавад.

Ниҳоди фиристонанда барои кутоҳ кардани муҳлати додани шиноснома (мувофиқи қонунгузории Тоҷикистон) фаъолона мусоидат менамояд, то ба корҷӯён имкон диҳад, ки шиносномаро сари вақт гирифта, нусхаи онро ҳангоми муроҷиат ба кор пешниҳод кунанд.

Ниҳоди фиристонанда ба корҷӯён хабар медиҳад, ки дохил кардани онҳо ба рӯйхат кафолати кор карданро дар Корея намедиҳад.

Ниҳоди фиристонанда инфрасохтори зарурии технологияҳои иттилоотиро (IT) барои насби системаи Агентии давлатии ирсолкунанда (САДИ), барномаи компютерӣ барои ташкили феҳрист таъсис медиҳад ва ниҳоди қабулкунанда маълумоти дахлдорро ба ниҳоди фиристонанда мефиристад.

Моддаи 7. Идораи феҳристи корҷӯён

Феҳристи корҷӯён барои як (1) сол эътибор дорад. Ҳангоми ба охир расидани муҳлати феҳрист, корҷӯён метавонанд дар давоми муҳлати эътибори натиҷаи системаи холҳо дубора ба қайд гирифта шаванд ва ниҳоди фиристонанда дар ҳамкорӣ бо ниҳоди қабулкунанда барои таъмини дубора бақайдгирии корҷӯён дар феҳрист дар давоми муҳлати муқарраршуда талош хоҳад кард.

Ҳангоми ворид намудани тағйирот ба маълумот дар феҳрист, аз ҷумла омодагии корҷӯён барои дарёфти ҷои кор ё маълумот барои тамос ва ному насаби онҳо, ниҳоди фиристонанда ба ниҳоди қабулкунанда дар бораи тағйирот ва сабаби он хабар медиҳад.

Агар корҷӯй ба фаъолияти ғайриқонунӣ машғул шавад ё ҳуҷҷатҳои қалбакӣ пешниҳод кунад, ВШМ чораҳои заруриро меандешад, аз қабили хориҷ кардани корҷӯй аз рӯйхат, кам кардани шумораи ҷудошудаи корҷӯён, муваққатан боздоштани раванди фиристонандаи қувваи корӣ ё қатъ кардани Ёддошти тафоҳуми мазкур.

ВШМ ба ВММША оид ба намудҳои соҳаҳое, ки дар доираи ЕРS иҷозат дода шудаанд ва шумораи ҷудошудаи корҷӯёни тоҷик дар феҳрист ҳар сол огоҳ менамояд.

Моддаи 8. Шартномаи меҳнатӣ

Ҳар як корфармо аз феҳрист корҷӯёнро интихоб намуда, варақаи шартномаи меҳнатии стандартиро, ки аз ҷониби ВШМ дар асоси Қонун дар бораи шуғли коргарони хориҷӣ тасдиқ шудааст, тартиб медиҳад. Ниҳоди қабулкунанда шартномаи меҳнатиро ба ниҳоди фиристонанда мефиристад.

Ниҳоди фиристонанда ба ҳар як коргар мазмуни шартномаи меҳнатиро ҳаматарафа фаҳмонда медиҳад, то ки коргар онро пурра дарк намуда, тавонад, ки бо хоҳиши худ дар бораи бастани шартномаи меҳнатӣ қарори ниҳоӣ қабул кунад.

Ниҳоди фиристонанда дар давоми чордаҳ (14) рӯзи гирифтани шартномаи меҳнатӣ ба ниҳоди қабулкунанда хабар медиҳад, ки оё ҳар як шартномаи меҳнатӣ аз ҷониби коргар имзо шудааст ё не ва сабаби имзо накардани онро нишон медиҳад. Агар қарор дар бораи бастани шартномаи меҳнатӣ дар давоми чордаҳ (14) рӯз ба ниҳоди қабулкунанда расонида нашавад, ниҳоди қабулкунанда метавонад пас аз машварат бо корфармо ба ниҳоди фиристонанда хабар диҳад, ки оё ҳар як шартномаи меҳнатӣ аз ҷониби корманд имзо шудааст ё не, дар сурати имзо нашудан сабаби он нишон дода мешавад. Агар қарор дар бораи бастани шартномаи меҳнатӣ дар давоми чордаҳ (14) рӯз расонида нашавад, ниҳоди қабулкунанда метавонад пас аз машварат бо корфармо шартномаро бастанашуда эълон намояд.

Агар корҷӯй шартномаи меҳнатии басташударо бекор кунад ё ду маротиба бе ягон сабаб шартномаи меҳнатии пешниҳодшударо имзо накунад, ниҳоди қабулкунанда метавонад ӯро аз рӯйхат хориҷ кунад.

ВШМ метавонад корфармоёнро аз киро кардани коргарони хориҷӣ маҳдуд кунад, агар онҳо шартномаи меҳнатии басташударо бе ягон сабаб бекор кунанд.

Ниҳоди фиристонанда нусхаи аслии шартномаи меҳнатии басташударо ба коргар пешниҳод мекунад ва ҳангоми сафар кардан ба Корея уҳдадор аст, ки онро бо худ гирад.

Ниҳоди фиристонанда ба коргарон бо мақсади тезонидани раванди тайёрии пеш аз сафар ба коргарон кумаки фаъолона мерасонад.

Моддаи 9. Омӯзиши пеш аз сафар

Ниҳоди фиристонанда барои коргароне, ки шартномаи меҳнатӣ бастаанд, ба таври фаврӣ омӯзиши пеш аз сафар мегузаронад, то онҳо ба Корея сари вақт ворид шаванд.

Ниҳоди фиристонанда мундариҷа ва давомнокии таҳсилро тавассути машварати пешакӣ бо ВШМ муайян мекунад.

Ниҳоди фиристонанда ё худаш омӯзиши пеш аз сафарро анҷом медиҳад ё як муассисаи давлатӣ ё муассисаҳоеро интихоб мекунад, ки тавассути машварати пешакӣ бо ВШМ омӯзиши пеш аз сафар ба онҳо вогузор гардидааст.

ВШМ метавонад коргареро, ки таҳсилоти пеш аз сафарро хатм накардааст ё аз муассисаи беиҷозат таҳсилоти пеш аз сафарро гирифтааст, хориҷ (депортатсия) кунад. Дар ин ҳолат корманд барои хароҷоти умумии вобаста ба бозгашти ӯ масъул хоҳад буд. Аммо ҷониби Тоҷикистон (ниҳоди фиристонанда) барои пӯшонидани хароҷот, агар коргар имкони онро надошта бошад, мусоидат хоҳад кард.

Моддаи 10. Гирифтани раводид 

Ниҳоди фиристонанда фавран пас аз гирифтани Шаҳодатномаи тасдиқи додани раводид (минбаъд - «ССVI») аз ниҳоди қабулкунанда ба коргарон хабар медиҳад ва бо пешниҳоди ҳуҷҷатҳои зарурӣ ба Сафорати Корея дар Ҷумҳурии Тоҷикистон барои гирифтани раводид ба коргарон муроҷиат намоянд.

Ниҳоди қабулкунанда метавонад шартномаи меҳнатии ҳар як коргареро, ки дар давоми се (3) моҳи эътибори ССVI барои гирифтани раводид муроҷиат намекунад, бекор намояд.

Дар сурати нарафтани коргар ба Корея баъд аз гирифтани ССVI бо сабабҳои ба монанди бекор кардани шартномаи меҳнатӣ аз ҷониби корфармо, ниҳоди фиристонанда бо дархости ниҳоди қабулкунанда дар андешидани чораҳо ҷиҳати бекор кардани ССVI ҳамкорӣ хоҳад кард.

Агар фоизи коргароне, ки пас аз гирифтани бо сабабҳои шахсӣ ба Корея рафтан нахоҳанд аз сатҳи муайян зиёд бошад ё ниҳоди фиристонанда мувофиқи зербанди 3 ҳамкорӣ накунад, ВШМ метавонад чораҳои зарурӣ андешад, масалан, коҳиш додани шумораи ҷудошудаи корҷӯён ё муваққатан боздоштани раванди фиристодани қувваи корӣ.

Ниҳоди фиристонанда ягона муассисаест, ки барои кумак дар дархости раводид ваколатдор шудааст ва ҳеҷ як мақомоти дигар наметавонад ба ин раванд дахолат кунад.

Моддаи 11. Вуруди коргарон

Ниҳоди фиристонанда бо мақсади огоҳ кардани корфармоён дар бораи рафти омодагии коргарон барои вуруди онҳо ба Корея, дар ҳар марҳила маълумотро ба Низоми ЕРS навсозӣ мекунад. Чунин маълумот аз хатми таҳсили пеш аз сафар, вазъи дархостҳои раводид ва маълумоти дахлдори дигар иборат хоҳад буд.

Ниҳоди фиристонанда ва ниҳоди қабулкунанда санаи вурудро барои коргароне, ки ҳадди ақал як (1) ҳафта пеш аз ворид шуданашон шаҳодатномаи ССVI гирифтаанд, бо дарназардошти нақшаи таълимӣ пас аз омадани онҳо ба инобат гирифта мешавад.

Ниҳоди фиристонанда чораҳои зарурӣ меандешад, аз ҷумла барои фармоиши қаблии чиптаҳои ҳавопаймо, то боварӣ ҳосил кунад, ки коргарон дар санаи муқарраршуда ба Корея ворид мешаванд.

Ниҳоди фиристонанда ва ниҳоди қабулкунанда ҷиҳати ба тартиб даровардани раванди фиристодан бо мақсади пешгирӣ намудани таъхирҳои нолозим пеш аз ворид шудан ба Корея корҳоро идома медиҳанд.

Моддаи 12. Ҷойгиркунии коргарон

Пас аз вуруди коргарон ВШМ пеш аз ба кор шурӯъ намудан омӯзиш ва муоинаи тиббӣ мегузаронад. ВШМ ташкилот(ҳо)-ро, ки барои омӯзиши пас аз омадан ва муоинаи тиббӣ масъуланд, муайян мекунад.

Коргароне, ки аз муоинаи тиббӣ нагузаштаанд, ба Тоҷикистон баргардонида мешаванд ва ниҳоди қабулкунанда ба ниҳоди фиристонанда дар бораи баргардонидани чунин коргарон хабар медиҳад.

Агар коргар бо сабабҳои аз муоинаи ҳатмии тиббӣ нагузаштан, мушкилоти саломатӣ ҳангоми гузаштан аз таълими пас аз омадан ё мутобиқ нашудан ба ҷои кор ба Тоҷикистон баргардад, ӯ хароҷоти дахлдор, аз ҷумла хариди билетро ба Тоҷикистон ба дӯши худ мегирад. Дар сурати надоштани имкони пардохти он, ҷониби Тоҷикистон (ниҳоди фиристонанда) барои пӯшонидани хароҷот мусоидат хоҳад кард.

Моддаи 13. Дастгирӣ дар раванди фиристодан ва қабул намудан

ВШМ ё ниҳоди қабулкунанда метавонад маркази ЕРS-и Кореяро дар Тоҷикистон ҷойгир кунад, то раванди сафарбар намудан ва қабули коргарони тоҷикро дастгирӣ намояд.

Маркази ЕРS Корея тавассути машваратҳо бо ВММША ва ниҳоди фиристонанда метавонад дар раванди сафарбар намудани қувваи корӣ кумак, назорат ва машварат диҳад. Хусусиятҳо, ба монанди сана ва раванди сафарбарсозии кормандони он, тавассути машваратҳои қаблии байни Тарафҳо муайян карда мешаванд.

ВММША ва ниҳоди фиристоданда барои сода кардани вазифаҳои кормандоне, ки ба маркази ЕРS Корея дар Тоҷикистон фиристода шудаанд, ҳамкорӣ хоҳанд кард, аз ҷумла барои мусоидат дар гирифтани раводиди дарозмуддат ба кормандон ва оилаҳои онҳо, дар расмиёти фурудгоҳ ва пешниҳоди маводи дархостшуда кумак мерасонад.

Моддаи 14. Идоракунии шуғл ва будубош

Ба коргарон иҷозат дода мешавад, ки дар Корея ба муддати то се (3) сол аз рӯзи ворид шудан кор кунанд. Бо вуҷуди ин, дар баъзе ҳолатҳо ба коргарон иҷозат дода мешавад, ки муҳлати кории худро як маротиба ба ҳадди аксар як (1) сол ва даҳ (10) моҳ бо риояи муқаррароти дахлдори Қонун дар бораи шуғли хориҷӣ тамдид намоянд.

Ба ҳамаи коргароне, ки ихтиёран пас аз ба итмом расидани шартномаи меҳнатӣ ба Ватан баргаштаанд, муҳлати шашмоҳаи дубора ворид шуданро маҳдуд мекунад. Бо вуҷуди ин, ба коргароне, ки ҳангоми корашон бе тағйир додани ҷои корашон самимона ба кори худ содиқ буданд, пас аз як (1) моҳи тарки Корея иҷозати дубора ворид шуданро дода, аз талаботи системаи холҳо, инчунин таҳсилоти қаблӣ ва пас аз сафар бо дархости корфармоён озод карда мешаванд.

ВММША ва ниҳоди фиристонанда кафолат медиҳанд, ки ҳамаи коргарон тамоми қонунҳои Корея, аз ҷумла санади шуғли хориҷӣ ва санади назорати муҳоҷиратро риоя мекунанд. ВШМ ва ниҳоди қабулкунанда ҳуқуқҳои коргарони хориҷиро тибқи қонунҳои марбут ба меҳнати Корея ҳимоя хоҳанд кард.

ВММША ва ниҳоди фиристоданда бо мақсади дастгирии раванди шуғл ва идоракунии будубош метавонанд намояндагонро ба Корея фиристанд. Хусусиятҳо, аз қабили сана ва раванди ирсоли онҳо, инчунин нақшаҳо тавассути машваратҳои қаблии байни Тарафҳо муайян карда мешаванд.

ВШМ ва ниҳоди қабулкунанда дар осон кардани вазифаҳои намояндагони ба Корея фиристодашуда, аз ҷумла пешниҳоди маводи дахлдор, ҷавобҳо ба дархостҳои мусоҳиба ва дастгирӣ дар гирифтани раводиди мувофиқ барои онҳо ва оилаҳои онҳо ҳамкорӣ хоҳанд кард.

Тарафҳо коргарони ба Ватан баргаштаро барои гирифтани имтиёзҳои суғурта дар доираи суғуртаи кафолати рафтан ва суғуртаи арзиши бозгашт роҳнамоӣ мекунанд ва инчунин ба онҳое, ки аллакай бе имтиёз ба хона баргаштаанд, дастгирӣ хоҳанд кард.

Дар сурате, ки коргар Кореяро бидуни пешниҳоди даъво барои суғуртаи кафолати рафтан ё пардохтҳои суғуртаи хароҷоти бозгашт тарк кунад, ВММША ва ВШМ ба корманд дар гирифтани пардохтҳои суғурта кумак мерасонанд ва ниҳоди фиристоданда маълумотеро, аз қабили суроғаи коргар ва маълумоти тамос, ки ВШМ дар ҷараёни баргардонидани пардохтҳо зарур мешуморад, пешниҳод хоҳад кард.

ВШМ ва ниҳоди қабулкунанда ба ВММША ва ниҳоди фиристонанда тавассути САДИ маълумоти асосӣ дар бораи коргарони тоҷикро пешниҳод менамояд, то сиёсати онҳо барои коҳиш додани коргарони ғайриқонунӣ самараноктар амалӣ карда шавад. Тарафҳо барои такмили пайваста ва фаъолияти устувори САДИ ҳамкорӣ хоҳанд кард.

Моддаи 15. Пешгирии коррупсия ва муқовимат ба будубоши ғайриқонунии коргарон

Тарафҳо ҷиҳати таъмини шаффофият ва самаранокии раванди ирсол ва қабул ҳамкорӣ хоҳанд кард. Бо мақсади баланд бардоштани шаффофият, Тарафҳо метавонанд маркази шикоятӣ таъсис диҳанд, ки дар он дар бораи рафтори нодуруст хабар дода мешавад.

ВММША ва ниҳоди фиристонанда мафҳуми асосии ЕРS-ро дар Тоҷикистон, аз ҷумла раванди ба шуғл таъминкунӣ, хароҷот барои сафар таблиғ менамояд. Хусусиятҳо, ба монанди усул ва ҷадвалҳои таблиғот тавассути машваратҳо бо ВШМ, ниҳоди қабулкунанда ё маркази ЕРS-и Корея ҳал карда мешаванд.

ВММША ва ниҳоди фиристонанда ба ВШМ, ниҳоди қабулкунанда ва/ё маркази ЕРS Корея дар таблиғи ЕРS тавассути воситаҳои ба монанди баргузории презентатсия дар Тоҷикистон мусоидат менамояд.

Тарафҳо барои ба таври комил идора кардани шуғл ва будубоши муваққатии коргарони тоҷик, аз ҷумла ҷиҳати пешгирии фаъолияти коргарон бидуни иҷозат, ҳавасманд намудани рафтани ихтиёрии онҳо аз Корея баъди ба охир расидани муҳлати иҷозати кор ва кам кардани шумораи коргарони ғайриқонунӣ дар Корея талош хоҳанд кард.

ВММША дар ҳамкорӣ бо ВШМ нақшаи коҳиш додани коргарони ғайриқонуниро дар Корея (харитаи роҳ) дар заминаи Ёддошти мазкур таҳия менамояд. ВММША барои иҷрои ҳадафҳо ва вазифаҳои мушаххаси нақшаи коҳиш додани шумораи коргарони ғайриқонунии тоҷик дар Корея корбарӣ менамояд.

Тарафҳо дар роҳандозии мониторинги ҳамаҷонибаи раванди фиристодани қувваи корӣ, ки ҷалб ва ҷойгиркунӣ, шуғл ва будубош ва бозгашти коргаронро дар бар мегирад, бо мақсади ноил шудан ба рушди минбаъда ва самаранокии баландтар дар татбиқи ЕРS фаъолона ҳамкорӣ хоҳанд кард.

Тарафҳо барои таъмини иҷрои босамари Барномаи дастгирии бозгаштагон, аз ҷумла хизматрасонии фаъоли шуғл барои кумак ба коргарони бозгашта барои мутобиқ шудан ба кишвари худ ҳамкорӣ хоҳанд кард.

Дар сурати ошкор шудани фасоди шадид ва/ё қонуншиканӣ дар раванди фиристодан, ё ба маротиб зиёд будани фоизи бе иҷозат дар ҷойи кор набудани коргарони тоҷик, ё будубоши ғайриқонунӣ дар Корея нисбат ба коргарони дигар кишварҳои фиристонанда, ВШМ чораҳои заруриро ба монанди кам кардани шумораи ҷудошудаи корҷӯён дар рӯйхат, боздоштани муваққатии раванди сафарбарсозӣ ё қатъи Ёддошти тафоҳуми мазкур меандешад.

Моддаи 16. Муқаррарот барои кормандони маркази ЕРS Корея

Тарафи Тоҷикистон ба кормандон ва оилаҳои онҳо дар маркази ЕРS-и Корея имтиёзҳо ва манфиатҳои зерин медиҳад:

а) додани шаҳодатномаи дипломатӣ ба роҳбари маркази ЕРS Корея барои таъмини ҳамкории ҳамаи муассисаҳои давлатии Тоҷикистон ҷиҳати иҷрои вазифаҳои зарурӣ аз ҷониби Вазорати корҳои хориҷии Ҷумҳурии Тоҷикистон дар асоси дархости расмии Ҳукумати Корея амалӣ карда мешавад;

(б) барои ворид шудан ба фурудгоҳ то нуқтаи назорати шиноснома бо категорияҳои гумрук, коргар, транзит, (С. О, Т) ба роҳбари Маркази ЕРS Корея гузарномаи махсус дода мешавад. Ҳангоми зарурат дастрасии берун аз нуқтаи назорати шиносномавӣ бо дархости Вазорати шуғл ва меҳнати Ҷумҳурии Корея дар муҳлати муқарраршуда ба роҳбари Маркази ЕРS баррасӣ карда мешавад.

(в) тибқи тартиби муқарраршуда ба кормандони маркази ЕРS Корея ва оилаҳои онҳо аз пардохтҳои консулӣ, боҷҳои гумрукӣ, андозҳо ва пардохтҳои дигари шабеҳи фискалӣ мусоидат карда мешавад. Илова бар ин, барои воситаҳои нақлиёти автомобилӣ, ки барои фаъолияти идора ба иҷора гирифта шудаанд ё киро шудаанд, бо миқдори мувофиқашудаи мақомоти дахлдор, инчунин барои ҳама гуна андозҳо ва пардохтҳои дахлдори андоз, ки вобаста ба пардохти хароҷоти идоравӣ аз хориҷа интиқол дода мешаванд, мусоидат карда мешавад.

Моддаи 17. Муқаррароти умумӣ 

Ҳама гуна ихтилофот ё баҳсҳое, ки ҳангоми тафсир ё татбиқи Ёддошти тафоҳуми мазкур ба миён меоянд, тавассути машваратҳои байни Тарафҳо ҳал карда мешаванд.

Дар сурати фаро нагирифтани баъзе масъалаҳо дар Ёддошти тафоҳуми мазкур, ки метавонанд ҳангоми фиристодан ва қабул кардан ба миён оянд ё дар сурати таҷдиди назари баъзе муқаррароти Ёддошти тафоҳуми мазкур, Тарафҳо метавонанд бо розигии мутақобилаи хаттӣ муқаррароти иловагиро аз нав дида бароянд ё илова кунанд.

ВШМ метавонад аз ВММША барои дастгирии зарурии коргарон, ки аз хориҷа ба Корея дар ҳолатҳои пешбининашаванда, ба монанди пандемияҳои ҷаҳонӣ ворид шудаанд, дархост намояд. Чунин ҳолат барои таъмини татбиқи пайвастаи ЕРS ва пешгирии бемориҳои сироятӣ дар чунин шароит пешниҳод мегардад.

Моддаи 18. Пайдо кардани эътибор, давомнокӣ ва қатъи амал

Ёддошти тафоҳуми мазкур аз рӯзи ба имзо расонидани он аз ҷониби Тарафҳо эътибор пайдо мекунад.

Ҷониби Тоҷикистон баъди ба имзо расидани Ёддошти тафоҳуми мазкур дар давоми 30 рӯз расмиёти дохилидавлатиро, ки барои эътибор пайдо кардани он заруранд, мегузаронад.

Ёддошти тафоҳуми мазкур барои ду (2) сол эътибор дорад. Аммо он метавонад бо ҳама гуна сабабҳои узрнок, ки дар огоҳии хаттии ҳар ду Тараф на камтар аз се (3) моҳ пеш аз он равона шудааст, боздошта шавад ё қатъ карда шавад.

Ҳатто агар Ёддошти тафоҳуми мазкур дар ҷараёни музокирот оид ба тамдиди он ба охир расад, он то ба имзо расидани Ёддошти тафоҳуми нав эътибор дорад. Бо вуҷуди ин, ҳар яке аз Тарафҳо метавонад амали Ёддошти тафоҳуми мазкурро қатъ кунад, агар гуфтушунид беш аз шаш (6) моҳ бе шарҳ ё сабабҳои узрнок ба таъхир гузошта шуда бошад.

Дар сурати содир шудани амалҳои ҷиддии ғайриқонунӣ, аз қабили таҳдид ба ҳамкориҳои дуҷониба, ҳифзи коргарон ва амнияти миллӣ аз ҷониби коргарон ва корфармоёне, ки қобилияти истифодабарии ЕРS-ро надоранд, амали Ёддошти тафоҳуми мазкур метавонад бо дархости яке аз Тарафҳо боздошта шавад.

Дар шаҳри__________«__»_________2024 дар ду нусхаи аслӣ бо забонҳои тоҷикӣ, кореягӣ ва англисӣ ба имзо расонида шуд, зимнан ҳамаи матнҳо эътибори якхела доранд.

Дар сурати ба вуҷуд омадани ихтилоф дар тафсири Ёддошти тафоҳуми мазкур ба матни англисӣ бартарӣ дода мешавад.