ҲУКУМАТИ ҶУМҲУРИИ ТОҶИКИСТОН

ҚАРОР 

Мутобиқи моддаҳои 11, 12, 13 ва 17 Қонуни Ҷумҳурии Тоҷикистон «Дар бораи созишномаи сармоягузорӣ» Ҳукумати Ҷумҳурии Тоҷикистон қарор мекунад:

1. Лоиҳаи созишномаи сармоягузорӣ байни Ҳукумати Ҷумҳурии Тоҷикистон ва Ширкати «Tilemaster Investment Limited» оид ба сохтмон ва ба истифода додани корхонаи истеҳсоли маҳсулоти сохтмонӣ-ороишӣ (кошин) дар минтақаи озоди иқтисодии «Данғара» маъқул дониста шавад.
2. Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон созишномаи сармоягузории мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.
3. Кумитаи давлатии сармоягузорӣ ва идораи амволи давлатии Ҷумҳурии Тоҷикистон тибқи тартиби муқарраргардида бо Ширкати «Tilemaster Investment Limited» сана ва маҳалли имзои созишномаи сармоягузории мазкурро мувофиқа намояд.
4. Хадамоти гумруки назди Ҳукумати Ҷумҳурии Тоҷикистон гузаронидани расмиёти гумрукӣ ва назорати истифодабарии мақсадноки молҳо, ашёи хом, маводи кимиёвӣ, масолеҳ, мошинҳо, таҷҳизоти истеҳсолию технологӣ ва муҳандисӣ, воситаҳои нақлиёт, асбобҳо, таҷҳизоти ёрирасон ва қисмҳои онҳоро, ки ба Ҷумҳурии Тоҷикистон ворид карда мешаванд, таъмин намояд.
5. Созишномаи сармоягузории мазкур пас аз ба имзо расидан ба Маҷлиси намояндагони Маҷлиси Олии Ҷумҳурии Тоҷикистон барои тасдиқ пешниҳод карда шавад.

СОЗИШНОМАИ САРМОЯГУЗОРӢ БАЙНИ ҲУКУМАТИ ҶУМҲУРИИ ТОҶИКИСТОН ВА ШИРКАТИ «TILEMASTER INVESTMENT LIMITED» ОИД БА СОХТМОН ВА БА ИСТИФОДА ДОДАНИ КОРХОНАИ ИСТЕҲСОЛИ МАҲСУЛОТИ СОХТМОНӢ-ОРОИШӢ (КОШИН) ДАР МИНТАҚАИ ОЗОДИ ИҚТИСОДИИ «ДАНҒАРА»

Созишномаи сармоягузории мазкур оид ба сохтмон ва ба истифода додани корхонаи истеҳсоли маҳсулоти сохтмонӣ-ороишӣ (Кошин) дар Минтақаи озоди иқтисодии «Данғара» байни

1. ҲУКУМАТИ ҶУМҲУРИИ ТОҶИКИСТОН (минбаъд - Ҳукумат) дар шахсияш Кумитаи давлатии сармоягузорӣ ва идораи амволи давлатии Ҷумҳурии Тоҷикистон (Минбаъд - Мақоми ваколатдори давлатӣ); ва
2. ШИРКАТИ «TILEMASTER INVESTMENT LIMITED» шахси ҳуқуқӣ, ки дар Маврикий ба қайд гирифта шудааст, бо ҷойи пешбурди фаъолияташ дар шаҳри Сайбер Сити, Эбене, Ҷумҳурии Маврикий (минбаьд дар якҷоягӣ бо ҳама гуна ширкатҳои фаръӣ, филиалҳо, саҳмдорон ва корхонаҳои муштарак - Сармоягузор) ва дар якҷоягӣ Тарафҳо

• бо дарназардошти муқаррароти Кодекси андози Ҷумҳурии Тоҷикистон, қонунҳои Ҷумҳурии Тоҷикистон «Дар бораи сармоягузорӣ», «Дар бораи созишномаи сармоягузорӣ», «Дар бораи минтақаҳои озоди иқтисодӣ» ва «Дар бораи бақайдгирии давлатии шахсони ҳуқуқӣ ва соҳибкорони инфиродӣ»;
• бо эътирофи он, ки низоми имтиёзу кафолатҳои дар созишномаи сармоягузории мазкур пешниҳодшуда бояд сармоягузориҳои хусусӣ ва рушди иқтисодиро ҳавасманд созанд;
• бо розигӣ бар он, ки сармоягузории босубот бояд фаъолона ба афзоиши истифодабарии захираҳои иқтисодӣ ва баланд бардоштани сатҳи зиндагӣ дар минтақа мусоидат намояд;
• бо мақсади мусоидати якҷоя баҳри татбиқи муваффақонаи Лоиҳаи сармоягузорӣ;
• бо мақсади вусъати ҳамкорӣ байни Тарафҳо ва дар ин замина баланд бардоштани иқтидори содиротии Тоҷикистон, фаъолгардонии воридоти технологияҳои муосир ва сармоягузории мустақими хориҷӣ ба объектҳои муҳими иқтисодии Ҷумҳурии Тоҷикистон.

ба имзо расонида шудааст:

МОДДАИ 1. МАФҲУМҲО ВА ТАФСИР

1. Мафҳумҳо

Дар созишномаи сармоягузории мазкур (бо шумули қисми эъломиявӣ) истилоҳу ибораҳои зерин, ба истиснои ҳолатҳое, ки аз матни он маънои дигар барнаояд, маънои зайл доранд:

«созишшома» / «созишномаи сармоягузорӣ» - маьнои созишномаи сармоягузории мазкурро дар якҷоягӣ бо муқаддима, замимаҳо, иловаҳо ва ҷадвалҳои он дорад;

«қонунгузории амалкунанда» - маънои тамоми шартномаҳои расмӣ, қонунҳо, санадҳои қонунгузорӣ, кодексҳо, қоидаҳо, қарорҳо. низомномаҳо, дастурамал, фармон ва санаду меъёрҳои дигари ҳуқуқиеро ифода менамояд, ки дар вақти дахлдор дар Ҷумҳурии Тоҷикистон амал мекунанд;

«иҷозатнома» - маънои ҳама гуна ҳуҷҷатҳои иҷозатномавӣ, иҷозатномаҳо, санадҳо, мувофиқаҳо, маъқул донистан, ваколатно.маҳои тасдиқй, шаҳодатномаҳои бақайдгирй, сертификатҳо, оюҳномаҳо, радномаҳо, имтиёзҳо, иҷозатнома барои даст кашидан аз меъёрҳои мавҷуда, раводид, барасмиятдарорӣ, ҷудокунӣ ва ҳуқуқи гузаштан ва интиқол доданро дорад, ки тибқи қонунгузории амалишаванда зарур мебошанд;

«мақоми ваколатдори давлатӣ» - маънои Кумитаи давлатии сармоягузорӣ ва идораи амволи давлатии Ҷумҳурии Тоҷикистонро дорад;

ширкати «TILEMASTER INVESTMENT LIMITED» - маънои ширкати Tilemaster Investment Limited, ки дафтари кории асосии он дар Маврикий ҷойгир шудааст, ширкати муассиси Ширкати лоиҳавиро дорад;

«санаи эътибор пайдо намудан» - санаи интишор гардидани қарори Маҷлиси намояндагони Маҷлиси Олии Ҷумҳурии Тоҷикистон дар бораи тасдиқи созишномаи сармоягузории мазкур;

«кормандони хориҷӣ» - ҳайати кормандони хориҷии сатҳи идоракунанда ва ҳайати техникии Ширкати лоиҳавӣ, ки тибқи эҳтиёҷот ва дар асоси Қонунгузории амалишаванда барои татбиқи Лоиҳа ҷалб карда мешаванд;

«ҳолатҳои ғайричашмдошт» - ҳоҷагиҳое, ки аз идораи Тарафҳо вобаста намебошанд, бо шумули буҳрони иқтисодӣ, ҳолатҳои фавқулода, офатҳои табиӣ, ба амсоли заминҷунбӣ, фаъолияти вулқонӣ, обхезӣ, сӯхтор ва тӯфони сахт, ҷангҳо, исён, инқилоб, амалиёти низомӣ ва таҳдиди бевоситаи ҳуҷум, ки метавонанд ба татбиқи Лоиҳа таъсир расонанд, ғайр аз мусодира аз тарафи Ҳукумат;

«асосноккунии техникию иқтисодӣ» - ҳуҷҷате мебошад, ки он бояд тамоми ҷанбаҳои дорои аҳаммияти муҳим барои татбиқи Лоиҳаро, бо дарназардошти меъёрҳои ҳатмии Қонунгузории амалишаванда дар соҳаи ҳифзи муҳити зист, саломатӣ ва бехатарии саноатӣ дар бар гирифта, мутобиқи таҷрибаи пешқадами байналмилалӣ тартиб дода шавад;

«Ҳукумат» - маънои Ҳукумати Ҷумҳурии Тоҷикистонро дорад;

“сармоягузор» - маънои Ширкати «TILEMASTER INVESTMENT LIMITED»-ро дорад;

«Тарафҳо» - маънои Ҳукумат ва Ширкати «TILEMASTER INVESTMENT LIMITED», инчунин ҳар шахси дигарро, ки мувофиқи шартҳои он Тарафи созишномаи сармоягузории мазкур мегардад, ифода мекунад ва мафҳуми «Тараф» яке аз онҳоро ифода менамояд;

«Корхона» - маънои корхонаи истеҳсоли кошин дар Минтақаи озоди иқтисодии «Данғара»-и ноҳияи Данғараи вилояти Хатлони Ҷумҳурии Тоҷикистонро ифода мекунад;

«Лоиҳа» - маънои лоиҳаи сармоягузории сохтмон, ба истифода додан ва фаъолияти корхона барои истеҳсоли маҳсулоти сохтмонӣ-ороишӣ (кошин) дар Минтақаи озоди иқтисодӣ «Данғара»-и ноҳияи Данғараи вилояти Хатлони Ҷумҳурии Тоҷикистонро ифода мекунад;

«ширкати лоиҳавӣ» - маънои Ҷамъияти дорои масъулияти маҳдуди “Ширкати Сафолии Кеда Тоҷикистон", ки дар Минтақаи озоди иқтисодии «Данғара» ба қайд гирифта шудааст;

«қитъаи лоиҳавӣ» - маънои қитъаи заминеро, ки барои татбиқи Лоиҳаи мазкур аз ҷониби маъмурияти Минтақаи озоди иқтисодии «Данғара» ба Сармоягузор дар асоси қарордод ҷудо карда мешавад, дорад;

«мақомоти давлатӣ» - маънои ҳама гуна вазорат, кумита, агентӣ, муассиса, инчунин ҳама гуна мақомоти иҷроия, қонунгузор ва судии маҳаллии ҳокимияти давлатӣ, ҳамчунин зерсохторҳои муассисаҳои дар боло номбаршудаи Ҷумҳурии Тоҷикистонро дорад.

2. Тафсир

1. Агар аз матн маънои дигар барнаояд, ишора ба банди муайян ё замима ба сифати ишора ба чунин банд ё замимаи созишномаи сармоягузории мазкур шарҳ дода мешавад. Замимаҳо ба созишномаи сармоягузории мазкур қисми ҷудонашавандаи созишномаи сармоягузории мазкур мебошанд.
2. Агар аз матн маънои дигар барнаояд, ишора ба Созишнома, қонунҳо, санадҳои қонунгузорӣ, дастурамал, қоида ё дигар санади меъёрии ҳуқуқӣ ва ҳама гуна қонунгузории амалишаванда ҳамчун ишора ба чунин Созишнома, қонунҳо, санадҳои қонунгузорӣ, дастурамал, қоида ё дигар санадҳои меъёрии ҳуқуқӣ ва ҳама гуна қонунгузории амалишаванда, бо дарназардошти тасҳеҳу тағйироти ҷузъӣ, вариатсияҳо, иловаҳо, тағйирот, гузашт карданҳо, навгониҳо ё қабул дар таҳрири такрорӣ дар лаҳзаи дахлдор шарҳу эзоҳ дода мешавад.
3. Сарлавҳаҳо маҳз барои истифодабарии муносиб ворид карда шуда, ба шарҳу эзоҳи созишномаи сармоягузории мазкур таъсир намерасонанд.
4. Агар аз матн маънои дигар барнаояд, калимаҳои шумораи танҳоро ифодакунанда, инчунин дар шакли ҷамъ ва баръакс фаҳмида мешаванд.

МОДДАИ 2. ЛОИҲА

Сармоягузор нияти татбиқи Лоиҳаро дошта, барои ин мақсад захираҳои молиявӣ, технологӣ, кадрӣ ва ғайраҳоро ҷудо мекунад ва Ҳукумат розӣ мешавад, ки низоми махсуси ҳуқуқӣ, аз ҷумла низоми махсуси андозӣ, гумрукӣ ва дигар имтиёзҳоро барои татбиқи Лоиҳа, ки моҳиятан аз:

• Сохтмони корхонаи (минбаъд - Корхона) истеҳсоли маҳсулоти сохтмонӣ ороишӣ (кошин) (минбаъд - «Маҳсулот») ва фаъолияти Корхонаи истеҳсоли Маҳсулот, ки иқтидори бароришаш ба 12,960,000 (дувоздаҳ миллиону нӯҳсаду шаст ҳазор) м² дар 1 сол дар Минтақаи озоди иқтисодии «Данғара» тавассути Ширкати лоиҳавӣ иборат аст. Муҳлати сохтмони корхона 18 (ҳаждаҳ) моҳро дар бар гирифта, ҳаҷми умумии сармогузорӣ 50 (панҷоҳ) миллион Доллари ИМА-ро ташкил медиҳад.

МОДДАИ 3. САРМОЯГУЗОРӢ 

1. Тарафҳо ба мувофиқа омаданд, ки Сармоягузор ҳуқуқ дорад, ки маблағгузории Лоиҳаро тавассути сармоягузорӣ намудан ба сармояи саҳомӣ ё қарзҳои Ширкати лоиҳавӣ ва ё тавассути муттаҳидкунии ин ду усул амалӣ менамояд.
2. Иловатан ба уҳдадории умумӣ оид ба пешниҳод намудани маълумоти оморие, ки Ширкати лоиҳавӣ дорад, Сармоягузор тибқи Қонунгузории амалишаванда вазифадор аст, ки ба воситаи Ширкати лоиҳавӣ ба мақоми ваколатдори давлатӣ ҳар се моҳ оид ба татбиқи Лоиҳа, аз он ҷумла бо қайди маблағи сармоягузориҳои барои мақсадҳои Лоиҳа воридкардашуда дар муддати 30 рӯз аз санаи анҷоми давраи ҳисоботӣ, ҳисобот пешниҳод намояд.

МОДДАИ 4. АСОСНОККУНИИ ТЕХНИКӢ ВА ИҚТИСОДӢ 

1. Асосноккунии техникию иқтисодӣ бояд тамоми паҳлуҳои техникӣ (истеҳсолӣ), экологӣ ва иқтисодии (тиҷоратии) татбиқи Лоиҳаро дар бар гирад. Барои таҳияи асосноккунии техникию иқтисодӣ Сармоягузор метавонад мутахассисону коршиносони маҳаллӣ ва байналмилалиро ҷалб намояд.
2. Дар давоми 180 (яксаду ҳаштод) рӯз аз санаи эътибор пайдо намудани созишномаи сармоягузории мазкур Сармоягузор бояд асосноккунии техникӣ-иқтисодиро омода намуда, як нусхаи онро ба Мақоми ваколатдори давлатӣ пешниҳод намояд.

МОДДАИ 5. ШИРКАТИ ЛОИҲАВӢ 

1. Сармоягузор қарор доир ба таъсис додани шахси ҳуқуқии нав дар Ҷумҳурии Тоҷикистон бо 100% ҳиссаи «Tilemaster Investment Limited» дар сармояи оинномавӣ ҳамчун Ширкати лоиҳавӣ қабул кардааст. Ширкати лоиҳавӣ ба санаи имзои созишномаи сармоягузории мазкур дар Минтақаи озоди иқтисодии «Данғара» ба таври дахллор таьсис ва ба қайд гирифта шудааст.
2. Сармоягузор ҳуқуқ дорад, сохтори моликияти Ширкати лоиҳавиро дар рафти татбиқи Лоиҳа тағйир диҳад, аз он ҷумла бе маҳдудият ҳуқуқи ҷалб намудани сармоягузори дигарро барои муштаракаи ташкил додан ва ё ворид карданн сармоягузорҳо ба Ширкати лоиҳавӣ дорад.

МОДДАИ 6. ҚИТЪАИ ЛОИҲАВӢ 

1. Корхона дар қитьаи замини Минтақаи озоди иқтисодии «Данғара» (минбаъд - «Қитъаи Лоиҳа») сохта мешавад. Ширкати лоиҳавӣ Қитъаи Лоиҳаро дар асоси қарордод бо Маъмурияти Минтақаи озоди иқтисодии «Данғара», ки дар он ҳаҷм ва хусусиятҳои қитъаи замин муайян мешавад, ба иҷора мегирад. Истифодабарии Қитъаи Лоиҳа метавонад бо роҳи ба иҷора гирифтани объекти молу мулки ғайриманқул, ки ба тамоми низомҳои зарурии таъминоти муҳандисӣ дастрасӣ дорад ва қитъаи замин, ки масоҳати он барои ҷойгир кардани Корхона дар доираи Лоиҳа кифоя мебошад, амалӣ мегардад.
2. Мақоми ваколатдори давлатӣ уҳдадор аст, ки ба Сармоягузор ва/ё Ширкати лоиҳавӣ ҳуҷҷатҳои расмии аз ҷониби мақомоти давлатӣ додашударо пешниҳод намояд, ки

- ҳақиқӣ ва қонунӣ будани ҳуқуқи молик ба объекти молу мулки ғайриманқул;

ва

- вуҷуд надоштани ҳеҷ гуна даъвоҳо аз тарафи Ҷумҳурии Тоҷикистон нисбати Қитъаи лоиҳавиро тасдиқ менамоянд.

3. Дар мавриди ҷудо кардани қитьаи замин барои Қитъаи лоиҳавӣ, Мақоми ваколатдори давлатӣ бояд дар барасмиятдарории қарорҳои зарурӣ (Шартномаи иҷораи қитъаи замин) ва ё додани Шаҳодатнома/Сертификатҳо аз тарафи Ҳукумат ва ё мақомоти давлатии дахлдор мусоидат намояд.
4. Мақоми ваколатдори давлатӣ бояд дар амалӣ намудани тамоми намудҳои фаъолияте, ки ба бақайдгирии давлатии ҳуқуқҳои молумулкии Ширкати лоиҳавӣ нисбати Қитъаи лоиҳавӣ мансубанд, аз ҷумла бе маҳдудият ба воситаи додани тамоми ҳуҷҷатҳои ҳуқуқӣ аз тарафи мақомоти давлатӣ, ки мутобиқи Қонунгузории амалишаванда заруранд, кӯмаки худро расонад.
5. Барои Ширкати лоиҳавӣ дар тамоми давраи амалисозии Лоиҳа арзиши иҷораи замин, яъне қитъаи замине, ки Ширкати лоиҳавӣ дар Минтақаи озоди иқтисодии ноҳияи Данғара ба иҷора гирифтааст, ба андозаи 50% (панҷоҳ фоиз) кам карда мешавад, зеро ки Сармоягузор розӣ шудааст, ки пешакӣ аз ҳисоби худ лоиҳаи қубури оббиёриро созад, зеро иншооти мавҷудаи об талаботи Лоиҳаро ба об қонеъ карда наметавонад.

МОДДАИ 7. ИҶОЗАТНОМАҲО

1. Ҳукумат мустақилона ва ё тавассути мақомоти салоҳиятдори давлатӣ мутобиқи тақсими доираи ваколатҳои дахлдор амал намуда, ба Сармоягузор бояд тамоми Иҷозатномаҳои дорои аҳамияти муҳим ва ё дар ҳолатҳои дигар мувофиқи Қонунгузории амалишаванда барои сохтан ва истифодабарии Корхона ва ё Лоиҳа заруриро диҳад, иваз ва ё муҳлати онҳоро тамдид намояд, дар ҳолатҳои дигар қонунгузории дахлдор оид ба фаъолияти Корхона ва/ё дар оғози амалисозии Лоиҳа заруранд, бидуни маҳдудият:

• ҳуҷҷатҳои дахлдор дар бораи бақайдгирии ҳуқуқи моликият нисбати Қитъаи Лоиҳа, додани Шаҳодатномаи ҳуқуқи истифодабарии замин, ҳуқуқи моликият, ҳама гуна ҳуқуқҳои молумулкӣ, ҳуқуқи истифодабарии хатти қитъаи ҷудошуда, ки ба Лоиҳа муносибат дорад ё зарур мебошад, инчунин ҳама гуна ҳуҷҷатҳои дигаре, ки бе истисно ҳуқуқро нисбати Қитъаи Лоиҳа, Корхона ва ё Лоиҳа тасдиқ менамоянд;
• иҷозат барои сохтмони Корхона ва ишноотҳои вобаста, аз ҷумла хатҳои интиқоли барқ, иншоотҳо, кашидани хатҳои ёрирасон, инчунин гирифтани ҳамаи дигар иҷозатҳо, хулосаҳои экспертӣ ва розигии мақомоти давлатӣ вобаста ба сохтмон ва лоиҳакашии Корхона;
• гирифтани розигӣ ва хулосаи мақомот оид ба ҳифзи сухтор ва хадамоти санитарию эпидемиологӣ, арзёбии таъсир ба муҳити зист;
• дар ҳолати зарурӣ бақайдгирии тамғаҳои молии Сармоягузор ё Ширкати лоиҳавӣ, ҳуқуқи муаллифӣ, тарҳҳо ва дигар ҳуқуқҳои моликияти зеҳнӣ ва/ё тамдиди бақайдгирии мавҷудаи тамғаҳои молии Сармоягузор ё Ширкаги лоиҳавӣ дар Ҷумҳурии Тоҷикистон;
• иҷозат барои ворид намудани таҷҳизот, мавод ва молу мулки дигари барои Лоиҳа ва Корхона зарурбуда;
• иҷозат барои дастрасӣ барои таъминоти об, обёрӣ ва васл шудан ба таъминоти барқ, парма картани чоҳҳои чуқур, гузоштани таҷҳизоти иловагии барқӣ, аз ҷумда трансформаторҳо ва ноқилҳои барқӣ, сохтмони шабакаҳои обтозакунӣ ва гузоштани лӯлаҳо;
• иҷозатнома барои кирояи шаҳрвандони хориҷӣ, иҷозат барои кор ва будубоши муваққатии шаҳрвандони хориҷӣ, раводиди воридот, раводиди кор, квотаҳои зарурӣ барои кирояи шаҳрвандони хориҷӣ.

2. Ҳукумат тибқи талаботи қонунгузорӣ кафолат медиҳад, ки додан, додани такрорӣ, ивазкунӣ ва тамдид кардани тамоми Иҷозатномаҳо фавран ва бе мамониат сурат мегирад.

МОДДАИ 8. МУБОДИЛАИ АСЪОР ВА АМАЛИЁТИ БОНКӢ

1. Дар робита ба татбиқи Лоиҳа, Ширкати лоиҳавӣ ҳуқуқ дорад, пардохтҳоро бо асъори хориҷӣ ба паймонкорони хориҷӣ ва ё қарздиҳандагон анҷом диҳад, даромади Сармоягузорро бо асъори хориҷӣ ба хориҷи кишвар интиқол диҳад, дар робита ба татбиқи Лоиҳа озодона асъори миллии Ҷумҳурии Тоҷикистонро бо асъори дигар мубодила намояд ва дар асоси гуфтаҳои боло Ҳукумат бояд ба Сармоягузор, Ширкати лоиҳавӣ ва ё Тарафҳои манфиатдор тамоми кӯмакҳои зарурии оқилонаеро, ки аз ҷониби Сармоягузор ҷиҳати гирифтани Иҷозатномаҳои ба Лоиҳа алоқаманд вобаста бо асъор ва мубодилаи он дархост карда мешавад, аз мақомоти салоҳиятдори давлатӣ, аз он ҷумла аз Бонки миллии Тоҷикистон тибқи қонунгузории Ҷумҳурии Тоҷикистон расонад.
2. Ба шарти риояи муқаррароти Қонунгузории амалишаванда Сармоягузор ва Ширкати лоиҳавӣ ҳуқуқ доранд, дар бонкҳои берун аз ҳудуди Ҷумҳурии Тоҷикистон суратҳисоби бонкӣ кушоянд. Сармоягузор ва Ширкати лоиҳавӣ ҳуқуқи кушодани суратҳисобҳои бонкӣ дар Тоҷикистон доранд ва метавонанд тамоми муомилотро вобаста ба хароҷот бо асъори миллӣ ба воситаи чунин суратҳисобҳо анҷом диҳанд.

МОДДАИ 9. НИЗОМИ АНДОЗӢ ВА ГУМРУКӢ ВА ДИГАР ИМТИЁЗҲО 

1. Бо дарназардошти ҳаҷми сармоягузорӣ, таҷҳизот, техника ва технологияҳо дар доираи Лоиҳа ҷалбшаванда, ба Ширкати лоиҳавӣ илова ба имтиёзҳои андоз ва гумрукие, ки дар Қонуни Ҷумҳурии Тоҷикистон "Дар бораи минтақаи озоди иқтисодӣ” пешбинӣ шудааст (дар таҳрире, ки дар Санаи эътибор пайдо намудан амал менамояд), имтиёзҳои андозии зерин пешниҳод шудааст:

- Ба андозаи 50 фоиз кам кардани меъёри андоз аз арзиши иловашуда ҳангоми истеҳсол, таҳвил, фуруш ва содироти Маҳсулот аз ҷониби Ширкати Лоиҳавӣ ба дигар қаламрави гумрукии Ҷумҳурии Тоҷикистон (берун аз минтақаи озоди иқтисодии Данғара) дар 5 соли аввали истеҳсол ва фурӯши Маҳсулот.

2. Ширкати лоиҳавӣ аз боҷҳои гумрукӣ ҳангоми таҳвили Маҳсулот, ҳамчун маҳсулоти дар Тоҷикистон истеҳсолшуда, ба қаламрави Ҷумҳурии Тоҷикистон (берун аз Минтақаи озоди иқтисодии ноҳияи Данғара) дар тамоми давраи татбиқи Лоиҳа озод мебошад.

3. Воридоти молҳо, ашёи хом, маводи кимиёвӣ ва масолеҳи масрафи бевосита барои татбиқи лоиҳа истифодашаванда, инчунин корхонаҳо, мошинҳо, таҷҳизот ва қисмҳо, таҷҳизоти муҳандисию истеҳсолӣ, воситаҳои нақлиёт, асбобҳо, таҷҳизоти ёрирасон ва ҷузъҳои он, ки бо мақсади татбиқи Лоиҳа илова ба имтиёзҳои муқаррарнамудаи Қонуни Ҷумҳурии Тоҷикистон "Дар бораи минтақаи озоди иқтисодӣ" ворид мешаванд, пас аз эътибор пайдо кардани созишномаи сармоягузорӣ ба муддати 5 сол аз пардохги 50 фоизи мёъёри муқарраргардидаи андоз аз арзиши иловашуда ва дар тамоми давоми амалигардонии Лоиҳа аз боҷи гумрукӣ пурра озод карда мешавад.

Номгуи молҳо ва таҷҳизотҳои дар сархати 1 банди 3 муққарраргардидаро Ҳукумати Ҷумҳурии Тоҷикистон тасдиқ менамояд.

4. Тағйироту иловаҳо ба қонунгузории андоз ва гумруки Ҷумҳурии Тоҷикистон, ки пас аз имзои созишномаи сармоягузорӣ қабул гардида, шароити татбиқи Лоиҳаро бадтар мекунанд, нисбат ба Сармоягузор ва Ширкати лоиҳавӣ дар тамоми муҳлати амали Лоиҳа татбиқ намегарданд. Дар давоми тамоми давраи татбиқи Лоиҳа, Ширкати лоиҳавӣ ҳуқуқ ба: (а) низоми ҳуқуқии на камтар аз низоми ҳуқуқие, ки барои шахсони ҳуқуқӣ ва воқеии Тоҷикистон мусоидтар аст ва (б) ҳуқуқ ва имтиёзҳое, ки ба ҳама гуна сармоягузори хориҷӣ ё корхонаи дорои саҳмияҳои хориҷӣ пешниҳод мешаванд, дорад.

МОДДАИ 10. ИҶОЗАТ БА КОР, КИРО НАМУДАН ВА ТАЪЛИМИ КОРГАРОН 

1. Сармоягузор бояд кушиш ба харҷ диҳад, ки шумораи зиёди шаҳрвандони Ҷумҳурии Тоҷикистонро барои фаъолият дар Ширкати лоиҳавӣ ҷалб намояд, ба шарте, ки чунин кормандон таҷрибаи дахлдор, тахассус ва маҳорати заруриро барои мансаби дархосткардаашон дошта бошанд. Ғайр аз давраи сохтмони Лоиҳа, Сармоягузор вазифадор аст, ки дар татбиқи Лоиҳа на камтар аз 80% шаҳрвандони Ҷумҳурии Тоҷикистонро ҳамчун кормандони Ширкати лоиҳавӣ ба кор ҷалб намояд. Ҳамзамон, ғайр аз давраи сохтмони Лоиҳа, миқдори кормандони хориҷӣ аз миқдоре, ки барои амалисозии Лоиҳа зарур аст, зиёд буда наметавонад.
2. Сармоягузор уҳдадор аст ба кормандоне, ки аз ҳисоби аҳолии маҳаллӣ ҷалб карда шудаанд, таълими мунтазам ва такмили ихтисосро пешниҳод намояд.

МОДДАИ 11. ҲУҚУҚИ МОЛИКИЯТ БА МОЛУ МУЛК, ЗАХИРАҲО ВА ҲУҚУҚҲО 

1. Агар дар созишномаи сармоягузории мазкур тартиби дигар пешбинӣ нашуда бошад, Ширкати лоиҳавӣ ҳуқуқи пурраи соҳибмулкӣ нисбати Корхона, таҷҳизот, техника, воситаҳои нақлиёт ва молу мулки дигари воридгардида ва/ё дар рафти татбиқи Лоиҳа ба даст овардашударо дорад.
2. Ширкати лоиҳавӣ ҳуқуқи озодона ихтиёрдорӣ намудани тамоми молу мулки дар ихтиёрдоштаи Ширкати лоиҳавиро дорад, агар ин молу мулк барои Лоиҳа дигар зарур набошад.

3. Ширкати лоиҳавӣ метавонад молу мулки худро аз он ҷумла бо мақсади ҷалб кардани сармоягузориҳо барои лоиҳа дар шакли қарзҳои аз ҷониби тарафҳои сеюм додашаванда ба гарав гузорад ё ба тариқи дигар иваз кунад.

4. Ширкати лоиҳавӣ метавонад тибқи тартиби муқаррарнамудаи қонунгузорӣ даромади дар рафти татбиқи Лоиҳа бадастомадаро озодона ба Сармоягузор интиқол диҳад.

МОДДАИ 12. СЕРТИФИКАТСИЯИ МАҲСУЛОТ, ҲИФЗИ МУҲИТИ ЗИСТ ВА САЛОМАТӢ 

1. Ширкати лоиҳавӣ уҳдадор аст, ки тамоми маҳсулот бо сертификати пешбининамудаи Қонунгузории амалишаванда ба ин навъи мол таъмин карда шавад. Ҳукумат тибқи талаботи қонунгузорӣ ҷиҳати сари вақт гирифтани сертификат барои Маҳсулот аз тарафи Мақоми давлатии дахлдор кафолат медиҳад.
2. Сармоягузор кафолат медиҳад, ки Ширкати лоиҳавӣ тамоми меъёрҳои Қонунгузории амалишавандаро оид ба ҳифзи муҳити зист риоя менамояд ва Лоиҳаро тавре амалӣ менамоянд, ки:

• эҳтимолияти расонидани зарари экологӣ ба муҳити зист ҳарчӣ камтар гардад;
• партовҳои истеҳсолӣ бехатар ва босамар дар Корхона нест карда шаванд.

Ширкати лоиҳавӣ бояд саъю кӯшиши оқилона кунад, то паймонкорон ва паймонкорони фаръиро оид ба риояи шартҳои дар боло зикршуда ҳамчун Ширкати лоиҳавӣ огоҳ созад. Гарчанде, ки ҳама гуна қонунвайронкунии паймонкорон ва паймонкорони фаръӣ набояд ҳамчун қонунвайронкунии Ширкати лоиҳавӣ ҳисоб карда шавад.

3. Сармоягузор уҳдадор аст таъмин намояд, ки аз тарафи Ширкати лоиҳавӣ қоидаҳои ҳифзи саломатӣ, ки Қонунгузории амаликунанда дар ҳолати сохтмон ва истифодаи Корхона пешбинӣ намудааст, риоя карда шаванд. Сармоягузор инчунин уҳдадор аст, ки аз тарафи Ширкати лоиҳавӣ риояи тамоми муқаррароти Қонунгузории амаликунанда оид ба масъалаҳои меҳнат, тандурустӣ ва бехатарӣ таъмин карда шавад.

Ширкати лоиҳавӣ бояд саъю кӯшиши оқилона кунад, то паймонкорон ва паймонкорони фаръиро оид ба риояи шартҳои дар боло зикршуда ҳамчун Ширкати лоиҳавӣ огоҳ созад, гарчанде ки ҳама гуна қонунванронкунии паймонкорон ва паймонкорони фаръӣ набояд ҳамчун қонунвайронкунии Ширкати лоиҳавӣ ҳисоб карда шавад.

МОДДАИ 13. СУҒУРТА 

Ширкати лоиҳавӣ ҳуқуқ доранд ҳама гуна шакли суғуртаро, ки тибқи Қонунгузории амаликунанда талаб шудааст, дар ширкатҳои суғуртавии маҳаллӣ ё хориҷӣ бо шартҳои имтиёзнок ба расмият дароранд.

МОДДАИ 14. ҲИСОБОТ ВА БАҲИСОБГИРИИ МУҲОСИБАВӢ 

1. Ширкати лоиҳавӣ пешбурд ва нигоҳдории пурраи дурусти ҳуҷҷатгузории муҳосибавӣ ва иттилоотро нисбат ба Лоиҳа дар идораи ба қайд гирифташудаи Ширкати лоиҳавӣ таъмин менамояд.
2. Ширкати лоиҳавӣ ҳар семоҳа дар давоми 30 (сӣ) рӯзи пас аз анҷоми семоҳаи дахллор ба Мақоми ваколатдор ҳисоботи идоракунӣ ва молиявиро оид ба татбиқи Лоиҳа пешниҳод менамояд. Чунин ҳисобот бояд ҳисоботи молиявӣ барои семоҳаи дахлдор, тавсифи иҷрои асосноккунии техникию иқтисодии дахлдор ва чунин дигар маълумоти молиявӣ ва амалиётиро, ки Ширкати лоиҳавӣ барои дохил кардан ба чунин ҳисобот зарур ё ба таври дигар мувофиқ дониста метавонад, дар бар гирад.
3. Уҳдадориҳои ҳисоботдиҳии Ширкати лоиҳавӣ дар ин ҳуҷҷат илова ба ҳамаи дигар уҳдадориҳои ҳисоботии пешбининамудаи Қонунгузории амаликунанда мебошанд.

МОДДАИ 15. УҲДАДОРИҲОИ УМУМИИ ШИРКАТИ ЛОИҲАВӢ 

1. Ширкати лоиҳавӣ уҳдадор аст, ки

• Лоиҳаро тибқи таҷрибаи пешқадаме, ки Сармоягузор дорад, инчунин бо риояи Қонунгузории амаликунанда, аз ҷумла меъёрҳои ҳифзи муҳити зист ба амал барорад;
• тибқи созишномаи сармоягузории мазкур нисбат ба Лоиҳа, аз ҷумла барои пешниҳоди маблағгузорӣ, техника, таҷҳизот, технология ва кормандон, ки ҷиҳати бомуваффақият ва сари вақт анҷом додани он лозим мебошад, масъулияти пурра дошта бошад;
• таъмин намояд, ки Лоиҳа ва тамоми кормандон ва мушовироне, ки дар доираи Лоиҳа ҷалб карда мешаванд, Қонунгузории амалишавандаро дар давраи татбиқи Лоиҳа риоя намоянд;
• фаъолияти истеҳсолӣ дар муддати 3 сол аз рӯзи бақайдгирӣ дар минтақаи озоди иқтисодӣ ё дар муддати 2 сол пас аз ба қувваи қонунӣ даромадани созишномаи сармоягузории мазкур оғоз намояд;
• муқарароти Созишномаро дар мӯҳлати амали Созишнома босифат татбиқ намояд.

2. Тарафҳо дарк менамоянд ва розӣ мебошанд, ки уҳдадориҳои дар боло зикркардашуда, инчунин дигар уҳдадориҳое, ки дар дигар фаслҳои созишномаи сармоягузории мазкур қайд гардидаанд, тибқи Қонунгузории амаликунанда илова ба уҳдадориҳои умуми Ширкати лоиҳавӣ маҳсуб мешаванд.
3. Дар сурати дар муҳлати муайянгардида татбиқ нагардидани Созишнома ва ё роҳ додан ба қонунвайронкуниҳо Ширкати лоиҳавиро ҷаримабандӣ намояд.
4. Ҳангоми ислоҳ нагардидани муқаррароти созишномаи сармоягузории мазкур ва ё қонунвайронкуниҳо, Созишномаро бекор намояд. Дар ин сурат Ширкати лоиҳавӣ уҳдадор мегардад, ки зарари аз ҳисоби имтиёзҳои ба Ширкати лоиҳавӣ додашудаи Ҳукумати Ҷумҳурии Тоҷикистонро пурра ҷуброн намояд.

МОДДАИ 16. КАФОЛАТҲОИ ИЛОВАГИИ БА САРМОЯГУЗОР ПЕШНИҲОДШАВАНДА

1. Бо мақсади татбиқи самарабахши созишномаи сармоягузории мазкур, Ҳукумат мустақиман ё ба воситаи Мақоми ваколатдори давлатӣ уҳдадор мешавад:

• риояи пурраи муқаррароти созишномаи сармоягузории мазкурро аз ҷониби тамоми Мақомоти давлатие, ки барои амалӣ намудани Лоиҳа масъул мебошанд, таъмин намояд;
• Мақомоти дахлдори давлатиро оид ба эътибор пайдо намудани созишномаи сармоягузории мазкур огоҳ намояд.

2. Ҳукумат иловатан ба Сармоягузор, Ширкати лоиҳавӣ ва ё Лоиҳа тасдиқ менамояд, ки:

• ҳимоя аз санадҳои Ҳукумат ё ҳама гуна Мақомоти давлатӣ, ки маҳз ба паст кардани арзиши сармояи Сармоягузор равона шудаанд ва дар рафти татбиқи Лоиҳа қабул гардиданд, таъмин карда мешавад;
• ҳуқуқ барои фаъолияти соҳибкорӣ дар асоси қарордод, интихоби озоди шарикон ва мавзуи қарордод, интихоби ҳуқуқи қобили татбиқ барои қарордод, расмиёти судӣ ва ё арбитражии ҳалли баҳсҳо ё шаклҳои дигари ҳалли баҳсҳо ва мухолифатҳо барои тамоми қарордодҳо, муайянкунии озоди уҳдадориҳо, инчунии шартҳои дигари қарордодҳо муайян карда мешавад.
• ҳуқуқ барои гирифтан ва пешниҳод намудани қарзҳо, кафолатҳо, замонат ва намудҳои дигари таъминот аз бонкҳои дохилию хориҷӣ, ҷамъияту ташкилотҳо, инчунин барои суғуртакунӣ бо суғуртакунандагони дохилию хориҷӣ бо шартҳои имтиёзнок дода мешавад;
• ҳуқуқи сармоягузорӣ намудан ва такроран сармоягузорӣ кардани даромаде, ки дар доираи Лоиҳа ба даст омадааст, агар он барои татбиқи Лоиҳа зарур бошад, дода мешавад.

3. Ҳукумат кафолат медиҳад, ки Сармоягузор ва Ширкаги лоиҳавӣ ҳуқуқ доранд натиҷаҳои сармоягузории худ, аз ҷумла сармоягузориҳои такрорӣ ва амалиётҳои тиҷоратиро дар ҳудуди Ҷумҳурии Тоҷикистон ихтиёрдорӣ ва истифода намоянд, фоидаи худро дар ҳама гуна шакл, аз ҷумла дар шакли нақд, маҳсулот ва хизматрасонии дар Ҷумҳурии Тоҷикистон харидоришуда интиқол намоянд.
4. Ҳукумат ҳуқуқи Сармоягузор ва Ширкати лоиҳавиро оид ба мубодилаи озоди даромади фоидаи софи он бо ҳама гуна асъор кафолат медиҳад, аз он ҷумла:

• фоидае, ки дар натиҷаи фуруши пурра ё қисмати ҳиссаи иштироки он дар Ширкати лоиҳавӣ дар муддати амалӣ намудани Лоиҳа ё пас аз анҷом ёфтани он, дар сурати барҳам хурдани Лоиҳа, ба даст омадааст;
• фоидаи дар натиҷаи бегона кардани молу мулк ё ҳуқуқҳои дар рафти амалӣ намудани Лоиҳа таъсис ва ё та таври дигар бадастомадаи Сармоягузор ҳосил шудааст.

5. Ҳукумат мусоидат менамояд, ки Сармоягузор ва Ширкати лоиҳавӣ тибқи талаботи қонунгузорӣ даромади худро озодона ба асъори миллӣ ва хориҷӣ мубодила намуда, онро берун аз марзи Ҷумҳурии Тоҷикистон содир намоянд.

МОДДАИ 17. ҲУҚУҚҲОИ МАХСУСИ ҲУКУМАТ 

1. Иловатан ба ҳуқуқҳои дигари дар фаслҳои дигари созишномаи сармоягузории мазкур пешбинигардида Ҳукумат мустақилона ва ё тавассути мақоми ваколатдори давлатӣ ҳуқуқ дорад:

• иттилоот дар бораи рафти татбиқи Лоиҳа, инчунин ҳуҷҷатҳои барои санҷиши риояи шарту муқаррароти созишномаи сармоягузории мазкур заруриро талаб намояд;
• ба Сармоягузор тавсия ва пешниҳодотро, ки ба баланд бардоштани самаранокии Лоиҳа равона карда шудааст, манзур намояд.

2. Ҳукумат мустақилона ё тавассути ягон мақомоти давлатӣ амал карда, набояд ба фаъолияти иқтисодии Сармоягузор ва Ширкати лоиҳавӣ дар тамоми давраи амали Лоиҳа дахолат кунад.

МОДДАИ 18. УҲДАДОРИҲОИ МУТАҚОБИЛАИ ТАРАФҲО 

1. Ҳеҷ яке аз Тарафҳо наметавонанд бе розигии хаттии Тарафи дигар ҳуқуқҳои худро дар доираи созишномаи сармоягузории мазкур ба тарафи бегона гузашт кунад ё бо тарзи дигар пурра ё қисман вогузор намояд.
2. Тарафҳо бояд мубодилаи иттилооти марбут ба Лоиҳа ва барои татбиқи он муҳимро анҷом диҳанд. Чунин иттилоот маълумоти оморӣ, тафсилоти таҳлилӣ, таҳлилҳои маркетингӣ, қонунҳо ва санадҳои меъёрии ҳуқуқии мушаххаси нисбати Лоиҳа истифодашавандаи Ҷумҳурии Тоҷикистонро дар бар мегирад. Ҳамаи маълумоти байни Тарафҳо мубодилашуда нисбати шахсони сеюм бояд махфӣ ҳисобида шавад.
3. Тарафҳо дар ҳаҷми пурра дар доираи татбиқи Лоиҳа ҳамкорӣ намуда, барои ии мақсад тамоми захираҳои оқилонаи зарурии доштаи худро бо дарназардошти муқаррароти созишномаи сармоягузории мазкур ва қонунгузории амалишаванда ҳамаҷониба истифода мебаранд.

МОДДАИ 19.УСТУВОРИИ МУҚАРРАРОТИ СОЗИШНОМА

1. Тарафҳо розӣ мешаванд, ки Сармоягузор бояд риоя ва таъмин намояд, ки Ширкати лоиҳавӣ, Қонунгузории амаликунандаро бо дарназардошти пай дар пай ворид гардидани тағйиру иловаҳо дар давраи татбиқи Лоиҳа риоя намояд.

Ширкати лоиҳавӣ бояд саъю кӯшиши оқилона кунад, то паймонкорон ва паймонкорони фаръиро оид ба риояи шартҳои дар боло зикршуда ҳамчун Ширкати лоиҳавӣ огоҳ созад. гарчанде ки ҳама гуна қонунвайронкунии паймонкорон ва паймонкорони фаръӣ набояд ҳамчун қонунвайронкунии Ширкати лоиҳавӣ ҳисоб карда шавад.

2. Новобаста аз гуфтаҳои боло, тағйиру иловаҳои ба қонунгузории амалишаванда пас аз санаи эътибори созишномаи сармоягузории мазкур воридгардида ба имтиёзҳои дар созишномаи сармоягузории мазкур пешбинигардида таъсир намерасонанд, ба истиснои ҳолатҳое, ки тағйиру иловаҳо имтиёзҳои иловагиро пешбинӣ намоянд.

МОДДАИ 20. ТАҒЙИРУ ИЛОВАҲО 

Ҳеҷ гуна тағйиру иловаҳо ба созишномаи сармоягузории мазкур эътибор надоранд, ба истиснои ҳолатҳое, ки онҳо ба тариқи хаттӣ мувофиқа шуда, аз ҷониби Тарафҳо ё аз номи ҳар яке аз Тарафҳои созишномаи сармоягузории мазкур имзо гардидаанд ва мутобиқи Қонунгузории амаликунанда тасдиқ карда шудаанд.

Муҳлат ва шартҳои созишномаи сармоягузории мазкур бо иҷозати Ҳукумати Ҷумҳурии Тоҷикистон метавонад тамдид карда шавад.

МОДДАИ 21. ҲОЛАТҲОИ ҒАЙРИЧАШМДОШТ (ФОРС- МАЖОР) 

1. Дар сурати ба вуқуъ омадани ҳолатҳои ғайричашмдошт, ки ба яке аз Тарафҳо имконияти пурра ё қисман иҷро кардани уҳдадориҳои худро намедиҳад, муҳлати иҷрои уҳдадориҳо бояд то санаи дигари бо розигии Тарафҳо дар шакли илова ба созишномаи сармоягузории мазкур муайяншуда дароз карда шавад, ба шарте ки Тарафи дигар дар ин бора дар муҳлати кӯтоҳтарин огоҳ карда шавад.
2. Дар сурати қатъ шудани татбиқи Лоиҳа бо сабаби ҳолатҳои ғайричашмдошт дар тӯли на зиёда аз 3 моҳ, муҳлати идомаи Лоиҳа бояд ба ҳамин муддат дароз карда шавад. Агар ҳолатҳои ғайричашмдошт зиёда аз 3 моҳ давом ёбанд, Тарафҳо бояд мӯҳлати мавқуфро, ки бо ҳарду Тараф мувофиқа мешавад, тамдид кунанд ё Созишномаро бо розигии Тарафҳо қатъ намоянд.

МОДДАИ 22. ҚАТЪИ СОЗИШНОМА

1. Созишномаи сармоягузории мазкур бо розигии Тарафҳо қатъ карда мешавад.

2. Созишномаи сармоягузории мазкур ба тариқи яктарафа танҳо дар ҳолатҳои зерин қатъ мсгардад:

бо ташаббуси Ҳукумат:

• дар ҳолате, ки аглр Ширкати лоиҳавӣ ба таври дахлдор шартҳои созишномаи сармоягузории мазкурро вобаста ба муҳлат ва андозаи сармоягузориҳо бо сабаби вобаста аз Сармоягузор иҷро накунад. Бо мақсади пешгирӣ намудани тафсири нодуруст, то он даме, ки сармоягузориҳои анҷомдодашуда ба нишондиҳандаҳои ҳисобӣ наздик мешаванд, он бояд сабаби қатъи Созишнома нагардад;
• дар сурати нишондиҳандаҳои таҳминӣ ба таври назаррас кам будани сармоягузории воқеӣ, Ҳукумат бояд аввал Ширкати лоиҳавиро огоҳ созад ва барои ислоҳи ҳолат ба Ширкати лоиҳавӣ на камтар аз 24 моҳ давраи имтиёзнок диҳад. Пас аз ба итмом расидани давраи имтиёзнок, агар вазъияти Лоиҳа то ҳол ба шарту шартҳои созишномаи сармоягузории мазкур ҷавобгӯ набошад, Ҳукумат метавонад созишномаи сармоягузории мазкурро бекор кунад.

бо ташаббуси Сармоягузор:

• агар Ҳукумат ё мақомоти давлатии дигар ба амалӣ намудани Лоиҳа мамоният ва мушкилиро ба миён оваранд;
• агар Ҳукумат ё мақомоти давлатии дигар уҳдадориҳои дар доираи созишномаи сармоягузории мазкур қабул намудаи худро иҷро накунанд;
• агар тибқи ҳисоботи Сармоягузор пас аз 1 соли имзо шудани созишномаи сармоягузории мазкур аён гардад, ки Лоиҳа бо сабабҳои вобаста аз ҳукумати Чин, Ҳукумат ё мақомоти давлатии дигар амалӣ карда намешавад.

МОДДАИ 23. ҚОНУНГУЗОРИИ АМАЛИШАВАНДА ВА ҲАЛЛИ БАҲСҲО 

1. Созишномаи сармоягузории мазкур мутобиқи қонунгузории Ҷумҳурии Тоҷикистон танзим ва тафсир карда мешавад.
2. Дар бораи ҳама гуна баҳсҳое, ки байни Тарафҳо дар асос ё вобаста ба созишномаи сармоягузории мазкур ба миён меоянд, огоҳинома ба тариқи хаттӣ бо воридкунии иттилооти муфассал оид ба он ирсол карда мешавад. Ба қадри имкон Тарафҳо бояд кӯшиш ба харҷ диҳанд, ки чунин баҳсро ба воситаи машварат ва гуфтушунид ҳаллу фасл намоянд.
3. Агар баҳс бо роҳи машварат ва гуфтушунид дар муддати 6 моҳ аз санаи ирсоли огоҳиномаи хаттӣ, ки дар Моддаи 24.2 қайд шудааст, ҳаллу фасл нагардад, он гоҳ ҳама гуна баҳс, ихтилоф, фарқият ё даъвое, ки аз ин созишномаи сармоягузорӣ бармеоянд, аз ҷумла мавҷудият, эътиборнокӣ, тафсир, иҷро, вайрон кардан ё қатъ кардани он ё ҳама гуна баҳс оид ба ӯҳдадориҳои ғайришартномавӣ, ки аз он ё ба он марбутанд, аз ҷониби арбитражи Маркази Байналмилалии Арбитражии Ҳонконг (HKIAC) тибқи Қоидаҳои HKIAC, ки ҳангоми пешниҳод кардани огоҳинома дар бораи арбитраж амал мекунад, ҳал карда мешавад. Ҷойи гузаронидани арбитраж Гонконг хоҳад буд.

МОДДАИ 24. ДАСТ КАШИДАН АЗ МАСУНИЯТИ СОҲИБИХТИЁРӢ 

Ҳукумат тибқи созишномаи сармоягузории мазкур бебозгашт ва бечунучаро аз масунияти соҳибихтиёрӣ аз чораҳои пешакӣ оид ба таъмини хароҷоти расмиёти арбитражӣ, масуният аз огоҳиномаҳои мурофиавӣ, масуният аз иҷрои маҷбурии қарорҳои арбитражӣ ва масунияти молумулкии Ҷумҳурии Тоҷикистон ё ин ки нисбат ба чораҳои пешакии таъмини иҷрои қарори арбитражӣ ва ё нисбат ба иҷрои маҷбурии қарори арбитражӣ дар ҳудуди Ҷумҳурии Тоҷикистон ва ё берун аз ҳудуди онро даст мекашад.

МОДДАИ 25. ҶУБРОН 

Ҳукумат бояд Сармоягузор ва/ё Ширкати лоиҳавиро аз ҳама гуна талафот ҳисорот, хароҷот, даъвоҳо, қарорҳо, ҳаққи адвокат ё замимаҳое, ки дар натиҷаи маълумоти бардурӯғ, рафтори қасдан ё хунукназарии дағалона ё вайрон кардани шартҳои созишномаи сармоягузории мазкур аз ҷониби Ҳукумат ба вуҷуд меоянд, ҷуброн ва безарар нигоҳ дорад.

МОДДАИ 26. МУҚАРРАРОТИ ХОТИМАВӢ 

1. Барои эътибори қонунӣ пайдо намуданн кафолати ҳуқуқҳои Сармоягузор, озодкунӣ аз андоз ва имтиёзҳои дигаре, ки ба Сармоягузор ва Лоиҳа дода мешаванд, инчунин амалӣ намудани муқаррарот дар бораи устуворӣ созишномаи сармоягузории мазкур бояд аз Тарафи Маҷлиси намояндагони Маҷлиси Олии Ҷумҳурии Тоҷикистон тасдиқ карда шавад.
2. Созишномаи сармоягузории мазкур дар рӯзи нашри санад дар бораи аз тарафи Маҷлиси намояндагони Маҷлиси Олии Ҷумҳурии Тоҷикистон тасдиқ гардидани он эътибор пайдо мекунад. Ҳукумат тамоми кӯшишҳоро ба харҷ медиҳад, то санаи эътибор пайдо намуданро на дертар аз (_________) моҳ аз рӯзи ба имзо расидани созишномаи сармоягузории мазкур ба даст орад.

3. Созишномаи сармоягузории мазкур дар шаҳри ____________ «__»___________соли 2024 дар ду нусхаи асл бо забонҳои тоҷикӣ ва англисӣ ба имзо расонида шуд. Дар ҳолати ба миён омадани мухолифат дар тафсири муқаррароти созишномаи сармоягузории мазкур, матни англисии он бартарӣ дорад.