ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Ёддошти тафоҳум байни Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон ва Созмони миллии стандартҳои Эрон дар соҳаи стандартизатсия ва метрология маъқул дониста шавад.

2. Директори Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон Ёддошти тафоҳуми мазкурро ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон тибқи тартиби муқарраргардида сана ва маҳалли имзои Ёддошти тафоҳуми мазкурро бо ҷониби Эрон мувофиқа намояд.

Ёддошти тафоҳум байни Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон ва Созмони миллии стандартҳои Эрон дар соҳаи стандартизатсия ва метрология

Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон (ТОҶИКСТАНДАРТ) ва Созмони миллии стандартҳои Эрон (СМСЭ), ки минбаъд «Тарафҳо» номида мешаванд,

бо тасдиқи аҳаммият ва нақши стандартизатсия, метрология,

бо тамоюл ба густариши манфиатҳои мутақобила аз тариқи ҳамкорӣ дар соҳаҳои стандартизатсия ва метрология бар асоси баробарӣ ва манфиатҳои мутақобила,

бо таваҷҷуҳ ба ин, ки ин ҳамкорӣ заминаи тарғиби ҳамкории иқтисодӣ миёни кишварҳои ду тараф бо дар назар гирифтани манфиатҳои иқтисодии дуҷониба хоҳад шуд,

ба шарҳи зер тафоҳум намуданд:

Моддаи 1. Заминаҳои ҳамкорӣ

Тарафҳо ҳамкориҳои зерини илмию техникиро дар соҳаҳои стандартизатсия, метрология, омӯзиш, табодули иттилоот ва нашриёт дар доираи Ёддошти тафоҳуми мазкур ба роҳ мемонанд:

1.1. Стандартизатсия

1.1.1. Табодули таҷриба дар дар соҳаи стандартизатсия;

1.1.2. Иштирок дар ҷаласаҳо, нишастҳо, курсҳо (семинарҳо)-и омӯзишӣ, намоишгоҳҳо ва чорабиниҳои дигари марбут ба соҳаи стандартизатсия, ки аз ҷониби Тарафҳо баргузор мешаванд;

1.1.3. Ҳамоҳангсозии стандартҳои миллии Тараф бо стандартҳои байналмилалӣ бо мақсади беҳтар намудани шароит ва рушди робитаҳои дуҷонибаи тиҷоратию иқтисодӣ;

1.1.4. Дар сурати набудани стандарти миллии мавриди тавофуқ аз сӯйи Тарафҳо, Тарафҳо аз стандартҳои тавассути ниҳодҳои байналмилалии стандартизатсия ва метрология қабулшуда, ки дар кишварҳои Тарафҳо амал менамоянд, истифода мебаранд;

1.1.5. Ҳамкорӣ дар доираи фаъолияти муассисаи минтақавии стандартизатсия, метрология, баҳодиҳии мутобиқат (ECO-RISCAM), Созмони байналмилалӣ оид стандартизатсия (ISO) ва Институти Созмони ҳамкориҳои исломӣ оид ба стандартизатсия ва метрологияи кишварҳои исломӣ OIC/SMIIC бо ҳадафи рушди стандартҳои минтақавӣ ё байналмилалӣ ва бо дарназардошти манфиатҳои миллӣ;

1.1.6. Ҳамкорӣ дар самти стандартизатсияи истифодаи захираҳои сузишворию энергетикӣ;

1.1.7. Табодули дониш ва ба роҳ мондани ҳамкорӣ дар бахши ҷорӣ намудани стандартҳои самаранок ва сарфакунандаи энергия, омӯзиши таҷрибаи эронӣ дар паст намудани сатҳи талафоти неруи барқ ва танзими низоми энергетикӣ дар ширкатҳои энергетикӣ;

1.1.8. Тарафҳо барои банақшагирӣ, муайян кардани сиёсат ва амалисозии банди мазкур, инчунин таҳияи Харитаи роҳ ва ё Нақшаи муштараки амал барои ҳамкорӣ дар соҳаҳои дигари марбута, аз ҷумла баҳодиҳии мутобиқат ва аккредитатсия Гурӯҳи кории муштарак ва ё комиссияҳои муштаракро, ки аз намояндагони ҳарду тараф иборат мебошанд, таъсис медиҳанд.

1.2. Метрология

1.2.1. Рушд ва такмил додани самтҳои таъмини ченаки ягона, ки манфиати Тарафҳоро дар бар мегирад;

1.2.2. Гузаронидани муқоиса ва андозагирии (калибровкаи) маҳакҳои миллӣ;

1.2.3. Ҳамкории Тарафҳо ҷиҳати расонидани ёрии техникӣ, омода кардан ва рушди маҳорати касбии кормандон, мубодилаи таҷрибаи мутахассисон дар соҳаи метрология.

1.3. Омӯзиш

1.3.1. Баргузории барномаи омӯзишии муштарак барои рушди ҳамкориҳо дар соҳаҳои стандартизатсия, баҳодиҳии мутобиқат ва метрология ва ҳама намуди дигари ҳамкорӣ, ки метавонанд дар мавриди мувофиқа қарор дошта бошанд.

1.4. Табодули иттилоот ва нашриёт

1.4.1. Мубодилаи асноди меъёрӣ, иттилоот ва нашриёти даврӣ, феҳрасти стандартҳои миллӣ, қоидаҳо ва бамеъёрдарории техникӣ марбут ба маҳсулот ва ташхисҳои дахлдор, инчунин мубодилаи курсҳои иттилоот ва ҷузъиёти марбут ба барномаҳои омӯзишӣ ва беҳбуди тавонмандиҳои коршиносӣ дар заминаҳои стандартизатсия тибқи ниёзу дархостҳои ҳар яке аз Тарафҳо.

Моддаи 2. Ҳаллу фасли ихтилофот

Ҳама гуна ихтилофи назар дар шарҳ ё иҷрои Ёддошти тафоҳуми мазкур бо тариқи музокира ва машварат миёни Тарафҳо бо роҳҳои дипломатӣ ҳаллу фасл хоҳад шуд.

Моддаи 3. Иртибот бо ёддоштҳои тафоҳуми дигар

Ёддошти тафоҳуми мазкур ҳамкорӣ барои ширкати Тарафҳо дар ҳамкориҳои ду ё чандҷонибаи дигари кишварҳо дар соҳаҳои стандартизатсия ва метрология монеъ нахоҳад шуд.

Моддаи 4. Ислоҳот ва тағйирот

Бо мувофиқаи Тарафҳо ба Ёддошти тафоҳуми мазкур метавонанд тағйиру иловаҳо ворид карда шавад, ки бо протоколҳои алоҳида ба расмият дароварда шуда, тибқи тартиби пешбининамудаи моддаи 6 эътибор пайдо мекунад ва қисми таркибии Ёддошти тафоҳуми мазкур ба ҳисоб мераванд.

Моддаи 5. Махфият

Ҳама гуна маълумот ва иттилооте, ки ба ҳар шакле бар асоси Ёддошти тафоҳуми мазкур мубодила ва аз ҷониби Тарафҳо махфӣ шуморида мешавад, Тарафҳо уҳдадоранд махфияти онро таъмин намоянд.

Маълумот ва иттилооти махфӣ сарфи назар аз бекор шудани Ёддошти тафоҳуми мазкур бояд ҳифз карда шавад.

Моддаи 6. Муҳлати амал ва эътибор

1. Ёддошти тафоҳуми мазкур баъди ба имзо расидан ба муддати се (3) сол амал менамояд ва дар сурати розигии Тарафҳо Ёддошти мазкур бевосита барои се (3) соли дигар тамдид хоҳад шуд. Дар акси ҳол бояд яке аз Тарафҳо шаш (6) моҳ қабл аз санаи ба охир расидани он Тарафи дигарро ба таври хаттӣ бояд аз нияти худ дар бораи қатъи амали он огоҳ созад.

2. Қатъи амали Ёддошти тафоҳуми мазкур барои амалӣ намудани ҳама гуна нақша, барномаҳо ва лоиҳаҳо, ки зимни иҷрои Ёддошти тафоҳуми мазкур амалӣ мешуданд, таъсир нахоҳад гузошт, ба ғайр аз ҳолате, ки Тарафҳо ба таври хаттӣ дар хусуси шакли дигар тасмим гирифта бошанд.

Ёддошти тафоҳуми мазкур дар шаҳри __________ «___» ________________ соли 2024 мелодӣ баробар ба _______________ ҳиҷрии шамсӣ бо забонҳои тоҷикӣ, форсӣ ва англисӣ ба имзо расонида шуд, ки ҳамаашон аз эътибори яксон бархӯрдор мебошанд. Дар сурати ихтилоф дар шарҳ ё иҷро бар матни англисӣ бартарӣ дода мешавад.