ИТТИҲОДИ ДАВЛАТҲОИ МУСТҚИЛ

ШӮРОИ САРОНИ ҲУКУМАТҲО

ҚАРОР

Дар робита ба қабули таҳрири нави Оинномаи Шӯрои байниҳукуматии роҳсозон Шӯрои сарони ҳукуматҳои Иттиҳоди Давлатҳои Мустақил

ба хулоса омад:

1. Аз рӯзи ҳамроҳ шудан ба Созишнома дар бораи Оинномаи Шӯрои байниҳукуматии роҳсозон Қарори Раёсати Кумитаи байнидавлатии иқтисодии Иттиҳоди иқтисодӣ аз 11 сентябри соли 1998 дар бораи додани мақоми мақомоти байниҳукуматии Иттиҳоди Давлатҳои Мустақил ба Шӯрои роҳсозон аз эътибор соқит дода шавад.

2. Мақомоти дахлдори ҳокимияти давлатии давлатҳои иштирокчии ИДМ, ки дар салоҳияти онҳо масъалаҳои ташкили амалӣ намудани фаъолияти роҳҳо дохил мешавад, ба муқаррароти Оинномаи Шӯрои байниҳукуматии роҳсозон дар таҳрири нав корбарӣ намоянд.

Минск - 31.05.2013

СОЗИШНОМА дар бораи Оинномаи Шӯрои байниҳукуматии роҳсозон

Ҳукуматҳои давлатҳои иштирокчии Иттиҳоди Давлатҳои Мустақил, ки минбаъд Тарафҳо номида мешаванд,

ба мувофиқаи зерин омаданд:

Моддаи 1

Оинномаи Шӯрои байниҳукуматии роҳсозон, ки қисми ҷудонопазири Созишномаи мазкур мебошад, дар таҳрири нав қабул карда шавад.

Моддаи 2

Бо розигии Тарафҳо ба Созишномаи мазкур метавонанд тағйиру иловаҳо ворид карда шаванд, ки қисми ҷудонашавандаи он буда, бо протоколи дахлдор, ки бо тартиби барои эътибор пайдо кардани Созишномаи мазкур пешбинигардида эътибор пайдо мекунад, ба расмият дароварда мешаванд.

Моддаи 3

Созишномаи мазкур пас аз гузаштани 30 рӯз аз санаи аз ҷониби маҳфуздоранда гирифтани огоҳиномаи охирин дар бораи аз ҷониби Тарафҳои имзокардаи он иҷро гардидани расмиёти дохилидавлатие, ки барои эътибор пайдо кардани он заруранд, эътибор пайдо мекунад.

Моддаи 4

Созишномаи мазкур пас аз эътибор пайдо кардани он барои ҳамроҳшавии ҳар давлати иштирокчии ИДМ тавассути пешниҳоди ҳуҷҷати ҳамроҳшавӣ ба маҳфуздоранда боз аст.

Барои давлати ҳамроҳшаванда Созишнома пас аз гузаштани 30 рӯз аз санаи гирифтани ҳуҷҷати ҳамроҳшавӣ аз ҷониби маҳфуздоранда эътибор пайдо мекунад.

Моддаи 5

Созишномаи мазкур ба муҳлати номуайян баста мешавад. Ҳар яке аз Тарафҳо ҳуқуқ дорад, ки тавассути ба маҳфуздоранда дар бораи чунин нияти худ на дертар аз шаш моҳ пеш ирсол намудани огоҳиномаи хаттӣ ва ба танзим даровардани уҳдадориҳое, ки дар давраи амали Созишномаи мазкур ба миён омадаанд, аз Созишномаи мазкур хориҷ гардад.

Дар шаҳри Минск 31 майи соли 2013 дар як нусхаи аслӣ бо забони русӣ ба имзо расонида шуд. Нусхаи аслӣ дар Кумитаи иҷроияи Иттиҳоди Давлатҳои Мустақил нигоҳ дошта мешавад ва нусхаи тасдиқшудаи онро ба ҳар давлати имзокардаи Созишномаи мазкур ирсол менамояд.

Минск - 31.05.2013

ОИННОМАИ Шӯрои байниҳукуматии роҳсозон

1. Муқаррароти умумӣ

Шӯрои байниҳукуматии роҳсозон (минбаъд ШБР) мақоми ҳамкории соҳавии ИДМ мебошад, ки дар доираи ваколатҳои худ фаъолият мекунад ва ба шӯрои Иқтисодӣ ва Шӯрои сарони ҳукуматҳои ИДМ ҳисобот медиҳад.

Дар фаъолияти худ ШБР аз Оинномаи Иттиҳоди Давлатҳои Мустақил, шартномаҳои байналмилалии дар доираи Иттиҳоди Давлатҳои Мустақил басташуда, қарорҳои Шӯрои сарони давлатҳо, Шӯрои сарони ҳукуматҳо ва шӯрои Иқтисодии ИДМ, инчунин Оинномаи мазкур роҳбарӣ мекунад.

ШБР дар доираи салоҳияти худ бо Комиссияи масъалаҳои иқтисодии назди шӯрои Иқтисодии ИДМ, Кумитаи иҷроияи ИДМ, мақомоти ҳамкории соҳавии ИДМ дар соҳаи нақлиёт (маҷлиси ҳамоҳангсозии нақлиётии давлатҳои иштирокчиени ИДМ, Шӯрои нақлиёти роҳи оҳани давлатҳои иштирокчиени Иттиҳод, кумитаи Ҳамоҳангсозии гузаргоҳҳои нақлиётии ИДМ) ва дигар мақомоти ҳамкории соҳавии ИДМ ҳамкорӣ мекунад.

2. Мақсад, самтҳои асосии фаъолият ва вазифаҳои Шӯрои байниҳукуматии роҳсозон

2.1. Мақсади ШБР мусоидат ба рушд ва такмили шабакаи роҳдории автомобилгарди истифодаи умум, фароҳам овардани шароит барои истифодаи пурраи иқтидори истеҳсолӣ ва илмӣ-техникии ташкилотҳои роҳдории давлатҳои иштирокчии ИДМ, дастгирии ҳукуматҳо дар гузаронидани сиёсати мувофиқашудаи роҳ ва амиқ кардани равандҳои ҳамгироӣ, баланд бардоштани сатҳи тайёрии кадрҳо мебошад.

2.2. Самтҳои асосии фаъолияти ШБР аз инҳо иборат мебошанд:

мусоидат ба густариши муносибатҳои мутақобилан судманд байни маъмурияти роҳдории иштирокчиёни Шӯрои байниҳукуматии роҳсозон дар соҳаи лоиҳакашӣ, сохтмон, таҷдид, таъмир ва нигоҳдории роҳҳои автомобилӣ ва иншооти роҳ; таҳияи консепсияҳои сиёсати илмӣ-техникӣ дар соҳаи роҳ, аз ҷумла дар соҳаи экология ва бехатарии ҳаракат; ҳамоҳангсозии ҳамкории маъмурияти роҳҳо оид ба лоиҳакашӣ, сохтмон, таҷдид, таъмир ва нигоҳдории роҳҳои автомобилӣ ва иншооти роҳ, ки ба рӯйхати роҳҳои байналмилалии автомобилии ИДМ дохил карда шудаанд; омода намудани тавсияҳо оид ба гузаронидани сиёсати мувофиқашудаи роҳҳои давлатҳои иштирокчии ИДМ; ҳамоҳангсозии фаъолият оид ба тайёр кардани кадрҳо, кори муассисаҳои таълимии ташаккули роҳ ва ташкилотҳои илмӣ — тадқиқотӣ.

2.3. Вазифаҳои асосии ШБР:

ҳалли якҷояи вазифаҳои илмию техникӣ, бо тартиби муқарраргардида ворид намудани пешниҳодҳо оид ба такмили ҳуҷҷатҳои меъёрии асосӣ дар соҳаи хоҷагии роҳ; ҳамоҳангсозии ҳамкорӣ оид ба масъалаҳои рушди соҳаҳои роҳҳои давлатҳои иштирокчии ИДМ;

мусоидат ба татбиқи лоиҳаҳои муштарак оид ба сохтмон, таҷдид, таъмир ва нигоҳдории роҳҳои автомобилӣ ва иншооти роҳ, сохтмони иншооти саноатӣ, манзилӣ ва шаҳрвандӣ;

омода намудани тавсияҳо оид ба рушди роҳҳои воридшавӣ ба нуқтаҳои гузаргоҳ тавассути сарҳадҳои давлатии давлатҳои иштирокчии ИДМ дар самтҳои афзалиятноки интиқоли мусофирон;

мусоидат ба ҳамоҳангсозии лоиҳаҳо, нақшаҳои сохтмони роҳҳои автомобилӣ, шабакаҳои роҳҳо, долонҳои байналмилалии нақлиётӣ, ки ба нуқтаҳои гузариш тавассути марзҳои давлатии давлатҳои иштирокчии ИДМ наздик мебошанд, бо мақомоти иҷроияи ҳокимияти давлатӣ, ки дар салоҳияти онҳо сохтмон (таҷдид) ва рушди нуқтаҳои гузариш;

омода намудани тавсияҳо оид ба ташкили истеҳсолоти муштараки масолеҳи роҳсозӣ, сохторҳо, воситаҳои механизатсия, асбобҳои назорати сифати кор ва ташхиси роҳҳо, воситаҳои техникии ташкили ҳаракат, маҳсулоти барномавӣ;

таҳияи пешниҳодҳо оид ба таҳияи ҳуҷҷатҳои меъёрӣ ва методологӣ, тавсияҳо, меъёрҳо ва қоидаҳои сохтмон, стандартҳои байнидавлатӣ; омодасозии маводи иттилоотӣ маълумотӣ ва таҳлилӣ;

таҳияи пешниҳодҳо оид ба маблағгузории муштарак ва гузаронидани корҳои илмӣ-тадқиқотӣ оид ба рушди хоҷагии роҳ;

рушди робитаҳо бо ташкилотҳои дахлдори байналмилалии таъмини иштироки ШБР дар иттифоқҳои байналмилалӣ, конгрессҳо ва дигар форумҳо.

2.4. Шӯрои байниҳукуматии роҳсозон барои иҷрои вазифаҳои худ:

лоиҳаҳои ҳуҷҷатҳоро оид ба масъалаҳои марбут ба рушди соҳаҳои роҳҳои давлатҳои иштирокчии ИДМ бо тартиби муқарраргардида барои баррасии мақомоти олии ИДМ омода ва пешниҳод менамояд;

барои гирифтани маълумот дар бораи иҷрои созишномаҳои дуҷониба ва бисерҷониба, қарорҳои Шӯрои сарони давлатҳо ва Шӯрои сарони ҳукуматҳои ИДМ оид ба масъалаҳои ба салоҳияти ИДМ дохилшуда ба мақомоти ҳокимияти иҷроияи давлатҳои иштирокчии ШБР муроҷиат мекунад;

маҷлисҳои умумӣ ва дар масъалаҳои алоҳида маҷлисҳои корӣ ё гурӯҳҳои корӣ барои омода кардани лоиҳаҳои ҳуҷҷатҳои марбут ба салоҳияти Шӯрои байниҳукуматии роҳсозон; конфронсҳои илмӣ-амалӣ, семинарҳо, маҷлисҳо, намоишгоҳҳо ва дигар чорабиниҳоро баргузор мекунад;

аз маъмурияти роҳҳои иштирокчиени ШБР оид ба масъалаҳои ба салоҳияти он дохилшуда маълумот талаб мекунад.

3. Ташкили кории Шӯрои байниҳукуматии роҳсозон

3.1. Ба ҳайси Шӯрои байниҳукуматии роҳсозон роҳбарони мақомоти ҳокимияти давлатии давлатҳои иштирокчии ИДМ дохил мешаванд, ки салоҳияти онҳо масъалаҳои ташкили фаъолияти роҳдорӣ мебошад.

Дар ин ҳолат ҳар як давлати иштирокчии ШБР як овоз дорад.

Ба ҳайати ШБР бо ҳуқуқи овози машваратӣ роҳбари котиботи Шӯрои мазкур дохил мешавад ва инчунин дар асоси Низомнома дар бораи мақоми нозири тасдиқшудаи ШБР намояндагони мақомоти ҳокимияти давлатии давлатҳое, ки иштирокчии ИДМ нестанд, ки ҳадафҳо ва вазифаҳои Шӯрои мазкуро тақсим мекунанд, дохил шуда метавонанд.

Бо қарори ШБР ба ҳайати он роҳбарони мақомоти ҳамкории соҳавии ИДМ, роҳбари академияи байналмилалии нақлиёт, намояндаи Кумитаи иҷроияи ИДМ метавонанд бо ҳуқуқи овози машваратӣ дохил шаванд.

Бо қарори аъзои ШБР дар кори он намояндагони ташкилотҳои роҳ, ташкилотҳои байнидавлатӣ, байниҳукуматӣ, минтақавӣ, ҷамъиятӣ ва илмӣ-тадқиқотӣ, ассотсиатсияҳо, ҷамъиятҳои саҳҳомӣ, холдингҳо ва дигар ташкилотҳо метавонанд ҳамчун аъзои ассотсиатсияшуда иштирок кунанд Низомнома дар бораи узвияти ассотсиатсияшуда аз ҷониби Шӯрои мазкур тасдиқ карда мешавад.

Дар доираи ШБР дар асоси муқаррароти тасдиқшуда ҳамчун воҳидҳои сохторӣ амал мекунанд:

шӯрои Экспертӣ-илмӣ, Кумитаи техникии байнидавлатии "Хоҷагии Роҳ", гурӯҳҳои кории доимоамалкунанда: оид ба идоракунӣ ва рушди хоҷагии роҳ; оид ба мушкилоти ҳуқуқӣ; оид ба маблағгузории хоҷагии роҳ; оид ба сиёсати техникӣ, нигоҳдорӣ ва бехатарии ҳаракати роҳ; дар ҳолати зарурӣ, дар самтҳои дигари фаъолияти хоҷагиҳои роҳҳои ИДМ.

Роҳбарони гурӯҳҳои кории зикршуда аз ҷониби ШБР тасдиқ карда мешаванд.

Дар ҳолати зарурӣ бо қарори аъзои ШБР гурӯҳҳои кории муваққатӣ таъсис дода мешаванд.

3.2. ШБР низомномаи кори худро тасдиқ мекунад.

3.3. Ҷаласаҳои Шӯрои мазкур дар ҳолати зарурӣ бо пешниҳоди аъзои ШБР, аммо на камтар аз як маротиба дар як сол гузаронида мешаванд.

Ҷаласаҳо қонунӣ эътироф карда мешаванд, агар дар кори онҳо на камтар аз се ду ҳиссаи аъзои он иштирок кунанд.

Макон ва мӯҳлати баргузории маҷлисҳо бо мувофиқаи пешакии аъзои ШБР муайян карда мешавад.

Хароҷоти вобаста ба маблағгузории гузаронидани маҷлисҳои ШБР аз ҳисоби мақомоти дахлдори ҳокимияти давлатии давлати қабулкунандаи иштирокчии ИДМ амалӣ карда мешавад.

Хароҷоти сафарбаркунии аъзои ШБР ва иштирокчиёни чорабиниҳои Шӯрои мазкур аз ҷониби мақомоти роҳбарикунандаи ҳокимияти давлатӣ, ташкилотҳо ва корхонаҳои давлатҳои иштирокчии ИДМ амалӣ карда мешавад.

3.4. Шӯрои байниҳукуматии роҳсозонро Раис роҳбарӣ мекунад.

Раисӣ аз ҷониби ҳар як давлати иштирокчии ИДМ дар симои намояндаи он бо тартиби алифбои русии номҳои давлатҳои иштирокчии ИДМ дар давоми як сол, агар аз ҷониби ШБР ҳал карда нашавад, ба таври навбатӣ амалӣ карда мешавад.

Раисони пешина ва минбаъдаи ШБР ҳамраисони он мебошанд.

Дар сурати муваққатан набудани Раис вазифаҳои ӯ ба зиммаи яке аз ҳамраисон гузошта мешаванд.

3.5. ШБР ҳар сол нақшаи кориро тасдиқ мекунад, тартиб ва мӯҳлати баррасии масъалаҳоро муайян мекунад.

3.6. Қарорҳои ШБР бо аксарияти овозҳои аъзои он, ки дар маҷлис ҳузур доранд, қабул карда мешаванд, агар бо қарори Шӯрои мазкур тартиби дигаре муайян карда нашуда бошад.

Ҳар як узви ШБР метавонад дар бораи бетаваҷҷуҳии худ ба ин ё он масъала изҳори назар кунад, ки набояд ҳамчун монеа барои қабули қарор баррасӣ карда шавад.

Аъзои Шӯро, ки бо қарор розӣ нестанд, метавонанд фикри махсусеро, ки ба протоколи маҷлис ворид карда мешавад, баён кунанд.

3.7. Таъмини ташкилию техникӣ ва иттилоотии фаъолияти ШБР аз ҷониби мақомоти иҷроияи доимоамалкунандаи Шӯрои мазкур Котибот амалӣ карда мешавад.

Вазифаҳои Котиботи ШБР ва тартиби фаъолияти он бо Оинномаи он, ки аз ҷониби ШБР тасдиқ карда мешавад, муайян карда мешаванд.

Маблағгузории хароҷоти вобаста ба фаъолияти ШБР, аз ҷумла хароҷоти нигоҳдории Котиботи он аз ҳисоби саҳмияҳои солонаи иштирокчиёни Шӯрои мазкур аз манбаъҳои ғайрибуҷетӣ, саҳмияҳои ихтиёрӣ ва хайрияҳои шахсони ҳуқуқӣ ва воқеӣ амалӣ карда мешавад.

Андозаи пардохтҳои иштирокчиёни ШБР бо қарори Шӯрои мазкур ҳангоми тасдиқи сметаи хароҷоти котибот муқаррар карда мешавад.

3.8. Мақоми иҷроияи Шӯрои байниҳукуматии роҳсозонро роҳбари Котиботи Шӯрои мазкур роҳбарӣ мекунад, ки дар ин вазифа бо қарори Шӯро ба мӯҳлати панҷ сол тасдиқ карда мешавад.

Роҳбари Котиботи Шӯрои байниҳукуматии роҳсозон аз рӯи вазифа муовини Раиси Шӯрои мазкур мебошад.

3.9. Ҷои будубоши Котиботи Шӯрои байниҳукуматии роҳсозон шаҳри Москва, Федератсияи Русия мебошад.

4. Муқаррароти хотимавӣ

4.1. Шӯрои байниҳукуматии роҳсозон ҳар сол ба Кумитаи иҷроияи ИДМ маълумот дар бораи фаъолияти худро пешниҳод мекунад.

Ҳисобот дар бораи кори ШБР бо тартиби муқарраршуда дар ҷаласаи Шӯрои сарони ҳукуматҳои ИДМ баррасӣ карда мешавад.

Ҷадвали ҳисоботи ШБР аз ҷониби Комиссияи масъалаҳои иқтисодии назди шӯрои Иқтисодии ИДМ тасдиқ карда мешавад.

4.2. Забони кории ШБР забони русӣ мебошад.

Минск - 31.05.2013