ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Созишнома байни Ҳукумати Ҷумҳурии Тоҷикистон ва Ҳукумати Шоҳигарии Баҳрайн оид ба бекор намудани талаботи раводид барои дорандагони шиносномаҳои хизматӣ ва махсус маъқул дониста шавад.

2. Вазири корҳои хориҷии Ҷумҳурии Тоҷикистон Созишномаи мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.

3. Вазорати корҳои хориҷии Ҷумҳурии Тоҷикистон бо тартиби муқарраргардида бо Шоҳигарии Баҳрайн сана ва маҳалли имзои Созишномаи мазкурро мувофиқа намояд.

Созишнома байни Ҳукумати Ҷумҳурии Тоҷикистон ва Ҳукумати Шоҳигарии Баҳрайн оид ба бекор намудани талаботи раводид барои дорандагони шиносномаҳои хизматӣ ва махсус 

Ҳукумати Ҷумҳурии Тоҷикистон ва Ҳукумати Шоҳигарии Баҳрайн, ки минбаъд дар алоҳидагӣ «Тараф» ва якҷо «Тарафҳо» номида мешаванд,

бо нияти мусоидат ба рушди минбаъдаи муносибатҳо ва ҳамкориҳои дуҷониба байни ду кишвар;

бо мақсади содагардонии вуруд, будубош ва хуруҷи шаҳрвандони дорандагони шиносномаҳои хизматӣ ва махсус ба ҳудуди кишварҳои якдигар;

ба мувофиқаи зерин расиданд:

Моддаи 1

Шаҳрвандони Ҷумҳурии Тоҷикистон, ки дорандаи шиносномаҳои хизматӣ мебошанд, метавонанд бе раводид ба муддати на зиёдтар аз навад (90) рӯз дар давоми яксаду ҳаштод (180) рӯз шурӯъ аз санаи вуруд ба ҳудуди Шоҳигарии Баҳрайн ворид, хориҷ, тариқи транзитӣ убур ва будубош намоянд.

Моддаи 2

Шаҳрвандони Шоҳигарии Баҳрайн, ки дорандаи шиносномаҳои махсус мебошанд, метавонанд бе раводид ба муддати на зиёдтар аз навад (90) рӯз дар давоми яксаду ҳаштод (180) рӯз шурӯъ аз санаи вуруд ба ҳудуди Ҷумҳурии Тоҷикистон ворид, хориҷ, ба тариқи транзитӣ убур ва будубош намоянд.

Моддаи 3

Шаҳрвандони ҳар яке аз Тарафҳо, ки дорои шиносномаҳои амалкунандаи хизматӣ ва махсус мебошанд, метавонанд ба ҳудуди Тарафи дигар тавассути гузаргоҳҳои сарҳадӣ, ки барои ҳаракати байналмилалӣ муқаррар шудаанд, ворид гарданд.

Моддаи 4

Шиносномаҳое, ки аз ҷониби шаҳрвандони ҳар яке аз Тарафҳо пешниҳод мегарданд, бояд муҳлати амали на кам аз шаш (6) моҳро дар рӯзи вуруд ба ҳудуди Тарафи дигар дошта бошанд.

Моддаи 5

Тарафҳо намунаи шиносномаҳои амалкунандаи хизматӣ ва махсуси худро тавассути роҳҳои дипломатӣ ва на кам аз си (30) рӯз қабл аз эътибор пайдо намудани Созишномаи мазкур мубодила менамоянд.

Дар ҳолате, ки яке аз Тарафҳо шакли нави шиносномаро қабул намояд ё шиносномаҳоеро, ки қаблан мавриди мубодила қарор гирифта буданд тағйир диҳад, Тарафи дигар бояд бо роҳҳои дипломатӣ на кам аз си (30) рӯз қабл аз эътибор пайдо намудани ин тағйирот огоҳ карда шавад. Ба огоҳинома намунаи ҳуҷҷати нав ё тағйирдодашуда ва маълумот дар бораи истифодабарӣ замима карда мешавад.

Моддаи 6

Шаҳрвандони кишварҳои ҳар яке аз Тарафҳо, ки дорандаи шиносномаҳои хизматӣ ва махсус мебошанд, бояд қонунҳои амалкунандаи кишвари Тарафи дигарро дар муҳлати будубош риоя намоянд.

Моддаи 7

Дар ҳолати гум кардан ё корношоям шудани шиносномаҳои хизматӣ ва махсус дар ҳудуди кишвари Тарафи дигар, шаҳрванди зарардида бояд намояндагии дипломатӣ ва ё муассисаи консулии кишвари худро хабардор созад ва намояндагӣ мақомоти ваколатдори Тарафи дигарро огоҳ кунад. Намояндагии дипломатӣ ё муассисаи консулӣ бояд барои шаҳрванди худ шиносномаи нав ва ё шаҳодатномаи бозгашт таҳия намуда, мақомоти кишвари пазирандаро огоҳ намояд.

Моддаи 8

Ҳар яке аз Тарафҳо ҳуқуқ дорад вуруди шаҳрвандони дорандагони шиносномаҳои эътиборноки хизматӣ ва махсуси кишвари Тарафи дигарро, ки номатлуб меҳисобад рад ва ё муҳлати будубоши шаҳрвандони мазкурро кам намояд.

Моддаи 9

Шаҳрвандони кишварҳои ҳар яке аз Тарафҳо, ки дорандаи шиносномаҳои хизматӣ ва махсус мебошанд, ҳуқуқи машғул шудан ба фаъолияти касбӣ ё тиҷоратӣ ва таҳсил дар кишвари дигарро бидуни гирифтани раводид тибқи қонунҳои амалкунандаи ҳарду кишвар надоранд.

Моддаи 10

Амали Созишномаи мазкур метавонад муваққатан қисман ё пурра аз ҷониби ҳар яке аз Тарафҳо бо мақсади таъмини тартиботи ҷамъиятӣ, амнияти давлат ва сиҳатии аҳолӣ боздошта шавад. Тарафе, ки нияти боздоштани амали Созишномаи мазкурро дорад, бояд тавассути роҳҳои дипломатӣ Тарафи дигарро на кам аз чилу ҳашт (48) соат қабл аз боздоштани амали он огоҳ созад.

2. Боздоштани амали Созишномаи мазкур ба ҳуқуқҳои шаҳрвандоне, ки қабл аз боздоштан ба ҳудуди Тарафи дигар ворид шудаанд, таъсир намерасонад.

Моддаи 11

Созишномаи мазкур ба ҳуқуқ ва уҳдадориҳои Тарафҳо, ки аз созишномаҳо ва конвенсияҳои байналмилалие бармеоянд, ки онҳо иштирокдор мебошанд, таъсир намерасонад.

Моддаи 12

Ҳама гуна ихтилофоте, ки ҳангоми тафсир ва ё татбиқи муқаррароти Созишномаи мазкур ба миён меоянд, тавассути гузаронидани машваратҳо ё гуфтушунидҳо байни Тарафҳо бо роҳҳои дипломатӣ ҳаллу фасл карда мешаванд.

Моддаи 13

Ба Созишномаи мазкур бо розигии Тарафҳо метавонанд тағйиру иловаҳо ворид карда шаванд. Ҳама гуна тағйиру иловаҳо дар шакли протокол, ки кисми ҷудонашавандаи Созишномаи мазкур мебошад, ба расмият дароварда мешаванд. Тағйиру иловаҳо мутобиқи муқаррароти моддаи 14 Созишномаи мазкур эътибор пайдо хоҳанд кард.

Моддаи 14

Созишномаи мазкур баъд аз сӣ (30) рӯзи гирифтани огоҳиномаи хаттӣ, ки дар он Тарафҳо якдигарро тавассути роҳҳои дипломатӣ дар бораи иҷрои расмиёти дохилидавлатӣ барои эътибор пайдо кардани Созишномаи мазкур зарур, ки тибқи қонунгузории дахлдори миллии онҳо амалӣ карда мешаванд, огоҳ месозанд, эътибор пайдо мекунад.

Созишномаи мазкур ба муҳлати номуайян баста шуда, то он вақте амал менамояд, ки яке аз Тарафҳо тавассути роҳҳои дипломатӣ дар бораи нияти қатъ намудани амали Созишномаи мазкур ба таври хаттӣ огоҳ накунад ва дар ин ҳолат амали Созишнома баъди 30 рӯз аз санаи гирифтани огоҳинома қатъ мегардад. Қатъи амали Созишномаи мазкур ба ҳуқуқҳои шаҳрвандоне, ки ба ҳудуди Тарафи дигар ворид шудаанд, таъсир намерасонад.

Созишномаи мазкур «____»_____________соли 20__ дар шаҳри __________ дар ду нусхаи асл, ҳар кадом бо забонҳои тоҷикӣ, арабӣ ва англисӣ, ки ҳамаи матнҳо эътибори якхела доранд, ба имзо расонида шуд. Дар сурати ба миён омадани ихтилоф дар тафсир, матни забони англисӣ бартарӣ хоҳад дошт.