ҲУКУМАТИ ҶУМҲУРИИ ТОҶИКИСТОН

ҚАРОР

Қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 18 июни соли 2024, №2295 «Оид ба лоиҳаи Қонуни Ҷумҳурии Тоҷикистон «Дар бораи организмҳои аз ҷиҳати генетикӣ тағйирдодашуда»-ро баррасӣ намуда, Ҳукумати Ҷумҳурии Тоҷикистон қарор мекунад:

Хулосаи замимагардидаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Дар бораи организмҳои аз ҷиҳати генетикӣ тағйирдодашуда» ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

Хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Дар бораи организмҳоиаз ҷиҳати генетикӣ тағйирдодашуда»

Ҳукумати Ҷумҳурии Тоҷикистон лоиҳаи Қонуни Ҷумҳурии Тоҷикистон «Дар бораи организмҳои аз ҷиҳати генетикӣ тағйирдодашуда»-ро, ки бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 18 июни соли 2024, №2295 барои додани хулоса ба Ҳукумати Ҷумҳурии Тоҷикистон пешниҳод гардидааст, мавриди баррасӣ қарор дод.

Таҳлил ва омӯзиши лоиҳаи Қонуни мазкур нишон дод, ки аксарияти муқаррароти он дар лоиҳаи Қонуни Ҷумҳурии Тоҷикистон «Дар бораи организмҳои аз ҷиҳати генетикӣ тағйирдодашуда», ки бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 13 марти соли 2023, №1576 барои додани хулоса ба Ҳукумати Ҷумҳурии Тоҷикистон пешниҳод гардида буд, инъикос ёфтааст.

Хулосаи Ҳукумати Ҷумҳурии Тоҷикистон ба лоиҳаи Қонуни мазкур бо қарори Ҳукумати Ҷумҳурии Тоҷикистон аз 26 июни соли 2023, № 280 ба баррасии Маҷлиси намояндагони Маҷлиси Олии Ҷумҳурии Тоҷикистон манзур гардида буд. Эроду таклифҳои пешниҳодшуда қисман ба инобат гирифта нашуданд.

Илова ба хулосаи қаблӣ пешниҳодҳои зерин манзур карда мешавад:

1) муқаддима дар шакли пешниҳодгардида қобили қабул набуда, пурра карда шавад;

2) дар лоиҳаи Қонуни мазкур як қатор муносибатҳо, аз ҷумла санҷиши пешазистифодабарии микроорганизмҳои аз ҷиҳати генетикӣ тағйирёфта дар низоми маҳдуд, ташаккул ва фаъолияти Комиссияи миллӣ вобаста ба масъалаҳои мазкур бе танзим монда, меъёрҳо оид ба организмҳои аз ҷиҳати генетикӣ тағйирдодашуда ба таври умумӣ пешбинӣ гардида, организмҳои аз ҷиҳати генетикӣ тағйирдодашуда ҷамъоварӣ, нигоҳдорӣ ва истифодабарии оқилонаи захираҳои генетикии набототи корам ҷудо карда нашудаанд;

3) бо дар назар доштани мавзуи боби 2 набудан принсипҳо ва муқаррароти моддаи 23 доир ба тартиби иттилоотонӣ ва машварат бо ҷомеа дар боби 1 лоиҳа пешбинӣ карда шаванд;

4) мувофиқи таҳлили экспертизаи зиддикоррупсионии гузаронидашуда дар лоиҳаи пешниҳодгардида омилҳои бавуҷудоварандаи коррупсия, ки дар сархатҳои якум, дуюм, шашум, ҳаштум, ёздаҳум ва дувоздаҳуми қисми 2 моддаи 5 Қонуни Ҷумҳурии Тоҷикистон «Дар бораи экспертизаи зиддикоррупсионии санадҳои меъёрии ҳуқуқӣ ва лоиҳаҳои санадҳои меъёрии ҳуқуқӣ» пешбинӣ шудааст, дида мешавад;

5) дар лоиҳаи Қонуни мазкур ваколатҳои дигар мақомоти ваколатдори давлатӣ, аз он ҷумла ваколатҳои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Вазорати кишоварзии Ҷумҳурии Тоҷикистон ва Кумитаи бехатарии озуқавории назди Ҳукумати Ҷумҳурии Тоҷикистон, ки бевосита дар самти мазкур фаъолият менамоянд, пешбинӣ карда шавад;

6) дар лоиҳаи мазкур як қатор ҳуҷҷатҳои хусусияти иҷозатдиҳидошта, аз ҷумла хулоса оид ба транзит ва воридоти организмҳои аз ҷиҳати генетикӣ тағйирдодашуда, инчунин тартиби додани ҳуҷҷатҳои иҷозатдиҳӣ пешбинӣ гардидааст, ки он ба Қонуни Ҷумҳурии Тоҷикистон «Дар бораи низоми иҷозатдиҳӣ» мухолифат менамояд;

7) зимни такмили лоиҳа талаботи моддаҳои 49, 50 ва 51 Қонуни Ҷумҳурии Тоҷикистон «Дар бораи санадҳои меъёрии ҳуқуқӣ» ба инобат гирифта шуда, хатоҳои зиёди имлоӣ, грамматикӣ ва техникии ҷойдошта ислоҳ ва матни русии он ба матни забони тоҷикӣ мутобиқ карда шавад.

Бинобар гуфтаҳои боло лоиҳаи Қонуни мазкур дар шакли пешниҳодгардида қобили қабул набуда, мувофиқи мақсад аст, ки он бо дар назар доштани пешниҳодҳои болозикр ва хулосаи қаблӣ дар доираи гурӯҳи кории байниидоравӣ бо ҷалби мутахассисони мақомоти дахлдор такмил дода, тибқи тартиби муқарраргардида пешниҳод карда шавад.