ҲУКУМАТИ ҶУМҲУРИИ ТОҶИКИСТОН

ҚАРОР

Қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 24 июни соли 2024, №2314 «Дар бораи лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Кодекси ҷангали Ҷумҳурии Тоҷикистон»-ро баррасӣ намуда, Ҳукумати Ҷумҳурии Тоҷикистон қарор мекунад:

Хулосаи замимагардидаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси ҷангали Ҷумҳурии Тоҷикистон» ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

Хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси ҷангали Ҷумҳурии Тоҷикистон»

 Ҳукумати Ҷумҳурии Тоҷикистон лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси ҷангали Ҷумҳурии Тоҷикистон»-ро, ки бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 24 июни соли 2024, №2314 барои додани хулоса ба Ҳукумати Ҷумҳурии Тоҷикистон пешниҳод гардидааст, баррасӣ карда, ба моддаи 1 таклифҳои зеринро манзур менамояд:

1. Оид ба қисми 2:

• сархати шашум хориҷ карда шавад, зеро шарҳи истилоҳи «чорабиниҳои биотехникӣ» сода ва фаҳмо ифода гардида, зарурати тағйири он ҷой надорад;
• сархати ҳафтум дар таҳрири зерин ифода карда шавад:

“- сархати бисту ҳафтум хориҷ карда шавад;”;

• сархати ҳаштум, сархати бисту нуҳуми дар таҳрири нав ифодашавандаи моддаи 1 Кодекси мазкур бинобар коста ва нопурра будан таҷдид карда шавад;
• иловаи ба сархати нуҳум воридшаванда дар тамоми матни Кодекси мазкур ба инобат гирифта шавад.

2. Қисми 8 дар таҳрири зерин ифода карда шавад:

«8. Дар қисми 1 моддаи 14 калимаҳои «қаламрави» ва «салоҳиятҳояшон» мувофиқан ба калимаҳои «ҳудуди» ва «ваколат» иваз карда шаванд.».

3. Дар қисми 9 калимаҳои «Дар» ва «мерасонад,» ба калимаҳои «Ба» ва «мерасонанд,» иваз карда шаванд.
4. Дар қисмҳои 10, 34, 38 ва 39 калимаи «матни» ба калимаи «қисми» иваз карда шавад.
5. Дар қисми 13, аз номи боби 5 дар таҳрири нав ифодашаванда калимаҳои «ВА ҲУДУДҲОИ ТАБИИИ МАХСУС МУҲОФИЗАТШАВАНДА» хориҷ карда шаванд, зеро ҳифз, барқароркунӣ ва истифодабарии устувори ҳудудҳои табиии махсус муҳофизатшаванда тибқи Қонуни Ҷумҳурии Тоҷикистон «Дар бораи ҳудудҳои табиии махсус муҳофизатшаванда» танзим гардидааст.
6. Сархати якуми қисми 14 таҷдид карда шавад, зеро тибқи Қонуни конститутсионии Ҷумҳурии Тоҷикистон «Дар бораи тартиби ҳалли масъалаҳои сохти марзиву маъмурии Ҷумҳурии Тоҷикистон» шаҳр низ ба маҳалли аҳолинишин маҳсуб мебошад.
7. Оид ба қисми 23:

- дар сархати якум калимаи «номи» ба калимаҳои «ном ва қисми 2» иваз карда шавад;

- сархати сеюм хориҷ карда шавад.

8. Дар қисми 27, моддаи 52 дар таҳрири нав ифодашавандаи Кодекси мазкур таҷдид карда шавад, зеро мутобиқи моддаи 50 Кодекси мазкур ҳуҷҷатҳои тасдиқкунандаи ҳуқуқи истифодаи ҷангал ин шартномаҳо ва чиптаи ҷангал ба ҳисоб рафта, дар моддаи мазкур роххати шикор ҳамчун ҳуҷҷати тасдиқкунандаи ин ҳуқуқ муқаррар гардидааст. Ҳамзамон, дар тамоми матни Кодекс ивази калимаи «чипта» ба калимаи «билет» пешбинӣ карда шавад.

9. Аз қисмҳои 28 ва 30 калимаи «мувофиқан» хориҷ карда шавад.

10. Дар қисми 32, номи фасли IX дар таҳрири нав ифодашаванда калимаи «ДАВЛАТИИ» хориҷ карда шавад.

11. Сархати якуми қисми 41 дар иртибот ба эрод нисбат ба сархати шашуми қисми 2 хориҷ карда шавад.

Инчунин, пешниҳод менамоем, ки талаботи техникаи муқаррарнамудаи Қонуни Ҷумҳурии Тоҷикистон «Дар бораи санадҳои меъёрии ҳуқуқӣ» ба инобат гирифта шуда, хатоҳои дигари имлоӣ, грамматикӣ ва техникӣ ислоҳ ва матни забони русии лоиҳа ба матни забони тоҷикии он мутобиқ карда шавад. Аз ҷумла, ягонагии истифодаи истилоҳот таъмин гардида, калимаҳои «ҳифз», «ҳимоя» ва «муҳофизат» мутобиқ ба мазмун якранг истифода карда шаванд.

Дар ин асосҳо лоиҳаи Қонуни мазкур дар шакли пешниҳодгардида қобили қабул набуда, мувофиқи мақсад аст, ки он бо дар назар доштани пешниҳоди болозикр дар доираи гурӯҳи кории байниидоравӣ бо ҷалби мутахассисони мақомоти дахлдор такмил дода, тибқи тартиби муқарраргардида пешниҳод карда шавад.