ҲУКУМАТИ ҶУМҲУРИИ ТОҶИКИСТОН

ҚАРОР

Қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 18 июни соли 2024, №2300 «Дар бораи лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Кодекси тандурустии Ҷумҳурии Тоҷикистон»-ро баррасӣ намуда, Ҳукумати Ҷумҳурии Тоҷикистон қарор мекунад:

Хулосаи замимагардидаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси тандурустии Ҷумҳурии Тоҷикистон» ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

 Хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси тандурустии Ҷумҳурии Тоҷикистон»

Ҳукумати Ҷумҳурии Тоҷикистон лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси тандурустии Ҷумҳурии Тоҷикистон»-ро, ки бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 18 июни соли 2024, №2300 барои додани хулоса ба Ҳукумати Ҷумҳурии Тоҷикистон ирсол гардидааст, баррасӣ кард.

Таҳлил ва омӯзиши лоиҳаи Қонуни мазкур нишон дод, ки аксарияти муқаррароти он дар лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси тандурустии Ҷумҳурии Тоҷикистон», ки бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон 13 марти соли 2023, №1581 барои додани хулоса ба Ҳукумати Ҷумҳурии Тоҷикистон пешниҳод гардида буд, инъикос ёфтааст.

Хулосаи Ҳукумати Ҷумҳурии Тоҷикистон ба лоиҳаи Қонуни мазкур бо қарори Ҳукумати Ҷумҳурии Тоҷикистон аз 1 июни соли 2023, № 236 ба баррасии Маҷлиси намояндагони Маҷлиси Олии Ҷумҳурии Тоҷикистон манзур гардида буд. Эроду таклифҳои пешниҳодшуда ба пуррагӣ ба инобат гирифта нашуданд.

Илова ба хулосаи қаблӣ пешниҳодҳои зерин манзур карда мешаванд:

- қисми 2 хориҷ карда шавад, зеро роҳҳои амалигардонии танзими давлатӣ дар соҳаи тандурустӣ дар қисми 2 моддаи 4 Кодекси тандурустии Ҷумҳурии Тоҷикистон пешбинӣ гардида, он ба ваколати мақомоти худидоракунии шаҳрак ва деҳот мансуб набуда, ихтилофи меъёрӣ ва дар амалия гуногунфаҳмиро ба миён меорад;

- қисми 7 дар шакли тағйиру илова пешниҳод карда шавад, зеро аксарияти меъёрҳо мазмунан матни амалкунанда мебошад;

- қисми 9 бинобар ҷой надоштани зарурат хориҷ карда шавад.

Бинобар гуфтаҳои боло лоиҳаи Қонуни мазкур дар шакли пешниҳодгардида қобили қабул набуда, мувофиқи мақсад аст, ки он бо дар назар доштани пешниҳодҳои болозикр ва хулосаи қаблӣ дар доираи гурӯҳи кории байниидоравӣ бо ҷалби мутахассисони Вазорати тандурустӣ ва ҳифзи иҷтимоии аҳолӣ, Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон, Хадамоти зиддиинҳисории назди Ҳукумати Ҷумҳурии Тоҷикистон, Кумитаи бехатарии озуқавории назди Ҳукумати Ҷумҳурии Тоҷикистон ва дигар мақомоти дахлдор такмил дода, тибқи тартиби муқарраргардида пешниҳод карда шавад.