ҲУКУМАТИ ҶУМҲУРИИ ТОҶИКИСТОН

ҚАРОР

Қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 29 апрели соли 2024, №2163 «Дар бораи лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи аудити экологӣ»-ро баррасӣ намуда, Ҳукумати Ҷумҳурии Тоҷикистон қарор мекунад:

Хулосаи замимагардидаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи аудити экологӣ» ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шавад.

Хулосаи Ҳукумати Ҷумҳурии Тоҷикистон ба лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи аудити экологӣ»

Ҳукумати Ҷумҳурии Тоҷикистон лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи аудити экологӣ»-ро, ки бо қарори Шӯрои Маҷлиси намояндагони Маҷлиси Олии Ҷумҳурии Тоҷикистон аз 29 апрели соли 2024, №2163 барои додани хулоса ба Ҳукумати Ҷумҳурии Тоҷикистон ирсол гардидааст, баррасӣ карда, оид ба моддаи 1 пешниҳоди зеринро манзур менамояд:

1. Оид ба қисми 1:

- тағйироти дар сархати якум пешниҳодшуда дар тамоми матн ба инобат гирифта шавад;

- сархати сеюм дар иртибот бо Қонуни Ҷумҳурии Тоҷикистон «Дар бораи санҷиши фаъолияти субъектони хоҷагидор» таҷдиди назар карда шавад.

2. Қисми 4 таҷдиди назар карда шавад, зеро қисмҳои 1 ва 2 моддаи 4¹ ба Қонуни мазкур иловашаванда ба мафҳуми «аудити экологӣ» мувофиқ нестанд. Ҳамзамон дар он хусусияти гузарондани аудити экологӣ пурра ва ҳамаҷониба мушаххас гардида, муҳлат ва тартиби бартараф кардани камбудиҳо дақиқ муайян карда шавад.

3. Сархати дуюми қисми 6 хориҷ карда шавад.

4. Қисми 7 таҷдиди назар гардида, матни Қонун ба муқаррароти Қонуни Ҷумҳурии Тоҷикистон «Дар бораи низоми иҷозатдиҳӣ» мутобиқ гардонида шавад.

5. Қисми 8 ба талаботи техникаи ҳуқуқэҷодкунии пешбинишудаи Қонуни Ҷумҳурии Тоҷикистон «Дар бораи санадҳои меъёрии ҳуқуқӣ» мутобиқ гардонида шавад.

Дар маҷмуъ пешниҳод мегардад, ки хатоҳои техникию ҳуқуқӣ ва имлоии дигар ислоҳ карда шуда, матни русии лоиҳа ба матни тоҷикии он мутобиқ гардонида шавад.