ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Ёддошти тафоҳум оид ба ҳамкорӣ байни Вазорати меҳнат, муҳоҷират ва шуғли аҳолии Ҷумҳурии Тоҷикистон ва Вазорати адлия, Вазорати корҳои хориҷӣ, Вазорати тандурустӣ, меҳнат ва некуаҳволӣ ва Агентии миллии полиси Япония дар бораи асосҳои ҳамкории иттилоотӣ ҷиҳати роҳандозии низоми захираҳои инсонии хориҷии дорои мақоми «коргари соҳибтахассуси махсус» маъқул дониста шавад.
2. Вазири меҳнат, муҳоҷират ва шуғли аҳолии Ҷумҳурии Тоҷикистон Ёддошти тафоҳуми мазкурро ба имзо расонад ва ҳангоми зарурат ба матни он тағйиру иловаҳои хусусияти муҳимнадоштаро ворид намояд.
3. Вазорати корҳои хориҷии Ҷумҳурии Тоҷикистон тибқи тартиби муқарраргардида сана ва маҳалли баимзорасонии Ёддошти тафоҳуми мазкурро бо ҷониби Япония мувофиқа намояд.

ЁДДОШТИ ТАФОҲУМ ОИД БА ҲАМКОРӢ БАЙНИВАЗОРАТИ МЕҲНАТ, МУҲОҶИРАТ ВА ШУҒЛИ АҲОЛИИ ҶУМҲУРИИ ТОҶИКИСТОН ВА ВАЗОРАТИ АДЛИЯ, ВАЗОРАТИ КОРҲОИ ХОРИҶӢ, ВАЗОРАТИ ТАНДУРУСТӢ, МЕҲНАТ ВА НЕКУАҲВОЛӢ ВА АГЕНТИИ МИЛЛИИ ПОЛИСИ ЯПОНИЯ ДАР БОРАИ АСОСҲОИ ҲАМКОРИИ ИТТИЛООТӢ ҶИҲАТИ РОҲАНДОЗИИ НИЗОМИ ЗАХИРАҲОИ ИНСОНИИ ХОРИҶИИ ДОРОИ МАҚОМИ «КОРГАРИ СОҲИБТАХАССУСИ МАХСУС»

Вазорати меҳнат, муҳоҷират ва шуғли аҳолии Ҷумҳурии Тоҷикистон (минбаъд «Вазорати Ҷумҳурии Тоҷикистон») ва Вазорати адлия, Вазорати корҳои хориҷӣ, Вазорати тандурустӣ, меҳнат ва некуаҳволӣ ва Агентии миллии полиси Япония (минбаъд «Вазоратҳо ва Агентиҳои Япония») нуқтаи назари худро барои рушди манфиатҳои мутақобила тариқи ҳамкории ду кишвар оид ба интиқол ва қабули коргари соҳибтахассуси дорои таҷриба ва малакаҳои муайян, ки аз ҷониби Ҳукумати Япония ба онҳо мақоми «коргари соҳибтахассуси махсус» (минбаъд - «кормандони соҳибтахассус») дода шудааст, дар доираи низоми қабули (минбаъд «система») захираҳои инсонӣ, иброз менамоянд. Бо пайравӣ ба ин Ёддошти тафоҳум, вазорату агентиҳои Япония ва Вазорати Ҷумҳурии Тоҷикистон (минбаъд - «Вазоратҳо ва идораҳои ҳар ду кишвар») ба мувофиқаи зайл расиданд:

Моддаи 1. Мақсад

Мақсади ин Ёддошти тафоҳум мусоидат намудан ба сафарбаркунӣ ва қабули коргарони соҳибтахассус аз Ҷумҳурии Тоҷикистон ба Япония ва таъмини ҳифзи ҳуқуқу манфиатҳои онҳо тавассути таъсиси асоси заминавии шарикии иттилоотӣ (аз ҷумла, аз байн бурдани созмонҳои миёнарави зараровар) ва ҳалли масъалаҳои сафарбаркунӣ, қабул ва истиқомати коргарони соҳибтахассуси махсус дар Япония, инчунин рушди манфиатҳои мутақобилаи ҳар ду кишвар тавассути ҳамкорӣ барои фаъолияти дурусти низом, мебошад.

Моддаи 2. Сохтори масъули тамос

Ҷиҳати татбиқи самараноки Ёддошти тафоҳум Вазоратҳо ва идораҳои ҳар ду кишвар сохтори алоҳидаи зеринро барои тамоси ҳар як кишвар таъмин менамоянд.

1) Аз ҷониби Ҷумҳурии Тоҷикистон:

- раёсати ҳуқуқ, кадрҳо ва корҳои махсуси Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон.

2) Аз ҷониби Япония:

- шуъбаи идоракунии резидентӣ, Раёсати идоракунии иқомат ва дастгирии Агентии Хадамоти муҳоҷират.

Моддаи 3. Доираи ҳамкорӣ

Ҳамкорӣ дар асоси ин Ёддошти тафоҳум дар доираи қонунгузорӣ ва қоидаҳои амалкунандаи ҳар як давлат сурат мегирад. Ҳеҷ яке аз Вазоратҳо ва идораҳои ҳар ду кишвар маълумоти махфии вазорату агентиҳо ё вазорати кишвари дигарро, ки дар натиҷаи ҳамкорӣ ва мубодилаи итилоот дар доираи ин Ёддошти тафоҳум ба даст омадааст, бе розигии хаттии ҷониби дигар ба шахси сеюми давлати дигар ифшо намекунад.

Моддаи 4. Асосҳои шарикии иттилоотӣ

1) Мубодилаи иттилоот.

Вазоратҳо ва идораҳои ҳар ду кишвар маълумоти зарурӣ ва муфидро ҷиҳати таъмини бемамониат ва дурусти сафарбаркунӣ ва қабули коргарони соҳибтахассуси махсус, инчунин барои ҳалли ҳама гуна масъалаҳои марбут ба сафарбаркунӣ, қабул ва истиқомати коргарони соҳибтахассус дар Япония сари вақт мубодила менамоянд. Ин маълумот иттилоотро оид ба фаъолияти ташкилотҳои миёнарави (ҳам шахсони воқеӣ ва ҳам ширкатҳо) ҳар ду давлат, ки дар раванди ҷалб ва ҷустуҷӯйи кори марбут барои коргарони соҳибтахассус (минбаъд - «ташкилотҳои миёнарав барои коргарони соҳибтахассуси махсус») машғуланд ва онҳое, ки ба дараҷаҳои зерин дохил мешаванд, дар бар мегирад.

а) идоракунии маблағ ё амволи дигаре, ки ба коргарони соҳибтахассус ё номзадҳо (минбаъд - «кормандони соҳибтахассус ва номзадҳо»), аъзои оилаи онҳо ё ҳама гуна шахсони ба онҳо бо сабабҳои гуногун алоқаманд тааллуқ дорад, аз ҷумла ҷамъоварии пасандоз ё ҳама гуна мақсадҳои дигар;

б) имзои ҳама гуна шартномаҳое, ки таъин намудани ҷаримаҳои пулӣ ё интиқоли номатлуби пул ё дигар молу мулкро дар сурати вайрон кардани меъёрҳои шартнома пешбинӣ менамояд;

в) поймол кардани ҳуқуқҳои коргарони соҳибтахассус ва номзадҳои муайян, аз ҷумла ҳамла, таҳдид ва маҳдуд кардани онҳо аз озодӣ;

г) истифода ё пешниҳоди ҳуҷҷатҳо, аксҳо ё дигар маводди қалбакӣ ё тағйирёфта барои бо роҳи фиреб ба даст овардани иҷозатҳо, раводидҳо ё дигар ҳуҷҷатҳои расмии марбут ба назорати муҳоҷиратӣ ё расмиёти раводид дар Япопия;

д) ситонидани ҳаққи хизматрасонӣ ё дигар пардохтҳо аз коргарони соҳибтахассус ва номзадҳо бидуни нишон додани асоси ҳисобкунии хароҷот ва имкон додан ба онҳо барои эътирофи маблағ ва тақсимоти хароҷот.

2) Машваратҳо барои ҳалли мушкилот ва масъалаҳои дигар.

Вазоратҳо ва идораҳои ҳар ду кишвар барои ноил шудан ба ҳадафҳои дар моддаи 1-и ҳамин Ёддошти тафоҳум пешбинишуда мунтазам ё давра ба давра машварат доир намуда, барои ҳалли мушкилоте, ки такмил додани кори дурусти низомро тақозо менамояд, кушиш менамоянд. Мавзуъҳои асосии машваратҳо инҳо хоҳанд буд:

а) масъалаҳои марбут ба татбиқ ва тағйир додани сиёсати ҳар ду давлат дар бораи низом;

б) танзими фаъолияти ташкилотҳои миёнарав барои коргарони соҳибихтисос (аз ҷумла андешидани чораҳои зарурии ислоҳсозӣ);

в) масъалаҳои марбут ба тадбирҳои танзимӣ ҳангоми гузарондани санҷишҳои гуногун вобаста ба фиристодан ва қабули коргарони муайяни соҳибихтисос, инчунин ташкилотҳои номуносиби қабулкунанда дар Япония ташкилотҳое, ки бо дастгирии захираҳои меҳнатии хориҷӣ бо мақоми истиқомати «коргари соқибтахассуси махсус» машғуланд (ки маънои дастгирии ҳаети корӣ, ҳаети ҳарруза ва иҷтимоии онҳоро дорад, ба кормандони муайяни соҳибихтисос бо қайди «коргари соҳибтахассуси махсус» имкон медиҳад, ки ба фаъолияти худ мутобиқи мақоми истиқомати доимӣ пайваста ва бемамониат машғул шаванд), инчунин барои ташкилотҳои сафарбаркунандаи номатлуб дар Ҷумҳурии Тоҷикистон;

г) идоракунии дурусти баҳодиҳии маҳорати касбӣ ва имтиҳонҳои донистани забони японӣ барои коргарони соҳибтахассуси махсус (минбаъд - «имтиҳонҳо ва тестҳо»);

д) идоракунии макони зисти коргарони соҳибтахассуси махсус дар Япония;

е) фаъолияти дурусти низом ва дигар низомҳои муҳоҷират ё меҳнатии ҳар ду кишвар ба ғайр аз масъалаҳои дар зербандҳои аз “а” то “д”-и дар боло зикршуда.

Моддаи 5. Ҳамкорӣ дар имтиҳон ва санҷишҳо

Вазоратҳо ва Агентиҳои Япония ва дигар вазорату идораҳои Япония, ки барои қабули коргарони соҳибтахассуси махсус масъуланд (минбаъд «Вазорат ва Агентиҳои дахлдори Япония») имтиҳон ва санҷишҳоро дуруст мегузаронанд. Агар Вазорат ва Агентиҳои дахлдори Япония аз Вазорати Ҷумҳурии Тоҷикистон дар бораи гузаронидани имтиҳон, санҷиш ва чорабиниҳои ба онҳо алоқаманд оид ба таълими забони японӣ ва ё чорабиниҳои дигари марбут ба баҳодиҳӣ ҷиҳати муайян намудани дараҷаи дониши забони японӣ, ки вазорату агентиҳои дахлдори Япония ҷалб шудаанд, дархости ҳамкорӣ намояд, Вазорати Ҷумҳурии Тоҷикистон ин дархостро ба қадри имкон иҷро мекунад.

Ғайр аз ин, агар Вазорат ва агентиҳои дахлдори Япония ва Вазорати Ҷумҳурии Тоҷикистон доир ба имтиҳон ва санҷишҳо, гузаштани санҷиш аз ҷониби миёнаравҳо, сохтакорӣ ё тағйир додани хуҷҷатҳои тасдиқкунанда оид ба супоридани имтиҳон ва санҷишҳо ё дигар амалҳои ғайриқонунӣ маълумот пайдо намоянд, онро тибқи муқаррароти зербанди 1 моддаи 4-и ҳамин Ёддошти тафоҳум ба таври фаврӣ мубодила хоҳанд кард.

Моддаи 6. Уҳдадориҳои вазорату идораҳои Япония

Вазорат ва Агентиҳои Япония дар робита ба қабули кормандони соҳибихтисоси махсус аз Ҷумҳурии Тоҷикистон мутобиқи қонун ва қоидаҳои дахлдори Япония уҳдадориҳои зеринро иҷро менамоянд:

1) ҳангоми аз Вазорати Ҷумҳурии Тоҷикистон гирифтани маълумот дар бораи ташкилоти ирсолкунанда (минбаъд - «ташкилоти ирсолкунанда»), ки аз ҷониби Вазорати Ҷумҳурии Тоҷикистон тасдиқ шудааст ва нияти сафарбар намудани коргарони баландихтисоси махсусро ба Япония дорад, чунин маълумотро дар Япония дастраси умум мегардонад;

2) ҳангоми аз Вазорати Ҷумҳурии Тоҷикистон гирифтани маълумот дар хусуси бекор кардани тасдиқи масъалаҳои дар зербанди 4, моддаи 7 дарҷгардида, чунин маълумотро дар Япония дастраси умум мегардонад;

3) ҳангоми ба расмият даровардани супориш дар хусуси тартиби такмили ташкилоти қабулкунанда Вазорати Ҷумҳурии Тоҷикистонро оид ба қабули чунин супориш огоҳ намуда, руйхати ташкилотҳои ёрирасони бақайдгирифташударо ба Вазорати Ҷумҳурии Тоҷикистон пешниҳод менамояд;

4) ҳангоми қабули дархостҳо аз Вазорати Ҷумҳурии Тоҷикистон оид ба қабули кормандони соҳибтахассуси махсус аз Ҷумҳурии Тоҷикистон маълумоти заруриро пешниҳод менамояд.

Моддаи 7. Уҳдадориҳои Вазорати Ҷумҳурии Тоҷикистон

Вазорати Ҷумҳурии Тоҷикистон уҳдадориҳои зеринро ҷиҳати сафарбаркунии кормандони соҳибтахассуси махсус аз Ҷумҳурии Тоҷикистон тибқи қонун ва санадҳои меъёрии дахлдори Ҷумҳурии Тоҷикистон иҷро менамояд:

1) мутобиқат кардан ё накардани ташкилотҳои ирсолкунандаро ба стандартҳои тасдиқшуда месанҷад ва дар сурати ҷавобгуй будани ташкилотҳои ирсолкунанда ба стандартҳои тасдиқгардида, ки Вазорати Ҷумҳурии Тоҷикистон муқаррар кардааст, иҷозат медиҳад;

2) ном ва дигар маълумотро дар хусуси ташкилотҳои ирсолкунанда дар Ҷумҳурии Тоҷикистон пас аз гирифтани иҷозатҳои дар зербанди 1 болозикр дарҷгардида, оммавӣ мегардонад. Ба вазоратҳо ва идораҳои Япония маълумотро дар бораи тасдиқи ташкилотҳои ирсолкунанда пешниҳод менамояд;

3) ҳангоми гирифтани маълумот аз вазорату идораҳои Япония дар бораи он машғул шудани ташкилоти ирсолкунандаи тасдиқшуда ба фаъолиятҳое, ки ба стандартҳои тасдиқшуда ё дигар фаъолиятҳои номуносиб мувофиқат намекунад, нисбати ташкилоти ирсолкунандаи тасдиқшудаи дахлдор тафтишот мебарад, тавсияҳои зарурӣ медиҳад ва назоратро таъмин намуда, аз натиҷаи он ба вазорату идораҳои Япония хабар медиҳад;

4) ба ташкилотҳои ирсолкунандаи тасдиқшудаи Ҷумҳурии Тоҷикистон оид ба интихоб ва сафарбаркунии коргарони соҳибтахасссуси махсуси Ҷумҳурии Тоҷикистон ба таври дахлдор тавсияҳо медиҳад, агар муайян гардад, ки ташкилоти ирсолкунандаи тасдиқшуда дигар ба стандартҳои тасдиқшуда мутобиқат намекунад, иҷозатро бекор мекунад ва аз натиҷаи он Вазоратҳо ва Агентиҳои Японияро огоҳ менамояд;

5) пас аз дастрас намудани маълумот аз вазорату агентиҳои Япония дар бораи дастури онҳо оид ба такмили ташкилоти қабулкунанда ё рӯйхати ташкилотҳои тасдиқшудаи бақайдгирифташуда, ин маълумотро дар Ҷумҳурии Тоҷикистон дастраси умум мегардонад;

6) ҳангоми қабули дархостҳо аз вазорату идораҳои Япония дар хусуси сафарбарсозии коргарони соҳибтахассуси махсус аз Ҷумҳурии Тоҷикистон маълумоти заруриро пешниҳод менамояд.

Моддаи 8. Масъалаҳои дигар

Агар вазорату агентиҳои Япония чунин шуморанд, ки захираҳои инсонӣ барои таъмини норасоии қувваи корӣ дар Япония аз ҳисоби қабули коргарони соҳибтахассуси махсус дар ҳар як минтақа сурат гирифтааст, онҳо метавонанд тибқи муқаррароти қонун ва санадҳои меъёрии ҳуқуқии соҳаи муҳоҷират дар Япония қабули баъзе коргарони соҳибтахассусро муваққатан боз доранд. Дар ин ҳолат, вазорату агентиҳои Япония ҷойи истиқомати коргарони соҳибтахассуси махсуси Ҷумҳурии Тоҷикистон, ҳамсарон ё фарзандони ба онҳо вобасташударо (ба шарте, ки мақоми иқоматии коргарони соҳибтахассуси махсус «Коргарони соҳибтахассуси махсус (ii) бошад), тибқи муқаррароти қонунгузорӣ ва қоидаҳои муҳоҷират дар Япония, бо назардошти шартномаи меҳнатӣ байни коргарони баландихтисос ва ташкилотҳое, ки онҳоро қабул кардааст, вазъи истеҳсолот, шароити зиндагӣ ва ғайра ҳал хоҳанд кард.

Агар ба ин коргарони соҳибтахассуси махсус, инчунин ҳамсарон ё фарзандони онҳо барои истиқомат дар Япония иҷозат дода нашавад, Вазорати Ҷумҳурии Тоҷикистон якҷо бо Сафорати Ҷумҳурии Тоҷикистон дар Япония барои андешидани чораҳои зарурӣ, ба монанди додани шиносномаҳои муваққатӣ бо хоҳиши вазорату идораҳои Япония бо мақсади бе мамониат баргаштани онҳо ба Ҷумҳурии Тоҷикистон, кӯшиш менамояд.

Моддаи 9. Шарҳи масъалаҳои дигар

Дар ҳолати зарурӣ бо розигии хаттии ҳар ду кишвар ин Ёддошти тафоҳум таҷдиди назар шуда, ба он тағйиру илова ворид карда мешаванд.

Моддаи 10. Забон ва масъалаҳои дигар

Ин Ёддошти тафоҳум аз санаи гирифтани огоҳиномаи охирини хаттии Ҷумҳурии Тоҷикистон дар бораи анҷом додани расмиёти дохилидавлатӣ тариқи роҳҳои дипломатӣ, ки барои эътибор пайдо кардани он заруранд, эътибор пайдо мекунад.

Муҳлати амали ин Ёддошти тафоҳум пас аз шаш моҳ аз рӯзи гирифтани огоҳиномаи як тараф ё Вазорати Ҷумҳурии Тоҷикистон ё Вазорат ва Агентиҳои Япония дар бораи нияти худ оид ба қатъ намудани амали ин Ёддошти тафоҳум, ба охир мерасад.

Ҳама гуна баҳсҳое, ки вобаста ба тафсир ва/ё татбиқи Ёддошти тафоҳуми мазкур ба миён меоянд, тавассути машваратҳои мутақобила ва гуфтушунидҳои байни вазорату идораҳои ҳар ду кишвар ҳал карда мешаванд.

Ёддошти тафоҳуми мазкур дар ду нусхаи асл бо забони англисӣ дар Токио санаи «__» ________ соли 2024 ва дар ш. Душанбе санаи «__» ________ соли 2024 ба имзо расид.