ҲУКУМАТИ ҶУМҲУРИИ ТОҶИКИСТОН

ҚАРОР

Мутобиқи моддаи 7 Қонуни Ҷумҳурии Тоҷикистон «Дар бораи шартномаҳои байналмилалии Ҷумҳурии Тоҷикистон» Ҳукумати Ҷумҳурии Тоҷикистон қарор мекунад:

1. Лоиҳаи Ёддоштҳои табодулии байни Ҳукумати Ҷумҳурии Тоҷикистон ва Ҳукумати Япония оид ба «Лоиҳаи пешниҳоди бурсияҳои таҳсилӣ барои рушди захираҳои инсонӣ» маъқул дониста шавад.
2. Вазири корҳои хориҷии Ҷумҳурии Тоҷикистон Ёддоштҳои табодулии мазкурро аз номи Ҳукумати Ҷумҳурии Тоҷикистон ба имзо расонад ва ҳангоми зарурат ба матни онҳо тағйиру иловаҳои хусусияти муҳимнадоштаро ворид намояд.
3. Вазорати корҳои хориҷии Ҷумҳурии Тоҷикистон мувофиқи тартиби муқарраргардида сана ва маҳалли имзои Ёддоштҳои табодулии мазкурро бо ҷониби Япония мувофиқа намояд.

Сабти музокирот

Дар робита ба Ёддоштҳои табодулӣ байни Ҳукумати Япония ва Ҳукумати Ҷумҳурии Тоҷикистон (минбаъд - «Қабулкунанда») аз «санаи имзо» вобаста ба ҳамкориҳои иқтисодӣ бо Япония, ки бо мақсади рушди иқтисодӣ ва иҷтимоии Ҷумҳурии Тоҷикистон (минбаъд - «Ёддоштҳои табодулӣ») роҳандозӣ гаштаанд, намояндагони ҳайати Ҷумҳурии Тоҷикистон ва ҳайати Япония изҳороташонро ба таври зайл тасдиқ мекунанд:

Дар робита ба Ёддоштҳои табодулӣ байни Ҳукумати Ҷумҳурии Тоҷикистон (минбаъд - «Қабулкунанда») ва Ҳукумати Япония аз «санаи имзо» вобаста ба идомаи ҳамкориҳои иқтисодӣ бо Япония, ки бо мақсади рушди иқтисодӣ ва иҷтимоии Ҷумҳурии Тоҷикистон (минбаъд - «Ёддоштҳои табодулӣ»), намояндагони ҳайати Ҷумҳурии Тоҷикисгон ва ҳайати Япония изҳороташонро ба таври зайл тасдиқ менамоянд:

1. Вобаста ба банди 3 Ёддоштҳои табодулӣ намояндаи ҳайати Япония изҳор намуд, ки Ҳукумати Япония муътақид бар он аст, ки Ҳукумати Ҷумҳурии Тоҷикистон ҷиҳати пешгирӣ аз ҳама гуна пешниҳодот, туҳфаҳои арзишнок, пардохтпулиҳо ва ё имтиёзҳое, ки ҳамчун сӯйистифода дар Ҷумҳурии Тоҷикистон дар намуди ҳавасмандгардонӣ ё мукофоти пулӣ барои соҳиб шудани қарордодҳои дар банди 4 Ёддоштҳои табодулӣ зикршуда чораандешӣ менамояд.
2. Вобаста ба зербанди 2 банди 6 Ёддоштҳои табодулӣ намояндаи ҳайати Япония изҳор менамояд, ки Ҳукумати Япония бар он назар аст, ки:

(а) маълумоти зарурӣ дар худ иттилоот оид ба амалҳои коррупсионии вобаста ба «Лоиҳаи пешниҳоди бурсияҳои таҳсилӣ барои рушди захираҳои инсонӣ»-и зербанди 1 банди 1 ёддоштҳои табодулиро дар бар мегирад; ва

(б) Қабулкунанда бояд муносибати адолатнокро бо сарчашмаи чунин маълумот таъмин намояд.

3. Намояндаи ҳайати Тоҷикистон изҳор менамояд, ки ҳайати Тоҷикистон нисбат ба изҳороти болозикри аз ҷониби намояндаи ҳайати Япония додашуда зид намебошад.

(Лоиҳа) 

Муҳтарам,

Шарафёбам, ки метавонам музокироти қаблии байни намояндагони Ҳукумати Япония ва Ҳукумати Ҷумҳурии Тоҷикистонро (минбаъд - «Қабулкунанда») вобаста ба масьалаҳои тавсеаи ҳамкориҳои иқтисодии Япония, ки бо мақсади мусоидат ба рушди иқтисодиёт ва иҷтимоиёти Ҷумҳурии Тоҷикистон роҳандозӣ мегардад, таъкид намоям. Баъдан боиси ифтихори ман аст, ки аз номи Ҳукумати Япония ёддошти тафоҳуми зеринро пешниҳод намоям:

1. (1) Бо мақсади мусоидат ба татбиқи «Лоиҳаи пешниҳоди бурсияҳои таҳсилӣ барои рушди захираҳои инсонӣ» (минбаъд - «Лоиҳа») Ҳукумати Япония тасмим гирифт, ки тибқи қонунгузорӣ ва маблағҷудокунии буҷетии Япония ба Қабулкунанда грант ба маблағи умумии то 298 000 000 (дусаду наваду ҳашт миллион) йени японӣ (минбаъд - «Грант») ҷудо менамояд.

(2)Грант пас аз ба имзо расидани Созишномаи грантӣ (минбаъд - «С/Г») байни Қабулкунанда ва ё мақомоти дахлдори он ва Агентии Япония оид ба ҳамкориҳои байналмилалӣ (JICA) эътибор пайдо хоҳад кард.

(3) Шарту шароитҳои Грант ва расмиёти истифодабарии он тариқи С/Г дар доираи тавофуқоти мазкур ба роҳ монда мешавад.

2. Грант дар давраи дар С/Г пешбинигардида, ки аз санаи эътибор пайдо кардани С/Г то муҳлати ниҳоӣ (сана баъдан муайян карда мешавад) эътибор дорад. Давраи эътибори он метавонад дар асоси тавофуқоти мақомоти дахлдори ҳар ду Ҳукумат тамдид гардад.
3. Грант аз ҷониби Қабулкунанда метавонад ба таври зарурӣ ва ба таври истисно ба мақсади харидорӣ ва/ё хизматрасониҳои барои татбиқи Лоиҳа зарурӣ, ки дар С/Г муайян карда шудааст (минбаъд - «Маҳсулот» ва «Хизматрасониҳо»), истифода бурда шавад.
4. Қабулкунанда ва ё мақоми ваколатдоршудаи он бо шаҳрвандони Япония* барои харидории Маҳсулот ва/ё Хизматрасониҳо бо асъори йени японӣ қарордод ба имзо мерасонад (*Ибораи «шаҳрвандони Япония» дар ёддошти мазкур ифодагари шахсони воқеӣ ё ҳуқуқии ин кишвар мебошад, ки аз ҷониби шахсони воқеии дар Япония бақайдгирифташуда назорат бурда мешаванд). Чунин қарордодҳо барои муайян намудани мувофиқат бо Грант аз ҷониби JICA баррасӣ карда мешаванд.
5. Грант тавассути JICA тибқи муқаррароти С/Г бо роҳи ба роҳ мондани пардохтҳо бо асъори йени японӣ ба суратҳисобе, ки ба номи Қабулкунанда дар бонки Япония кушода мешавад, ки бо нишондоди ҷониби Қабулкунанда ё мақоми ваколатдори он истифода бурда мешавад.
6. (1) Қабулкунанда тадбирҳои зеринро меандешад:

(а)оид ба озод намудан аз тамоми пардохтҳои гумрукӣ, андозҳои дохилӣ ва боҷҳои дигари молиявии кишвари Қабулкунанда, ки зимни харидории маҳсулот ва/ё хизматрасонӣ вобаста ба Грант ба миён меоянд;

(б) додани таваҷҷуҳи махсус барои баррассии масъалаҳои экологӣ ва иҷтимоӣ дар татбиқи ин Лоиҳа;

(в) таъмин намудани он, ки донише, ки шахсони воқеии Тоҷикистон дар натиҷаи Грант ба даст овардаанд, бо мақсадҳои ҳарбӣ истифода нашаванд;

(г) ба шахсони воқеии японӣ ва/ё шахсони воқеии кишварҳои сеюм расонидани хизматрасониҳое, ки метавонад барои таъмини Маҳсулот ва/ё Хизматрасониҳо, ба монанди фароҳам овардани шароитҳои зарурӣ барои вуруд, иқомати онҳо зимни ифои вазифа дар кишвари Қабулкунанда зарур бошанд;

(д) таъмини бехатарии шахсоне, ки дар татбиқи ин Лоиҳа дар кишвари Қабулкунанда ширкат мекунанд;

(е) пардохти тамоми хароҷоти дигареро, ки Грант намепушонад ва дар татбиқи ин Лоиҳа зарур мебошанд, анҷом диҳанд;

(2) Дар асоси дархост Қабулкунанда Ҳукумати Японияро бо маълумоти зарурӣ доир ба татбиқи ин Лоиҳа таъмин менамояд.

(3) Дар робита ба ҳамлу нақли баҳрӣ ва суғуртаи баҳрии маҳсулот Қабулкунанда бояд аз маҳдудиятҳое, ки метавонанд ба рақобати озод байни ширкатҳо оид ба ҳамлу нақл ва суғуртаи баҳрӣ монеъ шаванд, худдорӣ намояд.

(4) Маҳсулот ва ё хизматрасониҳо набояд аз кишвари Қабулкунанда содирот гардад ва ё тавассути он гузаронида шаванд.

7. Ҳукуматҳои ҳар ду ҷониб дар робита ба масъалаҳое, ки вобаста ба Ёддоштҳои табодулии мазкур ба миён меоянд, бо якдигар машварат доир хоҳад кард.

Шарафёбам то ин Ёддошти тафоҳум ва Ёддошти тафоҳуми минбаъда Шуморо, ки аз номи кишвари Қабулкунанда тадбирҳои болозикрро тасдиқ мекунад, ҳамчун Созишнома байни ду Ҳукумат, ки аз санаи ба имзо расидани Ёддошти ҷавобии Шумо эътибор пайдо хоҳад кард, пешниҳод намоям.

Ман ин фурсатро ҷиҳати таҷдиди ғояти эҳтиром ба Шумо ғанимат медонам.

(Лоиҳа)

Мухтарам,

Шарафёбам қабули Ёддошти Шуморо ба таърихи имрӯза, ки дар матни он чунин оварда шудааст, тасдиқ намоям:

Шарафёбам аз номи Ҳукумати Ҷумҳурии Тоҷикистон тавофуқоти мазкурро тасдиқ намуда, ёддошти Шуморо ва ин ёддошти ҷавобиро, ки рӯзи ба имзо расидани он эътибор пайдо хоҳад кард, ҳамчун созишнома байни ду Ҳукумат эътироф намоям.

Ман ин фурсатро ҷиҳати таҷдиди ғояти эҳтиром ба Шумо ғанимат медонам.